Faaliliuga o le Tusi Paia Faa-Aferika

O uluai faaliliuga o le Tusi Paia atoa i le gagana faa-Aferika, sa faia i Aikupito. Ona o loo taʻua o ni faaliliuga a Coptic po o tagata Aikupito anamua, ua talitonuina ai faapea, sa saunia ia faaliliuga mai le senituri lona tolu po o le lona fa T.A. E tusa ma le tolu senituri mulimuli ane, sa faaliliuina ai le Tusi Paia i le gagana Aitiope.

E faitau selau gagana e leʻi tusia, sa tautalagia i le itu i saute o Aitiope ma Sahara sa manaomia ona faatali seʻi taunuu atu misionare i le senituri lona 19. Na ausia se mea e sili ona tāua ina ua faamaeʻaina e Robert Moffat se faaliliuga o le Tusi Paia i le faa-Tswana, o se gagana a tagata i saute o Aferika. Sa ia lomia foi ni ona vaega i se masini lomitusi e faagaoioi e lima. O le uluai Tusi Paia atoa lenei sa lomia i Aferika, ma sa avea foi lea o se uluai faaliliuga atoa i se gagana faa-Aferika sa leʻi tusia anamua. O le mea e lelei ai, ona sa faaaogā e Moffat i lana faaliliuga le suafa o le Atua o Ieova (Yehova). I le faaliliuga i le 1872, lea sa faasalalauina e le British and Foreign Bible Society, sa faaaogāina ai le suafa o Ieova (Yehova) i faamatalaga autū sa faia e Iesu e pei ona faamauina i le Mataio 4:10 ma le Mareko 12:29, 30.

E oo mai i le 1990 ua faaliliuina le Tusi Paia atoa i gagana faa-Aferika e 119, ma o loo maua ni ona vaega i se faaopoopoga e 434.