Lotu Taufaasese—O ā na Mea?

IA FEPUARI 28, 1993—e silia i le selau sui o le aufaitulafono na siomiaina se nofoaga o iai ni fale e nonofo ai sina toatele o tamaloloa, fafine, ma tamaiti. O le pogai ina ia sailia auupega e leʻi lesitalaina faaletulafono, ma ia puea se tagata solitulafono sa masalomia. Ae sa matuā faateia nei sui ina ua felelei mai ni pulufana agaʻi ia i latou mai i totonu o fale. Sa toe tafana atu foi e i latou ni fana.

E toasefulu ē na maliliu i lenei fetauaiga ma nisi na manunua. I le 50 o aso mulimuli ane, na siomia ai e le faitau selau o sui o le malo lea nofoaga, faatasi ma ni fana e lava e faia ai se taua laitiiti. Na iu le faataututu o malosi i le oti o tagata e 86, e aofia ai ma tamaiti a itiiti mai e 17.

Ae o ai sa avea ma fili? O se autau ea o tagata e gaosia fualaau faasaina? Se au o fitafita lalafi solo? E leai. Atonu o e iloa, o le “fili” sa avea o se vaega o tagata lotu tuutoina, o ni sui o se lotu taufaasese. O lo latou malaia, na faia ai se nuu lē taualoa i laufanua tutotonu o Texas i le Iunaite Setete o Amerika, ma taulaiga o manatu faavaomalo. Na faatumuina alaleo faasalalau i tala, ma nusipepa i le anoanoai o lipoti, o suesuega, ma faamatalaga i le matautia o le maelega valea o lotu taufaasese.

Na manatua ai e le lautele tulaga na tutupu muamua na faapogai ai e taʻitaʻi o lotu taufaasese le oti o o latou lava sui: le fasiotia o tagata i le 1969 e le au a Manson i Kalefonia; le anoanoai o sui o le lotu taufaasese i Jonestown, i Guyana na pule i o latou lava ola i le 1978; le fuafuaga lilo na faia e fasiotia ai tagata e ala i le pule i le ola, na faia i le 1987 e le taʻitaʻi o le lotu taufaasese o Park Soon-ja o Korea, lea na iu ina feoti ai sui e 32. E mataina, ona o le toatele o nei tagata na fai mai o Kerisiano ma na tautino mai e talitonu i le Tusi Paia.

E malamalama lava, o le toatele o ē faaaloalo i le Tusi Paia o le Afioga a le Atua, ua meia i le faaaogasese ma le lē masiasi o le Tusi Paia e nei lotu taufaasese. O le iuga, a o gasolo tausaga, e faitau selau faalapotopotoga ua faavae mo le suesueina o lotu taufaasese ma faaalialia a latou faiga matautia. O tagata tomai i amioga a lotu taufaasese, ua latou valoia mai, i ni nai tausaga ona oo mai lea o se meleniuma fou e ono faateleina ai nei lotu taufaasese. Na taʻua faapea e se tasi mekasini o tala fou, e tusa ai ma manatu o vaega e tetee i lotu taufaasese, e faitauafe lotu taufaasese ua “i inā ua nofo sauni e pulea lou tino, lou mafaufau, ma faaleaga lou ola. . . . E itiiti lava e faaauupegaina, ae o le tele ua manatu i ai e matautia. O le a latou faasese oe ma faoa au mea, faafaaipoipo oe ma fasioti oe.”

O le ā le Lotu Taufaasese?

O le upu “lotu taufaasese” ua soona faaaogā e le toatele o ē atonu e leʻi malamalama atoatoa i ana aʻoaʻoga. Ina ia aveesea le nunumi, ua alofia moni ai e nisi aʻoaʻo faalelotu le faaaogāina o lea upu.

