Pulea Totino—Aiseā e Matuā Tāua Ai?

“Ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le poto i le amio lelei, ia faaopoopo foi le [pulea totino] i le poto, ma ia faaopoopo le onosai i le [pulea totino].”—2 PETERU 1:5, 6.

1. O le ā le faailoaga mataʻina o le pulea totino faaletino na tupu i le senituri lona 19?

E AUNOA ma le masalosalo, o se tasi o faailoaga e sili ona ofoofogia o le pulea faaletino, sa saunia e Charles Blondin i le ʻafa mulimuli o le senituri lona 19. E tusa ma se tasi o lipoti, na ia sopoia le Afu o Niagara i le tele o taimi, muamua i le 1859, i luga o se maea uʻamea e 1,100 futu [340 m] le umi ma e 160 futu [50 m] i luga aʻe o le vai. Ina ua uma lena, sa ia faia faapea i taimi taitasi e ala i se faailoaga e ese o lona tomai: sa fusi ona mata i se taga, savali ma tulei se uili paelo i luga o lagolago, ma fafa se tagata i lona tua. I se isi faiga, sa oso liliu ai o ia i luga o lagolago i se maea sa toso e 170 futu [52 m] i luga aʻe o le eleele. Ina ia tausia sea paleni sa manaomia ai le matuā pulea totino faaletino e sili atu. Sa tauia Blondin i le taʻutaʻua ma le mauʻoloa, mo ona tigā.

2. O ā isi ituaiga o gaoioiga o loo iai ua faapea ona manaomia ai le pulea faaletino?

² E ui ina toaitiiti nisi e mafai ona faataʻitaʻi i na faailoaga, ae o le tāua o le pulea totino faaletino i le faaalia o tomai faapolofesa pe i taaloga, ua manino ia i tatou uma. Mo se faaaʻoaʻoga, i le faamatalaina o le tomai o le ta piano taʻutaʻua anamua o Vladimir Horowitz, na faapea mai se tasi o fai musika: “Ia te aʻu o le mea sa mataʻina, o se lagona o le pulea atoatoa . . . , le lagona o le malosi e lē matalitonuina ae sa mafai ona faatonutonuina.” O se isi lipoti e uiga ia Horowitz na taʻua ai le “faitau valu sefulu tausaga o tamai lima vavave e pulea lelei atoatoa.”

3. (a) O le ā le ituaiga e sili ona manaomia o le pulea, ma ua faapefea ona faauigaina? (e) O le ā le uiga o le upu Eleni ua faaliliuina o le ‘pulea totino’ i le Tusi Paia?

³ E alu ai se taumafaiga tele ina ia atiina aʻe na tomai. Peitai, e matuā sili atu ai ona tāua ma fai ma luʻitau le pulea totino. Ua faauigaina lea i le “faaalia o le taofiofia o uunaiga, faalogona ootia, po o faanaunauga o se tasi.” I Tusitusiga Kerisiano Eleni, o le upu ua faaliliuina o le ‘pulea totino’ i le 2 Peteru 1:6 atoa ma isi mea, ua faauigaina i “le malosi o se tasi na te puleaina ai ona faanaunauga ma faalogona alofa, ae maise lava lona tuʻinanau mo feusuaiga.” Ua taʻua foi le pulea totino o le tagata lava ia “o le tumutumuga o ausiaga faaletagata.”

Le Pogai e Matuā Tāua ai le Pulea Totino

4. O ā fua leaga ua seleseleina, ona o le lē lava o le pulea totino?

⁴ Pagā se seleselega o le lē lava o le pulea totino ua seleseleina! O le pogai autū o le tele o faafitauli i le lalolagi i aso nei o le lē lava o le pulea totino. E moni lava, ua tatou iai i “aso e gata ai,” ia ‘ua oo mai ai aso e faigata ona faafetaiaia.’ Ua masani ona ‘lē pulea totino’ tagata ona o le matapeapea, lea ua avea ai le “manao [tele] i mea faafiafia ae leai se manao i le Atua,” o se tasi o ona vaega. (2 Timoteo 3:1-5) Ua matuā faamalosia ona faamanatu mai ia i tatou lenei upu moni iloga e ala i le tuuesea o le silia i le 40,000 tagata faimeasese mai le auau faatasi ma le faapotopotoga Kerisiano i le tausaga faaleauaunaga ua tuanai, o le toatele lava ona o amioga sese matuiā. E tatau ona faaopoopo atu ia i latou ia le toatele o ē na aʻoaʻia, e māfuli lava i feusuaiga lē mamā, ae o na mea uma ua mafua ona o le lē taulau ona faaalia o le pulea totino. Ua iloga foi le mea moni faapea o nisi o toeaina ua loa ona auauna, ua aveesea uma o latou faaeaga o ni ovasia ona o le mafuaaga lava lea e tasi.

