Feteenai Aʻoaʻoga mai le Atua ma Aʻoaʻoga a Temoni
“E o ese nisi i le faatuatua i tausaga amuli, latou te faalogo i agaga e faasese ma mataupu [“aʻoaʻoga,” NW] a temoni.”—1 TIMOTEO 4:1.
1. O le ā le taua o loo lotolotoi ai Kerisiano?
SEʻI faapea o lou olaga atoa lava o loo e ola aʻe i se vaipanoa o loo tau ai se taua. E faapeī le taimi e te moe ai, a o loo e faalogoina pea le pāpā o fana ma e toe teʻi aʻe ai ona o le paō o meatau? Ma le faanoanoa lava, o le tulaga tonu lava lena o loo ola ai tagata i nisi itu o le lalolagi. Ae i se uiga faaleagaga, o le tulaga lena o loo ola ai Kerisiano uma. Ua iai i latou i le lotolotoi o se taua tele ua tauina e tusa ma le 6,000 tausaga, ma ua matuā faateteleina i o tatou aso. O le ā lenei taua faaumiumi? O le taua i le va o upu moni ma upu pepelo, o le feteenaiga o aʻoaʻoga mai le Atua, ma aʻoaʻoga a temoni. E lē faapea ua soona faamamafa naua le faatauaina o lenei mea—auā i le itu o loo tetee mai—o se matuā feteenaiga lē alofa ma le matautia i talafaasolopito o le tagata.
2. (a) E tusa ai ma upu a Pauro, o ā itu e lua o loo feteenai? (e) O le ā na uiga i ai Pauro ina ua ia taʻua “le faatuatua”?
2 E lua itu taua na taʻua e le aposetolo o Pauro ina ua ia tusi atu ia Timoteo e faapea: “A o loo taʻutino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu [“aʻoaʻoga,” NW] a temoni.” (1 Timoteo 4:1) Ia mātau, o aʻoaʻoga a temoni o le a matuā tetele o latou aafiaga i “tausaga amuli.” E pei ona matauina mai i aso o Pauro, o taimi tonu lava foi na o lea ua tatou ola ai nei. Seʻi mātau foi, o le mea lea e feteenai ma aʻoaʻoga a temoni, o “le faatuatua.” I inei, o loo fai ai “le faatuatua” ma sui o aʻoaʻoga mai le Atua, lea e faavae aʻe i fetalaiga faagaeeina a le Atua o loo i le Tusi Paia. O le faatuatua lena e aumai ai le ola. E aʻoaʻoina ai se Kerisiano ina ia faia le finagalo o le Atua. O le upu moni lena e taitaiina ai i le ola e faavavau.—Ioane 3:16; 6:40.
3. (a) O le ā ua tupu i ē ua manunua i le taua i le va o le upu moni ma upu pepeplo? (e) O ai o loo i tua o aʻoaʻoga a temoni?
3 So o se tasi e paʻū ese mai le faatuatua, ua ia lē maua foi le ola e faavavau. O i latou na o tagata ua manunua i le taua. Pagā se iuga matuia ona o le faatagaina e se tasi o ia lava e taitaiseseina e aʻoaʻoga a temoni! (Mataio 24:24) E mafai faapefea e i tatou taitoatasi ona alofia le avea ma ē manunua i le taua? E ala lea i le teena atoatoa o nei aʻoaʻoga pepelo, lea e faafiafiaina ai na o Satani le Tiapolo, o “le alii o temoni.” (Mataio 12:24) Na muai valoia mai, o aʻoaʻoga a Satani e pepelo, auā o Satani o “le tamā o le pepelo.” (Ioane 8:44) Seʻi manatunatu i lona tomai i le faaaogāina o pepelo e taitaiseseina ai o tatou uluai mātua.
Ua Faaalialia Aʻoaʻoga a Temoni
4, 5. O le ā le pepelo na taʻu atu e Satani ia Eva, ma aisea na matuā leaga ai lena pepelo?
