O Fea E te Maua ai Taʻiala Maufaatuatuaina mo se Lumanaʻi Saogalemu?

E pei ona tatou talanoaina i mataupu ua mavae, o loo taumafai tagata e maua se lumanaʻi lelei e ala i le maufaatuatuaina o mea e pei o iʻuga tuupōina, aʻoaʻoga, tamaoaiga, ma le avea ma tagata lelei. Ae o le uia o nei auala, e tai pei lava o le faaaogāina o se faafanua e lē saʻo ina ia oo ai i se nofoaga o loo faamoemoe i ai. Po o lona uiga la, e leai se taʻiala maufaatuatuaina mo le lumanaʻi? O le tali, e iai!

TAʻIALA MAI I SE PUNA E SILI ATU

Pe a faia ni filifiliga, e masani lava ona tatou talanoa atu i se tasi e matua atu ma e sili atu lona atamai nai lo o i tatou. E faapena foʻi ona tatou maua taʻiala maufaatuatuaina mo lo tatou lumanaʻi, mai i Sē e sili atu ona matua ma atamai nai lo o i tatou. E mafai ona tatou faitau i ana fautuaga mai i se tusi ua taʻua o le Tusi Paia, lea na amata tusia i le pe ā ma le 3,500 tausaga ua mavae.

Aiseā e mafai ai ona e maufaatuatuaina le Tusi Paia? Talu ai o le Tusitala o le Tusi Paia e sili atu ona umi ona soifua nai lo o i tatou, ma o ia o Lē e sili ona atamai i le aoao o mea. Ua faamatalaina o ia o “Lē e mai anamuā ona aso” ma “e mai i le vavau e oo i le faavavau.” (Tanielu 7:9; Salamo 90:2) O ia “o Lē na foafoaina le lagi, o Ia o le Atua moni, o le Mataisau o Lē na faia le lalolagi.” (Isaia 45:18) Ua ia faailoa mai iā i tatou o lona suafa o Ieova.—Salamo 83:18.

Talu ai o le Tusi Paia e mai i Lē na foafoaina tagata uma, e lē faasilisilia la e le Tusi Paia se aganuu po o se ituaiga o tagata. O fautuaga o loo iai e aogā i taimi uma mo tagata o atunuu uma. Ua maua i le tele o gagana, ma e sili atu ona kopi ua tufatufaina nai lo o se isi lava tusi.a O lea, ua mafai ai e tagata i so o se mea ona faitau i ai ma taʻitaʻiina ai i latou. E lagolagoina lenei manatu i le faamatalaga a le Tusi Paia:

“E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—GALUEGA 10:34, 35.

E pei lava ona saunia e se matua alofa taʻiala mo lana fanau, ua faapena foʻi ona saunia e Ieova le Atua lo tatou Tamā alofa ni fesoasoani e ala mai i lana Afioga le Tusi Paia. (2 Timoteo 3:16) E mafai ona tatou maufaatuatuaina lana Afioga, ona na ia foafoaina i tatou ma e na te silafia mea e tatou te maua ai le fiafia.

TAʻIALA E MAUFAATUATUAINA

E mafai ona tatou mautinoa o le Tusi Paia o se taʻiala maufaatuatuaina mo lo tatou lumanaʻi, ona na valoia ma le saʻo e le Tusi Paia mea o loo tutupu i le lalolagi ma amioga a tagata i aso nei, i le pe ā ma le 2,000 tausaga talu ai.

MEA O LOO TUTUPU

“O le a siitaua atu le tasi atunuu i le isi atunuu, ma le tasi malo i le isi malo; o le a iai foʻi mafuiʻe tetele, o faamaʻi ma oge i lea mea ma lea mea.”—LUKA 21:10, 11.

AMIOGA

“O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.”—2 TIMOTEO 3:1-4.

E faapefea la ona valoia mai ma le saʻo e le Tusi Paia nei mea? E mautinoa e te ioe faatasi ma Leung mai i Hong Kong o lē na faapea mai: “Ua leva ona tusia valoaga o le Tusi Paia. E matuā lē mafai lava e se tagata ona valoia ma le saʻo nei mea. E mautinoa la o le Tusi Paia na faagaeeina e se tasi e sili atu nai lo o i tatou.”

O loo i le Tusi Paia le faitau selau o valoaga ua uma ona faataunuuina.b Ua faamaonia ai o le Tusi Paia o le Afioga moni lea a le Atua. Ua fetalai mai Ieova, “O aʻu o le Atua ma e leai lava se isi Atua, po o se isi e pei o aʻu; o Lē ua taʻu mai talu mai le amataga le iʻuga.” (Isaia 46:9, 10) O lea, ua talafeagai ona e maufaatuatuaina faamatalaga a le Tusi Paia e uiga i le lumanaʻi.

TAʻIALA E AOGĀ IĀ TE OE I LE TAIMI NEI MA LE FAAVAVAU

Pe a e mulimuli i taʻiala o loo i le Tusi Paia, o le a e maua aogā. Seʻi mātau nisi o faaaʻoaʻoga nei.

VAAIGA PALENI I TUPE MA GALUEGA

“E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.”—FAILAUGA 4:6.

OLAGA FAALEAIGA

“Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.”—EFESO 5:33.

FAIĀ FAALETAGATA

“Inā tuu ia le ita ma soia le lotoa; aua e te ita! E na o le oo ai ina e faia o se mea leaga!”—SALAMO 37:8.

O le faatatauina o fautuaga o le Tusi Paia o le a maua ai aogā i le taimi lenei faapea se lumanaʻi saogalemu. E tatou te maua i le Tusi Paia le folafolaga a le Atua mo se lumanaʻi matagofie lea e aofia ai

LE FILEMU MA LE SAOGALEMU

“E matuā faafiafiaina foʻi i latou ona o le tele o le filemu.”—SALAMO 37:11.

FALE MA MEAʻAI MO TAGATA UMA

“O le a latou fausia fale ma nonofo ai; e latou te totō foʻi togāvine ma latou aai i ona fua.”—ISAIA 65:21.

LE LĒ TOE IAI O MAʻI MA LE OTI

“E lē toe iai se oti, po o se faanoanoa, po o se tagiauē, e lē toe iai foʻi se tigā.”—FAAALIGA 21:4.

O le ā e tatau ona e faia ina ia maua ai lenā lumanaʻi? E maua le tali i le mataupu e sosoo ai.

a Mo nisi faamatalaga e faatatau i le faaliliuina ma le tufatufaina atu o le Tusi Paia, tagaʻi i le www.jw.org i le vaega AʻOAʻOGA A LE TUSI PAIA > TALAFAASOLOPITO MA LE TUSI PAIA.

b Mo nisi faamatalaga, tagaʻi i le mataupu e 9 o le tusi The Bible—God’s Word or Man’s? ua lomia e Molimau a Ieova. E maua i le www.jw.org i le vaega LIBRARY > BOOKS & BROCHURES.