Le Kirisimasi—Po o le Auala lea e Faafeiloaia ai Iesu?

O LE fanau mai o le Faaola, le Mesia ua leva ona faatalitali i ai, o le mea moni sa o se taimi e olioli ai. “Faauta!” na folafola mai ai e le agelu i leoleo mamoe i fafo atu o le aai o Peteleema, “Ou te au mai ia te outou le tala lelei e olioli tele i le nuu uma; auā o le aso nei ua fanau ai i le aai a Tavita, lo outou Faaola, o le Alii ia o Keriso.” Sa aufaatasi atu i ai le au agelu e manomanō, e vivii atu i le Atua: “O le viiga i le Atua i mea aupitoaluga; ma le filemu i le lalolagi i tagata o le finagalo lelei.” (Luka 2:10-14, NW) Atonu o le a faia e nisi se faaiʻuga faapea, e ao i Kerisiano ona faataʻitaʻi i agelu i le faaleoina o le olioli i le afio mai o Keriso i le lalolagi i na aso ua mavae.

Sa lē o se uluai faamaumauga lenei a le Tusi Paia e uiga i agelu ua alalaga i pese o viiga. Ina ua faataatia le faavae o le lalolagi, “ina o pepese [olioli] faatasi fetu o le taeao, ma alalaga fiafia atalii uma o le Atua.” (Iopu 38:4-7) E lē o faamauina i le Tusi Paia le aso tonu na faia ai lenei mea. (Kenese 1:1, 14-18) E ui lava i le tulaga olioli atonu na faia ai lenei sauniga fiafia, ae ua lē finau mai lava Kerisiano faapea ona sa alalaga fiafia agelu, ua ao ai la ia i latou ona faamanatuina faaletausaga le foafoaga o le lalolagi ma atonu o le a faia ai se faigaʻai faapaupau e faamanatu ai lena mea.

Ae o le mea tonu lava lena o loo faia e tagata o ē o loo faamanatuina le Kirisimasi i le fanau mai o Iesu Keriso. O le tagai i so o se lomifefiloi maufaatuatuaina i lalo o le ulutala “Kirisimasi” ua faamautinoa ai faapea, o le aso na fanau ai Iesu, e lē o iloa. E leai lava se tala a le Tusi Paia e uiga i lena aso.

“A Faaletonu le Leo o le Pu”

“O le Atua, e le o le Atua ia o le [fenuminumiai, NW], a o le filemu,” na tusi ai le aposetolo o Paulo, i le faasaʻoina o le fenuminumiai o le faapotopotoga i Korinito anamua. I lena lava mataupu, na ia fesili ai: “A faaletonu le leo o le pu, o ai ea se na te sauni e tau!” (1 Korinito 14:8, 33) Afai la sa finagalo le Atua o le lē fenuminumiai ina ia faamanatu e Kerisiano le fanau mai o lona Alo i le lalolagi, pe o le a Ia tuu atu la i tagata lē lelei atoatoa e filifilia e tusa ai ma o latou lava manatu se aso mai faigaʻai faapaupau ma talia faiga lē faaleatua?

O le suesueina o ni nai faaaʻoaʻoga faale-Tusi Paia ua faamaninoina ai, e lē o le auala lena e feutagai ai Ieova le Atua ma ona tagata. Ina ua ia finagalo ina ia tausia e tagata Isaraelu ni faamanatuga faaletausaga i lalo o le Tulafono faa-Mose, sa filifilia e le Atua ni aso faapitoa ma faailoa atu ia i latou le auala latou te tausia ai na sauniga o faigaʻai. (Esoto 23:14-17; Levitiko 23:34-43) E ui lava sa leʻi poloaiina e Iesu Keriso ina ia faamanatuina le aso na fanau ai, ae sa poloaiina ona soʻo ina ia faamanatu le aso faapitoa lava e tasi. “I le po ina o le a tuuina atu ai o ia,” (NW) Nisani 14, 33 T.A., na faataʻimua ai e Iesu le faamanatuina o le Talisuaga Afiafi a le Alii, i le faaaogāina o le areto e lē faafefeteina ma le uaina. Sa ia poloai: “Ia outou faia lenei mea ma faamanatuga ia te au.” (1 Korinito 11:23, 24) O le ilia o le pu ina ia iloa ai po o afea ma pe faapefea ona tausia le Talisuaga Afiafi a le Alii, e manino ma e lē masesē. Ae faapefea la le Kirisimasi? E leai lava se mea i le Tusi Paia o tatou maua ai se poloaiga ina ia faamanatu le aso fanau o Keriso, e lē o taʻu maia ai foi ia i tatou po o le ā le aso ma pe e faapefea foi.

