Pe sa Aʻoaʻo e le Uluai Motu Faapea o le Atua o se Tolutasi?
Vaega 3—Pe sa Aʻoaʻoina ea e Apolotisi le Aʻoaʻoga o le Tolutasi?
I ona lomiga o Mati 1, 1992, ma Iuni 1, 1992, na faaalia ai e Le Olomatamata faapea sa leʻi aʻoaʻoina e Iesu ma ona soʻo le aʻoaʻoga o le Tolutasi, e leʻi aʻoaʻoina foi e Tamā Faaaposetolo i le tau faaiʻuiʻuga o le uluai senituri ma le tau amataga o le senituri lona lua T.A. Pe sa aʻoaʻoina ea e tagata lotu i se taimi mulimuli ane i le senituri lona lua?
PE TUSA o le ogatotonu o lo tatou lua senituri T.A. seia oo atu i lona faaiʻuga, na aliaʻe ai ni tagata lotu ua taʻua i aso nei o Apolotisi (o Ē sa Lagolagoina le Faatuatua). Sa faia a latou tusitusiga e puipuia ai le Faa-Kerisiano na latou iloa, faasaga i filosofia faatuʻiese sa taatele i le pulega a Roma i na ona po. Na aofia i a latou tusitusiga le faaiʻuga, ma le taimi ina ua maeʻa tusitusiga a Tamā Faaaposetolo.
O nisi o Apolotisi o ē sa faia a latou tusitusiga i le faa-Eleni, e aofia ai Justin Martyr, Tatian, Athenagoras, Teofilo, ma Clement o Alexandria. O se tasi o Apolotisi na faia ana tusitusiga i le faa-Latina, o Tetuliano. Pe na latou aʻoaʻoina ea le Tolutasi a Kerisinetoma o ona po nei—e toatolu peresona e tutusa (le Tamā, le Alo, ma le Agaga Paia) i se Aoātua, o i latou uma o le Atua moni, peitai e lē o ni Atua e toatolu ae o le Atua e toatasi?
“E Maualalo Ifo le Alo”
Ua faamatala e Dr. H. R. Boer, i lana tusi A Short History of the Early Church, e uiga i le salalau atu o le aʻoaʻoga a le au Apolotisi e faapea:
“Na aʻoaʻoina e Justin [Martyr] faapea, a o leʻi foafoaina le lalolagi sa na o le Atua lava sa iai ma sa leai se Alo. . . . Ina ua finagalo le Atua e foafoaina le lalolagi, . . . sa ia afuafuaina loa pe faia se isi foafoaga tauatua ina ia foafoaina le lalolagi mo ia. Na taʻua lenei foafoaga tauatua o le . . . Alo, ona sa afuafuaina o ia; na taʻua o ia o le Lokou ona sa saunia o ia e ala i le Fuafuaga po o le Finagalo o le Atua. . . .