5. E mafai faapefea ona faatusaina le tāua o le pulea totino?

⁵ O le tāua o le pulea totino e mafai ona faatusaina i se taavale afi. Ua iai ona uili e fa e mafai ai ona gaoioi, o se afi malosi e mafai ai ona faataavavale saosaoa na uili, ma ni taofi e mafai ona taofia ai. Peitai, e mafai ona iʻu i le malaia, seʻi vaganā ua iai se tasi i le nofoa o le ave taavale e faatonutonuina le mea e ō i ai na uili, le saosaoa e taavavale ai, ma le taimi e taofi ai, e ala i le pulea o le faaaogāina o le foeuli, le vae penisini, atoa ma taofi.

6. (a) O le ā le mea tāua e uiga i le alofa, e mafai ona faatatau i le pulea totino? (e) O le ā le fautuaga atili e tatau ona teu i o tatou manatu?

⁶ E faigata ona soona faamamafa nauā le tāua o le pulea totino. O le mea na fai mai ai le aposetolo o Paulo i le 1 Korinito 13:1-3 e uiga i le tāua o le alofa, e ono fetaui lelei foi i le pulea totino. E tusa lava po o le ā le agavaa atonu e avea ai i tatou ma failauga i le lautele, e tusa po o le ā le tele o le poto ma le faatuatua atonu ua tatou maua e ala i le masani o le faia o suesuega, e tusa foi po o ā galuega tatou te ono faia mo le lelei o isi, ae afai tatou te lē faaalia le pulea totino, o le a lē aogā na mea uma. E ao ona teu i o tatou manatu upu a Paulo: “Tou te le iloa ea, o e tausinio i le tausinioga, e tausinio uma i latou, a e maua le taui e le toatasi? Ia faapea ona outou tausinio, ina ia outou maua. [E sili atu i lena, o tagata uma lava e auai i se tausinioga latou te faaalia le pulea totino i mea uma].” (1 Korinito 9:24, 25) Ina ia fesoasoani ia i tatou e faaalia le pulea totino i mea uma, o le lapataiga a Paulo i le 1 Korinito 10:12: “O lē manatu o loo o tu ia, ina faaeteete ia neʻi paū.”

Faaaʻoaʻoga Lapatai

7. (a) Sa faapefea i le lē lava o le pulea totino ona amataina ai le ala leaga o le fanau a tagata? (e) O ā isi uluai faaaʻoaʻoga o le lē lava o le pulea totino ua aumaia e le Tusi Paia ia i tatou?

⁷ I le faatagaina o ona faalogona ootia e pulea ai ana gaoioiga na i lo le fefulisai, sa lē taulau ai ona faaalia e Atamu le pulea totino. O le iʻuga, na “oo mai [ai] le agasala i le lalolagi . . . o le oti foi ona o le agasala.” (Roma 5:12) Na mafua foi le uluai fasioti tagata ona o le lē lava o le pulea totino, auā na lapataia Kaino e Ieova le Atua: ‘Aiseā ua e ita ai ma aiseā foi ua faaūū ai ou mata? O loo taoto le agasala i le faitotoa, ma pe o le a e pule ea ia te ia?’ Ona sa lē mafai ona pulea e Kaino le agasala, na ia fasiotia ai lona uso o Apelu. (Kenese 4:6-12) Na lē taulau foi i le avā a Lota ona faaalia le pulea totino. Sa matuā lē mafai lava ona ia teena le faaosoosoga ina ia tepa i tua. O le ā na iʻu i ai le lē lava o lona pulea totino? Ioe, o le leiloa o lona lava ola!—Kenese 19:17, 26.