‘Ina ia Maua Tagata’

“Oi, o le mea moni ua ou iloa o le Kirisimasi e faapaupau lona amataga,” na fai mai ai se taʻitaʻi lotu i se Lotu Siona i Tokyo, “ae afai lava e naunau fiafia tagata lautele latou i le Faa-Kerisiano ia Tesema 25 ma oo ina iloa aʻoaʻoga a Iesu Faamamaluina, ona iai lava lea o le nofoaga o le Kirisimasi i le Faa-Kerisiano.” E toatele ua ioe i lona manatu. Pe e te talitonu o se mea saʻo le faia o na fetuutuunaiga?

Ua finau mai nisi faapea e oo lava ia Paulo sa faia ni fetuutuunaiga ina ia maua ai tagata talitonu. Na ia tusi: “Ua faapologaina aʻu e aʻu mo tagata uma, ina ia atili ai ona toatele tagata e mafai ona ou maua . . . Ina o galulue ma tagata o Nuu Ese, sa ou ola e faapei o se tagata o Nuu Ese, e lē i lalo o le Tulafono a Iutaia, ina ia ou maua ni tagata o Nuu Ese. . . . Ua ou faia nei mea uma lava ona o le tala lelei, ina ia tofusia faatasi i ona faamanuiaga.” (1 Korinito 9:19-23, Today’s English Version) Pe o taʻutonuina e nei upu le taliaina o se faigaʻai faapaupau e faatosina ai tagata o Nuu Ese i le Faa-Kerisiano?

Ia iloilo ma le faaeteete faamaoniga o loo siomia ai le faamatalaga a Paulo. I le fuaiupu e 21, na ia faapea mai ai: “E lē o le uiga o lenei mea faapea ua ou lē usiusitai i le tulafono a le Atua; o loo ou iai moni lava i lalo o le tulafono a Keriso.” (TEV) O lea, e leʻi faagutugutulua o ia i mataupu na sa solia ai le tulafono a Keriso, ae sa ‘ola o ia e pei o se tagata o Nuu Ese’ e ala i lona faaaloalo i tu masani ma agaifanua pe afai sa lē feteenai na mea ma poloaiga faa-Kerisiano.a

Faatasi ai ma le manatuaina o lenei mea, seʻi manatu i le pe o le a faapefea ona manatu i le faaofi mai o faigaʻai faapaupau i le “Faa-Kerisiano” i lalo o le igoa o le Kirisimasi pe afai e malamalama i poloaiga o loo mulimuli mai a le Tusi Paia: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? . . . Pe faapefea foi ona tofusia faatasi o lē talitonu ma le ua le talitonu? . . . O lea ia o mai ai outou nai totonu ia te i latou, ma ia outou vavae mai, ua fetalai mai ai [Ieova], aua foi tou te papai atu i se mea leaga; ona ou talia ai lea o outou.” (2 Korinito 6:14-17) E tusa lava po o ā faamolemolega atonu o le a fai mai, ae o le faamuliluaina o le Faa-Kerisiano faatasi ma faigaʻai faapaupau, ua lē o le auala lena e faafeiloai ai Iesu e avea o le Faaola. Sa lē o se mea talafeagai lena mo le uluai senituri ina ua afio mai Iesu i le tino, ma ua faapena moni lava ona lē talafeagai i aso nei po o le lumanai, pe a afio mai Keriso e avea o le Tupu e faaooina mai faamasinoga a le Atua. (Faaaliga 19:11-16) O le mea moni, o i latou ua filifili e faamanatu faigaʻai faapaupau i tua o foliga ua suia i le “faa-Kerisiano” ua faapena moni lava lo latou faafitia o Iesu Keriso.

“Kerisiano ua Natia” e Leʻi Toe Faafoisia

Ia fai ma lesona le mea na tupu i tagata Katoliko i Iapani i le vaitaimi na pulea ai Iapani e malo faafitafita. Ina ua amata ona taofia faiga faa-Katoliko i le 1614, e tolu lava ni filifiliga na tuuina atu i nisi o tagata Katoliko Iapani pe tusa ma le 300,000: o le avea ma maturo, lafoai lo latou faatuatuaga, po o le faia faalilolilo. O ē na faia faalilolilo, sa taʻua o Kerisiano ua natia. Ina ia faafoligaeseina lo latou faatuatuaga, na latou liliu atu ai i tu eseese faa-Puta ma le faa-Shinto. I la latou tapuaiga tāutu, sa latou faaaogā ai Maria Kannon, o Maria lava lea na suia ona foliga i se ituaiga o atua fafine lotu Puta o loo sii se tamaitiiti. O a latou faigaʻai sa faafefiloi ma faiga faa-Puta, faa-Katoliko, ma le lotu faa-Shinto a le tagata lava ia. Ae peitai, ina ua faamalosia ina ia auai i tanuga o maliu faa-Puta, sa latou lagi faapese tatalo faa-Kerisiano ma faia modoshi, o se sauniga e faaleaogāina ai le sauniga faa-Puta. O le ā le mea na tupu i na “Kerisiano”?

