Pe e Leaga Faitioga Uma?
O ā faiga faasoesa ia e sili atu ona tiga nai lo o faiga ia e lē mafai ona tatou faitioina?—Marquis De Custine, 1790-1857.
MO LE lua tausaga na ia onosaia ai ni faiga faasoesa faaleituaiga mai se alii e la te faigaluega faatasi. O lona tetee na iu ai i ni tala faatiga ma le matuā lē amanaia. O le natia o faalogona mafatia na aafia ai lona soifua maloloina, ae o le ā le mea e mafai ona ia faia? E faapena foi i se tamaitiiti aʻoga o lē sa sili i lana vasega, na tuliesea ona na lē faatagaina o ia e lona loto fuatia ifo e faia sana vaega i nisi o toleniga o faipelega matautia (martial arts) ia sa manaomia e le aʻoga. Na lagona uma e nei tagata e toalua e faapea ua faia ni mea sese ia i laua, ae pe sa tatau ona la faitio atu? Pe ana la faia faapena, pe mafai ona la faamoemoe i ai mo se fesoasoani pe atili ai ona oo i le leaga?
O faitioga faapea ma isi ua taatele i aso nei, a o tatou ola ai ma tagata lē lelei atoatoa i se lalolagi lē lelei atoatoa. E anoanoai ituaiga o faitioga, e aofia ai le faamatala atu o le lē fiafia i se tasi ae lē i le lautele, le loto momomo, le tiga, po o le faaalia o le lē fiafia i nisi faatulagaga patino e oo lava i se moliaga faaletulafono o se tagata patino. E toatele tagata e sili ia i latou le alofia o faitioga ma fefinauaiga; ae pe e tatau la ona gūgū ai pea? O le ā le manatu o le Tusi Paia?
Aafiaga Leaga i le Tagata Lava ia ma Isi
E mautinoa o se uiga faitio naʻuā e faaleagaina ai, ma e taʻusalaina e le Tusi Paia. O le a oo ai i lē faitio le faaleagaina faaletino ma le faaleagaga ma puapuaga ia i latou o ē e faasaga i ai lana faitioga. E faasino atu i se avā faitio, ua faapea mai le faataoto a le Tusi Paia: “O le fale tutulu e lē nofoia i le aso e mamafa ai uaga e faatusalia i ai le avā faamisa.” (Faataoto 27:15, NW) O faitioga e faasaga ia Ieova po o se tasi lava o ana sauniuniga e mautinoa e taʻusalaina. Ina ua faitio le nuu o Isaraelu e uiga i le manai lea na saunia faavavega a o malaga i le vaomatua mo le 40 tausaga, sa taʻua o le “mea e ʻai faatauvaa,” o lea na auina mai ai e Ieova gata uogo e faasalaina ai tagata faitio lē faaaloalo, ma e toatele na maliliu ai.—Numera 21:5, 6.
E lē gata i lena, na fautuaina e Iesu ona soo e aua le faitio i “le fasilaau” o mea sese na matauina i o tatou uso a tagata, ae ia mataalia lelei i le “utupoto” telē o vaivaiga o loo ia i tatou lava. (Mataio 7:1-5) I se uiga tali tutusa, na taʻusalaina ai e Paulo le faamasino atu (po o le faitio foi) o le isi e pei o lē ua “lē mautali . . . auā o oe lē faamasino atu, ua e faia ia lava mea.” O nei lapataiga faasaga i faitioga, e tatau ona uunaia ai i tatou e alofia le faitio naʻuā ma le ati ae o se uiga faitio.—Roma 2:1.
Pe e Taʻusalaina Faitioga Uma?
O lea pe tatau ona tatou faia se faaiuga faapea e taʻusalaina so o se ituaiga o faitioga? E leai, e lē tatau. Ua faailoa mai e le Tusi Paia e faapea e tele faiga lē tonu i le lalolagi ponā lea o loo tatou ola ai, ia e talafeagai ona faasaʻoina. I se faataoto, na taʻua ai e Iesu se faamasino amioletonu o lē na faaoo atu ma le lē fiafia se faamasinoga tonu mo se fafine mafatia ua oti lana tane, ina ia taofia ai o ia i le “faatiga mai ia te [ia] i lona sau soo.” (Luka 18:1-8) I nisi itu atonu e ao ona tatou maumauai i le faailoa atu o le tatou lē fiafia i tulaga leaga seia oo ina faasaʻoina mea sese.
