Atiina aʻe le Fua o le Pulea Totino
“O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le [pulea totino]; e le faatulafonoina mea faapena.”—KALATIA 5:22, 23.
1. O ai ua aumaia ia i tatou faaaʻoaʻoga e sili ona lelei o le pulea totino, e pei ona vaaia i ā mau o le Tusi Paia?
UA AUMAIA e Ieova le Atua ma Iesu Keriso ia i tatou ni faaaʻoaʻoga e sili ona lelei o le pulea totino. Talu mai lava ona lē usiusitai le tagata i le faatoaga o Etena, ua faaauau ai pea ona faaalia e Ieova lenei uiga. (Faatusatusa Isaia 42:14.) E faaiva ona tatou faitau ai i Tusitusiga Eperu faapea e “telegese lona toasa.” (Esoto 34:6) E manaomia ai i lena itu le pulea totino. Ma le mautinoa foi sa faaalia e le Alo o le Atua le pulea totino e sili atu, auā “o le sa agateleina, a e lei toe agatele atu.” (1 Peteru 2:23) E ui i lea, sa ono mafai ona aioi atu Iesu i lona Tamā faalelagi mo le fesoasoani a “agelu e sili ona toatele i lekeona e sefulu ma le lua.”—Mataio 26:53.
2. O ā faaaʻoaʻoga lelei faale-Tusi Paia ua tatou maua e uiga i le faaalia o le pulea totino e tagata lē lelei atoatoa?
2 O loo ia i tatou foi nisi o faaaʻoaʻoga lelei faale-Tusi Paia o le pulea totino ua faaalia e tagata lē lelei atoatoa. Mo se faataʻitaʻiga, sa faaalia lenei uiga i se mea iloga na tupu i le olaga o Iosefa, le atalii o le augatamā faatuatua o Iakopo. Maeu le pulea totino na faaalia e Iosefa ina ua taumafai le avā a Potifara e olegia o ia! (Kenese 39:7-9) Na iai foi le faaaʻoaʻoga lelei a taulelea Eperu e toafa o ē na faaalia le pulea totino e ala i le mumusu e aai i meaʻai a le tupu o Papelonia ona o faasasaaga o le Tulafono faa-Mose.—Tanielu 1:8-17.
3. O ai ua matauina mo a latou amioga lelei, e pei ona vaaia i ā faamaoniga?
3 Mo faaaʻoaʻoga faaonaponei o le pulea totino, e mafai ona tatou faasino atu i le vaega atoa o Molimau a Ieova. Ua alagātatau ia i latou ia le faamālō na avatu ia i latou e le New Catholic Encyclopedia—e faapea o i latou o se “tasi o vaega e sili ona amio lelei i le lalolagi.” Na taʻua e se faiaʻoga o se iunivesite i Filipaina e faapea “o loo faatinoina faaletapuaiga e Molimau mea ua latou aʻoaʻoina mai le Tusi Paia.” E faatatau i le tauaofiaga a Molimau i Warsaw i le 1989, na tusia e se tusitala Polani e faapea: “Sa leʻi ulaina e tagata e 55,000 se sikareti e tasi mo aso e tolu! . . . O lenei faaaliga o le puleaina e sili atu na i lo le tagata, sa faagaeetia ai aʻu i le viiga ua tuufaatasia ma le mamalu.”