“E tusa ai ma le mea sa popole i ai le toatele o na Kirishitans [Kerisiano],” ua faamatalaina e le tusi The Hidden Christians, faapea “sa tuputupu aʻe i totonu o o latou loto le pipii mau atu i le lotu ua faafaigata ai ia i latou ona lafoai le tapuaiga i atua o Shinto ma Puta.” Ina ua tatalaina le sa, ma ua toe foi atu misionare Katoliko i Iapani, sa pipii mau atu pea le toatele o na “Kerisiano ua natia” i la latou ituaiga o tapuaiga palu faatasi.

Ae peitai, pe mafai e le Lotu Katoliko ona faitioina na “Kerisiano ua natia” o ē na mumusu e toe faafoisia i latou i faiga faa-Katoliko Roma? Ua faapena foi ona talia e le Lotu Katoliko le tele o aʻoaʻoga ma faigaʻai faapaupau, e aofia ai ma le Kirisimasi. Ae ui lava ina fai mai tagata Katoliko ma Porotesano o i latou o Kerisiano, ae ua faafaapaupauina lava la latou “Faa-Kerisiano” i faigaʻai faapaupau, po ua latou lē teena ai ea foi i lea faiga Iesu Keriso?

Toe Faafoisia i le Faa-Kerisiano Moni

O Setsuko, o se Katoliko tuutoina mo le 36 tausaga, sa iʻu ina ia iloa lena mea. Ina ua mavae le Taua Lona Lua a le Lalolagi, sa ia taumafai e faatumuina lona matelaina faaleagaga e ala i le aufaatasi atu i se lotu Katoliko. ‘Maeu le faamalieina ai!’ sa ia manatu ai a o ia auai i Misasa o le Kirisimasi ma vaai atu i le matagofie o laau Kirisimasi i totonu ma fafo o lana falesa. “Sa ou lagona le mitamita i a matou teuga matagofie, na sa sili mamao aʻe na i lo o isi falesa sa latalata mai,” na ia fai mai ai. Ae peitai, sa leai se malamalamaga moni o Setsuko i aʻoaʻoga a le Katoliko, e ui lava sa avea foi o ia ma faiaʻoga i le aʻoga Aso Sa mo se taimi umi. O lea, pe a manao e matuā faaaafia o ia i galuega faalelotu, ona ia fesili atu lea i le latou patele ni nai fesili. Na i lo le taliina o ana fesili, sa taʻu faatauvaaina o ia e le patele. I le ita, sa filifili ai o ia e suesue lava ia i le Tusi Paia. I le lua vaiaso mulimuli ane, na asiasi atu ai ni Molimau a Ieova ia te ia, ma sa ia talia se suesuega faale-Tusi Paia i lona aiga.

Ua ia faamatala mai: “Sa o se mea tiga le faafesagaʻi ma upu moni o le Tusi Paia na sa faamaonia ai le sese o oʻu uluai talitonuga. Sa oo lava ina ou maua i le alopecia neurotica, ua toulu loʻu lauulu ona o loʻu lē fiafia. Ae peitai, sa auaumalie ona susulu mai le malamalama o le upu moni i loʻu loto. Sa faateʻia lava aʻu i le aʻoaʻo faapea sa lē tatau ona mafai ona fanau Iesu i se po timuga malūlū ia Tesema, ana o lea semanū e lē o leoleoina e leoleo mamoe a latou lafu i fafo i le po. (Luka 2:8-12) Sa luluina ai loʻu manatu e uiga i le fanau mai o Iesu, ona sa matou faaaogā vavae e fai ma kiona e teuteu ai vaaiga i mamoe ma leoleo mamoe.”

Ina ua uma ona faamautinoa o ia lava e uiga i mea o aʻoaʻo moni e le Tusi Paia, sa filifili ai loa Setsuko e taofia lona toe faamanatuina o le Kirisimasi. Ua lē o toe iai ia te ia le “agaga o le Kirisimasi” e faatasi i le tausaga ae ua faaalia le agaga fiafia o le foai faa-Kerisiano i aso uma lava.

Afai e te talitonu ma le faamaoni ia Keriso, aua e te ita pe a e vaai i faiga faapaupau o faapolusioneina le Kirisimasi. Ua na ona latou toe faamanatuina o le mea na iai i le amataga—o se faigaʻai faapaupau. O le Kirisimasi e lē taʻitaʻiina atu ai se tasi e talia Iesu Keriso, o lē ua uma ona toe faatasi mai lē vaaia e avea o se Tupu faalelagi. (Mataio, mataupu 24 ma le 25; Mareko, mataupu 13; Luka, mataupu 21) Na i lo lea, o Kerisiano moni latou te faaalia le agaga e pei o Keriso i le tausaga atoa, ma latou te folafola le tala lelei o le Malo, lea ua avea ai Iesu ma Tupu. O le auala lena e finagalo le Atua ia tatou faafeiloaia ai Iesu Keriso e avea o lo tatou Faaola ma le Tupu o le Malo.—Salamo 2:6-12.

[Faaopoopoga i lalo]

[Ata i le itulau 7]

O Kerisiano moni e āva ia Iesu i le tausaga atoa