O Fea e Mafai ona E Maua ai Taiala Maufaatuatuaina?

“IEOVA E, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia. Ieova e, ia e aoai mai ia te au.”—Ieremia 10:23‚ 24.

I le 25 senituri ua mavae, na tusia ai e le tusitala o le Tusi Paia o Ieremia na upu. O le tulaga faanoanoa o tagata ina ua mavae le faitauafe o tausaga o faatatauina taiala faaletagata, ua faamaonia ai le moni aʻiaʻi o lenei faamatalaga. Ae atonu e te fesili mai, ‘O fea e mafai ona maua ai taiala maufaatuatuaina?’

Ua faasino atu le mau o loo siitia mai i luga i se puna o taiala maufaatuatuaina ma taitaiga e sili mamao atu i lo o tagata—o Lē na Foafoaina le tagata‚ o Ieova le Atua. E mautinoa, e leai se tasi e sili atu lona iloa le fausaga o le tagata ma ona manaoga na i lo o Lē na Foafoaina i tatou. Ae ui i lea, po o naunau ea le Atua e saunia mo i tatou na taiala ma taitaiga? E faapefea ona ia faia lena mea? Pe aogā mo o tatou taimi?

Fuafuaina ina ia Maua Taitaiga Mai le Atua

Ua lauiloa faapea, o se eseesega sili e tulaga ese ai le tagata mai manu, e faaautu lea i le fausaga, tomai e aʻoaʻo ai, ma le galueaiina o le faiai o le tagata. I manu, e toetoe lava o gaoioiga uma o le faiai e faapolokalamaina i le mea ua taʻua o le tomai faalenatura. Ae lē faapena le tulaga i tagata.—Faataoto 30:24-28.

I le lē pei o le faiai o manu‚ o se vaega tele o le faiai o le tagata e aunoa ma ni polokalama faatulagaina. Na tuuina atu e le Atua i le tagata le tomai o le filifiliga saoloto, ina ia mafai ai ona latou faia ni filifiliga poto ma faaalia ai uiga sili, e pei o le alofa, matamau, lē manatu faapito‚ faamasinotonu‚ ma le atamai.

Po o se mea saʻo le manatu faapea, ua foafoaina e le Atua le tagata faatasi ma lena tomai e aunoa ma le saunia o ni taiala i le auala e mafai ai ona faaaogā i se auala e sili ona lelei? Na tuuina atu e le Atua i uluai tagata ni taiala tuusao. (Kenese 2:15-17, 19; 3:8, 9) E oo lava i le taimi ina ua agasala le tagata, sa faaauau pea ona taitaiina e Ieova tane ma fafine faamaoni, o le toatele sa taitaiina ae maise lava e ala i lana Afioga faagaeeina, le Tusi Paia. (Salamo 119:105) Ua faatagaina ai e lenei mea tagata e faafesagaia ma le manuia faafitauli o le olaga i aso faisoo a o latou faaaogāina ma le atamai la latou filifiliga saoloto.

Le Tusitala Tauatua o le Tusi Paia

O le ā ua avea ai le Tusi Paia ma puna maufaatuatuaina o taiala? E tasi lava le mea, ona o loo aumaia ai faamatalaga e na o Lē na Foafoaina Mea e mafai ona ia saunia. O loo otooto mai ai le talafaasolopito o mea na tutupu i tuā lava a o leʻi faia le tagata. Mo se faaaoaoga, ua saunia ai le talafaasolopito o le auala na saunia ai le lalolagi i tulaga faasolosolo seia oo ina avea ma nofoaga talafeagai e maua ai le ola faaletagata. (Kenese, mataupu 1, 2) E ui lava na faamauina lenei tala i le Tusi Paia e sili atu i le 3‚000 tausaga ua mavae‚ ae o loo ogatasi pea ma manatu o saienitisi i aso nei.

