Toeitiiti—Se Lalolagi e Aunoa ma ni Taua!

IA TESEMA 24, 1914, na sopoia ai e se fitafita talavou Peretania e igoa ia Jim Prince se laufanua e leʻi nofoia e se vaegaau ina ia talanoa atu i se fitafita Siamani. Na fesili atu le tagata Siamani ia te ia e faapea: “O aʻu o se Siamani. O oe o se ʻafa Siamani. Aisea ta te fetauai ai?” I ni tausaga mulimuli ane, na tautino mai ai e Prince e faapea: “O loo tumau pea ona ou lē iloa le tali i lena fesili.”

E mo na o le tasi lava se vaiaso tulaga ese i le 1914, na matuā fesanisaniaʻi ai ʻau tau a Peretania ma Siamani, na taaalo soka, ma oo lava foi ina feaveai meaalofa o le Kirisimasi. O lena maliega mo se filemu, o le mea moni, sa lē o se mea aloaia. Sa lē mananao taitaiau ina ia iloa e a latou vaegaau faapea o le “fili,” e lē o le manu feai matautia lea na faaatagia mai i faiga taua. Na taʻua mulimuli ane e le fitafita Peretania o Albert Moren e faapea: “Ana faaauau mo se isi vaiaso se tasi le taofia o le taua, semanu o le a matuā faigata lava ona toe amataina.”

O lena taofia o le taua, na faailoa atu ai e faapea, e oo lava i le toatele o fitafita na aʻoaʻoina, sa moomoo mo le filemu na i lo o le taua. O le toatele o fitafita o ē na lagona le matautia o taua, na lagolagoina le alagaupu faa-Sepania: “Tuu ai pea lē na te lē iloaina le mea e taʻua o le taua, e alu i le taua.” E lē taumatea, o se iloiloga o manatu na faia i le lalolagi aoao i tagata lautele, o le a faaalia ai e faapea, o se aofaiga e lē mafaitaulia o tagata, latou te filifilia le filemu na i lo o le taua. Ae e mafai faapefea ona faaliliuina lenei faanaunauga mo le filemu i le vateatea aoao i se lalolagi e aunoa ma ni taua?

A o leʻi mafai ona faaiua taua, e tatau ona suia uiga. Ua taʻua e le faalapotopotoga tau Aʻoaʻoga, Faasaienisi, ma Aganuu a Malo Aufaatasi e faapea: “Talu ai o mafaufauga o tagata e amataina ai taua, o mafaufauga foi la o tagata e tatau ona amata atiina aʻe ai le puipuiga mo le filemu.” Ae i le sosaiete i aso nei, lea ua taatele ai le lē fefaatuatuaai ma le feitagai, ua oo ina sili atu ona sauā, ae lē o le sili atu ona filemu.

Ae peitai, na folafola mai e le Atua lava ia e faapea, i se aso, o le a tamau ai le filemu i mafaufau o tagata ua tuutoina e fai le amiotonu. Na ia faapea mai e ala i lana perofeta o Isaia: “E faamasino foi o ia [le Atua] i nuu ese, ma aoai atu i nuu e tele; ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.”—Isaia 2:4.

Faatupuina o le Filemu i le Mafaufau

Pe e mafai ona tupu lena suiga mataina i mafaufauga? Po o le a aʻoaʻoina ea e tagata ia leoleomaluina le filemu na i lo o le faamamaluina o taua? Manatu i le faaaoaoga a Wolfgang Kusserow. I le 1942, na vavaeeseina ai e Nasi le ulu o lena talavou Siamani e 20 tausaga le matua ona o lona ‘lē aʻoaʻo i taua.’ Aisea na ia filifili ai e oti? I se faamatalaga tusia, na ia siitia mai ai ni mataupu silisili faale-Tusi Paia e pei o lenei, “E te alofa atu i lē lua te tuaoi, ia pei o oe lava ia te oe,” ma, “O i latou uma o e tago i le pelu, e oti i latou i le pelu.” (Mataio 22:39; 26:52) Ona ia fesili saʻo atu lea: “Pe na tusiaina ea e Lē na Foafoaina i tatou nei mea uma mo laau?”

