Le Pogai e Lē Fiafia ai Ē e Faitio Nauā

NA LIUA le fiafia i le loto mafatia i na o ni nai vaiaso. O le uluai fiafiaga o tagata Isaraelu ina ua maua lo latou saolotoga fou mai saisaitiaga i Aikupito, na faaleagaina ona o lo latou faitio atu i mea e lē tāua, o meaʻai. I le lona lua o masina ina ua mavae lo latou ō ese mai Aikupito, sa faapea mai ai lenei nuu tomumumu, sa sili atu ai ona faapologaina pea i latou na i lo o le ola i se olaga faigata i le vao. I masina na sosoo mai ai, na faavaivaia ai e lenei agaga faitio lo latou maumauai e usiusitai ia Ieova, ma faaleagaina ai le avanoa o lena tupulaga e ulu atu ai i le Nuu o le Folafolaga.—Esoto 16:1-3; Numera 14:26-30.

O le mea moni, o le faitio, e lē muta mai i se tupulaga e tasi po o se atunuu se tasi. O ai se tasi e lē faitio i nisi taimi e uiga i le galuega, i meaʻai, le tau, o fanau, o tuaoi, po o le tau o le soifuaga? E foliga mai o le lē lelei atoatoa o tagata ua mafua ai ona faitio.—Roma 5:12; Iakopo 3:2.

Aiseā e vave ai ona tatou faitio? Pe atonu o loo tatou lagona le faavaivai, le lē fiafia, po o le maʻi foi. O le faitio atonu o se auala lena e faaali atu ai lo tatou lē fiafia, pe i se isi uiga, o loo e faapea atu ai: “E sili atu ona lelei aʻu i le faiga o le galuega na i lo isi!” I nisi taimi o faitioga e mapuna aʻe e ala i eseesega o uiga totino. Ua iai foi la ni mafuaaga moni e faanoanoa ai.

Po o le ā lava le mafuaaga iloga, ae e pei o le faaaʻoaʻoga na faaalia e le nuu o Isaraelu, e mafai e le faitio ona faaleagaina ai pe afai e faaauau pea. E ono avea ai le tagata ma sē ua mauaa ai le faitio, e oo lava ina muimui ai o ia i le auala o loo aaoina ai mea e Ieova. Aiseā e matuā mataʻutia ai lena mea? Ma e mafai faapefea ona taulimaina ma le saʻo se faitioga ua tonu?

Faitioga ua Tonu

Afai o le atugaluga e lē o se mea matuiā, o le fesili muamua la e ao ona tatou fesili ai o le, Pe e mafai ona ou faagalogaloina lea mea i le alofa? E moni, atonu e iai lava mafuaaga tonu mo faitioga agaʻi i le isi, pe atonu o se uso talitonu. Atonu po ua ia lē agalelei mai po ua lē alofa foi. Ae e ui i lea, pe o le a avea ea la lo tatou faitio i isi i le auala o loo ia vaai mai ai ia i tatou e faaleleia ai le mataupu? Ua faapefea ona fautua mai le Tusi Paia i le auala tatou te gaoioi ai? Ua faapea mai le Kolose 3:13: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso [“Ieova,” NW] ia te outou, ia faapea foi outou.” O lea e tusa lava pe saʻo le faitioga, ua fautua mai le Tusi Paia i le uiga o le fefaamagaloai na i lo le agaga o le faitio.—Mataio 18:21, 22.

Ae faapefea pe afai o se mea ua matuā faigata lava ona faagalo? Atonu e iai mafuaaga lelei mo le faaleoina atu o le faitioga. Ina ua oo atu le “alaga” o le faitioga ia Ieova e uiga ia Sotoma ma Komoro, sa gaoioi loa Ieova e tusa ai ma le tulaga lē mamā ma le faalumaina sa iai i na aai leaga. (Kenese 18:20, 21) O le isi faitioga na mapuna aʻe e leʻi leva lava talu ona mavae le Penetekoso i le 33 T.A. Ina ua tufatufaina atu meaʻai i fafine matitiva ua oti a latou tane, sa faaalia le faaituau i fafine e tautatala i le gagana Eperu. Ona o lena mea, na pogai ai le tupu aʻe o le lē fiafia i fafine ua oti a latou tane o ē tautatala i le gagana Eleni. Mulimuli ane, na oo atu le faitioga i le au aposetolo, ma sa vave loa ona latou faapotopotoina se vaega o tane agavaa ina ia faasaʻoina le faafitauli.—Galuega 6:1-6.