“O le mea lea, na aʻoaʻoina ai e Justin atoa ma isi o Apolotisi e faapea o le Alo o sē na foafoaina. O ia o se foafoaga maualuga, o se foafoaga e matuā lava ma totoe lona malosi e foafoaina ai le lalolagi, ae e ui i lena, o ia o se mea na foafoaina. I tala e uiga i lotu, o loo taʻua ai lenei faiā a le Alo ma le Tamā o se tulaga maualalo. E maualalo ifo le Alo, o lona uiga e tulaga lua, pe faalagolago atu, ma na foafoaina e le Tamā. Sa talitonu le au Apolotisi i le aʻoaʻoga o le tulaga maualalo.”1
Ua faapea mai Dr. Martin Werner i le tusi The Formation of Christian Dogma, e uiga i le uluai malamalamaaga i le faiā a le Alo ma le Atua:
“O lena faiā, sa matuā manino ona malamalama i ai o se faiā e ‘maualalo’, o lona uiga e maualalo ifo Keriso i le Atua. So o se mea lava i le Feagaiga Fou, e lagā ai se iloiloga o le faiā a Iesu ma le Atua, le Tamā, . . . e faia aʻe ai ma faavasegaina ai o se faiā e maualalo. Ma o Lē sa sili ona lagolagoina aʻiaʻi le tulaga maualalo o le Alo i le Feagaiga Fou, e tusa ai ma le faamaumauga a tusi o le Evagelia, o Iesu lava ia . . . O lenei uluai tulaga e tumau pea ma ua faaalia mai, sa mafai e lea ona faatumauina ai o ia mo se taimi umi. ‘O aʻoaʻo faifeau matutua uma lava i tua atu o le faa-Nicea sa aʻoaʻoina le maualalo ifo o le Lokou i le Atua.’”2
I le ōgatasi ma lenei, ua taʻua ai e R. P. C. Hanson, i le The Search for the Christian Doctrine of God:
“E aunoa ma se aʻoaʻo faifeau i Lotu i Sasae po o Sisifo sa leʻi iai sina manatu e uiga i le maualalo ifo o le Alo i le Tamā, a o leʻi gāpā le Fefinauaiga i Arian [i le senituri lona fa].”3
Ua faaopoopo mai e Dr. Alvan Lamson, i le The Church of the First Three Centuries, le taʻutinoga lenei e uiga i le aʻoaʻoga a taʻitaʻi lotu a o lumanai le Fono i Nicaea (325 T.A.):
“Sa masani ona talia e Tamā i tua atu o le faa-Nicea, le itiiti ifo o le Alo, pe afai e leʻi suia . . . O lo latou manatu e tumaʻoti ese le Alo mai le Tamā ua faamaonia lea i le tulaga ua latou faailoa mai ai ma le manino lona itiiti ifo . . . . Sa latou manatu ia te ia o sē e tumaʻoti ese ma maualalo.”4
Ua faapena foi ona taʻua e Robert Grant, i le tusi Gods and the One God, le faamatalaga o loo i lalo e uiga i Apolotisi:
“I le pei o le Feagaiga Fou, o aʻoaʻoga a tagata o Keriso, e matuā maualalo lava. E maualalo pea le Alo i le Tamā, o lē o loo avea ma Atua e toatasi o le Feagaiga Tuai. . . . O lea, o le mea ua tatou iloa mai i nei uluai tusitala, e lē o se aʻoaʻoga o le Tolutasi . . . A o leʻi oo i le fono i Nicaea, sa toetoe lava o suesuega uma o talaaga faa-Kerisiano sa maualalo ifo i le lalolagi aoao.”5
Ua aʻoaʻoina e le Tolutasi a Kerisinetoma faapea e tutusa le Alo ma le Atua le Tamā, i le faavavau, malosi, tulaga, ma le atamai. Ae ua faapea mai le au Apolotisi, e lē tutusa le Alo ma le Atua le Tamā. Latou te manatu i le Alo o sē e maualalo ifo. E lē o le aʻoaʻoga lena o le Tolutasi.
Toe Manatunatu i Aʻoaʻoga o le Uluai Senituri
Sa sili atu ona faaalia e le au Apolotisi atoa ma isi uluai Tamā Faalelotu mea na aʻoaʻoina e Kerisiano o le uluai senituri e uiga i le faiā a le Tamā ma le Alo. Matau le auala ua faaalia ai lenei itu i le tusi The Formation of Christian Dogma:
“I le vaitaimi o Uluai Kerisiano, sa leʻi foliga mai na iai se faafitauli po o se fefinauaiga e uiga i le Tolutasi, e pei o lea ua tutupu aʻe ai feteenaiga sauā i le Lotu. E lē taumatea o le mafuaaga o lea itu, ona o le mea moni faapea, i le Uluai Faa-Kerisiano, sa avea ai Keriso . . . o se foafoaga maualuga faalelagi i le faapotopotoga o agelu, o lē sa foafoaina ma filifilia e le Atua mo le galuega o le aumaia o le Malo o le Atua, . . . i le faaiʻuga o tausaga.”6
Ua taʻutino mai e le The International Standard Bible Encyclopedia isi manatu e uiga i le aʻoaʻoga a uluai Tamā Faalelotu:
“I uluai mafaufauga o le Lotu, o le pogai o le taʻua o le Atua le Tamā, ona e manatu muamua ia te Ia, faapea e lē o le Tamā o Iesu Keriso, ae o ia o le puna o mea uma. O lea la, o le Atua le Tamā e pei ona iai, o le Atua e matuā silisili atu ona lelei. Ua talafeagai ai la ia te Ia faamatalaga e pei o le leai o se amataga, e lē mafai ona oti, saʻo lele, e lē mafaamatalaina, e lē vaaia, ma e leʻi foafoaina. O Ia o lē na faia mea uma, e aofia ai mea o le foafoaga, mai mea e leʻi iai muamua. . . .