Mataʻu i le Atua ae Inoino i le Mea Leaga
4. O le ā se tasi o fesoasoani silisili i le faaalia o le pulea totino?
4 O se tasi o fesoasoani aupito sili i le atiina aʻe o le pulea totino o le mataʻu i le Atua, le mataʻu lea ina neʻi faia se mea e toasa ai lo tatou Tamā alofa faalelagi. O le tāua o le mataʻu ma le migao i le Atua, lea e ao ona ia i tatou, ua mafai ona vaaia i le mea moni faapea e tele taimi ua taʻua ai e le Tusi Paia. A o toeitiiti lava ofoina atu e Aperaamo lona atalii o Isaako, sa fetalai mai le Atua: “Soia le oo lou lima i le tama, aua foi e te fai se mea e tasi ia te ia; auā ua ou iloa nei ua e mataʻu i le Atua, ina ua e le taofia lou atalii, o lou atalii e toatasi, a ua e tuu mai ia te au.” (Kenese 22:12) E lē taumatea sa matuā mafatia faalogona ootia, sa ono tatau ai ona manaomia e Aperaamo se fua tele o le pulea totino ina ia faaauau ai le poloaiga a le Atua i le tulaga o le siiina aʻe o lana pelu e fasiotia ai lona atalii pele o Isaako. Ioe, o le mataʻu i le Atua o le a fesoasoani lea ia i tatou e faaalia le pulea totino.
5. O le ā le vaega a le inoino i le leaga e faia i lo tatou faaalia o le pulea totino?
5 O le mea e fesootai vavalalata ma le mataʻu ia Ieova, o le inoino lea i le leaga. Tatou te faitau ai i le Faataoto 8:13: “O le mataʻu ia Ieova, o le ʻinoʻino lea i le leaga.” I le isi itu, o le inoino i le mea leaga e fesoasoani foi lea ia i tatou i le faaalia o le pulea totino. Ua taʻu mai e le Tusi Paia ia i tatou i lea taimi ma lea taimi, ina ia inoino—ioe, ia lafoaia—mea leaga. (Salamo 97:10; Amosa 5:14, 15; Roma 12:9) O se mea leaga, e masani lava ona sili atu lona manaia, e matuā tau faaosooso lava, e faatosina nauā, o lea e tatau ai ona tatou matuā inoino i ai ina ia faamalosia ai i tatou e tau faasaga i ai. O lena inoino uma i le mea leaga e iʻu ai i le faamalosia o la tatou filifiliga ina ia faaalia le pulea totino ma faapea ona avea ai o se puipuiga ia i tatou.
Pulea Totino, le Ala o le Atamai
6. Aiseā ua avea ai o se ala atamai le taofia o o tatou tuʻinanauga manatu faapito e ala i le faaalia o le pulea totino?
6 O se isi fesoasoani sili i lo tatou faatinoina o le pulea totino o le talisapaia lea o le atamai o le faaalia o lenei uiga. Ua poloaia i tatou e Ieova ina ia tatou faaalia le pulea totino mo lo tatou lava lelei. (Faatusatusa Isaia 48:17, 18.) O loo iai i lana Afioga le tele o fautuaga e faaalia ai le atamai o le taofia o o tatou tuʻinanauga manatu faapito e ala i le faatinoina o le pulea totino. E matuā lē mafai lava ona tatou alo ese mai tulafono lē masuia a le Atua. Ua taʻu mai e lana Afioga ia i tatou: “O le mea e luluina e le tagata, o le mea lava lea e seleseleina mai ai e ia; o sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.” (Kalatia 6:7, 8) O se faaaʻoaʻoga iloga, o le ʻai ma le inu. E tele maʻi ua mafua ona o le aai ma le inu tetele o tagata. O lena lolo atu uma i le manatu faapito ua fāoa ese ai i se tagata le pulea totino. E lē gata i lena, e lē mafai e se tagata ona lolo atu i le manatu faapito e aunoa ma le faaleagaina ai o ana faiā ma isi. Ae o le mea e sili ona matuiā o na mea uma, o le lē lava o le pulea totino e faaleagaina ai la tatou faiā ma lo tatou Tamā faalelagi.
7. O le ā le matua autū o le tusi o Faataoto, e pei ona faaalia i ā mau o le Tusi Paia?
7 O le mea lea, e tatau ai ona tatou aʻoaʻia pea i tatou faapea o le manatu faapito e faatoilaloina ai le tagata lava ia. Ua faamamafaina e se matua tulagaese o le tusi o Faataoto, le pulea totino e faapea, o le manatu faapito e matuā lē tauia lava ma o loo iai le atamai i le faaalia o le pulea totino. (Faataoto 14:29; 16:32) Ma ia tau ina matauina faapea o le pulea totino e aofia ai e sili atu na i lo le tau ina alofia o le mea leaga. E manaomia foi le pulea totino ina ia faia ai le mea saʻo, lea atonu e faigata ona e feteenai lenei mea ma o tatou tuʻinanauga agasala.
