Ua Iloa e le Au Faauu a Kiliata le ‘Tele o Manuia i le Foai Atu’
O LE Aso Sa, Mati 6, 1994, na faapotopoto ai le aiga Peteli mai le faauluuluga i le lalolagi aoao o Molimau a Ieova, ma uo, mo se faatasiga fiafia—o le faauuga lea o le vasega lona 96 a le Aʻoga Faale-Tusi Paia a le Olomatamata o Kiliata. O le taitaifono o Karl F. Klein, o lē ua toeitiiti atoa le luasefulu tausaga talu ona auauna i le Vaega Pule o Molimau a Ieova, na ia faapea atu i ana upu tomua i tagata aʻoga e toʻa 46: “Na fetalai Iesu, e tele le manuia i le foai atu na i lo manuia i le talia mai. O le tulaga la lena o le a iai i o outou tofiga faamisionare—o le tele o la outou foai atu, o le tele foi lena o lo outou manuia.”—Galuega 20:35.
O Timaiga Faamavae
Ona sosoo mai lea ma se faasologa o lauga i tagata aʻoga. O Leon Weaver, o se sui o le Komiti o le Matagaluega o le Auaunaga, sa lauga i le matua “O le Onosai e Faamamaluina ai Ieova.” O i tatou uma lava e fesagai ma tofotofoga. (2 Korinito 6:3-5) Na taʻua e le uso o Weaver: “Pe a oo omiga ia i tatou, e faigofie tele ona tatou faalagolago ia i tatou lava.” Ae peitai na ia faamanatu atu i tagata aʻoga: “Po o le ā lava se tofotofoga tou te fesagai, o loo sagaʻi mai i ai le silasila a Ieova. E lē taitai ona ia faatagaina outou e tofotofoina i se mea e lē mafai ona outou onosaia.”—1 Korinito 10:13.
Ona sosoo lea ma le matua, “Ia Faapelepeleina Pea Lou Tofiga” o le lauga na tauaaoina atu e Lyman Swingle o le Vaega Pule. Sa leʻi filifiliina e le fanauga a Isaraelu i taimi uma lava nofoaga latou te nonofo ai ma mea latou te faia. Sa faatulaga vaega o le laueleele e nonofo ai ituaiga taitasi, ma sa tofia atu i le ʻau sā Levī ni tiute patino latou te faatinoina. I se tulaga tutusa, e toatele i latou o loo i le auaunaga faataimi atoa i aso nei—e pei o misionare ma sui o le aiga Peteli—latou te lē filifiliina mo i latou lava ni nofoaga e nonofo ai ma galuega o le a latou faia. Ae faapefea pe afai o le a oo i se tasi ni lagona o le lē mautonu i lona tofiga? Na taʻua e le uso o Swingle e faapea: “Pe afai tou te vaai atu ma le naunautai i le Sui Sili o lo tatou faatuatua, o Iesu, ma matuā manatunatu i lana faaaoaoga, ona outou lē faavaivai ai lea.”—Eperu 12:2, 3.
Na sosoo mai ma le mataupu “Ia Taulai atu Pea,” na faia e Leonard Pearson, mai le Komiti a le Watchtower Farms. Na ia faapea mai: “E mafai ona iai sau mea pueata o le ituaiga e sili ona lelei, e te maua foi se vaega e sili ona matagofie mo le pueina o le ata, o se vaaiga matagofie i le pito i tua o lea vaega, ae maua mai lava au ata e leaga—pe afai e lē lelei ona faatonutonu le taulai atu o le mea pueata.” I le pei o le vaaiga lautelē a le faʻata o le mea pueata, ia faapena ona aofia i la tatou vaaiga le talaʻiga i le lalolagi aoao o loo faia nei. Ia aua lava neʻi galo ia i tatou le ata telē lena. Na faapea mai le uso o Pearson: “O i latou o ē taulai o latou manatu ia i latou lava, o le a lē fiafia i o latou tofiga. O i latou o ē taulai o latou manatu ia Ieova ma le galuega ua tuuina atu latou te faia, o le a taulau manuia.”
