Afifio mai i le Tauaofiaga Itumalo o le “Mataʻu i le Atua”!

IOE, ua lalata mai le taimi mo tauaofiaga itumalo a Molimau a Ieova mo le 1994. Mai ia Iuni 1994 seia oo ia Ianuari 1995, o le a faafofogaina ai lenei polokalama o le tauaofiaga mo le tolu aso i le faitau selau o aai i le lalolagi—e muamua lava i Amerika i Mātū, ona faasolo lea i Europa i Sasaʻe ma Sisifo, i Asia, i Amerika Tutotonu ma Amerika i Saute, i Aferika, i Ausetalia, ma atumotu o le vasa laolao.

Maeu se matua faatupu manatu o le—“Mataʻu i le Atua”! E lē o le soona fefevale lenei o se tasi ua lamatia lona ola, a o le mataʻu i le Atua, o se mataʻu e maua ai le filemu o le mafaufau ma le olioli. Ua faapea mai se faataoto o le Tusi Paia: “O le taui o le faamaulalo ma le mataʻu ia Ieova, o le oloa lea, ma le viiga, ma le ola.” (Faataoto 22:4) Pe e faapefea ona iu le mataʻu i le Atua i le ‘oloa ma le viiga ma le ola’? O le a manino lea a o faagasolo le faalauteleina o le matua o le tauaofiaga i aso e tolu e tumu i lauga, talanoaga, faataitaiga, ma se tala.

Na tusi le aposetolo o Pauro e faapea, e ‘aua le lafoaiina le faapotopotoina o i tatou.’ (Eperu 10:25) Ua tāua tele i Molimau a Ieova lena mea, ma e faatolu i le vaiaso ona latou faapotopoto mo suesuega a le faapotopotoga ma tapuaiga. Peitai ane, e faapitoa le tauaofiaga itumalo i tausaga taitasi. Latou te aloalo atu i ai ma le naunau ma mulimuli ane latou te talanoa i ai mo se taimi umi. Ua matou valaaulia ma le mafana oe, po o le ā lava lau lotu, ina ia aufaatasi ma i latou i le latou tauaofiaga ma olioli i le faatasitasiga mafana faa-Kerisiano, ma faamatalaga tāua faaleagaga. O le a fiafia se isi o le faapotopotoga a Molimau a Ieova o lou vaiaai e taʻu atu ia te oe po o fea, ma o afea foi, o le a faia ai le tauaofiaga e sili ona lata atu ia te oe.