8. O le ā le mea na tupu ua faamatilatila ai le atamai o le faaalia o le pulea totino?
8 E fai ma faataʻitaʻiga o le atamai o le pulea totino, o le tulaga o se tasi o Molimau a Ieova na tu i le laina i se fale tupe ina ua oso ane se tamaloa i ona luma. E ui ina sa fai si lē malie o le Molimau, ae na ia faaalia le pulea totino. O lena lava aso na manaomia ai ona alu le Molimau e vaai se inisinia ina ia sainia ai pepa mo nisi o fuafuaga o le Maota o le Malo. Ma o ai le inisinia na ia tau i ai? Ioe, o le tamaloa lea na oso ane i ona luma i le fale tupe! E lē gata ina ua matuā faaleuo ane nei i ai le inisinia ae na ia faapaʻūina i le Molimau le tasi vae sefulu o le tau masani. Maeu le fiafia na oo i ai le Molimau ona sa ia uluai faaalia le pulea totino i lena aso, i lona lē faatagaina o ia lava e faatupuina se vevesi!
9. O le ā le ala atamai pe a tatou fetaiai ma ni tali faatigā i le faiva?
9 I lea taimi ma lea taimi pe a tatou ō atu i lea fale ma lea fale e talaʻi atu le tala lelei o le Malo o le Atua pe tutū i autafa o se magaala ma taumafai e faauaʻi mai tagata feoai i la tatou feau, tatou te fetaiai ai ma upu faatigā. O le ā le ala o le atamai? O le faamatalaga atamai lenei ua iai i le Faataoto 15:1: “O le tali filemu e liliueseina ai le ita.” I nisi faaupuga, e manaomia ona tatou faaalia le pulea totino. Ma e lē na o Molimau a Ieova ua latou iloa le moni o lenei mea ae faapena foi i isi. Ua talisapaia atili pea e tagata popoto faivailaau le aogā o le pulea totino e fai ma vaifofo.
Fesoasoani le Alofa Lē Manatu Faapito
10, 11. Aiseā ua avea ai le alofa o se fesoasoani moni i le faaalia o le pulea totino?
10 Ua faaalia i le faamatalaga a Paulo o le alofa i le 1 Korinito 13:4-8 faapea e mafai ona fesoasoani lona malosi ia i tatou ina ia faaalia ai le pulea totino. “E onosai le alofa.” Ina ia onosai, e manaomia ai le pulea totino. “E le losilosi le alofa, e le mitamita vale le alofa, e le faafefeteina.” E fesoasoani le alofa ia i tatou e pulea ai o tatou manatu ma faalogona ootia, e taofia ai so o se taaʻiga ina ia losilosi, pe mitamita vale, pe faafefeteina ai. Ua uunaia i tatou e le alofa ina ia faia le tuufaafeagai, faia i tatou ia loto maulalo, ma agamalu, e pei ona sa faia e Iesu.—Mataio 11:28-30.