8. O ai tane e toatolu anamua na tutupu ai mea, ia ua avea ma lapataiga mo i tatou i le manaoga mo le pulea totino?

⁸ Na misia e le atalii ulumatua a Iakopo, o Reupena le tofi o le ulumatua ona o le lē lava o lona pulea totino. Sa ia solia le moega o lona tamā e ala i le faia o amioga lē mamā faaleituaiga ma se tasi o palake a Iakopo. (Kenese 35:22; 49:3, 4; 1 Nofoaiga a Tupu 5:1) Ona o le lē mafai ona taofia e Mose o lona ita i le auala na faatiga ai tagata Isaraelu ia te ia i lo latou muimui, faitio, ma le fouvale, na ia lē maua ai le faaeaga sa sili ona faanaunau i ai o le ulu atu i le Nuu Folafolaina. (Numera 20:1-13; Teuteronome 32:50-52) E oo foi i le Tupu faamaoni o Tavita, ‘o se tagata na finagalo malie i ai le Atua,’ sa oo i ni faafitauli matuiā ona o le lē lava o lona pulea totino i se tasi o mea na tupu. (1 Samuelu 13:14; 2 Samuelu 12:7-14) O na faaaʻoaʻoga uma ua saunia ai i tatou i ni lapataiga lelei tatou te manaomia i le faaalia o le pulea totino.

Mea Tatou te Manaomia ina ia Pulea Ai

9. O ā nisi o mau ua faamatilatila ai le tāua o le pulea totino?

⁹ E muamua lava, o le pulea totino e aofia ai o tatou manatu ma faalogona ootia. Ua masani ona faasino i ia mea i le Tusi Paia e ala i le faaaogāina faafaatusa o upu nei e pei o le “loto” atoa ma “manatu.” O mea tatou te faauaʻi atu i ai o tatou mafaufau, e ono mafai ona fesoasoani ia i tatou pe taofia ai foi i tatou mai a tatou taumafaiga e faafiafia Ieova. E manaomia le pulea totino, pe afai tatou te fia utagia le fautuaga faale-Tusi Paia o loo maua i le Filipi 4:8, ina ia manatunatu ai pea i mea ua moni, mamā, ma matagofie. Sa faaleoina e le faisalamo o Tavita ni lagona tali faapena i se tatalo, e faapea: “Ia mālie foi ia te oe . . . mafaufauga o loʻu loto, Ieova e, loʻu papa ma le na te togiolaina aʻu.” (Salamo 19:14) O le tulafono lona sefulu—e aua le manao fua i mea totino a se uso a tagata—sa manaomia ai le pulea o manatu o se tasi. (Esoto 20:17) Na faamatilatila e Iesu le matuiā o le puleaina o o tatou manatu ma faalogona ootia ina ua ia faapea mai: “Ai se vaai atu i le fafine ina ia manao i ai, ua uma ona mulilua ma ia i lona loto.”—Mataio 5:28.

10. O ā mau faale-Tusi Paia ua faamamafa ai le tāua o le puleaina o a tatou tautalaga?

¹⁰ E aofia ai foi i le pulea totino a tatou upu, ma a tatou tautalaga. O le mea moni e tele mau ua fautuaina ai i tatou ina ia pulea o tatou laulaufaiva. Mo se faaaʻoaʻoga: “O i le lagi le Atua, a ua e i le lalolagi; o le mea lea ia itiiti ai au upu.” (Failauga 5:2) “O le tele o upu e le oge solitulafono ai; a o le ua taofi ona laugutu, o le tagata poto lea.” (Faataoto 10:19) “Aua neʻi alu atu se upu leaga ai o outou gutu, na o le upu lelei e ati ae ai i mea e aoga, . . . Ia teʻa ma outou [uma] . . . le leo tele, ma le upu leaga, atoa ma le loto leaga uma lava.” Ona faaauau lea ona aumaia e Paulo fautuaga e aveesea ai mai ia i tatou tala valea ma upu masoā.—Efeso 4:29, 31; 5:3, 4.

11. Ua faapefea ona feagai Iakopo ma le faafitauli o le puleaina o le laulaufaiva?

¹¹ Ua taʻusalaina e Iakopo, le ʻafa uso o Iesu, tautalaga e lē taofiofia ma faaalia ai le faigata ona pulea o le laulaufaiva. Ua ia faapea mai: “E faapea foi le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele. O le laulaufaiva o le afi lea, o le faupuega o amio leaga; ua faapea ona tuuina le laulaufaiva i o tatou itu tino, o loo leaga ai le tino uma, ua faamuina ai le olaga nei uma lava; ua faamuina foi lena mai Kēna. E mafai ona faalataina, ua uma foi ona faalataina i le poto o tagata, o manu amio eseese o manu feai ma manu felelei, o mea fetolofi ma mea ola i le sami. Peitai e le mafai e se tasi tagata ona faalata i le laulaufaiva; o le mea leaga e le mataofia, ua tumu i le mea oona e oti ai; o lea ua tatou vivii aʻi i le Atua le Tamā, o lea foi ua tatou fetuu aʻi i tagata ua faia e foliga i le Atua; e luai mai i le gutu e tasi le vivii ma le fetuu. Oʻu uso e, e le tusa ona faia faapea o na mea.”—Iakopo 3:5-10.