4 Ua tusia tala o mea na tutupu i le Tusi Paia i le Kenese 3:1-5. Na faaaogā e Satani se gata, e faalatalata atu ai i le fafine o Eva ma fesili atu ia te ia: “E moni ea, na fetalai mai le Atua, lua te le aai i laau uma o le faatoaga?” E foliga mai e leai se afaina o le fesili, ae seʻi toe tagai lava i ai. “E moni ea?” E foliga mai sa ofo Satani, e pei o loo faapea atu, ‘Aisea o le a fetalai atu ai le Atua i se mea faapena?’
5 I le loto mamā lava o Eva ia, na ia faaalia atu ai o le tulaga lena. Sa ia iloa le aʻoaʻoga mai le Atua e faatatau i lenei mea e faapea, sa fetalai le Atua ia Atamu, o le a la feoti pe afai la te aina le laau e iloa ai le lelei ma le leaga. (Kenese 2:16, 17) E manino mai o le fesili a Satani na faagaeeina ai le naunau o Eva, o lea na ia faalogologo lelei ai a o tuusao mai e Satani le mea sa ia finau mai ai: “Ona fai mai lea o le gata i le fafine, Lua te le oti lava.” Pagā le leaga o le mea na fai atu ai! Sa tuuaia e Satani Ieova, le Atua o le upu moni, le Atua o le alofa, o Lē na Foafoaina Mea, e faapea ua pepelo i Lana fanau faaletagata!—Salamo 31:5; 1 Ioane 4:16; Faaaliga 4:11.
6. Na faapefea ona luia e Satani le agalelei ma le pule silisiliesee a Ieova?
6 Ae e iai foi isi mea na fai atu ai Satani. Na ia fai atu atili: “Auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.” E tusa ai ma upu a Satani, o Ieova le Atua—o lē na ia saunia le anoanoai o mea mo o tatou uluai mātua—sa manao o ia e taofia mai i laua i le mauaina o se mea matagofie. Sa ia manao e taofia i laua mai le avea e pei o ni atua. Ona luia ai lea e Satani le agalelei o le Atua. Sa ia faagaeeina foi le agaga o le faamalieina totino ma le lē amanaia ma le loto i ai o tulafono a le Atua, i le faapea atu, o le faia faapea o le a maua ai aogā. O le mea moni, na luia e Satani le pule silisiliesee a le Atua i Ana lava foafoaga, i le tuuaia faapea e leai se aiā a le Atua na te tuua ai ni tapulaa i mea e faia e le tagata.
7. O anafea na muai lagonaina ai aʻoaʻoga a temoni, ma ua faapefea ona tutusa ma aso nei?
7 O upu na a Satani, na amata ai loa ona lagonaina aʻoaʻoga a temoni. O loo uunaia pea e nei aʻoaʻoga leaga mataupu silisili e lē faaleatua. E pei lava ona ia faia i le faatoaga i Etena, ua faapea foi ona aufaatasi atu nei ia Satani isi agaga fouvale, i le luia pea o le aiā a le Atua e faia ai tapulaa o gaoioiga. O loo ia luia pea le pule silisiliesee a Ieova ma taumafai e taaina tagata ina ia lē usiusitai atu i lo latou Tamā faalelagi.—1 Ioane 3:8, 10.
8. O le ā na leiloa e Atamu ma Eva i Etena, ae na faapefea ona faamaonia le moni o Ieova?
8 O le uluai fetaiaiga lena i le taua i le va o aʻoaʻoga mai le Atua ma aʻoaʻoga a temoni, na faia ai e Atamu ma Eva se filifiliga sese ma leiloa ai lo la faamoemoe o le ola e faavavau. (Kenese 3:19) A o mavae atu tausaga, ma ua amata ona fai ifo o la tino, sa mafai ai ona la mautinoa po o ai na pepelo a o ai na tautala i le upu moni i tuā i Etena. Peitai, i le faitau selau o tausaga a o leʻi feoti i laua i se uiga faaletino, na avea ai i laua ma uluai tagata manunua o le taua i le va o le upu moni ma upu pepelo, ina ua faamasinoina i laua ua lē aogā mo le ola, e Lē na Foafoaina i laua, le Puna o le ola. O le taimi lena na la feoti ai i se uiga faaleagaga.—Salamo 36:9; faatusatusa i le Efeso 2:1.
