Le Taʻitaʻiau Roma Agalelei
E LEAI se talaaga lelei o taʻitaʻiau Roma mo le agalelei. I le tofia e taʻitaʻia se ʻautau e toaselau o ni fitafita o le taua, e tatau ai i se taʻitaʻiau ona avea o se satini tomai i le toleniina, ma o sē e avatua aʻoaʻiga, ma i nisi taimi e avea o se faaoosala. Ae peitai, ua taʻu mai e le Tusi Paia ia i tatou e uiga i se taʻitaʻiau Roma o le vaegaau a Aokuso o lē na faaalia le agalelei moni ma le alofa mutimutivale i le aposetolo o Paulo. O ai lona igoa? O Iulio.
Ua faafeiloai atu i tatou e le Tusi Paia i lenei tagata i le Galuega mataupu e 27. Sa talosaga atu le aposetolo o Paulo ina ia tuuina atu lona faamasinoga i Roma ia Kaisara. I lea, na tuuina atu ai Paulo ma isi pagota i le vaaiga a “le taʻitaʻi o le toaselau, o Iulio le igoa, o i le ʻau a Aokuso.” Ona latou tuuvaa atu lea mai Kaisereia, o se aai e taula ai vaa i matu sisifo o Ierusalema lena sa avea o le nofoaga autū mo vaegaau a Roma. Fai mai le tusitala o talafaasolopito o Luka: “O le taeao foi ua o ae i uta i matou i Saitonu. Ua agalelei mai foi Iulio ia Paulo, ma tuu atu ia te ia e alu i ana uo e tali i o latou alofa mai.”—Galuega 27:1-3.
E lē o taʻua mai i le Tusi Paia le pogai na uunaia ai Iulio e faaalia lea agalelei. Atonu sa faatonuina mai o ia e le Kovana o Feso ina ia avatu ia Paulo se tausiga faapitoa. Pe atonu ai ona ua masani ma le tulaga ua saisaitia ai Paulo, atonu ai ua na ona viia ai e Iulio le lototele ma le faamaoni o Paulo. I so o se mea lava, e foliga mai sa talisapaia e Iulio faapea o Paulo e lē o se pagota e faatauvaa.
Ae peitai, sa filifili Iulio ina ia lē faalogo atu i le lapataiga a Paulo faasaga i le folau ese atu mai le taulaga o Fair Havens. E leʻi pine ae fetaiai le vaa ma se matagi malosi na faamataʻuina ai ina ua lafoia i le matafaga o Aferika i matū. (Galuega 27:8-17) I le ogatotonu o lenei matagi malosi, na tulai Paulo ma faamautinoa atu i le pasese ua matataʻu faapea ‘e leai so outou ola e māumau, na o le vaa.’ Ae o nisi o le auvaa sa taumafai pea e sosola. Ona taʻu atu lea e Paulo ia Iulio: “Afai e le tumau i latou na i le vaa, e le mafai ona faaolaina o outou.”—Galuega 27:21, 22, 30, 31.
I le taimi lea, sa filifili ai Iulio e faalogo ia Paulo, ma ua faaleaogāina ai taumafaiga a le auvaa e sosola. E moni lava e tusa ai ma le valoaga a Paulo, na lafoia le vaa i se faga oneone ma malepe ai. I le mataʻu ina neʻi sosola pagota, na filifili ai fitafita sa i luga o le vaa ina ia fasiotia i latou uma. O lea, na toe faalaa ane foi Iulio ma taofia ana fitafita, i lea ua faasaoina ai le ola o Paulo.—Galuega 27:32, 41-44.
E lē o taʻu maia e le Tusi Paia ia i tatou po o le ā na iʻu i ai lenei taʻitaʻiau agalelei, pe sa ia talia le faatuatuaga Kerisiano. Po o le ā lava se agalelei na ia faaalia, sa o se faatinoga o galuega o se loto fuatiaifo mai le Atua. (Roma 2:14, 15) Ae peitai, e oo atu Kerisiano e sili atu i le na o se agalelei faaletagata ma faaalia le agalelei faaleatua lena e iʻu i ai ona o le maua o le agaga o le Atua. (Kalatia 5:22) E mautinoa lava, afai e mafai e se fitafita faapaupau o lē na te leʻi iloa le Atua ona faaalia le agalelei, maeu la le tele e ao ona uunaia ai tagata o le Atua e faia faapea!