Talavou—O Aʻoaʻoga a Ai Tou Te Utagiaina?
“E o ese nisi i le faatuatua . . . latou te faalogo i . . . aʻoaʻoga a temoni.”—1 TIMOTEO 4:1, LF.
1. (a) O le ā le filifiliga ua iai i talavou? (e) E faapefea ona aʻoaʻo mai Ieova?
O LE fesili i inei o loo faasino atu i talavou e faapenei, O aʻoaʻoga a ai tou te utagiaina? Ua faaalia ai i inei le iai ia te outou talavou o se filifiliga. O le filifiliga i le taliaina o aʻoaʻoga mai le Atua, ma le usiusitai atu i aʻoaʻoga a temoni. E aʻoaʻo mai Ieova e ala i lana Afioga, le Tusi Paia, ma e ala mai foi i le faiva a ē o loo ia faaaogā e avea o ni ona sui i le lalolagi. (Isaia 54:13; Galuega 8:26-39; Mataio 24:45-47) Ae po o faateia ea outou ona o loo aʻoaʻo foi temoni?
2. Aisea e tāua ai le leoleomalu mai aʻoaʻoga a temoni ae maise lava i le taimi lenei?
2 Na tusi le aposetolo o Pauro e faapea: “E o ese nisi i le faatuatua i tausaga amuli, latou te faalogo i agaga e faasese ma aʻoaʻoga, a temoni.” (1 Timoteo 4:1, LF) Talu ai o loo tatou ola i “aso e gata ai” lea o loo matuā gaoioi ai Satani ma ana temoni, po ua tou malamalama la i le mafuaaga ua matou fesiligia ai lena fesili, O aʻoaʻoga a ai tou te utagiaina? (2 Timoteo 3:1-5; Faaaliga 12:7-12) Talu ai e faitogafiti tele Satani ma ana temoni, e matuā taufaasee tele i a latou auala o loo faaaogā, ua matuā tāua ai ona tou manatunatu ma le faaeteete i lenei fesili.—2 Korinito 11:14, 15.
O Temoni ma a Latou Aʻoaʻoga
3. O ai temoni, o le ā la latou fuafuaga, ma ua faapefea ona latou saili ina ia faataunuuina?
3 O temoni sa avea muamua ma agelu a Ieova, ae na latou fouvale atu i Lē na Foafoaina i latou, ma avea ai loa ma lagolagosua a Satani. (Mataio 12:24) O la latou fuafuaga ia faaleagaina tagata ma tatai ese i latou ia lē auauna i le Atua. Ina ia faataulau lenei fuafuaga, ua faaaogā ai e temoni aʻoaʻo faaletagata ina ia uunaia se olaga manatu faapito ma le lē mamā lea e inosia e Ieova. (Faatusatusa i le 2 Peteru 2:1, 12-15.) O le toe autaluina o le mafuaaga na avea ai ma temoni nisi sa avea muamua ma agelu faamaoni, o le a fesoasoani ia te outou e mataulia ai a latou aʻoaʻoga ma le ituaiga o olaga o loo uunaia e nei aʻoaʻoga.
4. (a) Aisea na ō mai ai i le lalolagi i ona po o Noa agelu lē usiusitai? (e) O le ā na tupu i agelu amio leaga ma a latou fanau i le taimi o le Lolo?
4 I aso o Noa, na matuā tosina mai ai ni agelu i afafine lalelei o tagata, ona tuua ai lea e nei foafoaga agaga o latou tulaga i le lagi ae ō mai i le lalolagi. O a latou faiā faaleituaiga ma fafine na maua mai ai ni fanau tino eese sa taʻua o Nefilimi. Talu ai o se tulaga e lē masani ai le feusuai o foafoaga agaga ma tagata, na pei ai le leaga o mea na faia e agelu lē usiusitai ma nei fafine, o mea sese faatauatane na faia e tamaloloa ma tama i Sotoma. (Kenese 6:1-4; 19:4-11; Iuta 6, 7) E ui na faaumatia paaga a agelu ma a latou fanau tino eese i le lolo, ae na toe faamataa e agelu leaga o latou tino faitino ma toe foi atu i le lagi i le mea na avea ai loa ma aumea temoni a Satani le Tiapolo.—2 Peteru 2:4.