12, 13. O ā nisi mau e faaalia ai le tāua o le puleaina o a tatou gaoioiga ma amio?

¹² O le mea moni, o le pulea totino e aofia ai a tatou gaoioiga. O se tasi o vaega e matuā manaomia ai le pulea totino e faatatau lea i a tatou fesootaiga ma i latou o le itupā vaivai. Ua poloaia Kerisiano: “Ia sosola ese mai amioga lē mamā faaleituaiga.” (1 Korinito 6:18, New International Version) Ua lapataia tane ina ia gata mai lo latou naunau i feusuaiga e tau o a latou lava avā, e faapea sona vaega: “Ia e inu vai ai lou lava vailepa, ma vai e tafe mai ai lou lava vaieli.” (Faataoto 5:15-20) Ua taʻu manino mai ia i tatou faapea “e faasalaina e le Atua o e faitaaga ma e mulilulua.” (Eperu 13:4) E manaomia faapitoa lava le pulea totino e i latou o ē o le a atiina aʻe le meaalofa o le nofofua.—Mataio 19:11, 12; 1 Korinito 7:37.

¹³ Sa ta aofaia e Iesu le mataupu atoa e uiga i a tatou gaoioiga i uso a tagata ina ua ia aumaia le mea ua masani ona taʻua o le “Tulafono Faaauro,” e faapea: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou; auā o le tulafono lea ma le au perofeta.” (Mataio 7:12) O le mea moni, e manaomia le pulea totino ina ia aua ai le avea o tatou tuʻinanauga po o omiga mai fafo po o tofotofoga e faapogaia ai ona tatou faia isi i se auala e matuā ese lava mai le auala tatou te mananao ai ia i latou e fai mai ia i tatou.

14. O le ā le fautuaga ua aumaia e le Afioga a le Atua e faatatau i meaʻai ma mea inu?

¹⁴ O loo iai foi le mataupu e uiga i le pulea totino i meaʻai ma mea inu. Ua fautua mai ma le atamai le Afioga a le Atua: “Aua neʻi fai oe ma so latou o e inu tele i uaina; ma e ua aai tetele i manu.” (Faataoto 23:20) Na lapatai mai Iesu, ae maise lava e uiga i o tatou aso: “Ia outou, neʻi faamamafaina o outou loto, ma le faaniniva, ma le onā, ma le popole i mea a le olaga nei, neʻi faafuasei mai lea aso ia te outou.” (Luka 21:34, 35) Ioe, o le pulea totino e aofia ai o tatou manatu ma o tatou faalogona, atoa ma a tatou upu ma a tatou gaoioiga.

Le Pogai ua Avea ai le Pulea Totino o se Luʻi

15. Ua faapefea ona faaalia e le Tusi Paia le iai moni o teteega a Satani i le faaalia o le pulea totino e Kerisiano?

¹⁵ E lē faigofie ona maua le pulea totino ona, e pei ona silafia e Kerisiano uma, o loo iai ni uunaiga malolosi se tolu o loo tau faasaga i lo tatou faaalia o le pulea totino. Muamua, o loo iai Satani ma ana temoni. Ua lē taumateina e le Tusi Paia lo latou iai moni. O lea, ua tatou faitau ai faapea ʻona uluitino lea o Satani’ ia Iuta a o leʻi alu atu e faalataina Iesu. (Ioane 13:27) Na fesili le aposetolo o Peteru ia Anania: “Se a le mea ua faatumu ai e Satani lou loto e te pepelo ai i le Agaga Paia”? (Galuega 5:3) Ae sili atu ona fetaui, na lapatai mai foi Peteru: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia.”—1 Peteru 5:8.

16. Aiseā e tatau ai i Kerisiano ona faaalia le pulea totino e uiga i lenei lalolagi?

¹⁶ I a latou taumafaiga e faaalia le pulea totino, e tatau foi i Kerisiano ona tauivi ma lenei lalolagi o loo faapea ona “nofo toilalo i loo leaga,” o Satani le Tiapolo. Na tusi le aposetolo o Ioane, e faatatau i lea: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tuʻinanau o le tino ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi. O le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” Seʻi vaganā ua tatou faaalia le pulea totino ma matuā teena malosi so o se faanaunauga ina ia manao i le lalolagi, o le a tatou lolo atu la i ana taaʻiga, e pei ona sa faia i se tasi taimi e le aumea faigaluega a Paulo o Tema.—1 Ioane 2:15-17; 5:19; 2 Timoteo 4:10.