Aʻoaʻoga a Temoni i Aso Nei
9. O le ā le aafiaga ua oo i ai aʻoaʻoga a temoni a o faagasolo le tele o senituri?
9 E pei ona tusia i le tusi o Faaaliga, na tatai atu ai e faagaeega manatu o le aposetolo o Ioane i “le aso o le Alii,” lea na amata i le 1914. (Faaaliga 1:10) O le taimi lena na lafo ifo ai Satani ma ana temoni mai le lagi i le lalolagi—o se matuā toilalo lea i lenei meafaiola o loo tetee i Lē Sili na Foafoaina i tatou. Na lē toe lagona ai i le lagi lona leo i le faia pea o ana tuuaiga tetee i auauna a Ieova. (Faaaliga 12:10) E ui i lea, o le ā le agaigai i luma ua iai aʻoaʻoga a temoni i le lalolagi talu mai le taimi i Etena? Ua faapea mai le tala: “Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma.” (Faaaliga 12:9) Ua faaseseina le lalolagi atoa i pepelo a Satani! E lelētioa taʻua Satani o “le alii o lenei lalolagi”!—Ioane 12:31; 16:11.
10, 11. I ā auala ua olaola ai i aso nei Satani ma ana temoni?
10 Pe na tautino e Satani lona toilalo ina ua tuliesea mai le lagi? E leai lava! Sa ia maumauai pea e faasagatau atu i aʻoaʻoga mai le Atua ma i latou o loo taofi mau pea i ai. Ina ua mavae lona lafoina ifo mai le lagi, sa faaauau pea e Satani lana taua: “Ua ita foi le tarako [Satani] i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.”—Faaaliga 12:17.
11 E lē gata i le tau ma auauna a le Atua, ae o loo matuā faatumuina e Satani le lalolagi i ana faufauga, i le taumafai ina ia ona uumauina tagata. I se tasi o vaaiga o i le Faaaliga a le aposetolo o Ioane e faatatau i le aso o le Alii, na ia vaaia ai ni manu feai se tolu, sa fai ma sui faafaatusa o Satani, o lana faalapotopotoga faapolotiki i le lalolagi, ma le malo malosi o le lalolagi o loo pule i o tatou aso. Na feosofi mai rane i fafo o gutu o nei manu e tolu. O le ā na fai ma faatusa o nei rane? Ua tusi mai Ioane e faapea: “Auā o agaga ia o temoni e fai faailoga, ua latou o atu i tupu o le lalolagi ma le atu laulau uma, e faapotopoto ia te i latou i le taua i le aso tele o le Atua e ona le malosi uma lava.” (Faaaliga 16:14) E mautinoa lava, le matuā olaola o aʻoaʻoga a temoni i le lalolagi. O loo tau pea Satani ma ana temoni e tetee atu i aʻoaʻoga mai le Atua, ma o le a latou faaauau pea seia oo ina taofia faamalosi i latou e Iesu Keriso, le Tupu Faa-Mesia.—Faaaliga 20:2.
Matauliaina Aʻoaʻoga a Temoni
12. (a) Aisea e mafai ai ona tetee atu i aʻoaʻoga a temoni? (e) Ua faapefea ona taumafai Satani e ausiaina ana faufauga i auauna a le Atua?