“O lenei mea e ono fautuaina ai le manatu faapea o le Tamā e toatasi, o le Atua lava ia ae o le Alo ma le Agaga ua naʻo nisi e tulaga lua. O le tele o uluai faamatalaga e foliga mai latou te lagolagoina lenei manatu.”7
A o faaauau pea ona taʻu faatauvaaina e lenei enesaikolopilia ia upu moni ma faapea mai sa taliaina le aʻoaʻoga o le Tolutasi i lena uluai vaitaimi, ae ua faamaonia e mea moni le sese o lea taofi. Ia manatunatu i upu nei a se aʻoaʻo faafaifeau Katoliko lauiloa o John Henry Cardinal Newman:
“Seʻi tatou faailoa atu ia faapea o aʻoaʻoga uma lava o loo faaautū i lo tatou Alii, sa faaauau pea ma le lē masuia ona taʻutino mai e le Uluai Lotu . . . Peitai, i le isi itu, e matuā eseese lava lea ma le aʻoaʻoga Katoliko e uiga i le Tolutasi. Ou te lē iloa po o le ā le uiga e mafai ai ona faapea atu e iai se ioega a uluai [taʻitaʻi lotu] e taliaina ai . . .
“E leʻi taʻua lava i Faamatalaga Faalelotu o na uluai aso . . . le [Tolutasi]. E moni, na latou taʻua ai se Toatolu; ae sa leʻi taʻua ai lava, ma e lē taitai ona aofia ai le iai o se mealilo i le aʻoaʻoga, faapea o le Toatolu e Toatasi, e tutusa uma i Latou, e faavavau uma, e leʻi foafoaina uma, e tutusa uma i le malosi, ma e lē mafaamatalaina uma.”8
Le Mea na Aʻoaʻoina e Justin Martyr
O se tasi o uluai Apolotisi o Justin Martyr, o lē sa ola e tusa o le 110 T.A. e oo i le 165 T.A. I le tele o ana tusitusiga, e aunoa ma sona taʻua ai o ni peresona tutusa e toatolu i le Atua e toatasi.
Mo se faaaʻoaʻoga, e tusa ai ma le Jerusalem Bible a le Katoliko, ua faapea mai le Faataoto 8:22-30 e uiga ia Iesu a o leʻi soifua mai o se tagata: “Na foafoaina aʻu e Iaue ina ua muai faailoa mai lana fuafuaga, e muamua i ana galuega uma. . . . Na fanaua aʻu, a o leʻi iai le sami . . . Sa fanaua aʻu, a o leai ni mauga iti . . . Na ou iai ma ia [le Atua], o se matai tufuga.” I le talanoaina o nei fuaiupu, ua faapea mai Justin i lana Dialogue With Trypho:
“Ua folafola mai e le Tusi Paia faapea, sa afuafuaina lenei Atalii e le Tamā a o leʻi foafoaina isi mea uma; ma o le a ioe so o se tasi e faapea o sē ua afuafuaina, e matuā maʻoti ese lava mai lē na fanau mai ai.”9
Talu ai sa afuafuaina le Alo e le Atua, ua faaaogā ai e Justin le upu “Atua” e faatatau i le Alo. Ua ia taʻua i lana First Apology: “E iai le Alo o le Tamā o le lagi ma le lalolagi; o lē ua muai afuafuaina foi e avea ma Upu a le Atua, e avea foi ma Atua.”10 O loo faatatau foi e le Tusi Paia le taʻu “Atua” i le Alo o le Atua. I le Isaia 9:6 ua taʻua ai o ia o le “Atua malosi.” Peitai ua taʻua foi i le Tusi Paia, agelu, tagata, atua sese, ma Satani o ni “atua.” (Agelu: Salamo 8:5; faatusatusa i le Eperu 2:6, 7. Tagata: Salamo 82:6. Atua sese: Esoto 12:12; 1 Korinito 8:5. Satani: 2 Korinito 4:4.) I Tusitusiga Eperu, o le upu mo le “Atua” ʼEl, o lona uiga moni o “Lē e Malosi.” E tutusa ma le upu the·osʹ i Tusitusiga Eleni.