I aso anamuā lava a o leʻi ioe tagata e lapotopoto le lalolagi, na faalauiloa mai e le Tusi Paia e faapea: “Ua ia [le Atua] folasia le itu i matu i luga o le va nimonimo, ua ia tautauina foi le lalolagi, a e leai se tautaulaga.” (Iopu 26:7) E lē gata i lea, ua faaalia e le Tusi Paia e faapea, “o ia lē tietie i luga o le faataaliolio o le lalolagi, a o e nonofo ai e tutusa i latou ma sē.” (Isaia 40:22) E na o le Atua lava, Lē na Foafoaina Mea, e mafai ona ia saunia lenei tala auiliili.

O le tomai e valoia ai le lumanai, e lē o se meaalofa na tuuina atu i le tagata. Na i lo o lea, ua muai taʻuina mai e Lē na Foafoaina Mea le lumanai e ala i itulau o le Tusi Paia. Na faagaeeina e le Atua le perofeta o Isaia e tusi e uiga ia te Ia: “O aʻu o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia.”—Isaia 46:9‚10.

Ua faaalia e le Tusi Paia e faapea, e mafai ona ia valoia mai ma le matuā saʻo lelei lava le iuga mai lava i le amataga. Mo se faaaoaoga‚ sa ia valoia le tulai mai, le paʻū, ma uiga o malo malolosi o le lalolagi i le faitauafe o tausaga o le talafaasolopito o le tagata. O nei valoaga mataina sa tusia i le tele o senituri a o leʻi oo i lo latou faataunuuga, i nisi tulaga na valoia i le faitauafe o tausaga muamua atu. O lea ua valoia ai ma le saʻo e le Tusi Paia mea tutupu o aso nei, faapea foi ma o latou iuga. E tutasi foi le Tusi Paia, ona ua ia faasino atu i le auala o le faasaoina i le vaitaimi o le faaumatiaga o mālō lē lelei atoatoa e faia e tagata ia Amaketo, “le taua i le aso tele o le Atua e ona le malosi uma lava.” O le Malo o le Atua i aao o lona Alo, o Iesu Keriso, o le a faataulauina lena gaoioiga sili.—Faaaliga 16:14, 16; 17:9-18; Tanielu mataupu e 2 ma le 8.

E Aogā Pea—E Lē Taitai ona Afaina Ai

O le poto o le tagata faatauvaa, e lē lelei atoatoa; o lea, e lē aogā pea fautuaga mai tagata, e ui lava ina tuuina mai ma ni faanaunauga lelei. Ae e lē o le tulaga lea i fautuaga a le Tusi Paia. Ua fetalai mai le Atua lava ia: “O aʻu o Ieova, . . . o loo aʻoaʻo ia te oe i mea e aogā, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.”—Isaia 48:17‚ 18.

Ua fesoasoani taiala mai le Atua ia i tatou ina ia faatulaga mea e faamuamua ma pipiimau ai i mea e sili ona tāua o le olaga. A o tuu e sosaiete o le lalolagi le faamamafaga i mea faitino ma sini faitino, ua faamamafa mai e le Tusi Paia le maeu o le tāua mo i tatou pe a “o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.” (2 Korinito 4:18) I lenei auala, ua faalaeiauina ai i tatou ina ia faia ni sini e sili ona lelei i le olaga, ae maise sini faaleagaga e fesootai ma le faia o le finagalo o le Atua, le sini faaiu, o le ola e faavavau i le faiga fou amiotonu.

A o naunautai se Kerisiano e tuliloa nei sini maualuluga‚ ua fesoasoani le fautuaga a le Tusi Paia ia te ia ina ia ola i se ituaiga o olaga e sili ona lelei ua mafai ona faia i lenei faiga o mea amio leaga. E faanaunau le poto faaletagata i ona po nei e faamalosia le filosofia e faapea, tau lava ina fai sina galuega, ae maua mai ai se totogi e sili ona telē. I le isi itu, ua taʻu mai e le Tusi Paia ia i tatou e faapea “e mativa le ua galue ma le lima vaivai; a o e lima malosi e mauoa i latou.” Na tusi atu le aposetolo o Pauro i Kerisiano Eperu e faapea: “O loo taofi i matou ua ia te i matou le loto fuatia ifo lelei, o loo loto i matou e amio lelei i mea uma lava.”—Faataoto 10:4; Eperu 13:18.