Ua faamatala e le World Book Encyclopedia e faapea, e tusa ai ma “uputuu, o le upu lotu taufaasese, e faasino i so o se ituaiga o tapuaiga po o se faiga faalelotu faifai pea.” O lea la tulaga, ua faavasega ai faalapotopotoga faalotu uma o lotu taufaasese. Ae i se faaaogāina lautele i aso nei, o le upu “lotu taufaasese” e iai se isi ona uiga. Ua taʻua e lea lava lomifefiloi, “talu mai tausaga ogatotonu o le senituri na amata mai i le 1900, o le taatele o lotu taufaasese ua suia ai le uiga o le upu. Ua faatatauina i aso nei lea upu i ni vaega o loo mulimuli atu i se taʻitaʻi o ola o lē amataina aʻoaʻoga fou ma faiga e lē faavaea.”

I le lagolagoina o le faaaogāina masani o le upu, ua faamatala ai e le mekasini o le Newsweek e faapea, o lotu taufaasese “e masani ona avea o ni vaega toaitiiti e tulaga ese lava o latou uiga, e maua mai e ona sui le faamaoniga ma fuafuaga mai se tagata malosi ma ona uiga faatosina.” E faapena foi ona matauina e le mekasini o le Asiaweek e faapea, “o le upu [lotu taufaasese] lava ia, e lē manino, ae e masani lava ona faailoa mai ai se talitonuga fou faalotu e faavae i se taʻitaʻi lotu malosi ma e uiga ese, o lē e masani lava ona ia faalauiloaina mai o ia e faapea, o le Atua ua faaalitino mai.”

O le gagana na faaaogā i se faaiuga soofaatasi a le Fonotaga lona 100 a le Setete o Maryland, i le Iunaite Setete o Amerika, ua faailoa ai foi le lē tāua o le upu lotu taufaasese. Ua faapea mai le faaiuga, “o se lotu taufaasese, o se vaega po o se gaoioiga e faaalialia ai le matuā tuutoina i se tagata po o se aʻoaʻoga, ma faaaogā ai i se auala tomai amio leaga e tauanau ma pulea ai le auiluma o sini o ona taʻitaʻi.”

E manino, o lotu taufaasese e masani ona manatu i ai, o ni vaega faalotu e iai manatu ma faiga faavae e feteenai ma amioga masani a le lautele i aso nei. E masani ona faalilolilo a latou gaoioiga faalotu. O le tele o nei vaega faalotu taufaasese ua matuā vavaeesea i latou i ni nuu laiti. O lo latou tuutoina i se tagata ua faapea mai o lo latou taʻitaʻi, e lē pulea ma matuā tuutoina i ai. E masani ona gugutu mai nei taʻitaʻi e faapea, ua filifilia i latou e le Atua po ua pei foi i latou o le Atua.

I nisi taimi, o faalapotopotoga ma le au tusitala e matuā tetee i lotu taufaasese, ua faasino atu i Molimau a Ieova e faapea o se lotu taufaasese. O nisi o mataupu na taʻua talu ai nei i nusipepa, ua faaaofia ai ma Molimau a Ieova i vasega faalotu ua lauiloa i a latou faiga lē mautinoa. Ae pe o se mea saʻo le faasino atu i Molimau a Ieova e faapea o se vasega o se lotu laitiiti e tu ese? O tagata o lotu taufaasese e masani ona faaesea i latou mai uo, aiga, e oo lava i le sosaiete o tagata lautele. Po o le tulaga ea lena i Molimau a Ieova? Po o faaaogā e Molimau a Ieova ni tomai taufaasese ma lē faavaea e faaliliu ai ni sui fou?

Ua tautaua taʻitaʻi o lotu taufaasese i le faaaogāina o auala taufaasese e pulea ai mafaufau o o latou soʻo. Po o iai ea se faamaoniga o le faia e Molimau a Ieova o lenei mea? Po o faia faalilolilo ea la latou tapuaiga? Po o latou mulimuli ma faamamalu se taʻitaʻi faaletagata? I se uiga tuusao, po o Molimau a Ieova ea o se lotu taufaasese?

[Ē Ana le Ata i le itulau 3]

Jerry Hoefer/Fort Worth Star Telegram/Sipa Press