E lē gata i lena, o le upu Eperu o loo faaaogā i le Isaia 9:6 ua faaalia ai se eseesega maʻoti i le va o le Alo ma le Atua. O inā o loo taʻua ai le Alo o le “Atua malosi,” ʼEl Gib·bohrʹ, ae lē o le ‘Atua e Ona le Malosi Uma lava.’ O lena upu i le faa-Eperu o le ʼEl Shad·daiʹ ma e faapitoa ona faatatau ia Ieova le Atua.
Peitai, ia matau, a o taʻua e Justin le Alo o le “Atua,” sa lē taitai ona ia faapea mai o le Alo, o se tasi lea o peresona tutusa e toatolu, o i latou uma o le Atua e faia uma aʻe i le toatolu le Atua e toatasi. Na i lo lena, ua ia faapea mai i lana Dialogue With Trypho:
“E iai le . . . isi Atua ma le Alii [o Iesu a o leʻi avea ma tagata] e gauai atu i Lē na Foafoaina mea uma [o le Atua e Ona le Malosi Uma lava]; ua taʻua foi [le Alo] o se Agelu, auā ua Ia [le Alo] faailoa atu i tagata e uiga i Lē na Foafoaina Mea uma—o lē e leai se isi Atua e i luga atu o ia—e manao e faailoa atu ia i latou. . . .
“E maʻoti ese mai [le Alo] ia te Ia o lē na faia mea uma,—o lona uiga, i le aotelega, e lē [eseese] i finagalo.”11
E manaia le manatu ua aliaʻe i le mataupu e 6 o le First Apology a Justin, lea o loo ia finau atu ai i le tuuaiga faapaupau faapea, o Kerisiano o ni tagata e lē talitonu i le Atua. Ua ia tusia faapea:
“O Ia le [Atua], ma le Alo (o lē na Ia auina mai ma aʻoaʻoina i tatou i nei mea, ma le anoanoai o isi agelu lelei o ē na mulimuli mai ma sa faia e pei o Ia), atoa ma le Agaga faavaloaga, ua tatou tapuai atu ai ma faaaloalogia.”12
Ua faapea mai lē na faaliliuina lenei faamatalaga o Bernhard Lohse: “E peiseaī e lē lava lenei faitauga, ona o loo taʻua ai agelu o ni foafoaga o loo faamamaluina ma tapuaia e Kerisiano, e lē o faatautū Justin i le taʻua muamua o agelu, a o leʻi taʻua le Agaga Paia.”13—Tagai foi i le An Essay on the Development of Christian Doctrine.14
O lea, a o foliga mai ua see ese Justin Martyr mai le aʻoaʻoga mamā a le Tusi Paia i le mataupu, o ai e ao ona avea ma taulaʻiga o le tapuaiga faa-Kerisiano, ae ua manino sa leʻi manatu o ia i le Alo o sē e tutusa ma le Tamā, e pei ona manatu ai i agelu e lē tutusa ma Ia. E tusa ai ma Justin, tatou te toe otootoina mai le Church of the First Three Centuries a Lamson:
“Sa manatu Justin i le Alo e maʻoti ese mai le Atua, ma e itiiti ifo ia te ia: o le maʻoti ese, e lē i le uiga faaonaponei, o le faia aʻe i tagata po o peresona e toatolu, . . . ae o le maʻoti ese i le uiga ma le natura; e iai moni o ia, e tuese mai le Atua, o lē na aumaia ai lona malosi uma ma ona tofiga; e lagolagosua ia te ia, ma gauai atu i mea uma lava mo lona finagalo. E pule aoao le Tamā; e maualalo ifo le Alo: o le Tamā o le puna o le malosi; o le Alo o lē na te taliaina: ua foafoaina e le Tamā; le Alo, e avea ma ana auauna po o se mea faigaluega, e faatinoina. E toalua i laʻua, ae e malilie faatasi, pe e tasi i le finagalo; ae e faamuamua pea le finagalo o le Tamā i lo le Alo.”15
E faaopoopo atu i lena, e leai se mea o faapea mai ai Justin o le agaga paia o se peresona e tutusa ma le Tamā ma le Alo. O lea, e leai se auala e mafai ai ona faapea atu ma le faamaoni sa aʻoaʻoina e Justin le Tolutasi faaonaponei a Kerisinetoma.
Le Mea na Aʻoaʻoina e Clement
Ua taʻua foi e Clement o Alexandria (e tusa ma le 150 T.A. e oo i le 215 T.A.) le Alo o se “Atua.” Ua ia taʻua foi o ia o “Lē na Foafoaina Mea,” o se faaupuga sa lē taitai ona faaaogāina i le Tusi Paia e faatatau ia Iesu. Pe sa ia uiga ea faapea sa tutusa le Alo i itu uma ma Lē na Foafoaina Mea e ona le malosi uma lava? Leai. E foliga mai sa faatatau e Clement i le Ioane 1:3, lena o loo faapea mai e uiga i le Alo: “Na ia faia mea uma lava.”16 Sa faaaogā e le Atua le Alo o se tufuga i Ana galuega faalefoafoaga.—Kolose 1:15-17.
Ua taʻua e Clement le Atua Pule Aoao “o le Atua ma le Tamā o lo tatou Alii o Iesu”17 ma ua faapea mai “o le Alii o le Alo o Lē na Foafoaina Mea.”18 Ua ia faapea mai foi: “O le Atua o tagata uma e na o le toatasi lava, o Lē na Foafoaina Mea lelei, e faamasinotonu, ma o le Alo [o loo] i le Tamā.”19 O lea, na ia tusia ai faapea, o loo iai le Atua e i luga aʻe o le Alo.
Ua tautala Clement e uiga i le Atua o lē e “muamua ma ua na o ia e aumai ai le ola e faavavau, lea ua talia e le Alo, mai ia te Ia [le Atua], e foai mai ia i tatou.”20 Ua manino o Lē na muai aumaia le ola e faavavau, e sili atu na i lo lē, e faaooina atu, e pei ona iai. O lea, ua faapea mai ai Clement e “muamua lava, ma sili atu ona maualuga”21 le Atua. E lē gata i lena, fai mai a ia, o le Alo “e latalata atu o ia ia te Ia o Lē e Ona le Malosi Uma lava e toatasi” ma o le Alo na te “faatonuina mea uma lava e tusa ai ma le finagalo o le Tamā.”22 Ua faaalia mai e Clement i lea taimi ma lea taimi le pule aoao o le Atua e Ona le Malosi Uma lava i luga o le Alo.
E tusa ma Clement o Alexandria, tatou te faitau ai i le The Church of the First Three Centuries:
“E mafai ona tatou otootoina mai ni faamatalaga a Clement e faatatau i le itiiti ifo o le Alo, lea ua faamaonia le maʻoti ese. . . .