12 Pe mafai ea e tagata o loo matatau i le Atua ona teena aʻoaʻoga a temoni? O le mea moni lava latou te mafaia, ona o mafuaaga nei e lua. Muamua, auā e sili atu ona malolosi aʻoaʻoga mai le Atua; ma lona lua, auā ua faaalialia e Ieova faufauga a Satani ina ia mafai ai ona tatou teena. E pei ona faapea mai le aposetolo o Pauro, “tatou te le vālea i ana togafiti.” (2 Korinito 2:11) Ua tatou iloa o loo faaaogā e Satani sauaga e avea ma se tasi o ana auala i le ausiaina o ana fuafuaga. (2 Timoteo 3:12) E ui i lea, o le isi mea e sili atu ona taufaasese, o lona taumafai lea e taaina mafaufau ma loto o i latou o loo auauna atu i le Atua. Na ia faaseseina Eva ma tuuina faanaunauga sese i lona loto. Ua ia faaaogā foi le auala lava lena i aso nei. Na tusi atu Pauro i uso i Korinito e faapea: “A e ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.” (2 Korinito 11:3) Seʻi manatu i le auala ua ia faaleagaina ai mafaufauga o tagata lautele.
13. O ā pepelo ua taʻu atu e Satani i tagata talu mai taimi i Etena?
13 Ina ua tautala atu ia Eva, sa tuuaia ai e Satani Ieova i le pepelo, ma ia faapea atu e mafai ona pei tagata o ni atua, pe afai latou te lē usiusitai atu i Lē na Foafoaina i latou. O le tulaga agasala o tagata i aso nei ua faamaonia ai o Satani le pepelo ae lē o Ieova. E lē o avea tagata i aso nei o ni atua! Peitai, sa toe sosoo atu foi e Satani isi pepelo i lena uluai pepelo. Na ia faailoa atu le manatu e faapea e ola pea le solu o le tagata, e lē oti. Ona ia ofoina atu lea ma le faatosina i le tagata se avanoa e ono avea ai e pei o ni atua i se isi auala. I lena aʻoaʻoga sese, na ia faatulai mai ai aʻoaʻoga o le afi i seoli, pulekatolio, o faiga faataulaitu, ma tapuaiga i tuaa. O pepelo nei o loo faapologaina ai pea le faitau selau miliona o tagata.—Teuteronome 18:9-13.
14, 15. O le ā le upu moni e uiga i le oti ma le faamoemoe o le tagata mo le lumanai?
14 Ioe, o le upu moni lea na taʻu atu e Ieova ia Atamu. Na oti lava Atamu ina ua ia agasala i le Atua. (Kenese 5:5) Ina ua feoti Atamu ma ē na tupuga mai ia te ia, ona avea lea o i latou ma solu ua feoti, ua lē toe iloa se mea ma ua lē toe gaoioi. (Kenese 2:7; Failauga 9:5, 10; Esekielu 18:4) Talu ai le agasala ua tuufaasolo mai ia Atamu, ua feoti uma ai solu faaletagata. (Roma 5:12) Peitai ane, i tuā i Etena, na folafola ai e Ieova le oo mai o le fanau o le a tau e tetee atu i galuega a le Tiapolo. (Kenese 3:15) O lena Fanau o Iesu Keriso lea, o le Alo pele e toatasi o le Atua. Na maliu Iesu e aunoa ma sana agasala, ma na avea lona soifua faataulagaina ma togiola e faatau mai ai tagata mai lo latou tulaga oti. O i latou e faaalia ma le usiusitai le faatuatua ia Iesu, ua ia i latou le avanoa e mauaina ai le ola e faavavau lea na leiloa ia Atamu.—Ioane 3:36; Roma 6:23; 1 Timoteo 2:5, 6.
15 O le togiola, o se faamoemoe moni mo tagata, ae lē o se manatu tau matemate e faapea e ola le solu pe a mavae le oti. O le aʻoaʻoga lenei mai le Atua. O se upu moni lea. O se faataitaiga ofoofogia foi lea o le alofa ma le atamai o Ieova. (Ioane 3:16) Maeu so tatou loto faafetai e tatau ona iai i le aʻoaʻoina o lenei upu moni ma saoloto mai ai i aʻoaʻoga a temoni e faatatau i nei mataupu!—Ioane 8:32.