11 Ua faaauau ona faapea mai Paulo o le alofa “e le amio matagā.” E manaomia foi le pulea totino ina ia amio lelei ai i taimi uma. O le uiga o le alofa e taofia ai i tatou mai le matapeapea, mai le ‘vaavaai o mea mo lo tatou lava lelei.’ O le alofa “e le faaitaitagofie.” Maeu le faigofie ona ita ona o mea e tautatala ai pe faia e isi! Ae o le a fesoasoani le alofa ia i tatou ina ia faaalia le pulea totino ma lē tautala ai pe faia ai ni mea o le a mulimuli ane o tatou faanoanoa ai. O le alofa “e le faitau leaga ua tuuina mai e nisi [LF].” O le natura faaletagata e mafuli atu e teuloto se maseiga pe faatupuina se feteenaiga. Ae o le a fesoasoani le alofa ia i tatou e aveesea ai na manatu mai o tatou mafaufau. O le alofa “e le fiafia i le amio leaga.” E manaomia le pulea totino ina ia lē faafiafiaina ai i mea leaga, e pei o tusiata tau feusuaiga lē mamā po o ata leaga ua faaalia i le televise. O le alofa foi na te “lavātia mea uma [LF]” ma “e leai se mea e gata mai ai . . . lona onosai [LF].” E manaomia le pulea totino ina ia lavātia ai mea uma, ina ia onosaia ai tofotofoga po o mea mamafa ae aua le faatagaina e faavaivaia ai i tatou, ma faapogaia ai i tatou e toe taui ma sui atu i se auala tutusa, pe iʻu ai ina tatou faamaamulu mai le auauna atu ia Ieova.
12. O le ā se tasi o auala e faaalia ai lo tatou talisapaia mo mea uma ua faia e Ieova le Atua ma Iesu Keriso mo i tatou?
12 Afai tatou te alolofa moni lava i lo tatou Tamā faalelagi ma talisapaia ona uiga matagofie atoa ma mea uma ua ia faia mo i tatou, o le a tatou mananao la e faafiafiaina o ia e ala i le faaalia o le pulea totino i taimi uma. Afai foi tatou te alolofa moni i lo tatou Alii ma lo tatou Matai, o Iesu Keriso, ma talisapaia mea uma ua ia faia mo i tatou, o le a tatou utagiaina la lana poloaiga ‘ina ia ave lo tatou satauro ma faaauau pea ona mulimuli atu ia te ia.’ (Mareko 8:34) E mautinoa e manaomia ai i lena mea lo tatou faaalia o le pulea totino. O le alofa mo o tatou uso ma tuafāfine Kerisiano o le a taofia ai foi i tatou mai le faatigā ia i latou e ala i le uia o se ala manatu faapito.
Faatuatua ma Loto Maulalo o ni Ē Fesoasoani
13. Aiseā e mafai ai i le faatuatua ona fesoasoani ia i tatou e faaalia le pulea totino?
13 O se isi fesoasoani sili i le faaalia o le pulea totino o le faatuatua lea i le Atua ma ana folafolaga. O le faatuatua e mafai ai ona tatou talitonu ia Ieova ma faatalitali mo lana taimi atofaina e faasaʻoina ai mataupu. O le manatu lava lea e tasi na taʻua e le aposetolo o Paulo ina ua ia faapea mai i le Roma 12:19: “Le au pele e, aua le taui atu ma sui, . . . auā ua tusia, Ua faapea mai [Ieova], O ia te au le taui ma sui, ou te taui atu.” I lenei itu, e mafai ai foi ona fesoasoani le loto maulalo ia te i tatou. Afai tatou te loto maulalo, o le a lē vave la ona tatou tetee atu ona o ni manuʻa e oo moni mai pe leʻi mafaufauina. O le a tatou lē mateletele ai e faatino le tulafono i o tatou lava lima, peitai o le a tatou faaalia le pulea totino ma lotomalie e faatalitali ia Ieova.—Faatusatusa Salamo 37:1, 8.
14. O le ā le mea na tupu e faaalia ai faapea e mafai ona maua le pulea totino e oo lava ia i latou o ē sa matuā leʻi lava ona latou mauaina?
14 O se mea e mafai ona aʻoaʻoina ai i tatou e faaalia le pulea totino sa matuā malosi ona aumaia i le mea na tupu e aafia ai se tamaloa ita sauā. Ioe, ona sa mataʻutia lona ita, ina ua telefoni atu i leoleo ona o se faalavelave na mafua ia te ia ma lona tamā, sa ia tatuʻia ni leoleo se toatolu a o leʻi mafai e isi ona taofia o ia! Peitai, i se taimi, na ia fesootai ai ma Molimau a Ieova ma aʻoaʻoina ai o ia e faaalia le pulea totino, o se tasi o fua o le agaga o le Atua. (Kalatia 5:22, 23) I aso nei, e 30 tausaga mulimuli ane ai, o loo auauna pea ma le faamaoni lenei tamaloa ia Ieova.