“Tatou te maofa, pe afai e mafai e so o se tasi ona faitau i tusitusiga a Clement i se tulaga masani, ma vaai faalemafaufau ai mo sina taimi faapea sa manatu o ia i le Alo e matuā tutusa pau—ma le Tamā. Ua amanaia i so o se nofoaga lona tutoatasi ma lona tulaga e itiiti ifo, e pei ona aliali mai ai ia i tatou. Sa talitonu Clement faapea o le Atua ma le Alo e matuā eseese lava; i nisi faaupuga, o ni peresona eseese e toalua,—e pule aoao le tasi, a o le isi e maualalo ifo.”23
E lē gata i lena, e mafai foi ona toe faapea atu: E tusa lava pe aliali mai i nisi taimi ua sopoloa Clement mai le mea o loo fai mai ai le Tusi Paia e uiga ia Iesu, ae e aunoa ma se mea o ia taʻua ai se Tolutasi ua faia aʻe i ni peresona tutusa e toatolu i le Atua e toatasi. O apolotisi e pei o Tatian, Teofilo, ma Athenagoras, na ola i le va o ona po o Justin ma Clement, sa tutusa o latou manatu. Ua faapea mai Lamson “sa lē o i latou o ni Apolotisi e sili atu ia Justin lava ia; o lona uiga, sa leʻi talitonu i latou i se Toatolu e tutusa, e lē mavaevae, ae sa latou aʻoaʻoina se aʻoaʻoga e tuufaafeagai atoatoa ma lenei talitonuga.”24
Le Aʻoaʻoga Faalelotu a Tetuliano
O Tetuliano (e tusa ma le 160 T.A. e oo i le 230 T.A.) o ia lea na muai faaaogāina le upu Latina o le trinitas. E pei ona matauina e Henry Chadwick, sa manatu Tetuliano faapea o le Atua o sē e toatasi e faia aʻe i ni peresona e toatolu.’25 Ae, e lē o le uiga o lenei mea, faapea sa ia manatu i ni peresona e toatolu e tutusa uma ma faavavau uma. Peitai, sa atiina aʻe ona manatu e tusitala na mulimuli mai, o ē sa galulue i le aʻoaʻoga o le Tolutasi.
O le manatu o Tetuliano e uiga i le Tamā, le Alo, ma le agaga paia, sa matuā eseese mamao lava mai le Tolutasi a Kerisinetoma, auā sa avea o ia o se tasi o ē talitonu i le aʻoaʻoga o le tulaga maualalo o le Alo. Sa manatu o ia i le Alo o sē e maualalo ifo i le Tamā. Na ia tusia i le Against Hermogenes:
“E lē tatau ona tatou manatu faapea o loo iai se isi peresona na i lo le Atua e toatasi o lē e leʻi afuafuaina ma e leʻi foafoaina. . . . E mafai faapefea ona iai se isi mea e leva atu, na i lo le Tamā, ma o le mea moni i lenei itu, e sili atu ona lauiloa, na i lo le Alo o le Atua, le Upu na afuafuaina toatasi ma na muai foafoaina? . . . Ona sa lē manaomia Sē e foafoaina le [Atua] ina ia soifua mai ai, e sili atu ai la ona maualuga lona tulaga na i lo [le Alo] o lē sa iai sē na afuafuaina ina ia avea ai ma foafoaga.”26
Ua ia faaalia foi i le Against Praxeas, faapea e ese ma maualalo ifo le Alo mai le Atua e Ona le Malosi Uma Lava e ala i le faapea mai:
“O le Tamā o sē e atoa, ae o le Alo o sē na maua mai ma o se vaega o le mea atoa, e pei ona faailoa mai e Ia lava: ‘E sili loʻu Tamā ia te aʻu.’ . . . O lea, ua maʻoti ese ai le Tamā mai le Alo, e sili atu na i lo le Alo, e pei lava ona toatasi o Ia lē na foafoaina, ae o le isi, o Ia lē na fanau mai; E toatasi foi o Ia lē na auina mai, ae o le isi o Ia lē na maliu mai; ma e faapena foi ona toatasi o Ia lē na faia, ae o le isi, o Ia lē na ala mai ai le faia o mea.”27
Ua taʻua atili e Tetuliano i le Against Hermogenes, faapea, na iai le taimi sa leʻi soifua ai le Alo o se peresona, e faaalia ai sa leʻi manatu o ia i le Alo o se peresona mai le vavau e tutusa ma le tulaga na iai le Atua.28 Na taʻua e Katinale Newman: “Atonu sa talitonu Tetuliano i ni aʻoaʻoga e lē faavaeina faalelotu e uiga i le tupuaga e faavavau o lo tatou Alii.”29 E uiga ia Tetuliano, ua folafola mai e Lamson:
“O lenei amataga, po o le Lokou, e pei ona taʻua ai i le faa-Eleni, sa mulimuli ane avea ma Upu, po o le Alo e pei ona talitonu i ai Tetuliano, o lona uiga, o se peresona moni, e na o lē e faavavau na soifua mai o se mea totino a le Tamā. Peitai ane na tuu atu e Tetuliano ia te ia, se tulaga e maualalo ifo na i lo le Tamā. . . .