16. O ā āuga faaumiumi pe a mulimuli atu tagata i lo latou lava atamai?
16 O pepelo a Satani i le faatoaga i Etena, na ia uunaia ai Atamu ma Eva ina ia taumafai e tutoatasi mai le Atua ae ia faalagolago atu i lo laua lava atamai. I aso nei, ua tatou vaaia ai āuga faaumiumi o na mea, i soligatulafono, i faigata tau i le tamaoaiga, o taua, ma le matuā lē autasi o loo iai i le lalolagi i aso nei. E lelētioa ona faapea mai le Tusi Paia: “O le poto o lenei lalolagi o le valea lea i luma o le Atua”! (1 Korinito 3:19) Ae ui i lea, o le toatele o tagata ua vālea i lo latou faapea mai, ua sili ia i latou le puapuagatia na i lo o le uai atu i aʻoaʻoga a Ieova. (Salamo 14:1-3; 107:17) O Kerisiano ua latou talia aʻoaʻoga mai le Atua, ua latou aloese mai le pauu atu i lena mailei.
17. O le ā le mea ua ‘taʻua pepelo o le poto’ lea ua uunaia e Satani, ma o ā ona fua?
17 Na tusi atu Pauro ia Timoteo e faapea: “Timoteo e, ia e tausi i le mea na tuuina atu ia te oe, ma ʻaloʻalo ese i upu leaga ma le le aoga, ma finauga i mea ua igoa pepelo ai o le poto; o isi o e na taofi ai, ua sese ai i latou i le upu o le faatuatua.” (1 Timoteo 6:20, 21) O lena “poto” ua fai foi ma sui o aʻoaʻoga a temoni. I aso o Pauro, e foliga mai na faasino atu i manatu faaaposetate na sa faatulai mai e nisi i le faapotopotoga. (2 Timoteo 2:16-18) Mulimuli ane, o isi mea na taʻua pepelo o le poto, e aofia ai aʻoaʻoga a Gnostic ma filosofia faa-Eleni, sa faaleagaina ai le faapotopotoga. I le lalolagi i aso nei, o le lē talitonu i le Atua, le lē talitonu e iai se Atua, o filosofia faaevolusione, ma faitioga mamafa i le Tusi Paia, o faaaoaoga na o le mea lea ua taʻua pepelo o le poto, e faapea foi ma manatu e lē faale-Tusi Paia ua faatulai mai e aposetate i aso nei. O fua ua maua mai i lenei mea ua taʻua pepelo o le poto, ua vaaia i le paʻū maulalo o amioga mamā, le taatele o le lē faaaloalo i le pule, le lē faamaoni, ma le manatu faapito lea ua iloatino ai le faiga o mea a Satani.
Pipii Mau atu i Aʻoaʻoga Mai le Atua
18. O ai i aso nei ua sailia aʻoaʻoga mai le Atua?
18 E ui ina matuā faatumuina e Satani le lalolagi i aʻoaʻoga a temoni talu mai le taimi i Etena, ae ua iai pea nisi o loo saili atu mo aʻoaʻoga mai le Atua. O i latou na ua faitau miliona lo latou aofai i aso nei. E aofia ai le vaega totoe o Kerisiano faauuina o ē ua iai lo latou faamoemoe mautinoa o le nofotupu ma Iesu i lona Malo faalelagi, ma se motu o tagata e toatele o loo faatuputupulaia pea o “isi mamoe” o ē o lo latou faamoemoe ina ia aināina le nofoaga faalelalolagi o lea Malo. (Mataio 25:34; Ioane 10:16; Faaaliga 7:3, 9) I aso nei, ua aoaoina faatasi ai i latou nei i se faalapotopotoga i le lalolagi aoao, lea ua faatatauina i ai upu a Isaia: “E aʻoaʻoina lau fanau uma lava e Ieova; e tele foi le manuia o lau fanau.”—Isaia 54:13.