Ua aumaia foi e le Tusi Paia se fautuaga aogā e uiga i le faatulagaga faaleaiga. Ua faavaeina faapitoa ai le matafaioi a le tane ma le avā i le faatulagaga faalefaaipoipoga, faapea foi ma le auala saʻo e tausia ai ma aʻoaʻoina ai fanau. Ua faapea mai: “O loo faapea ona tatau ona alolofa o tane i a latou lava avā, faapei o latou lava tino; . . . o le fafine foi ia ava o ia i lana tane. O outou le fanau, ia outou faalogo i o outou mātua . . . O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.” O le mulimuli i le fautuaga silisili a Lē na Foafoaina Mea, o le a faia ai se sao tele i le tumau ma le fiafia o aiga.—Efeso 5:21–6:4.

Se Lumanai Saogalemu mo i Latou e Mulimuli i Taiala a le Atua

Ua faasino mai e le Afioga tusia a le Atua le vaifofo ua i le Atua mo faafitauli uma a tagata. Ua lē pine ona soloia lea e Ieova le Atua lenei faiga o mea, ma ona tiga uma, le lē faamasinotonu ma mafatiaga, ma o le a suia i lana faiga fou amiotonu. Ua faamatalaina e le Tusi Paia lenei mea i le 2 Peteru 3:7-10, ua faaopoopo mai ma le fuaiupu e 13: “E faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” O lenei mea ua faia aʻe ai se tala e sili mamao atu ona lelei ua mafai ona tuuina atu i le aiga faaletagata. O le feau tonu lava lea ua tuuina mai e le Tusi Paia ma o loo talaʻiina e Molimau a Ieova i atunuu ma motu o le sami e sili atu i le 200.

Pe a faatinoina le finagalo o le Atua i le lalolagi, ona maua ai lea e le aiga atoa faaletagata aogā e ala i le mulimuli atu i le taiala sili ona lelei a Lē na Foafoaina Mea, o Ieova. O le a lē toe iai ni faafitauli e pei o le mativa, solitulafono, ma vailaau faasaina. O le a lē toe maua foi tagata i ni faamaʻi, tino matua, ma le oti. O le a siitia le aiga faaletagata i le lelei atoatoa lea na i o tatou uluai mātua ae la te leʻi fouvale faasaga i le taiala a le Atua.

Maeu le lelei ona aoteleina mai e le tusi mulimuli o le Tusi Paia le tulaga fiafia o i latou o ē tuu atu lo latou faatuatua i taiala mai le Atua! Ua faapea mai le Faaaliga 21:4‚ 5: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” Ua faamaonia e Lē na Foafoaina i tatou lena mea i lona fetalai mai: “Faauta, ou te faia ia fou mea uma lava.” Ua ia faaopoopo mai: “O upu nei e moni ma le faamaoni ia.”

Afai tatou te fia maua nei faamanuiaga‚ o le ā o faatalitalia e le Atua mai ia i tatou? Ua faamatala mai e le aposetolo o Pauro e faapea, o le finagalo o le Atua “ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) Ua valaaulia ma le mafana oe e Molimau a Ieova ina ia e maua lena poto saʻo o le upu moni e ala i le suesueina maeaea o le Tusi Paia. I le aʻoaʻoina ma le filiga o le finagalo o le Atua, ona mafai ai foi lea ona e maua e ala i le tofo i ai e faapea, o le poto faaleatua ua na o le pau lea o le taiala maufaatuatuaina i nei taimi faigata. Ona o le utiuti o le taimi, ua sili atu ai ona tatau na i lo o se isi lava taimi, ona tatou mulimuli i na taiala!