“I le fuafua atu e tusa ai ma faamatalaga ua talia e uiga i le Tolutasi i le taimi nei, o le taumafaiga ina ia faasaoina Tetuliano mai le taʻusalaina [o sē e tetee i aʻoaʻoga a le lotu] e lē aogā. E lē mafai ona ia tatalia le tototofoga mo sina minute.”30
Leai se Tolutasi
Afai e te faitauina uma tusitusiga a le au Apolotisi, o le a e iloa ai faapea, a o latou see ese mai nisi vala o aʻoaʻoga a le Tusi Paia, ae aunoa ma se tasi o i latou na aʻoaʻoina faapea e tutusa uma le Tamā, le Alo, ma le agaga paia i le faavavau, malosi, tulaga, ma le atamai.
Ua moni foi lenei i isi tusitala o le senituri lona lua ma le lona tolu, e pei o Irenaeus, Hippolytus, Origen, Cyprian, ma Novatian. A o taumafai nisi ina ia faatutusa le Tamā ma le Alo i nisi o vaega patino, ae i isi auala, sa latou manatu ai i le Alo o sē e maualalo ifo i le Atua le Tamā. Ma e leai se tasi o i latou sa tau manatu faapea e tutusa le agaga paia i le Tamā ma le Alo. Mo se faaaʻoaʻoga, ua taʻua e Origen (e tusa ma le 185 T.A. e oo i le 254 T.A.) faapea o le Alo o le Atua “o le Ulumatua o foafoaga uma”31 ma ua “taʻua o Ia o se foafoaga e sili ona leva o galuega faalefoafoaga uma” i le Tusi Paia.
So o se tusi faitau a ia uluai taʻitaʻi lotu, ua faaalia ai sa leʻi aʻoaʻoina le Tolutasi a Kerisinetoma i o latou aso. E pei ona fai mai le The Church of the First Three Centuries:
“O le aʻoaʻoga ua lauiloa i aso nei o le Tolutasi . . . e leʻi lagolagoina e tusitusiga a Justin: ma e mafai ona oo atu lenei iloiloga i Tamā uma i tua atu o le faa-Nicea; o lona uiga, o tusitala Kerisiano uma lava i senituri e tolu ina ua mavae le fanau mai o Keriso. E moni, sa latou tautatala e uiga i le Tamā, le Alo, atoa ma le faiga faavaloaga po o le Agaga paia, ae matuā leai se uiga e tulaga tutusa ai, e lē toatasi i le aofaiga, e lē Toatolu i le Toatasi, lea ua tautino mai nei e i latou e lagolagoina le Tolutasi. O le mea moni o le matuā tuufaafeagai lava. O le aʻoaʻoga o le Tolutasi, e pei ona faamatalaina e nei Tamā, sa matuā eseese lava mai le aʻoaʻoga faaonaponei. Tatou te taʻua lenei mea moni o se faamaoniga maumaututū e pei o mea moni uma i talafaasolopito o manatu faaletagata.”32
O le mea moni, a o leʻi oo i ona po na soifua mai ai Tetuliano e leai lava se Tolutasi na taʻua ai. Ma o “aʻoaʻoga e leʻi faavaeina faalelotu” a Tetuliano e uiga i le Tolutasi sa matuā eseese lava mai le aʻoaʻoga lea ua talitonuina i aso nei. E faapefea la, ona tuputupu aʻe le aʻoaʻoga o le Tolutasi, e pei ona faamalamalamaina i aso nei? Pe sa amata ea i le Fono i Nicea i le 325 T.A.? O le a tatou iloiloina ia fesili i le Vaega 4 o lenei faasologa i se lomiga o Le Olomatamata o loo lumanai.