5. O ā ituaiga o meafaiola e iai temoni, ma ua faapefea ona latou taumafai e suia tulafono a le Atua?
5 E tusa ai ma lenei mea na tupu i tuā i le talafaasolopito, po ua tou malamalama la i ituaiga o foafoaga e iai moni lava temoni? O i latou o ni agaga lē vaaia o ē tuinanau i faiga matagā faaleituaiga, o loo lalafi mai i tua o pulega a lenei lalolagi ua maʻi valea i faiga faaleituaiga. E ui ua latou lē mafai ona toe faaliliuina o latou tino e avea o ni tagata, ae ua faafiafiaina i latou i faiga leaga faaleituaiga mai ia i latou na e mafai ona latou faaleagaina i le lalolagi. (Efeso 6:11, 12) E taumafai temoni e suia tulafono a Ieova i tulaga matagofie ma le mamā, e ala i le faafoliga mai o na tulafono ua soona mamafa naua. Ua lagolagoina e nei agelu leaga amioga lē mamā faaleituaiga e faapea o se ala o le olaga ua masani ai ma e faafiafiaina ai.
Uunaia Pea Aʻoaʻoga a Temoni
6. Aisea e lē tatau ai ona faateia i tatou ona ua uunaia e temoni a latou aʻoaʻoga i se auala faatogafiti?
6 O le uunaia e temoni o a latou aʻoaʻoga i se auala faatogafiti, e lē tatau ona tatou ofo ai, auā o le auala lenei na faaaogā e lo latou taʻitaʻi, o Satani le Tiapolo, i le faaseseina o Eva. Seʻi manatua le auala na ia tautala atu ai ia Eva, e pei lava na manao e fia fesoasoani atu. Na fesili atu Satani: “E moni ea, na fetalai mai le Atua, lua te le aai i laau uma o le faatoaga?” Ona ia faatogafiti loa lea ona taumafai e taʻu faatauvaa aʻoaʻoga a le Atua e ala i le taʻu atu ia Eva e faapea, o le a ia maua aogā pe a ʻai mai le laau faasaina. Na folafola atu e le Tiapolo e faapea: “O le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.” (Kenese 3:1-5) Ona maileia ai lea o Eva, ioe, na faaseseina ina ia lē usiusitai atu i le Atua.—2 Korinito 11:3; 1 Timoteo 2:13, 14.
7. O le ā le āuga o aʻoaʻoga faatogafiti a temoni, ma o le ā le lapataiga ua saunia ai?
7 E toatele foi ē ua faaseseina i ni taimi e leʻi leva atu. E faatogafiti tele le uunaia e temoni o faiga lē mamā faaleituaiga lea ua oo ina talia e le toatele o ē na latou inoino muamua i ai. Mo se faaaoaoga, ina ua tali atu se tagata tusitala fautua o nusipepa e lauiloa i le Iunaite Setete, i se tusi e faatatau i faiga faaleituaiga a tagata e leʻi faaipoipoina, na ia tusia e faapea: “Ou te leʻi mafaufauina lava o le a ese mai soʻu manatu i lenei mataupu, ae ua ou talitonu nei o ulugalii o loo uigā ia i latou le faaipoipoga, e ao ona ō malaga faatasi i ni faaiuga o vaiaso seʻi tofotofoina ai pe ono mafai ona latou mafuta faatasi.” Ona ia toe faaopoopo mai lea: “Ou te lē talitonu na ou tusia lena mea!” E ui lava na te lē talitonu ua na fautuaina le faitaaga, ae o le mea lena na ia faia! E manino la, e tatau ona tatou faaeteete ina ia lē avea aʻoaʻoga a temoni ma itu e aafia ai o tatou manatu i faiga ua inosia e le Atua.—Roma 1:26, 27; Efeso 5:5, 10-12.
8. (a) Ua faapefea ona faaaogā i le Tusi Paia le upu “lalolagi”? (e) O ai o loo pulea le lalolagi, ma o le ā le manatu e tatau ona manatu ai soʻo o Iesu e faatatau i le lalolagi?
