Gauai atu ma le Olioli i le Pule
“A ua outou gauai nei mai le loto.”—ROMA 6:17.
1, 2. (a) O le ā le agaga ua manino mai i le lalolagi i aso nei, ma o fea e puna mai ai ma o ā ona āuga? (e) Ua faapefea ona faaalia e auauna tuuina atu a Ieova lo latou ese mai?
“O LE agaga lea o loo matuā galue nei i e ua faalogogata” ua ofoofogia le faamaonia i aso nei. O le agaga o le fia tutoatasi lē mataofiofia, o loo puna mai ia Satani, “le taʻitaʻi o le au faipule i le va nimonimo.” O lenei agaga, lenei “ea” po o le uiga fia pulepuletutu o le manatu faapito ma le lē usitai, ua uunaia ai le ‘pule,’ i le toatele o tagata. O le tasi lenei mafuaaga ua oo ai le lalolagi i le mea ua taʻua o le mala tau pulega.—Efeso 2:2.
2 O se fiafiaga, ona e lē o faatumuina māmā faaleagaga o auauna tuutoina a Ieova i lenei “ea” oona, po o le agaga o le fouvale. Ua latou iloa, o loo oo mai “le toasa o le Atua i e faalogogata.” Ua taʻua atili e le aposetolo o Pauro e faapea: “O lenei, aua neʻi faatasi outou ma i latou.” (Efeso 5:6, 7) Na i lo o lea, ua vilivilitai Kerisiano moni ina ia “faatumuina . . . i le Agaga [o Ieova],” ma latou ave i fale “le poto mai lugā,” lea e “mamā, i le ua filemu, e agamalu, e ganagofie.”—Efeso 5:17, 18; Iakopo 3:17.
Gauai atu ma le Lotomalie i le Pule Silisili Ese a Ieova
3. O le ā le ki i le gauai atu ma le lotomalie, ma o le ā le lesona tele ua aʻoaʻo mai e le talafaasolopito ia i tatou?
3 O le ki i le gauai atu ma le lotomalie, o le amanaiaina lea o le pule e silisili ona maualuga. Ua faaalia i le talafaasolopito o le tagata e faapea, o le teena o le pule silisiliesee a Ieova e lē aumaia ai se fiafiaga. O lena teena na lē maua ai e Atamu ma Eva se fiafia, e leʻi maua ai foi e lē na faatupuina le la fouvalega, o Satani le Tiapolo. (Kenese 3:16-19) I lona tulaga paʻū maulalo ua iai nei, ua matuā “lotoa tele” ai Satani auā ua ia iloa ua saasaa ona po. (Faaaliga 12:12) O le filemu ma le fiafia o tagata, ioe, le lalolagi atoa, o loo faalagolago atu lea i le amanaiaina i le lalolagi aoao o le pule silisiliesee amiotonu a Ieova.—Salamo 103:19-22.
4. (a) O le ā le ituaiga o gauai atu ma le usiusitai e finagalo Ieova ina ia faaalia e ana auauna? (e) O le ā e tatau ona tatou faamautinoaina, ma ua faapefea ona faaleo mai e le faisalamo lenei mea?
4 Peitai, ona o le paleni o ona uiga ofoofogia, ua lē faamalieina ai Ieova i se faatagā usiusitai. Oi ioe, e malosi tele o ia! Ae e lē o ia o se pule sauā. O ia o le Atua o le alofa, ma e finagalo o ia ina ia usiusitai atu ma le lotomalie ia te ia ma ona o le alofa, ana foafoaga atamamai uma. E finagalo o ia ina ia latou gauai atu i lana pule silisiliesee, ona ua latou filifili ma le loto atoa e ola e tusa ai ma lana amiotonu ma lana pule e silisili ona maualuga, ma ua latou mautinoa e leai se isi mea e sili atu ona lelei mo i latou na i lo o le usiusitai atu ia te ia e faavavau. O le ituaiga o tagata e finagalo ai Ieova mo lana pulega, o lē e tutusa o la faalogona ma le faisalamo o lē na tusi e faapea: “E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie. E tonu feau a Ieova, e faafiafia ai le loto; e mamā poloaiga a Ieova, e malamalama ai mata. E mamā le mataʻu ia Ieova, e tumau e faavavau; o faamasinoga foi a Ieova e moni ia ma tonu uma lava.” (Salamo 19:7-9) O le mautinoa aʻiaʻi i le saʻo ma le amiotonu o le pule silisiliesee a Ieova—o lo tatou uiga lea e tatau ona iai pe afai tatou te fia ola i totonu o le lalolagi fou a Ieova.
