Lipoti a Ē Faalauiloa le Malo

O Molimau a Ieova, e Talaʻi Lē Fuafuaina Faatasi ma ni Iʻuga Lelei

E TOATELE tagata sa muai faailoa atu i ai le upu moni o le Tusi Paia ina ua talaʻi atu lē fuafuaina i ai se tasi o Molimau a Ieova ia i latou. I lenei mea, ua mulimuli ai Molimau i le faaaʻoaʻoga a Iesu Keriso, o lē na talaʻi lē fuafuaina i se fafine Samaria i se vaieli ina ua sau o ia e utu vai. (Ioane, mataupu e 4) I Aferika i Sasae, sa talaʻi lē fuafuaina atu ai se tasi o Molimau a Ieova i se taupousa Katoliko. Ua faailoa mai e le ofisa o le lala o le Sosaiete a le Olo Matamata le mea na iʻu i ai:

◻ I le taeao po lava o se tasi aso ina o malaga atu se tuafafine Molimau i le taulaga, sa la fetaui ai ma se taupousa Katoliko. Sa ia faaaogā loa le avanoa e fesili atu ai i le taupousa: “O fea a e alu i ai i lenei taimi o le aso?” O le tali sa faapea mai: “Ou te alu ou te tatalo i loʻu Atua.” Ona ia fesili atu loa lea i le taupousa: “E te iloa ea le igoa o lou Atua?” “E lē o lona igoa ea o le Atua?” na tali mai ai le taupousa. Ona ofo atu loa lea o le Molimau o le a ia alu atu i lona fale i lena afiafi e talanoa ai e uiga i le suafa o le Atua. Ina ua uma le talanoaga, ona alu atu lea o le taupousa i lana lotu ma fesili atu i se tasi o patele pe na te iloa po o le ā le uiga o le upu “Ieova.” O le tali na aumai, “O le suafa o le Atua.” Sa matuā ofo tele le taupousa i le faalogo atu sa iloa e le patele lenei mea ae leʻi aʻoaʻoina atu lava ia te ia.

Sa asiasi faalausosoo atu le Molimau i le fafine mo aso e iva e leʻi motusia ma aʻoaʻo o ia i le upu moni e uiga i le Tolutasi, le solu, le afi i hele, ma le faamoemoe mo ē ua oti. Sa matuā taofia e le fafine mea uma lava, ma i lea na ia talosaga atu ai i le Molimau ina ia tuu atu ia te ia sina taimi seʻi manatunatu ai i nei aʻoaʻoga fou uma. Ina ua mavae le lua vaiaso, sa ia toe faafesootai atu le Molimau ma talosaga atu mo nisi talanoaga atili. I le taimi lea ua faia le filifiliga a le taupousa o le a tuua le lotu, ma ua uma ona ia faatamaʻia ana faatusa, losalio, ma le koluse. Sa taumafai le patele e faaōleōle o ia ina ia toe foi mai i le lotu, ae sa maumauai o ia e tausisi i le upu moni. Sa mulimuli ane ona papatisoina lea o ia ma sa auauna e avea o se paeonia lagolago mo le tele o masina e ui lava i le lē lelei o lona soifua maloloina ma ona tausaga ua oo ina matua.

Talu ai foi ona o lona fale e matuā telē lava, sa ia ofoina atu ai i le faapotopotoga lona fale e faaaogāina e fai ma Maota o le Malo. Sa suia i apa fou e uso le taualuga tuai o le fale, na talepe i lalo puipui i totonu, ma faia se vaega telē o le fale e avea o se nofoaga matagofie mo sauniga. Ua nofo nei lē sa avea muamua ma taupousa Katoliko i se potu ua faia i le pito i tua o le maota. Ua matuā fiafia lava o ia ona ua mafaia ona fai o lenei foai tauofo i le tapuaiga ia Ieova.

◻ O le isi mea na tupu e faaalia ai le atamai o le talaʻi lē fuafuaina e sau mai Kampala, i Uganda. I lona agaʻi atu i se ofisa o le malo, na talanoa lē fuafuaina atu ai se Molimau misionare ia i latou sa iai faatasi ma ia i se auala faasitepu e alu i le eletise (elevator). O se tasi tagata, o Mr. L——, na faaalia lona naunau e talia le lomiga na ofo atu, ae sa lē mafai ona avea i lena taimi. O lea na ia tuuina atu ai i le misionare lona igoa ma le tuatusi o lona ofisa. Mulimuli ane, na alu atu i inā le misionare ma fesili po o fea Mr. L——. Sa valaau atu ia te ia, ae sa matuā ofo lava le misionare, ona e ese le tagata lea na sau. E toalua tagata sa galulue ai i lena ofisa e igoa i le igoa lava lea e tasi. Sa tuuina atu se molimau puupuu ia Mr. L—— lona lua, ma sa ia faaalia foi le matuā fiafia. Ae o Mr. L—— muamua na lē toe iai sona naunau, ae sa amataina se suesuega faale-Tusi Paia ma Mr. L—— lona lua. Ua avea nei o ia ma Molimau papatisoina, ma ua faia foi e lana avā ma lona atalii se agaʻigaʻi i luma i le papatisoga.

O Iesu Keriso o le Leoleo Mamoe Lelei ma ua ia silafia tagata pei ni mamoe ma ē o loo naunau o latou loto i le amiotonu. Ua faaalia i nei mea tutupu faapea, na te taʻitaʻia ona soʻo ia i latou na. E mafai ona fua tele le molimau lē fuafuaina!—Ioane 10:14.