E tatau foi i toeaina Kerisiano i aso nei ona aua neʻi faatuai i le faia o laasaga talafeagai pe afai ua latou iloaina se faafitauli matuiā. Ua faapea mai le Faataoto 21:13: “O le na te punitia ona taliga i le valaau a le tagata mativa, e valaau lava o ia, a e le talia.” Na i lo o le lē amanaiaina o se faitioga saʻo, e tatau i toeaina ona faalogologo lelei. I le isi itu, o i tatou uma lava e mafai ona tatou saosaolaumea e ala i le tuusaʻo atu o le faitioga matuiā i le au toeaina, na i lo o le faailoaina atu i tagata taitoatasi uma o loo faalogologo i ai.

Ae peitai, o le toatele lava o i tatou e mafai ona taʻutino atu faapea e iai taimi e faapogaia ai e le tino lē lelei atoatoa i tatou e faia ni faitioga lē talafeagai. O se vaaiga totoʻa i amioga a tagata Isaraelu i le vao o le a fesoasoani lea ia i tatou e tagai ai i le mataʻutia o le faatagaina o se avanoa e faavaivaia ai i le paʻū atu i le agaga o le faitio.

Le Silasila a le Atua i Ē Faitio

O le muimui o tagata Isaraelu i le mauaina o meaʻai ua faailoa mai ai ni lamatiaga se lua o le faitio. Muamua, o le faitio e pipisi. Ua faapea mai le tala “ona muimui lea o le faapotopotoga atoa uma o le fanauga a Isaraelu ia Mose ma Arona i le vao.” (Esoto 16:2) E faapena foi, e toatele na amata ona faitio e uiga i le lē lava o meaʻai, ma e leʻi umi ae faitio ai foi i latou uma.

O lona lua, o le tagata faitio e masani lava ona faateleina ai le faafitauli. I lenei tulaga, na faapea mai ai tagata Isaraelu, sa sili ai ona lelei o latou tulaga sa iai i Aikupito, le mea sa tele ai areto na latou aai ai ma aano o manu pe a mananao ai. Sa latou faitio mai faapea na ala ona ave i latou i le vao ina ia latou oti ai i le fia aai.—Esoto 16:3.

Pe sa faigata moni ea le tulaga o na tagata Isaraelu? Atonu sa tau lē lava a latou meaʻai, peitai na silafia lelei e Ieova lena faafitauli, ma i le taimi e tatau ai, na ia saunia ai le manai e faamalieina ai o latou manaoga faaletino. O lo latou faitio nauā na faaalia mai ai le matuā leai o so latou faalagolago i le Atua. A o latou iai i Aikupito sa iai se mafuaaga moni latou te faitio ai e uiga i le tulaga faigata sa latou iai. (Esoto 2:23) Ae ina ua faasaolotoina i latou e Ieova mai le saisaitiaga, sa amata loa ona latou faitio e uiga i meaʻai. Sa leai se mafuaaga moni mo le muimui. Na lapatai atu Mose ia i latou e faapea: “E le o i maua, a o Ieova tou te muimui i ai.”—Esoto 16:8.

O lenei agaga faitio o le fanauga a Isaraelu sa faaauauina pea. I le tausaga e tasi sa avea le manai ma pogai na faitio ai. (Numera 11:4-6) E leʻi leva mulimuli ane ae foi mai le toʻa 10 mai le toʻa 12 o sipai Isaraelu ma se lipoti leaga na faateleina ai lo latou faitio e uiga i le mataʻutia o le a aafia ai i le faatoilaloina i le Nuu o le Folafolaga. Sa oo lava ina matuā faapea mai tagata: “E! ana matou oti i le nuu o Aikupito. E! ana matou oti i lenei vao.” (Numera 14:2) Pagā le matuā leai o se talisapaia! E lē o se mea la e ofo ai, ina ua fetalai atu Ieova ia Mose: “E ʻinoʻino mai lenei nuu ia te au seia afea? E ui lava i faailoga uma ua ou faia ia te i latou, a e latou te le faatuatua lava ia te au seia afea?” (Numera 14:11) O i latou sa faitio ma leai se loto faafetai sa faasalaina i le faafesavaliaʻi solo i le vao mo le 40 tausaga seia mavae lena tupulaga.