17. Faatasi ma le ā le faafitauli e uiga i le pulea totino na fananau mai ma i tatou?

¹⁷ I le avea ma Kerisiano, tatou te manaomia foi le pulea totino ina ia tatou tauivi ai ma le manuia ma o tatou lava vaivaiga ma masei ua tuufaasolo mai faaletagata. E lē mafai ona tatou ʻalo ese mai le mea moni faapea ua “leaga o manatu o loto o tagata e afua mai ina o tama iti.” (Kenese 8:21) E pei o le Tupu o Tavita, ‘ua tatou fananau mai ma le leaga, na aumaia i tatou ma le tigā, ma na tatou iai i le manava o o tatou tinā ma le agasala.’ (Salamo 51:5) E augapiu ma se mea e iloa e se tamaitiiti faatoʻā fanau mai e uiga i le pulea totino. Pe a ia manao i se mea, e na o le tagitagi pea lava seia oo ina ia maua. Ua taʻua i se tasi o lipoti e uiga i le toleniina o tamaiti: ‘E matuā eseese lava le auala e manatunatu ai tamaiti mai tagata matutua. E manatu lava tamaiti e tau o i latou ma e masani lava ona lē tali mai i se faasufiga e moni aʻiaʻi, ona e lē mafai ona “latou tuua i latou lava i le tulaga o se isi tagata.”’ O le mea moni, “ua fusifusia le valea i le loto o le tama.” Peitai, i le faaaogāina o “le sasa e aoai aʻi,” na te aʻoaʻoina faasolosolo ai faapea o loo iai tulafono e tatau ona ia usiusitai i ai ma e tatau ona tuu le manatu faapito.—Faataoto 22:15.

18. (a) E tusa ma Iesu, o ā tuʻinanauga o loo nofo i le loto faafaatusa? (e) O ā upu a Paulo e faaalia ai lona nofouta i le faafitauli o le faaalia o le pulea totino?

¹⁸ Ioe, o o tatou tuʻinanauga manatu faapito na tatou fananau mai ma i tatou, ua aumaia ai se luʻi mo i tatou ina ia faaalia le pulea totino. O loo nofo na tuʻinanauga i le loto faafaatusa, lea na fetalai faatatau i ai Iesu: “Auā e alu ae mai le loto o le manatu leaga, o le fasioti tagata, o le mulilua, o le faitaaga, o le gaoi, o le molimau pepelo, ma le upu leaga.” (Mataio 15:19) O le pogai lea na tusi ai Paulo: “Auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. Afai foi ou te faia le mea ou te le loto i ai, ua le o aʻu e toe faia, a o le agasala o loo nofo i totonu ia te au.” (Roma 7:19, 20) Peitai, sa lē o se taua lenei na faiaina ai, auā na tusia foi e Paulo: “A ou te faatoilaloina loʻu nei tino, ma aʻu fai ai ma pologa, ina neʻi iu ina le faamaoni aʻu, o aʻu sa talaʻi atu i isi tagata.” O le faatoilaloina o lona tino sa manaomia ai le faaalia o le pulea totino.—1 Korinito 9:27.

19. Aiseā ua mafai ai ona faapea mai Paulo sa ia faatoilaloina lona tino?

¹⁹ Ua fetaui lelei le faapea mai o Paulo sa ia faatoilaloina lona tino, auā o le faaalia o le pulea totino, ua milo faatasi ma le tele o vala faaletino, e pei o le toto maualuga, le fefe vale, le lē lava o le moe, le ulu tigā, le lē lelei ona faamalūina o meaʻai, atoa ma isi mea. I le mataupu e sosoo ai, o le a tatou iloiloina ai uiga ma itu o le a fesoasoani ia i tatou ina ia faaalia le pulea totino.

O E Manatua?

◻ Aiseā e tāua ai le pulea totino?

◻ O ā nisi o faaaʻoaʻoga o i latou o ē ua tuuesea ona o le lē lava o le pulea totino?

◻ I ā auala e tatau ona tatou faaalia ai le pulea totino?

◻ O ā fili e tolu ua faafaigata ai ona tatou faaalia le pulea totino?

[Ē Ana Ata i le itulau 8]

Historical Pictures Service

[Ata i le itulau 10]

E manaomia e Kerisiano ona faaalia le pulea totino i meaʻai ma mea inu

[Ata i le itulau 11]

E fesoasoani le pulea totino ia i tatou e aloese ai mai le faitatala e faaleagaina ai