Faasinoga:
1. A Short History of the Early Church, a Harry R. Boer, 1976, itulau 110.
2. The Formation of Christian Dogma, a Martin Werner, 1957, itulau 125.
3. The Search for the Christian Doctrine of God, a R. P. C. Hanson, 1988, itulau 64.
4. The Church of the First Three Centuries, a Alvan Lamson, 1869, itulau 70-71.
5. Gods and the One God, a Robert M. Grant, 1986, itulau 109, 156, 160.
6. The Formation of Christian Dogma, itulau 122, 125.
7. The International Standard Bible Encyclopedia, 1982, Tusi 2, itulau 513.
8. An Essay on the Development of Christian Doctrine, a John Henry Cardinal Newman, Lomiga Lona Ono, 1989, itulau 14-18.
9. The Ante-Nicene Fathers, faatonutonuina e Alexander Roberts ma James Donaldson, Le Toe Tusia Faa-Amerika o le Lomiga i Edinburgh, 1885, Tusi I, itulau 264.
10. The Ante-Nicene Fathers, faatonutonuina e Alexander Roberts ma James Donaldson, Le Toe Tusia Faa-Amerika o le Lomiga i Edinburgh, 1885, Tusi I, itulau 184.
11. The Ante-Nicene Fathers, Tusi 1, itulau 223.
12. The Ante-Nicene Fathers, Tusi 1, itulau 164.
13. A Short History of Christian Doctrine, a Bernhard Lohse, na faaliliuina mai le faa-Siamani, e F. Ernest Stoeffler, 1963, lomiga lona lua i tusi faavaa vaivai, 1980, itulau 43.
14. An Essay on the Development of Christian Doctrine, itulau 20.
15. The Church of the First Three Centuries, itulau 73-74, 76.
16. The Ante-Nicene Fathers, Tusi II, itulau 234.
17. The Ante-Nicene Fathers, Tusi II, itulau 227.
18. The Ante-Nicene Fathers, Tusi II, itulau 228.
19. The Ante-Nicene Fathers, Tusi II, itulau 228.
20. The Ante-Nicene Fathers, Tusi II, itulau 593.
21. The Ante-Nicene Fathers, Tusi II, itulau 593.
22. The Ante-Nicene Fathers, Tusi II, itulau 524.
23. The Church of the First Three Centuries, itulau 124-125.
24. The Church of the First Three Centuries, itulau 95.
25. The Early Church, a Henry Chadwick, tusitusiga 1980, itulau 89.
26. The Ante-Nicene Fathers, Tusi III, itulau 487.
27. The Ante-Nicene Fathers, Tusi III, itulau 603-604.
28. The Ante-Nicene Fathers, Tusi III, itulau 478.
29. An Essay on the Development of Christian Doctrine, itulau 19, 20.
30. The Church of the First Three Centuries, itulau 108-109.
31. The Ante-Nicene Fathers, Tusi IV, itulau 560.
32. The Church of the First Three Centuries, itulau 75-76.
[Ata i le itulau 27]
Clement
[Ē Ana le Ata]
Historical Pictures Service
[Ata i le itulau 28]
Tetuliano
[Ē Ana le Ata]
Historical Pictures Service