Ua faamanatu mai e le aposetolo o Paulo ia i tatou lena faaaʻoaʻoga. Sa ia lapataia uso Kerisiano ina ia aua lava neʻi pei o na tagata Isaraelu o ē na faitio, ma iʻu ai ina feoti i le vao. (1 Korinito 10:10, 11) E manino la, o muimuiga lē saʻo ma le agaga o le faitio e mafai ona faaleagaina ai lo tatou faatuatua ma taʻitaʻiina atu ai i le lē faamalieina o le finagalo o Ieova.

Ae peitai, e onosai mai pea Ieova i ana auauna o ē e faitio i nisi taimi ona o tulaga e faavaivai ai. Ina ua sola atu Elia i le Mauga o Horepa ona o sauāga mai le Tupu Fafine o Iesepela, sa ia manatu ma le mautinoa faapea o lana galuega o se perofeta ua faaiʻuina. Sa faaseseina o ia faapea e na o ia lava le tagata tapuai o Ieova o loo totoe i le nuu. Ina ia faamalosia le faatuatua o Elia, sa tuuina atu muamua i ai e le Atua ia te ia se faataʻitaʻiga o Lona malosi tauatua. Na taʻuina atu i le perofeta faapea o loo totoe pea nisi auauna faamaoni e toʻa 7,000 i Isaraelu ma o loo tele pea galuega e ao ona ia faia. I le iʻuga, na galo ai ia Elia ana faitioga ma agaʻi atu ai i luma ma se malosi sa toe faafouina. (1 Tupu 19:4, 10-12, 15-18) A o faatinoina e toeaina Kerisiano le tofā mamao, e mafai foi ona latou tautala atu ma le alofa faamafanafana i ē faamaoni, i le fesoasoani atu ia i latou ina ia latou iloa lo latou tulaga i le fuafuaga a le Atua.—1 Tesalonia 5:14.

Le Manumalo i le Agaga o le Faitio

E mafai faapefea ona manumalo i le agaga o le faitio? Ia, o i latou ua avatu i ai faamaoniga e uiga i le faaleagaina e le tapaa o le tino, ua iai ia i latou se malosi e taofia ai le ulaula. E faapena foi, o le malamalamaga i le pe aiseā e leaga ai le agaga o le faitio e uunaia ai i tatou e taofia so o se ituaiga o faitioga.

O ā aogā e iʻu i ai i latou o ē ua manumalo i le agaga o le faitio? O se tasi aogā tāua ua latou olioli ai, o le mafai lea ona latou vaai ai faale-Tusi Paia i mataupu ma maua foi le vaaiga saʻo. O le tagata faitio e seāseā lava mafaufau e uiga i le silafaga a Ieova i le faafitauli. Sa galo i tagata faitio o Isaraelu faapea o Ieova le Atua na ia faasaolotoina i latou mai le nofo pologa ma na faavavegaina foi ona ia vaeluaina le Sami Ulaula mo i latou. O o latou manatu lē fiafia na faatauasoina ai i latou mai le malosi o le Atua ma sa aveesea ai le olioli mai ia i latou. I le iʻuga, na mou ese atu lo latou faamoemoe ia Ieova.

E lē gata i lea, e mafai e se tasi ona maua le vaaiga saʻo i ona faafitauli ma ia iloa ai o lona lava sese na amata ai le faafitauli. Atonu e lē toe faia ai e ia le mea sese lava lea. Na lapataia e Ieremia ona uso Isaraelu ia aua neʻi faitio e uiga i tulaga faigata ua latou masani ai ina ua mavae le faaumatiaga o Ierusalema. O lo latou pagatia o le iʻuga tuusaʻo lena o a latou lava agasala, ma o le mea lena sa manaomia ona latou malamalama i ai ina ia latou salamō ai ma toe foi ia Ieova. (Auega 3:39, 40) I se uiga tutusa, na faamasinoina ai e Iuta ‘tagata faalematau’ o ē na teena le taʻitaʻiga a Ieova ma faailogaina i latou o ē “muimui i latou ma faameo.”—Iuta 3, 4, 16.