8 E lē tatau ona tatou faagaloina o Satani, o “le alii o lenei lalolagi.” O le mea moni, na faapea mai le aposetolo o Ioane, “o le lalolagi uma o loo nofo toilalo i loo leaga.” (Ioane 12:31; 1 Ioane 5:19) E moni, o nisi taimi na faaaogā ai e Iesu le upu “lalolagi” e faatatau atu i tagata uma. (Mataio 26:13; Ioane 3:16; 12:46) Peitai ane, e sili atu ai ona ia faaaogā soo le upu “lalolagi” e faatatau atu i sosaiete uma a tagata ua faamaopoopoina, lea e lē o aofia i le faapotopotoga o Kerisiano moni. Mo se faataitaiga, na fetalai Iesu e tatau i ona soʻo ona “le ni o le lalolagi” (sosaiete o tagata amioletonu) ma talu ai e lē o i latou o se vaega o le lalolagi, o le a inoino ai le lalolagi ia i latou. (Ioane 15:19; 17:14-16) Na lapatai atili mai le Tusi Paia e faapea e ao ona tatou alofia le faauo atu i lenei lalolagi ua pulea e Satani.—Iakopo 4:4.
9, 10. (a) O ā mea faalelalolagi ua faagaeeina ai tuinanauga faaleituaiga e lē tatau? (e) Ua mafai faapefea ona mataulia lē o loo i tua o mea ua aʻoaʻo mai e faafiafiaga a le lalolagi?
9 Na lapatai mai le aposetolo o Ioane: “Aua tou te mananao i le lalolagi, po o mea o i ai i le lalolagi.” Na ia toe faapea mai foi: “O mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia.” (1 Ioane 2:15, 16) Seʻi manatu i lenei mea. O ā mea o i le lalolagi i aso nei o loo faagaee aʻe ai tuinanauga sese, mo se faaaoaoga, o tuinanauga i faiga leaga faaleituaiga? (1 Tesalonia 4:3-5) Ae faapefea le tele o musika a le lalolagi? Na faapea mai se leoleo tamaitai mo ē o nonofo vaavaaia i Kalefonia: “O le mea moni lava, ua aʻoaʻo mai e musika e faapea, e aua neʻi e toe faalogo atu i ou mātua, ma e ao ona e ola lava oe i le auala e te manao ai.” Po o tou tau mātea mai ea le puna o aʻoaʻoga ua aumaia e na musika?
10 Ia manatua, le uiga o le tala na fai atu e Satani ia Eva: ‘E iai se mea manaia o loo e misia. Ola oe i le auala e te manao ai. Fai lava a oe filifiliga i le mea e lelei ma le mea e leaga. E lē manaomia ona e faalogo atu fua i le Atua.’ (Kenese 3:1-5) Pe ua lē o le ituaiga o feau foi lena o loo maua i le tele o musika a le lalolagi? Ae lē na o musika e ala mai ai aʻoaʻoga a temoni. Latou te faaaogāina foi polokalama o faasalalauga faatosina i televise, o tifaga, ma vitiō e aʻoaʻo mai ai. E faapefea? O auala o faasalalauga a le lalolagi ua aumaia ai faafiafiaga na e foliga mai ai aʻoaʻoga a le Atua i amioga mamā o ni avega mamafa i tagata. Ua latou lagolagoina le faitaaga e ala i le matuā faafaatauaina mai ma aumaia i se tulaga o se mea e moomia.
11. I tulaga o amioga mamā, o ā mea ua masani ona aʻoaʻo mai e televise?
11 Ua taʻua i le mekasini o le U.S.News & World Report e faapea: “I le 1991, e tolu ālāleo o televise i le [Iunaite Setete] latou te faaalia le silia i le 10,000 o ata o faiga faaleituaiga i le taimi o le afiafi lea e toatele ai tagata maimoa (prime time); mai ata taitasi e faaalia ai feusuaiga a paaga faaipoipo, ua faaalia ai e ālāleo le 14 o ata o faiga faaleituaiga i fafo atu o le faaipoipoga.” O le faaalia o le silia i le 9,000 o vaaiga o faiga leaga faaleituaiga i lea taimi o le aso i totonu o le tausaga e tasi, o le ā la sau tala e uiga i mea o loo aʻoaʻoina e televise? Na taʻua e Barry S. Sapolsky, o le tusitala lagolago i le lipoti “Faiga Faaleituaiga ua Faaalia i le Televise i Afiafi: 1979 Faatusatusa i le 1989,” e faapea: “Afai e matamata se talavou i le televise mo le tele o tausaga i ata ia e fai ai e tagata amioga faatosina po o le faaalia saʻo mai lava o faiga faaleituaiga, ma pe a mavae le tele o tausaga, o le a aʻoaʻoina mai ai e le faitauafe o nei vaaiga e faapea, o faiga faaleituaiga e maua ai le fiafia—ma e aunoa ma se iuga leaga.” E lē fesiliga lenei mea: Ua aʻoaʻo e faafiafiaga a le lalolagi i talavou e faapea e leai ni tulafono, o le faitaaga e taliaina, ma e leai ni iuga leaga i le ola i se olaga ua inosia e le Atua.—1 Korinito 6:18; Efeso 5:3-5.
