Aiseā ua Tele ai le Atuatuvale?

UA IʻU lava ina iloa le faamoemoe mo se olaga sili ona lelei! O le toatele o tagata o loo ola i le mea sa taʻua muamua o Siamani i Sisifo, na talitonu i lenei mea ina ua soloia i lalo le Pa o Perelini ia Novema 1989. Ae peitai, i le sili laitiiti atu i se tausaga mulimuli ane, sa latou faitio mai ai e uiga i lo latou “mauaina o se lalolagi tauvā o faiga faatemokalasi tau tamaoaiga ua matuā sili ona faigata ona faafesagaʻia na i lo o le olaga sa puipuia ai i totonu o le Pa o Perelini.” O le ā le iʻuga? Ua lē mautonu ma ua oo ina atuatuvale.

O faiga sauā i aiga ma nuu, ua ono faamalosia ai tagata e tuua aiga ina ia saili mo se saogalemu, ae e toaitiiti lava na maua. O nisi atonu ua oo ina iʻu atu i le mea o iai tagata ua leai ni aiga o ē o loo nonofo i auala tetele i aai. I nisi atunuu o le toatele o i latou nei ua iʻu atu ina aafia i ni aiaiga lavelave faalemalo. Ua lē mafai ona maua se fale ona ua leai ni galuega, e lē mafai foi ona maua ni galuega ona o le leai o ni tuatusi o fale e nonofo ai. O loo taumafai sui o faalapotopotoga a le Malo mo le lelei o tagata lautele e fesoasoani, ae e tele se taimi e alu ai i le taumafai e foia faafitauli. O lea ua oo mai ai le loto vaivai ma le atuatuvale.

E toatele fafine ua taaʻina e le loto vaivai ma ua oo ai ina latou faia ni mea mataʻutia. I le lipoti Women and Crime in the 1990s, ua faamatala ai e le faiaʻoga o le tulafono o Dr. Susan Edwards e faapea: “O le aafia o tamaitai talavou i le [faia o le talitane] ua avea o se iʻuga tuusaʻo o le lē lelei o le tulaga o le tamaoaiga, ae lē o le lē aʻoaʻoina o mataupu silisili po o talaaga faaleaiga.” E faapena foi i alii talavou o ē ua tuua aiga ina ia sailia ni galuega, e masani lava ona lē maua ni galuega. O nisi, ona o le atuatuvale, ua iʻu atu ai i le avea o ni ‘tama totogi,’ ua tuuina atu o latou tino i le faia o le tauatane ina ia maua mai ai ni meaʻai ma fale e nonofo ai, ua avea ma maunu a tagata solitulafono.

O faiga sauā faapolotiki, tulaga faigata tau tamaoaiga, o nei mea uma ua oo mai ai le atuatuvale. E oo lava i tagata popoto, e lē o sao mai ai a o latou saili ina ia tausia pea o latou olaga lelei a o feagai ma le faateleina o faafitauli tau tupe. O le ā le iʻuga? E pei ona fai mai le Tupu o Solomona anamua, “O le saua e faavalea ai lava le tagata poto”!a (Failauga 7:7) O le mea moni, o le atuatuvale ua taʻitaʻiina atu i le faateleina o tagata e fofōina le faafitauli i se auala sili ona mataʻutia—o le pule i le ola.

Le Auala Aupito Sili e Aloese Ai

O le tele o tala e uiga i le pule o talavou i o latou ola, ua faaalia ai faapea e oo lava ia i latou, ua aafia foi i lenei mala o le atuatuvale. Na fesili se tamaitai tusitala o nusipepa i Peretania faapea: “O le ā le mea ua tupu i o tatou taimi ua mafua ai le matuā atuatuvale o talavou?” I se suesuega na faia i tamaiti i le va o le 8 ma le 16 tausaga o ē na taofia i falemaʻi ina ua uma ona latou taumafai e inu se vai oona, ua lipotia mai e Dr. Eric Taylor o le Aʻoga i Matata Eseese tau i le Mafaufau i Lonetona faapea: “O le tasi o mea e faateʻia ai, ona o le toatele o tamaiti ua tumu i le atuatuvale ma le loto vaivai e uiga i mea.” Ua faamauina e Peretania se faatatauga e 100,000 o ni tulaga e leʻi iʻu i le oti ae na tagofia ma le loto i ai vailaau oona i tausaga taitasi, e faailoa mai ai lo latou atuatuvale ma le manaomia o se fesoasoani.

O se tasi faalapotopotoga i Peretania na faia se tauiviga faapea o le a faalogologo atu ma le alofa i ē o atuatuvale. I lenei auala, na faapea mai ai ana faufautua ina ia ofoina atu “nisi auala e foia ai faafitauli na i lo o le filifilia o le oti.” Ae peitai, ua latou taʻutino mai faapea ua lē mafai ona latou foia faafitauli ua faapogai ai ona atuatuvale tagata.

O le aofaiga tele o pule i le ola ua atagia ai “le tulaga tutusa o le faaesea o se tagata ua lē toe manaomia e uō po o aiga, ma le leai o se autasi lautele i le sosaiete,” ua fai mai ai le nusipepa o le The Sunday Correspondent. Aiseā ua maualuga ai le aofai o tagata e pule i o latou ola i aso nei? Ua taʻua e le nusipepa le “leai o ni aiga, faateleina o le onā, le mataʻu i le Aids ma le tapunia o falemaʻi o maʻi o le mafaufau” o vala na ua mafua ai ona oo tagata i le matuā atuatuvale ua latou manatu ai o le pule i o latou lava ola ua na o lea le vaifofo i o latou faafitauli.

Po o iai ea se faamoemoe e aveesea ai le atuatuvale? Ioe! “Ia tepa ae outou, ma ia ea i luga o outou ulu” o le alaga faamalosi mai lea a Iesu! (Luka 21:28) O le ā sa ia uiga i ai? O le ā le faamoemoe o iai i inā?

[Faaopoopoga i lalo]