O le matua o le lauga na sosoo ai, “E Anoanoai Mea e Tatau ai ona Faafetai” na tauaaoina atu lea e le uso o John E. Barr, o le isi foi sui o le Vaega Pule. Na timai atu le uso o Barr i tagata aʻoga e faapea: “Aua lava neʻi lafoaia lo outou agaga faafetai ia Ieova. O se tasi lena o puna sili mo le lotomalie, e tusa lava po o le ā le tofiga ua ia te outou.” O le uiga faafetai na uunaia ai Tavita e tusia e faapea: “Ua fuafuaina moʻu le fanua i mea valevalenoa; e moni, ua ia te au le tofi matagofie.” (Salamo 16:6) Na faapea atu le uso o Barr: “Ua ia te outou lea oa sili o le iai o se lagona vavalalata ia Ieova i o outou olaga i aso taitasi. E lē taitai ona aveesea e Ieova lena faiā mai ia te outou, pe afai tou te vaai pea i ai o se mea e sili ona matagofie ua ao ai ona outou faafetaia.”
O le faiaoga o Kiliata, o Jack Redford, na sosoo ai lana lauga i le matua, “O le a Faapefea ona E Faaaogāina Lou Laulaufaiva?” Pagā se faaleagaina ona o le tautala ma le lē mafaufau! (Faataoto 18:21) E mafai faapefea ona pulea le laulaufaiva? Na tali le uso o Redford: “E tatau ona e aʻoaʻoina muamua lou mafaufau, auā e faaatagia mai e le laulaufaiva, le mafaufau ma le loto.” (Mataio 12:34-37) Na saunia e Iesu se faaaoaoga sili ona lelei; sa ia faaaogā lona laulaufaiva e vivii ai i le suafa o Ieova. Na faapea atu le uso o Redford i le vasega: “I aso nei, o loo iai se oge i le fia faalogologo i afioga a Ieova. Ua outou iloa na afioga. Ua ia te outou ‘le laulaufaiva o ē ua aʻoaʻoina.’ O lea, ia taitaia pea o outou laulaufaiva e ni mafaufau ma ni loto ua matuā tuutoina atu ia Ieova.”—Isaia 50:4.
Sa faamamafaina le tāua o le tatalo, i le lauga e faapea, “Po o Outou Savavali ea e Pei o loo Iai Faatasi ma Ieova?” Na taʻua e le faatonu o le aʻoga, o Ulysses Glass e faapea: “Afai e galue mamafa se tamā ina ia tausia lona aiga, ae lē taitai ona tautala atu ia i latou ma lē taitai ona ia faaali atu sona alofa faapelepele, atonu o le a manatu ifo lona aiga, o lana galuega ua na o se tiute e lē o fiafia i ai, ae lē o uunaia e lona alofa. Ua faapena foi i tatou. Atonu e tele a tatou galuega i le auaunaga i le Atua. Ae afai tatou te lē tatalo, ua na ona tatou tuutoina atu la i le galuega, na i lo o le tuutoina atu i le Tamā alofa faalelagi.”
Na lauga Theodore Jaracz, mai le Vaega Pule, i le matua e faapea, “Le Pogai ua Auaufaatasi atu ai se Vaega Tele i Tagata o le Atua.” I tausaga taitasi, e faitau selauafe ua lolofi mai i le faalapotopotoa a Ieova. (Sakaria 8:23) O le ā ua mataulia ai Molimau a Ieova e avea o ni tagata o le Atua? Muamua lava, latou te taliaina le Tusi Paia atoa o le Afioga lea a le Atua. (2 Timoteo 3:16) Lona lua, e solitu i latou i faiga faapolotiki. (Ioane 17:16) Lona tolu, latou te molimau atu i le suafa o le Atua. (Ioane 17:26) Lona fa, latou te faaalia le alofa faataulagaina. (Ioane 13:35; 15:13) O nei la pine faamau uma, ua mafai ai ona tatou lototetele e “faalauiloa atu lelei silisili o lē na ia aveesea i [tatou] mai le pouliuli ae avatu i lona malamalama ofoofogia.”—1 Peteru 2:9, NW.
Ina ua maeʻa nei lauga faagaeeloto, ona maua ai lea e le ʻau aooga e toʻa 46 o latou tusi pasi. E 16 atunuu i le lalolagi atoa ua tofia atu i ai i latou.