12. Aisea ua taufaamataʻu mai ai faafiafiaga a le lalolagi, ae maise lava i talavou Kerisiano?
12 Ua fuafuaina musika a le lalolagi, o ana tifaga, o vitiō, ma televise ina ia foliga mananaia atu i talavou. Ua latou uunaia atili aʻoaʻoga iuvale a temoni! Ae pe ao ea ona faateia ai i lenei mea? Mafaufau ane i ai. Afai o lotu sese ma faiga faapolotiki o ni vaega o le lalolagi a Satani—ma ua manino lava lena mea—pe talafeagai la ona talitonu faapea o faafiafiaga ua uunaia e le lalolagi ua lē aafia i taaʻiga a temoni? O outou talavou, ua manaomia faapitoa lava ona outou leoleomalu ina ia lē “faatagaina le lalolagi o loo siomia ai outou e mimiloina atu outou ia pei o ia.”—Roma 12:2, The New Testament in Modern English, a J. B. Phillips.
Ia E Suesueina Oe Lava
13. O le ā se suesuega e ao i le tagata ona faia ia te ia lava?
13 O le mataupu i le po o aʻoaʻoga a ai o loo outou utagia, e fuatia lea e lē gata i la outou gagana ae o a outou gaoioiga foi. (Roma 6:16) Fesili taitoatasi ifo la ia te outou lava, ‘Po ua lē talafeagai ea ni aafiaga ua oo i laʻu amio ma le auala o loo oʻu ola ai, ona o mea ua ou aʻoaʻoina mai i ala faasalalau a le lalolagi? Pe o mafai ea ona sao mai aʻoaʻoga a temoni i loʻu olaga?’ Ina ia fesoasoani i lou taliina o na fesili, aisea tou te lē avane ai le tele o le taimi ma taumafaiga ua tou faaalu i le suesueina o le Tusi Paia, le auai i sauniga faa-Kerisiano, ma le tautala atu i isi e uiga i le Malo o le Atua, ona faatusatusa lea i le tele o le taimi o loo tou faaalu i matamataga i le televise, le faalogologo i musika, le auai i se taaloga e sili ona tou fiafia i ai, po o le faia o isi mea faapena? Ia outou suesueina ma le faamaoni outou lava—talu ai o le tele o mea e ono oo atu i se tulaga lamatia—e aofia ai ma o outou lava ola.—2 Korinito 13:5.
14. O le ā o le a aafia ai lo tatou soifua maloloina faaleagaga, ma o le ā le manatu moni e tatau ona teu i o tatou mafaufau?
14 Ua tou iloa lelei lava o meaai faaletino o loo tou taumafaina o le a aafia ai lo outou soifua maloloina faaletino. E faapena foi ona aafia o outou soifua maloloina faaleagaga, i mea o loo outou fafagaina ai o outou mafaufau ma loto. (1 Peteru 2:1, 2) E ui atonu tou te faaseseina outou lava e tusa ai ma tou faanaunauga moni, ae e lē mafai ona tou faaseseina lo tatou Faamasino, o Iesu Keriso. (Ioane 5:30) O lea, ia fesili ifo le tagata lava ia ia te ia lava, ‘Pe ana fai o loo iai Iesu i le lalolagi, po o le a ou mā ea e faataga o ia e afio mai i totonu o loʻu potu ma faafofoga i aʻu musika po o le silasila atu foi i mea o loo oʻu matamata i ai?’ O le manatu moni lava o loo silasila mai Iesu ma ia silafia a tatou amioga.—Faaaliga 3:15.
Ia Teena Aʻoaʻoga a Temoni
15. Aisea e ao ai i Kerisiano ona tau malosi ina ia tetee atu i aʻoaʻoga a temoni?
15 E matuā anoanoai omiga o loo uunaia e temoni i talavou ina ia usitaia ai a latou aʻoaʻoga. E foliga mai o loo ofoina atu e nei agaga leaga se olaga o ni faamaliega vave—se olaga manaia ma tumu i le faafiafiaina. Ina ia faamalieina le Atua, na teena ai e Mose o aso anamua, “le fiafia i le agasala e vave mavae” i le avea o se tagata lauiloa i le aiga o Farao. (Eperu 11:24-27) E lē faigofie ona tetee atu i mea o loo ofoina mai e temoni, o lea e tatau ai ona outou tau malosi e faia le mea ua tonu. E matuā moni lava lenei tulaga auā ua tuufaasolo mai ia i tatou le agasala ma e masani ai ona faananau atu o tatou loto i le faia o le mea leaga. (Kenese 8:21; Roma 5:12) Ona o uunaiga o le agasala, na oo ai lava i le aposetolo o Pauro sa tatau ona ia maumauai ia te ia lava ina ia lē faatagaina ona tuinanauga faaletino e puleaina o ia.—1 Korinito 9:27; Roma 7:21-23.