I le faalaeiauina o tatou e tatalo mo le Malo o le Atua ia oo mai, pe e lē o timai mai ea Iesu ia i tatou ia iloa mea leaga a lenei lalo-lagi ma ‘tagi’ atu i le Atua mo se vaifofo? (Mataio 6:10) Ina ua oo atu le “alaga o faitioga” e faatatau i amioleaga a Sotoma ma Komoro anamua i ona fofoga, ona auina atu lea e Ieova o ana avefeau e ‘vaai po ua faia lava e i latou uma e pei o le alaga ua oo mai’ ma aumaia se mapusaga. (Kenese 18:20, 21) Na fiafia i latou o ē na tagi ane ia te ia, ona na mulimuli ane faasaʻoina e Ieova lea tulaga e ala i le faaumatiaina o aai e lua ma o latou tagatānuu amio lē mamā
O le Faapotopotoga Kerisiano
Pe e tatau la ona ese le tulaga o le au uso i totonu o le faapotopotoga Kerisiano? E ui lava o ni tane ma fafine lē lelei atoatoa, ae o loo taumafai ma le naunautai Kerisiano e auauna i le Atua i le filemu ma le autasi. Ae peitai, o le a aliae mai ni tulaga ia i latou e aumaia ai mafuaaga mo faitioga ia e manaomia ai se vaifofo. I le uluai senituri, na tulai mai ai se tulaga i totonu o le faapotopotoga o ē faauuina ina ua faatoʻā mavae lava le Penetekoso. Na toatele tagata fou liulotu Kerisiano na nonofo ai pea i Ierusalema mo nisi faatonuga ma ni faalaeiauga atili. Na tufatufaina ai le tele o meaʻai sa iai. Peitai, “ua tupu ai le muimui o Elenisi ia Eperu, auā ua galo o latou fafine ua oti a latou tane i le tufatufaina o mea i aso fai soo.” Nai lo le taʻusalaina o nei tagata faitio o ni ē faatupu faalavelave, na gaoioi le au aposetolo e faasaʻoina le tulaga. Ioe, o faitioga talafeagai e faia ma le faaaloalo tatau ma le agaga saʻo o le a faalologo atu i ai ma le lotomaulalo ma gaoioi ai i latou o loo vaavaaia le faapotopotoga.—Galuega 6:1-6; 1 Peteru 5:3.
Ia Faaoo Atu i Ē o Iai le Pule e Talafeagai Ai
Pe na e matauina mai faaaoaoga i luga e faapea o faitioga e tatau ona faia i le uiga saʻo ma i ē o iai le pule talafeagai? Mo se faaaoaoga, o le a lē aogā le faitio atu i leoleo e faatatau i se lafoga mamafa pe i se faamasino e faatatau i se maʻi o le tino o se tasi. O lea o le a lē o se mea talafeagai foi le faitio e faatatau i ni tulaga a lē i totonu po o fafo o le faapotopotoga i se tagata e leai sana pule po o se tomai e fesoasoani mai ai.
I le tele o atunuu i aso nei, e iai faamasinoga ma isi pule talafeagai e mafai ona tagi atu i ai ma le faamoemoe e maua mai ai ni fesoasoani. Ina ua tuuina atu e le tamaitiiti lea na taʻua i le amataga o le mataupu lana tagi i le faamasinoga, na faia e faamasino se faaiuga mo lona lelei, ma sa toe faaaʻe mai o ia ma se faatoesega mai le aʻoga. E faapena foi le tamaitai faigaluega lea sa aafia i faiga faasoesa faaleituaiga, na ia mauaina se fesoasoani mai se iuni a fafine faigaluega. Sa ia mauaina se faatoesega mai le komiti o aʻoga. Na faia foi e ona pule o le galuega ni laasaga e taofia ai faiga faasoesa faaleituaiga.
Peitai, e lē tatau ona faatalitalia e faapea o faitioga uma o le a tutusa o latou iuga. Na matauina ma le moni e le tupu poto o Solo-mona e faapea: “O le mea ua piopio e le mafaasaʻoina.” (Failauga 1:15) Ia tatou iloa lelei e faapea, o nisi o mea o le a manaomia ona faatalitali mo le Atua e faasaʻoina i lana lava taimi atofaina.
[Ata i le itulau 31]
O toeaina e faalogo atu ma gaoioi e tusa ai ma faitioga e tonu