Lipoti a Ē Faalauiloa le Malo

Faatasia e le Upu Moni o le Tusi Paia se Aiga

I ASO NEI, i le tele o vaega o le lalolagi, ua toetoe lava leai se autasi faaleaiga. Ae peitai, ua faaalia e le Tusi Paia le mealilo ua mafai ai ona autasia le aiga. Manatu i upu a Iesu: “Ai se faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa.” (Mataio 7:24) E faitau afe aiga o Molimau a Ieova ua latou maua le autasi e ala i le faatatauina o nei upu, ma e ala i le faaaogāina o le Tusi Paia e fai ma faavae e atiina aʻe ai se aiga autasi vavalalata. O loo maua foi e isi lena autasi, e pei ona faaalia i se mea lenei na tupu.

A o auai Tanielu i le vaegaau o le taua i Falani, na fautuaina ai o ia e le faifeau o le vaegaau, ina ia faatau sana Tusi Paia, ma na ia faia faapea, ma amata loa ona ia faitauina e lē aunoa. Mulimuli ane sa siitia atu o ia i Tāiti. O nisi o uo a Tanielu i le vaegaau, o ni Aso Fitu, o isi o Mamona. O a latou talanoaga, sa masani lava ona iu i le talanoaina o le mataupu tau i lotu. I se tasi aso, na faafeiloai atu ai e se satini sinia Tanielu i lana avā, o se Molimau a Ieova. Sa alu le aoauli atoa o taliina e le fafine le tele o fesili a Tanielu ma faafesootai atu ai o ia i se tasi o faapotopotoga a Molimau a Ieova i Tāiti. E leʻi pine ae ia amataina loa se suesuega faale-Tusi Paia e lē aunoa.

O mātua o Tanielu o loo nonofo i Falani, o ni Katoliko faamaoni. O lona tamā o se faufautua i le aʻoga, ma sa ia vaaia aʻoaʻoga uma faalelotu i se aʻoga a le lotu Katoliko. I le manao e tufa atu i ona mātua nisi o malamalamaga tāua faaleagaga na ia aʻoaʻoina, na auaumalie ai lava ona faaofi atu e Tanielu ni nai manatu faale-Tusi Paia i ana tusi sa tusi atu ia i laua.

I le taimi muamua, sa fiafia tele le tinā o Tanielu, ae sa faateia o ia ina ua tau atu i le suafa o Ieova i se tasi o tusi a lana tama. I ni nai aso mulimuli ane, sa faalogo ai o ia i se polokalama mai le leitio sa taʻua ai Molimau a Ieova e faapea o se “lotu mavae matautia.” Na ia tusi atu ia Tanielu, ma talosaga atu i ai ina ia momotuese loa ana fesootaiga uma ma Molimau. Ae peitai, sa agaigai pea i luma Tanielu i lana suesuega o le Tusi Paia ma sa leʻi pine ae faia loa se fuafuaga e tuua le vaegaau ma toe foi atu i Falani.

Ina ua taunuu i lona aiga, sa faaaogā ai e Tanielu afiafi taitasi—i nisi taimi e oo lava i le leva o le po—e faia ai ni talanoaga uumi faale-Tusi Paia ma lona tinā. Na iu lava ina malie o ia e ō atu ma Tanielu i se Maota o le Malo. Ina ua auai o ia i lana uluai sauniga, sa matuā faagaeeina o ia, o lea na amata ai ona faia sana lava suesuega faale-Tusi Paia e lē aunoa. Sa vave lava ona agaigai i luma ma e leʻi pine ae papatisoina loa o ia.

O le tamā o Tanielu, o se tamaloa faapalepale ae e matuā tuutoina i lana galuega ma gaoioiga faalelotu. Ae i se tasi taimi, na ia momoli atu ai lana avā ma Tanielu i se tauaofiaga itumalo. O le aso 14 lea o Iulai, ma sa mafaufau o ia e fia alu e matamata i le solo i le faamanatuina o le Aso na toilalo ai le ʻOlo mo falepuipui i Falani (Bastille Day) i le aai. A o faatalitali o ia, sa ia filifili ai, ona o lona fia iloa, e alu e matamata i totonu o le maota fono. Sa faagaeeina o ia i le maopoopo ma le filemu sa ia vaaia i tagata o Ieova, ma a o savali atu o ia i matagaluega eseese o le tauaofiaga, sa valaau mai pea tagata uma ia te ia “uso.” Sa galo nimo lava ia te ia le solo mo le aso faamanatu ma nofo ai pea seia oo i le faaiuga o le tauaofiaga. Sa talosaga atu o ia mo se suesuega faale-Tusi Paia ma na vave lava ona agaigai i luma i le aʻoaʻoina o le upu moni. Ae peitai, o le tele o mea na ia aʻoaʻoina, o le tele foi lena o lona lē manofo ona o le tulaga e uiga i lana galuega, o lea i le 58 o ona tausaga, na ia tuua ai lana galuega. I le taimi nei, o i latou uma ia e toatolu o le aiga, ua tuuina atu ma papatisoina ma o loo auauna faatasi uma ma le autasi ia Ieova.

O upu moni o le Tusi Paia na autasia ai le aiga o Tanielu. E mafai foi ona autasia ai isi aiga pe afai latou te aʻoaʻoina ma faatatauina ma le loto atoa.