16. E mafai faapefea e talavou ona tetee atu i omiga ina ia faia amioga lē mamā?
16 E ui atonu e tofotofoina outou ina ia “mulimuli atu i le toatele e fai le amio leaga,” ae e mafai e le Atua ona fesoasoani ia te outou e teena omiga mai a outou tupulaga o ē uunaia outou e mulimuli atu i o latou ala sese. (Esoto 23:2; 1 Korinito 10:13) Ae tatau ona tou faalogo atu i taitaiga a le Atua, ia teu faapelepele ana afioga i lou loto. (Salamo 119:9, 11) E manaomia ona tou iloatino e faapea, pe a vavae ese talavou e tuua na o i latou lava, e mafai ona tutupu aʻe ai tuinanauga faaleituaiga ma taitaiina atu ai i le solia o tulafono a le Atua. Na taʻutino mai e se tasi teine talavou e faapea: “Pe a na o maʻua ma laʻu uo tama, ona manao loa lea o loʻu tino e fai le isi mea, ae fai mai loʻu mafaufau e fai ma le isi mea.” O lea, ia iloa tou tapulaa ma iloatino o o outou loto e faaʻoleʻole. (Ieremia 17:9) Aua tou te fia momotu ese na o outou. (Faataoto 18:1) Ia faatapulaa upu ma gaoioiga e faailoa atu ai le alofa. Ma le mea e sili ona tāua, ia aumea vavalalata atu tau o i latou o ē alolofa ia Ieova ma o ē e faaaloalo loloto i ana tulafono.—Salamo 119:63; Faataoto 13:20; 1 Korinito 15:33.
17. O le ā e mafai ona fesoasoani i talavou Kerisiano ina ia maua le malosi e tetee atu ai i aʻoaʻoga a temoni?
17 O le suesueina ma le faaeteete o lomiga faa-Kerisiano ua fuafuaina mo le faamalosia o lo outou tulaga faaleagaga, o le a fesoasoani lea ia te outou. Mo se faataitaiga, ia iloiloina le tusi Lou Talavou—Mauaina mai ai Aogā Silisili, ma le mataupu “Le Taua e Faia Le Mea ua Tonu” i le tusi E Mafai ona E Ola e Faavavau i Parataiso i Le Lalolagi. Ia matuā goto ifo i o outou mafaufau ma o outou loto faatonuga faale-Tusi Paia ua saunia ai, ma o le a faamalosia ai outou. O le mea moni e lē tatau lava ona outou faagaloina e faapea, e lē faigofie le faia o le mea ua tonu i totonu o lenei lalolagi ua pulea e temoni. O lea, ia tau malosi. (Luka 13:24) Ia faatupu aʻe lo outou malosi faaleagaga. Aua lē faataitai fua i ē vaivai ma palaaai o loo mulimuli atu i le toatele o isi.
Ia Manuia i Aʻoaʻoga Mai le Atua
18. O ā nisi o aogā e maua mai i le utagiaina o aʻoaʻoga mai le Atua?
18 Ia manatua foi, o le a lē taitai ona outou misia se mea aogā pe a outou utagiaina aʻoaʻoga a Ieova. E alofa moni o ia ia te outou, ma o le pogai lena o loo ia “aʻoaʻo [ai] ia te [outou] i mea e aoga.” (Isaia 48:17) O lea, ia utagia aʻoaʻoga a Ieova, ma alofia le tiga o lou loto ona o se loto fuatiaifo ua faaleagaina, le lē toe iai o se faaaloalogia mo outou lava, ni maʻitō sa leʻi manaomia, ni faamaʻi pipisi mai faiga faaleituaiga, po o isi lava mala e pei o na. E olioli Ieova pe a saunia e ana auauna se tali atu i le luʻi a Satani e faapea, o le a lē tumau pea ona faamaoni tagata i le Atua pe a oo i ai ni tofotofoga. (Iopu 1:6-12) Afai tou te faafiafiaina le finagalo o Ieova e ala i le faamaoni atu ia te ia, ona faasaoina lea o outou pe a ia faaoo mai faamasinoga ogoogo i lenei lalolagi, ae o ē uma e lē amanaia ana tulafono o le a faafanoina.—Faataoto 27:11; 1 Korinito 6:9, 10; 1 Ioane 2:17.
