Lipoti a Ē Faalauiloa le Malo

Faasaoloto e le Upu Moni o le Tusi Paia se Taupousa i Bolivia

E TOATELE tagata loto faamaoni o loo sosola ese mai lotu sese, ua aʻoaʻoina le upu moni o le Tusi Paia, ma ua ō mai ina ia tapuai ia Ieova, le Atua moni. E sili atu i le 7,600 ua latou faia faapea i Bolivia, e aofia ai ma se taupousa.

Ina ua faatoʻā iva tausaga lona matua, na uluai feiloai atu ai M—— i se tasi o Molimau a Ieova. Sa ia tatalaina le faitotoa ina ua asiasi atu le Molimau i lona aiga, ma o le uluai taimi lea na faatoʻā faalogo ai o ia o faaleoina le suafa o le Atua o Ieova. Sa teu ai pea i lona mafaufau mo le tele o tausaga.

Talu ai sa na o ia le teine o le aiga, sa faia ai loa se filifiliga ina ia avea o ia ma taupousa. Ua fai mai M——: “Maeu se lagona fiafia sa oo ia te aʻu ona o le a ou iai i le auaunaga a le Atua, ona o le mea lena sa ou mafaufau i ai.” Ae o lona olioli sa liua i se vaaiga lē mautonu ina ua ia vaaia le lē faamasinotonu ma le faailoga tagata na faia i le nofoaga o taupousa. Fai mai a ia: “Atonu o le a lē mafai ona galo ia te aʻu na taimi o mafatiaga ma le sasaina i le faaletino ma le faaleagaga sa matuā tiga, sa faapogaia ai ona ou manatu i le Atua faapea e lē o Sē e alofa, ae o Lē e faasalaina tagata e aunoa ma se tiga alofa.”

Ua faaauau ona ia faapea mai: “E oo atu i le taimi na avea ai aʻu ma taupousa, sa leʻi mafai ona ou mauaina le suafa o Ieova i le Tusi Paia. Sa na o ‘Yahweh’ na ou maua, ma sa matuā faavevesia tele ai aʻu i lena mea. I se tasi aso, sa oo ai lava ina ou alu atu e saili mo na tagata o ē na tautala e uiga ia Ieova, ae ou te leʻi maua i latou.

“Na mavae taimi, ma i se tasi aso ina o ou alu atu i le fale o lo matou aiga, sa ou vaaia ai se laupapa o tusia ai, ‘Maota o le Malo o Molimau a Ieova.’ Sa ou manao e taʻu atu ia i latou faapea o i latou o ni perofeta pepelo, ae e leai se tasi sa iai i le maota. Sa ou toe foi i le Aso Sa, ma sa faia ai se sauniga. E toatele nisi sa foliga mai na faateʻia i le vaai mai i se taupousa o loo ofu se ofu sauatoa o taupousa o auai i le sauniga. Ina ua uma le sauniga, sa ou taumafai e vave ona alu ese. Ae peitai, sa faafeiloai mai aʻu e se tasi Molimau, o lea na ou fesili atu ai ia te ia, ‘O le ā le mea ua outou upuvale ai i Lē Paia i lo outou tauaveina o lena igoa?’ O laʻu fesili na taʻitaʻiina atu ai i se talanoaga faale-Tusi Paia, ma sa ou faia se fuafuaga ma ia ina ia asiasi atu ia te aʻu i le fale o loʻu aiga. Sa tuli o ia i fafo e oʻu mātua. Ae peitai, sa ma toe feiloai foi i le lua masina mulimuli ane, ma sa ia valaaulia aʻu i lona aiga mo se suesuega faale-Tusi Paia. Sa matuā faafiafiaina lava aʻu i faamatalaga na ia faailoa maia, e faamaonia ai faapea e ao i Kerisiano ona faaaogā le suafa o le Atua. O lena faamaoniga na aumaia ai ia te aʻu le malosi na ou manaomia e faafitia ai mea lē aogā uma ia na ou aʻoaʻoina a o avea ma taupousa.

“E tele mea o loo oʻu manatua e uiga i loʻu olaga i le nofoaga o taupousa. Mo se faaaʻoaʻoga, i se tasi taimi, sa ou manaomia ai nisi meaʻai. O lea, sa ou tusi atu ai i oʻu mātua ma talosaga atu ina ia aumai ni meaʻai ma aʻu, e aunoa ma le iloa faapea sa iloiloina uma lava tusi i le nofoaga. I le isi ʻaiga na sosoo ai, na tuu mai ai i oʻu luma le anoanoaʻi o falaoa ma siamu, ina ia faaloto ai aʻu. O lenei la ua matuā tele aʻu meaʻai. Sa ou faailoa atu lenei mea i aʻu uo, ma na fautua mai se tasi faapea ou te tago e nuti falaoa na e lē mafai ona ou ʻaina, ma faasalalau solo i luga o le fola. Ina ua ou faia le mea lena, sa tago mai loa se tasi o taupousa ma tata atu aʻu ma āto i lalo i luga o le fola, ma le faatonuga maʻatiʻati ina ia ou tago e eto faamamā le fola atoa i loʻu laulaufaiva. E matuā telē lava le potu. A o oʻu usiusitai i le faatonuga, sa ou faalogoina le toē lemu ma le leo tetele—e matuā leai lava se alofa na faaalia.

“Ua mafai nei ona ou iloa, maeu le ofoofogia o le saoloto mai na mea uma. E pei lava ona faatalitalia, o lenei saolotoga sa aafia ai le faia o ni faataulagaga. I se tasi taimi, na tuli ese ai aʻu e loʻu tamā mai le fale. Ae e ui i lea, a o leʻi tuua le nofoaga o taupousa, sa ou maua ai se faaeaga o le fesoasoani atu i isi taupousa talavou e aʻoaʻoina le upu moni. Ua ou olioli e faapea atu, o nisi o i matou ua uma ona tuuina atu o matou ola ia Ieova le Atua!

“Ina ua ou tuua le nofoaga, sa faigata lava mo loʻu tamā ona malamalama i le mafuaaga ua ou lafoaiina ai ni galuega e lelei totogi, ae maimau ai le taimi. Ae peitai, sa ou manaomia ni taimi se tele mo le auaunaga a le Atua. I le taimi nei, ua ou auauna ai o se paeonia lagolago, faatasi ma se olaga lē fenuminumiaʻi ae tauia. Ma o se olioli sili mo aʻu, ona ua auai faatasi ma aʻu loʻu tinā ma oʻu tuagane, i le auaunaga a Ieova.”

E moni lava, e mafai e le upu moni o le Tusi Paia ona faasaoloto se tasi mai faiga a lotu sese o lenei lalolagi, ma ua aumaia ai le olioli ma le fiafia tumau.—Ioane 8:32.