Lipoti a Ē Faalauiloa le Malo
Ua Faasusulu atu Lo Latou Malamalama i Initia
UA TALAʻIINA atu nei le tala lelei o le Malo e le 11,524 Molimau olioli i Initia. (Mataio 24:14) O le 1,066 o ē na papatisoina i vaitaimi o le tausaga faaleauaunaga o le 1991, ua avea nei o ni ē folafola o le Malo, ua faasusulu atu lo latou malamalama i isi. Maeu le fiafia o tagata uma ina ua vaaia le 28,866 o auai i le faamanatuina o le Faamanatuga o le maliu o Keriso!
◻ O le toatele na latou muai aʻoaʻoina le faamoemoe o le Malo e ala i molimau lē fuafuaina. Mo se faaaʻoaʻoga, o se Molimau e kamuta, sa talanoa atu i ana uō i le galuega o i latou foi o ni kamuta, e uiga i le Malo. Sa talia e se tasi o uō i le galuega ma amata ona faasusulu atu lona malamalama i lona aiga ma ana uō. Sa tufa faasolo atu foi e nei tagata le feau ofoofogia o le Malo i isi. E tusa ai ma lipoti e faapea, i na o ni nai tausaga lava, ‘ae sili atu i le 30 tagata na talia le upu moni.’ Sa faamanuiaina o ia ma ona uso faaleagaga fou e Ieova ona o le faasusuluina atu o lo latou malamalama.
◻ Ua faasusulu atu foi e se isi uso talavou i se isi faapotopotoga lona malamalama e ala i le molimau lē fuafuaina i ni uō i le aʻoga. Sa naunau nisi o i latou i le faamoemoe o le Malo, ma e masani ona ia faamatala le Tusi Paia ia i latou seia oo i le teʻa o le tulua o po ma ao. Sa faia e se tasi tagata Katoliko se tulaga mausalī mo le upu moni e ui ina lapataia o ia e se patele e uiga i ni iʻuga mataʻutia pe a ia faaauau ona auaufaatasi ma Molimau. Ae peitai, sa talitonu le tamaitiiti aʻoga faapea ua ia maua le upu moni o le Tusi Paia mai Molimau, ma sa faaauau pea ona ia ave i fale le poto. I le taimi tatau, na papatisoina ai o ia ma ua auauna nei o se auauna o le faiva i le faapotopotoga. Ua olioli o ia i le faamoemoe e sau mai i le malamalama ofoofogia o le upu moni!—Roma 12:12.
◻ O se tasi o lē na faalogologo i lenei Molimau talavou, o se talavou aʻoga lauiloa, e lē talitonu i le Atua, o lē e masani ona aamu ia i latou o ē fai mai e talitonu i le Atua, ae i se tasi aso, sa aufaatasi ai o ia i se talanoaga ma sa ia faia foi ni fesili se tele. Sa maofa lava o ia ina ua ia maua ni tali saʻo mo ana fesili uma lava, ma sa ia faia ai se faaiʻuga faapea o le Tusi Paia o le Afioga a le Atua. Sa agaʻigaʻi i luma o ia i le poto o le Tusi Paia ma iʻu ai ina papatiso. Sa tetee ia te ia lona tamā lotu Hinitu seia oo ina tuli ese o ia mai lona fale. Ae peitai, o le tu mausalī o lenei tama talavou mo le upu moni na tauia, ina ua talia e ona uso faaletino e toalua ma ana uō e toalua le upu moni ma papatisoina foi i latou. O se tasi o ona uso ua auauna nei i le ofisa o le lālā i Initia.
◻ Sa auai foi se tama talavou o se taʻitaʻi o le aʻoga i se talanoaga ma le Molimau talavou. O ia o se tagata ulaula e lē mafai ona pē le utufaga, e sosoo utufaga i taimi uma, ma o se tagata inu tele. I se tasi taimi, sa manao ai o ia e fasi i isi ana uō e toalua i le aʻoga na la aʻoaʻoina le upu moni mai le Molimau. Ona o lo la taliaina o le upu moni, na mumusu ai i laua e auai i se solo tetee a le kolisi ma sa la lē avatua foi ni toto faameaalofa i se tauiviga na faia e aoina ai toto, lena sa taʻimua ai le taʻitaʻi talavou o le aʻoga. Ua fiafia nei la lenei tama talavou e avea o se Molimau a Ieova e faasusulu atu le malamalama.
◻ I nei mea uma, o le tama talavou aʻoga o lē na uluai faasusulu atu lona malamalama, sa avea o se mea faigaluega i le fesoasoani atu i le toʻa 15 o ana tupulaga e tuuina atu ma papatisoina e ala i le talaʻi lē fuafuaina ia i latou.
O se mea e olioli ai, le vaai atu i le toatele i lena atunuu matuā telē, o talia le faamoemoe o le Tusi Paia i le lalolagi fou a le Atua ma aufaatasi ai i le alofa faaleuso i le lalolagi atoa ua faapea ona aoaoina e Ieova le Atua ina ia ola e faavavau i lalo o lona Malo.