19. O le ā le tāua o le auaufaatasi ma i latou o ē talisapaia aogā o aʻoaʻoga a Ieova?
19 Afai tou te auaufaatasi vavalalata atu i ē latou te talisapaia mea ua faia e Ieova mo i latou, ona mafai lea ona outou aʻoaʻoina ni mea mai ia i latou i o latou olaga. O se tasi fafine o lē sa pulea e fualaau oona i se taimi ua teʻa ma faia foi amioga lē mamā, na ia faamatala mai e faapea: “Pe ana fai ou te lē faalogo atu ia Ieova, semanu ua ou oti. O le tamaloa lea na fuafua ou te faaipoipo atu i ai na oti i le AIDS. O aʻu uo uma lava sa iai muamua ua feoti i le AIDS a o isi ua amata ona faasolo atu i ai i le iuga lea. E masani ona ou vaaia i latou i le auala, ma ou te faafetai ia Ieova i aso uma, ona o ana tulafono ua pulea ai ona tagata ma o le a tausia ai pea lo tatou paia pe afai tatou te faatatauina. E leʻi faapea muamua lava soʻu fiafia, soʻu faamalieina, ma le lagona o le saogalemu i loʻu olaga.” E moni lava, o le utagiaina o aʻoaʻoga a Ieova tatou te manuia ai pea.
Ia Faia le Filifiliga Saʻo
20, 21. (a) O ā filifiliga e lua ua iai i talavou? (e) O le ā le aogā e tumau o le a iu i ai ona o le utagiaina o aʻoaʻoga mai le Atua?
20 Matou te faalaeiauina outou le au talavou: Ia faia le filifiliga saʻo e ala i le auauna atu ia Ieova. Ona maumauai lea i le pipii mau atu i lena filifiliga. (Iosua 24:15) O le mea moni lava, e na o le tasi lava le filifiliga e mafai ona outou faia mai i filifiliga e lua. Na fetalai Iesu e iai le auala vatele—le auala faigofie o le faia o mea e fiafia i ai le tagata lava ia. O le ala lena e taitaiina atu i le oti, le faaumatiaga. O le isi auala e vavaapiapi. O se auala e faigata ona uia i totonu o lenei lalolagi o amioga lē mamā ua pulea e temoni. Ae o lena auala o le a mulimuli ane taitaiina atu ai i latou o loo uia i le lalolagi fou matagofie a le Atua. (Mataio 7:13, 14) O lē fea auala o le a e uia? O aʻoaʻoga a ai o le a e utagiaina?
21 Ua faataatia mai e Ieova le filifiliga ia te outou. Na te lē o taumafai e faamalosia outou ina ia auauna atu ia te ia. Na faapea mai le perofeta a le Atua o Mose: “Ua ou tuuina atu i ou luma o le ola ma le oti.” Ona ia faalaeiau atu lea: “Ia e filifili i le ola.” O lenei filifiliga e faia e ala i le “alofa atu ia Ieova lou Atua, ma e faalogo i lona siufofoga, ma ia e pipii atu ia te ia.” (Teuteronome 29:2; 30:19, 20) Tau ina ia e filifili ma le atamai e utagia aʻoaʻoga mai le Atua ma olioli ai i le ola e lē uma i le lalolagi fou faamamaluina a le Atua.
O le a Faapefea ona E Tali?
◻ O ai temoni, ma o le ā o loo latou aʻoaʻoina?
◻ Ua uunaia faapefea e temoni a latou aʻoaʻoga i aso nei?
◻ E mafai faapefea ona tetee atu i aʻoaʻoga a temoni?
◻ O ā aogā o le utagiaina o aʻoaʻoga a Ieova?
[Ata i le itulau 16]
A o leʻi oo mai le Lolo, sa uunaia atili ai e agelu lē usiusitai ma a la latou fanau, faiga sauā ma amioga matagā
[Ata i le itulau 18]
Po o le a tou mamā ea pe a faafofoga Iesu i pese e sili ona tou fiafia i ai?