Se Polokalama o Vaega Eseese i le Aoauli
I le aoauli na taitaia ai le Suesuega o Le Olomatamata sa faapuupuu mai e Donald Krebs o le Komiti o le Peteli. Ona tauaaoina atu ai lea e le ʻau faauu se polokalama o lona matua, “O loo Alaga le Poto i Fafo.” (Faataoto 1:20) Sa latou toe faaata mai ai ni mea lelei na latou tofo i ai a o latou molimau atu i ala tetele ma oganuu o pisinisi. E moni lava, ua faamanuia e Ieova i latou o ē loto tetele e talaʻi atu lē fuafuaina. Na faapea mai se tasi o le ʻau faauu: “Ou te manao e manatu faapea o i matou o ni selesaito o loo uu e agelu o loo faia le seleselega. O le tele o le maatiati o o matou tomai, o le tele foi lea o galuega e mafai e na agelu ona faaaogā i ai i matou e faia.” (Faatusatusa i le Faaaliga 14:6.) Sa iai foi i le polokalama a le ʻau aooga se ata (slide) na faaali, lea na faatepa ai le aofia i se matamataga faaleaoaoga i Polivia, Malata, ma Taiwan—o nisi o atunuu e tolu mai atunuu ia ua auina atu i ai le ʻau faauu mai lenei vasega.
Ona sosoo lea ma le faatalanoaina o Wallace ma Jane Liverance—ua 17 tausaga o avea ma misionare. Ia Oketopa 1993 na valaaulia ai i laua e galulue i le Watchtower Farms, lea o loo auauna ai nei le uso o Liverance e avea o se tasi o faiaoga i Kiliata.
Sa sosoo mai ai ma se tala e fa ona vaaiga, o lona matua, “Ia Āva i Ē ua Tatau ai i O Latou Soifuaga Matutua.” A o faasolo ina matutua tagata, o le popole i le lē toe aogā ma tuulafoaia, atonu e aveesea ai o latou lagona mautinoa ia i latou lava. (Salamo 71:9) O lenei tala na faaalia ai auala e mafai ai e tagata uma o le faapotopotoga ona lagolagosua atu i na tagata matutua o ē faatuatua.
Ina ua mavae le pese faaiu ma le tatalo, sa lagona uma e le aofia e 6,220 sa iai i le Maota Fono i Jersey City, ma maota sa taʻi i ai le satelite i le faalaeiauina. Ia faatasi atu a tatou talosaga ma le ʻau faauu a o iai i o latou tofiga fou. Tau ina ia latou faaauau pea ona tofo i le manuia silisili e maua mai i le foai atu.
[Pusa i le itulau 26]
Faamaumauga o le Vasega
Aofai o atunuu o loo iai o latou sui: 9
Aofai o atunuu ua tofia i ai: 16
Aofai o tagata aʻoga: 46
Faatatauga o tausaga: 33.85
Faatatauga o tausaga i le upu moni: 16.6
Faatatauga o tausaga i le faiva sauatoa: 12.2
[Pusa i le itulau 27]
Se Vaaiga Faapitoa ia Malata
SA FAASĀSĀ e Kerisinetoma le upu moni o le Tusi Paia i Malata mo le tele o tausaga. O misionare mulimuli lava mai Kiliata na aauina atu i inā, o Frederick Smedley ma Peter Bridle, o ē na faauu mai i le vasega lona valu i tuā i le 1947. Peitai, na pueina faapagota i laua ma tutuli ese mai Malata a o leʻi leva talu ona la taunuu i ai. Ua lipotia mai e le 1948 Yearbook of Jehovah’s Witnesses e faapea: “E tele taimi na faaaluina e nei misionare e toalua i faamasinoga ma alii ofisa o le atunuu e pei o le tele na la faaaluina i o la tiute faafaifeau, talu ai teteega mai le Vaega Pule a le Katoliko Roma. Ua faapea mai patele, o le Katoliko e ana Malata ma e tatau i isi uma tagata e ese mai ai ona ō ese.” Nei la, i le tusa ma le 45 tausaga talu mai lea taimi, ua tofia atu ai i Malata ni misionare se toʻafā mai le vasega lona 96 a Kiliata.
[Ata i le itulau 26]
Vasega Faauu Lona 96 o le Aʻoga Faale-Tusi Paia a le Olomatamata o Kiliata
I le lisi i lalo, o laina e amata mai i luma agaʻi i tua, ma o igoa e lisi mai le itu agavale i le taumatau.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.