Pulea Totino i le Liʻo o le Aiga
15, 16. (a) O le ā e fesoasoani i se tane ina ia faaalia le pulea totino? (e) O le ā le tulaga e manaomia faapitoa ai lava le pulea totino, e pei ona vaaia i le ā le mea na tupu? (i) Aiseā e manaomia ai le pulea totino e se avā?
15 E matuā mautinoa lava le manaomia o le pulea totino i le liʻo o le aiga. Ina ia alofa se tane i lana avā e pei ona alofa o ia ia te ia lava, e manaomia ona ia faaalia le pulea atili o ona manatu, upu, ma gaoioiga. (Efeso 5:28, 29) Ioe, e manaomia e tane le pulea totino ina ia utagia ai upu a le aposetolo o Peteru i le 1 Peteru 3:7: “Ia faapea outou tane, ia nonofo faatasi ma i latou ma le poto.” Ae maise lava pe afai o lana avā e lē o se tagata talitonu, o le a manaomia ai e le tane talitonu ona faaalia le pulea totino.
16 Ina ia faataʻitaʻia: Sa iai se toeaina o lē na iai se avā lē talitonu e matuā ita leaga. E ui i lea, sa faaalia e le toeaina le pulea totino, ma na aogā tele lenei ia te ia auā na faapea atu lana fomaʻi ia te ia: “Ioane, a lē ona o lou natura, ua avea ai oe ma tamaloa e sili ona onosai, pe ona ua e iai i se tapuaiga e sili atu ona malosi.” O le mea moni o loo tatou iai i se tapuaiga e sili atu ona malosi, auā “ua le foaiina mai e le Atua ia te i tatou le Agaga e mataʻu ai, a o le Agaga e faamalosi ai, ma alofa ai, ma mafaufau tonu ai,” e mafai ai ona tatou faaalia le pulea totino. (2 Timoteo 1:7) E faaopoopo i lena, e manaomia le pulea totino i le vaega a le avā ina ia gauai ai, ae maise lava pe afai o lana tane e lē o se tagata talitonu.—1 Peteru 3:1-4.
17. Aiseā e tāua ai le pulea totino i le faiā a se matua ma lana tama?
17 E manaomia foi le pulea totino i le faiā a se matua ma lana tama. Ina ia maua ni fanau e pulea totino, e tatau i mātua lava latou ona muamua i mea uma, ia faataatia se faaaʻoaʻoga lelei. Ma po o le ā lava le ituaiga o aʻoaʻiga e manaomia e le fanau e ao pea ona avatu i le agamalu, ma le alofa, lea e manaomia ai le pulea totino moni. (Efeso 6:4; Kolose 3:21) I le isi foi itu, e manaomia le usiusitai ina ia faaalia ai e le fanau latou te alolofa moni i o latou mātua, ma ina ia usiusitai, e mautinoa le manaomia ai o le pulea totino.—Efeso 6:1-3; faatusatusa 1 Ioane 5:3.
Faaaogāina Fesoasoani ua Saunia e le Atua
18-20. O ā sauniuniga faaleagaga e tolu e tatau ona tatou faaaogāina tatau e atiina aʻe ai uiga o le a fesoasoani ia i tatou e faaalia le pulea totino?
18 Ina ia tuputupu aʻe i le mataʻu i le Atua, i le alofa lē manatu faapito, i le faatuatua, i le inoino i le mea leaga, ma i le pulea totino, e manaomia ona tatou faaaogāina tatau fesoasoani uma ua saunia e Ieova le Atua. Seʻi o tatou iloiloina la ni sauniuniga faaleagaga se tolu e mafai ona fesoasoani ia i tatou i le faaalia o le pulea totino. E muamua i mea uma, ua ia i tatou le faaeaga tautele o le tatalo. Ia aua lava neʻi o tatou mananao e pisi nauā e lē mafai ai ona tatalo. Ioe, e ao ona tatou faanaunau e “tatalo e le aunoa,” ia “finafinau i le tatalo.” (1 Tesalonia 5:17; Roma 12:12) Seʻi o tatou avea le atiina aʻe o le pulea totino ma mataupu o tatalo. Ae a tatou masei laitiiti i le faaalia o le pulea totino, seʻi o tatou matuā faatoga atu i lo tatou Tamā faalelagi mo le faamagaloga.