O le afioga a le Atua o loo faamauina i le Tusi Paia, “o loo matuā galue foi” ma sa uunaia ai lenei talavou Molimau a Ieova e tausisia le filemu, e ui lava i iuga matautia. (Eperu 4:12; 1 Peteru 3:11) Ae e lē na o Wolfgang Kusserow le talavou na tausisia le filemu. I le tusi The Nazi Persecution of the Churches 1933-1945, na taʻua ai e J. S. Conway faamaumauga aloaia a Nasi e molimauina ai e faapea, i le avea o se vaega, na mumusu Molimau a Ieova e tagofia auupega. E pei ona faamatilatila mai e Conway e faapea, o se tulaga lototele faapena, o lona uiga, e pei lava ua sainia se maliega e fasiotia ai i latou.

O loo faaauau pea e Molimau a Ieova i aso nei ona tausisia le filemu, e tusa lava po o le ā le lanu po o le atunuu. Aisea? Ona ua latou aʻoaʻoina mai le Tusi Paia e faapea, o auauna moni a le Atua, e tatau ona tuʻi a latou pelu e fai ma suotosina. O Alejandro, o se taulealea talavou Anitenitina na malaga atu e nofo i Isaraelu i le 1987, sa mafai ona molimau totino i lenei mea moni.

Mo le tolu tausaga, sa nofo ai Alejandro i se faatoaga a o aʻoga i se iunivesite ma galue i faletalimalo ma faleʻaiga eseese. I le taimi lena, sa amata ai ona ia faitauina le Tusi Paia ma sailiili mo se fuafuaga i le olaga. I lo o mea uma lava, sa ia moomoo e fia vaai i se lalolagi e mafai e tagata ona olioli ai i le filemu ma le faamasinotonu. O Alejandro—o se Iutaia—sa galulue faatasi ma tagata Iutaia ma tagata Arapi, ae e lē faaituau i le tasi itu po o le isi itu.

I le 1990, na valaaulia ai Alejandro e sana uo o lē o loo suesueina le Tusi Paia ma Molimau a Ieova i se fonotaga e tasi le aso i Haifa. I le maofa ina ua iloa e 600 Tagata Siū ma Arapi o loo miomio fiafia i le fonotaga, sa ia manatu ifo ai e faapea, ‘O le auala saʻo la lenei mo tagata e ola ai.’ I totonu o le ono masina, sa avea ai o ia ma Molimau, ma ua tuutoina atu nei le tele o lona taimi i le talaʻiina o le feau a le Tusi Paia o le filemu.

Le Auala o le a Aumaia ai e le Atua le Filemu

E ui ina ootia i nei faaaoaoga, ae ua tulaga ese lea i le olaga masani i le lalolagi i aso nei. E ui lava e na ona taʻutaʻu i laugutu o lenei faiga o mea le filemu, a ua ia lagolagoina le pogai o taua. Pe e te fia nofo i se oganuu e faaalu ai e tagatanuu le 7 i le 16 pasene o a latou tupe maua i fana, ma le puipuiga o o latou fale? E tusa o le mea lena o loo faia e atunuu e ala i le tele o tupe na faaaluina i vaegaau i tausaga talu ai nei. E lē o se mea e ofo ai, ona ua faaalia i le valoaga a le perofeta o Isaia e faapea, o le a lē taitai ona tuʻia e tagata i se fua atoa a latou pelu e fai ma suotosina ‘seia faasaʻoina mataupu uma a le toatele o tagata’ e le Atua. O le a faapefea ona ia faia o lena mea?

O le auala sili mo le faasaʻoina o mea, o le Malo lea o Ieova le Atua. Na valoia e le perofeta o Tanielu e faapea ‘o le a faavaeina e le Atua o le lagi se malo o le a lē mafai ona faaumatia e faavavau.’ Na ia faaopoopo mai e faapea, o lea malo “na te tuimomomoina ma faaumatia ia malo uma lava [malo faalelalolagi], a o ia e tumau lava e faavavau.” (Tanielu 2:44) Ua faaalia i nei upu e faapea, o le a faatumauina e le Malo o le Atua lana pulega i le lalolagi uma. E ala i le aveesea o pa pupuni faavaomalo, o le a faamutaina foi e le Malo feteenaiga. E lē gata i lea, talu ai o ona tagatanuu o ‘tagata ua aʻoaʻoina e Ieova,’ o le a ‘tele foi lo latou manuia.’ (Isaia 54:13) E lē lētioa ona fai mai Iesu ia tatou tatalo i le Atua: “Ia oo mai lou malo”!—Mataio 6:10.