E pei ona sa mātauina e le Tupu o Solomona, “o le loto fiafia, e fai ma vailaau aoga lea; a o le loto faanoanoa e mamago ai ivi.” (Faataoto 17:22) O le agaga faitio e faavaivaia ai o tatou faalogona, ma aveesea ai foi lo tatou olioli. E atagia mai ai le lotovaivai, ae e lē o se loto fiafia. Ae o i latou o ē aʻoaʻo ina ia mafaufau e uiga i ‘mea e aogā ma viia ai’ o loo iai se loto fiafia, lea atonu e lelei ai o latou faalogona.—Filipi 4:8.

E leai se masalosalo, o o tatou ola o le a sili atu ona lelei pe afai tatou te mātauina uiga lelei o tagata na i lo o o latou vaivaiga. O le a faalaeiauina ai i tatou pe afai tatou te talia mea faigata ma le fiafia na i lo o le tomumumumu e uiga i o tatou tulaga. E oo foi i tofotofoga e mafai ona avea ma pogai mo le olioli pe afai tatou te vaai i ai o se avanoa lea e faamalosia ai lo tatou faatuatua ma faamalosia ai lo tatou onosai.—Iakopo 1:2, 3.

E tāua foi ona manatuaina pe afai tatou te muimui, e lē na o i tatou o loo faaleagaina ai. E ala i le faaleo atu o le faitioga, atonu ua tatou faavaivaia ai le faatuatua o isi. O le lipoti leaga a sipai Isaraelu e toasefulu na faapogaia ai le nuu atoa e vaai atu i le faatoʻilaloina o le Nuu o le Folafolaga o se taumafaiga e leai se aogā. (Numera 13:25–14:4) I se tasi mea na tupu, na faavaivaia ai le loto o Mose ona o le faaauau pea o le muimui a le nuu faapea ua ia faamolemole atu ia Ieova ina ia faaumaina lona ola. (Numera 11:4, 13-15) I le isi itu, afai tatou te talanoa e uiga i auala e atiina aʻe ai, atonu o le a mafai ai ona tatou faamalosia le faatuatua o isi ma saosaolaumea ai i lo latou olioli.—Galuega 14:21, 22.

E ui lava atonu e faaosoosoina i tatou e faitio e uiga i a tatou aumea i le galuega, i a tatou uō, i o tatou aiga, pe oo lava i toeaina o le faapotopotoga, ae ua finagalo Ieova mo ona tagata ia “maua . . . le alofa naunau o le tasi i le tasi.” O lena alofa na te uunaia i tatou ia ufiufi masei o isi na i lo le toe taʻu o o latou sese. (1 Peteru 4:8) Ma le loto faafetai, e manatu Ieova o i tatou ua na o ni efuefu, o lea e lē silasila mai ai o ia i o tatou masei. (Salamo 103:13, 14; 130:3) Afai tatou te taumafai uma lava taitoatasi e faaaʻoaʻo i lana faaaʻoaʻoga, ma le mautinoa la o le a matuā faaitiitia ai ia i tatou le toe faitio.

Pe a toe faafoisia tagata i le lelei atoatoa, o le a lē toe iai la se tasi e faitio e uiga i lona tulaga i le olaga. Seʻi oo i lena taimi, e manaomia ona tatou teena faaosoosoga e faitio ai i isi po o le faitio i o tatou lava tulaga faigata. Ina ia faaalia o loo tatou faalagolago ia Ieova ma alolofa moni i o tatou uso, seʻi o tatou “faia mea uma lava ma le lē muimui.” (Filipi 2:14) O le a faafiafiaina ai Ieova ae o le a sili ai foi ona aogā ia i tatou lava. O lea, ina ia maua so tatou lava lelei ma se lelei o isi, seʻi aua lava neʻi faagaloina, o lē faitio nauā e lē o ia o se tagata fiafia.

[Ata i le itulau 20]

E oo lava i le sauniuniga faavavega o le manai a le Atua sa avea ma mafuaaga o le faitio