19 O le vaega lona lua e lagolagosua i le faaalia o le pulea totino, o le mauaina lea o le fesoasoani e sau mai le fafagaina i le Afioga a le Atua ma lomiga e mafai ai ona tatou malamalama ma faatatauina le Tusi Paia. E matuā faigofie lava ona faagaloina lenei vaega o la tatou auaunaga paia! E tatau ona tatou faaalia le pulea totino ma ia teu pea ia i tatou faapea e leai ni tusi faitau e sili atu ona tāua na i lo le Tusi Paia ma tusi ua saunia e le “auauna faamaoni ma le mafaufau,” ma e tatau ona tatou avatu i ai le faamuamua. (Mataio 24:45-47) Ua matuā lelei ona faaupuina faapea, o le olaga e lē taitai ona faapea o lenei ma lena ae o lenei po o lena. Pe o i tatou moni ea o ni tane ma ni fafine faaleagaga? Afai tatou te naunau i lo tatou manaoga faaleagaga, o le a tatou faaalia la le pulea totino e manaomia ina ia tapē ai le televise ae sauniuni mo a tatou sauniga pe faitauina Le Olomatamata lena atonu faatoʻā taunuu mai i le meli.
20 O le manatu lona tolu, o loo iai le mataupu o le faatinoina o le faamasinotonu i a tatou sauniga a le faapotopotoga ma fonotaga ma tauaofiaga tetele. Pe o na ea faatasiga uma o ni mea tatau mo i tatou? Pe tatou te nofo sauni ea e faia se sao ma mulimuli ane ai faataunuuina pe a tatou maua le avanoa? I le faia faapea tatou te faatinoina ai le faamasino tonu i a tatou sauniga, i lena mamao o le a tatou faamalosia ai la tatou filifiliga ina ia faaalia le pulea totino i lalo o tulaga uma.
21. O ā nisi o taui e mafai ona tatou olioli ai i le atiina aʻe o le fua o le agaga o le pulea totino?
21 O ā taui e mafai ona tatou faatalitalia mo le taumafai malosi e faaalia le pulea totino i taimi uma? O se tasi o mea, o le a lē taitai ai ona tatou seleseleina iʻuga tigā o le manatu faapito. O le a faaaloalogia ai i tatou lava ma maua ai se loto fuatiaifo mamā. O le a puipuia ai i tatou lava mai le tele o faafitauli ma o le a faatumauina ai i tatou i le ala i le ola. E lē gata i lena, o le a mafai ai ona tatou faia le mea aupito sili ona lelei tatou te mafaia mo isi. I luga o mea uma, o le a tatou utagiaina ai le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” Ma o le taui silisili lena e mafai ona tatou maua—le faaeaga o le faafiafiaina o le finagalo o lo tatou Tamā faalelagi, o Ieova!
O E Manatua?
◻ E faapefea i le mataʻu i le Atua ona fesoasoani ia i tatou e faaalia le pulea totino?
◻ Aiseā e fesoasoani ai le alofa ia i tatou e faaalia le pulea totino?
◻ E faapefea ona fesoasoani le pulea totino i faiā i le aiga?
◻ O ā sauniuniga e tatau ona tatou faaaogā lelei pe afai tatou te fia atiina aʻe le pulea totino?
[Ata i le itulau 15]
Na faaalia e Iosefa le pulea totino ina ua tofotofoina
[Ata i le itulau 17]
E manaomia le pulea totino moni ina ia aʻoaʻia ai se tamaitiiti i le agamalu ma le alofa