19. O le ā e aofia ai i le aʻoaʻoina e Ieova?
19 O le aʻoaʻoina e Ieova, e sili atu lona faauigaina na i lo o le na ona iloa o le talitonuga moni—e ui lava e tāua foi lena itu. Ua faatonuina i tatou e Ieova i le auala tatou te ola ai, i le auala e faatatauina ai aʻoaʻoga mai le Atua i o tatou olaga totino. Mo se faataitaiga, ua tatou teena le manatu faapito, o amioga lē mamā, ma le agaga o le fia tutoatasi ia ua matuā salalau i le lalolagi o loo tatou iai. Ua tatou iloa le lē aogā o le sailia o le tamaoaiga i lenei lalolagi ona o lona taunuuga—e oti ai. (Iakopo 5:1-3) Ia aua lava neʻi o tatou faagaloina le aʻoaʻoga mai le Atua na faailoa mai i upu a le aposetolo o Ioane e faapea: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā.”—1 Ioane 2:15.
20, 21. (a) O le ā ua faaaogā e Satani i ana taumafaiga ina ia faatauasoina tagata? (e) O ā faamanuiaga ua maua e i latou o ē pipii mau atu i aʻoaʻoga mai le Atua?
20 O aafiaga o aʻoaʻoga a temoni i ē ua afaina ai, ua faamaonia lea i upu a Pauro i uso i Korinito e faapea: “Ua faatauasoina [e Satani] manatu o i latou o e le talitonu e le atua o le lalolagi nei, ina neʻi pupula atu ia te i latou le malamalama o le tala lelei i le mamalu o Keriso, ua tusa o ia ma le Atua.” (2 Korinito 4:4) E manao Satani ina ia faatauasoina foi Kerisiano moni i lenei auala. I tuā i Etena, na ia faaaogāina ai se gata ina ia faaseseina ai se tasi o auauna a le Atua. I aso nei, ua ia faaaogā faiga sauā, o ata tifaga, o amioga lē mamā ma polokalama i televise. Ua ia faaaogāseseina leitio, o tusi faitau, ma musika. O le auupega e sili ona malosi ua ia faaooina mai, o aumea sese ia. (Faataoto 4:14; 28:7; 29:3) Ia matauina pea na mea—o mailei na ma aʻoaʻoga a temoni.
21 Ia manatua, o upu a Satani i Etena o ni pepelo ia; sa faamaonia le moni o fetalaiga a Ieova. Talu mai na uluai taimi, ua faaauau ai pea lena tulaga. Ua faamaonia pea le avea o Satani ma pepelo, ae ua tumau pea le moni o aʻoaʻoga mai le Atua. (Roma 3:4) Afai tatou te pipii mau atu i le Afioga a le Atua, o le a tatou tumau ai pea i le itu manumalo o le taua i le va o le upu moni ma upu pepelo. (2 Korinito 10:4, 5) O lea, seʻi o tatou maumauai ai e teena aʻoaʻoga uma a temoni. O le faia faapena, o le a tatou tumau ai pea seia oo i le taimi e muta ai le taua i le va o le upu moni ma upu pepelo. O le a manumalo le upu moni. O le a mavae atu Satani, ae na o aʻoaʻoga mai le Atua o le a lagonaina pea i le lalolagi.—Isaia 11:9.
Pe Mafai ona E Faamatalaina?
◻ O anafea na muai lagonaina ai aʻoaʻoga faatemoni?
◻ O ā nisi o pepelo na faatulai mai e Satani ma ana temoni?
◻ I ā auala ua matuā olaola ona faia e Satani i aso nei?
◻ O le ā ua faia e Satani e uunaia ai aʻoaʻoga a temoni?
◻ O ā faamanuiaga e maua e i latou o ē pipii mau atu i aʻoaʻoga mai le Atua?
[Ata i le itulau 9]
Na muai lagonaina aʻoaʻoga faatemoni i le faatoaga o Etena
[Ata i le itulau 10]
O aʻoaʻoga mai le Atua e faatatau i le togiola ma le Malo, ua aumaia ai le na o le tasi le faamoemoe mo tagata