Aveesea Toatugā Faalotu

O le a aveesea foi e le Atua toatuga faalotu i le filemu. O lotu, na faapogaia le fetauaiga umi i le talafaasolopito—Le Taua mo Eleele Paia, po o “Taua Paia,” na uunaia e Pope Urban II i le 1095 T.A.a I lo tatou senituri, sa lauiloa ai taʻitaʻi lotu i le faapogaia o le lagolagosua mai le lautele mo taua, e oo lava i taua e lē aafia ai lotu.

I le faasino atu i le vaega a lotu ua faapea mai o Kerisiano i le taimi o le Taua Muamua a le Lalolagi, na tusia ai e le alii tusitala o Paul Johnson e faapea: “Sa lē mafai e taʻitaʻi lotu, ma o le tele lava, e lē mananao e tuu faamuamua le faatuatuaga faa-Kerisiano i lo o le lotonuu. E toatele lava sa latou filifilia le auala faigofie, ma faaogatusa le Faa-Kerisiano ma le lotonuu. O fitafita Kerisiano mai vaega faalotu uma, sa apoapoaia ina ia fasioti e le tasi le isi i le suafa o lo latou Faaola o Keriso.”

E tele mea na faia e lotu e lagolagoina ai taua na i lo o le tausia o le filemu. O le mea moni, ua faatusaina e le Tusi Paia lotu sese i se “fafine talitane” o lē faamalieina manaoga uma o tupu o le lalolagi. (Faaaliga 17:1, 2) Ua faasalaina o ia e le Atua e avea o le pogai autū o le faamasaaina o le toto o i latou na fasiotia i le lalolagi. (Faaaliga 18:24) I le iuga la, o le a soloiesea e Ieova lenei toatuga i le filemu e lē toe iai lava.—Faaaliga 18:4, 5, 8.

E ui lava o le a galoma atu na mea e fevaevaeai ai e pei o faiga faapolotiki ma lotu sese, ae o le a lē mafai ona malupuipuia le filemu pe a lē aveesea le faatupu taua silisili o mea uma lava—o Satani le Tiapolo. O le galuega mulimuli lava lenei o le a faia e le Malo o le Atua i lana polokalama, ina ia aumaia ai le filemu atoatoa i le lalolagi. Ua faamatala mai e le tusi o le Tusi Paia o Faaaliga e faapea, o le a “puea” Satani ma “fusifusia” ma “lafo . . . i le to e lē gata” ina ia “le toe faaseseina e ia o nuu.” Mulimuli ane ona faaumatia atoatoa ai lea o ia.—Faaaliga 20:2, 3, 10.

O le folafolaga a le Tusi Paia e uiga i se iuga o taua, e lē na o se miti. Ua uma ona faagaoioia le fuafuaga a Ieova le Atua mo le filemu. Ua faavaeina nei lona Malo i le lagi, ma ua nofo sauni e faataunuuina isi fuafuaga atili e faamautinoa ai le filemu i le lalolagi. I le taimi nei, o le faitau miliona o Molimau a Ieova o ē o lagolagoina lenei pulega faalelagi, ua uma ona latou aʻoaʻoina ina ia ola i le filemu.

O lea la, e manino lava le iai ia i tatou o mafuaaga tatau e talitonu ai faapea e mafai ona aveesea taua. E sili atu foi ona lelei, ona ua mafai ona tatou vaavaai atu i luma i se aso lata mai lava, o le a faaiuina ai e Ieova taua e oo i le faavavau. (Salamo 46:9) O le a ia silasila i ai faapea, ua toeitiiti iai se lalolagi e aunoa ma ni taua.

[Faaopoopoga i lalo]

[Ata i le itulau 7]

E mafai ona e ola i se lalolagi fou e aunoa ma ni taua