Gauai atu ma le Olioli i Lo Tatou Tupu
5. Na faapefea ona tauia Iesu ona o lona usiusitai, ma o le ā ia tatou lotomalie e amanaia?
5 O Keriso Iesu lava ia o le faaaoaoga mataina lena o le gauai atu i lona Tamā faalelagi. E pei ona tatou faitau ai, “ua faamaulalo e ia ia te ia, ua na anaana ua oo ina maliu, o le maliu lea i le satauro.” Ua faaopoopo mai Pauro: “O le mea lava lea ua matuā faaeaina ai o ia e le Atua, ma foaiina atu ai ia te ia o le suafa e silisili i suafa uma lava; ina ia tootuli o tulivae uma lava i le suafa o Iesu, o e o i le lagi, ma e o i le lalolagi ma e o i lalo o le lalolagi; ma ia taʻutaʻu atu e laulaufaiva uma lava o Iesu Keriso o le Alii lava ia, ia iu ina viia ai le Atua le Tamā.” (Filipi 2:8-11) Ioe, tatou te tootutuli ifo ma le olioli i luma o lo tatou Taʻitaʻi ma o le Tupu faapaleina, o Keriso Iesu.—Mataio 23:10.
6. Ua faamaonia faapefea le avea o Iesu ma molimau ma o le taʻitaʻi i vaega o atunuu, ma o le a faapefea ona faaauauina lana “pulega faaaloalii” pe a mavae le puapuaga tele?
6 Na valoia e Ieova e faatatau ia Keriso o lo tatou Taʻitaʻi e faapea: “Faauta, ua ou avatua o ia e fai ma molimau i le nuu, o le taʻimua ma le pule i le nuu.” (Isaia 55:4) O lana faiva faalelalolagi ma lona faatonutonuina o le galuega talaʻi mai le lagi ina ua mavae lona maliu ma le toetu, ua faaalia ai e Iesu o ia lava o le “molimau moni ma le faamaoni” a lona Tamā i le feagai ai ma tagata o atunuu uma. (Faaaliga 3:14; Mataio 28:18-20) O na atunuu ua suitulaga mai ai nei i ni aofaiga faateleina le “motu o tagata e toatele,” o ē o le a faasaoina i le “puapuaga tele” i lalo o le taitaiga a Keriso. (Faaaliga 7:9, 14) Ae lē faamutaina ai i inā le taitaiga a Iesu. O le a faaauauina mo le afe tausaga lana “pule faaaloalii.” Mo tagata usiusitai, o le a gaoioi ai o ia e tusa ma lona suafa o le “Faufautua Ofoofogia, le Atua Malosi, le Tamā o le Faavavau, le Aloalii o le Filemu.”—Isaia 9:6, 7, NW; Faaaliga 20:6.
7. Pe afai tatou te moomoo ina taitaia i tatou e Keriso Iesu i “puna o vai ola,” o le a e ao ona tatou faia loa e aunoa ma le faatuai, ma o le ā o le a faapogaia ai ona alofagia i tatou e Iesu ma Ieova?
7 Pe afai tatou te moomoo ina ia maua se manuia mai “puna o vai ola” lea o loo taʻitaʻi atu i ai e le Tamai Mamoe, o Keriso Iesu tagata o ē tonu o latou loto, e ao la ona tatou lē faatuai ae ia faamaonia atu i a tatou gaoioiga lo tatou gauai atu ma le olioli i lana pule o se Tupu. (Faaaliga 7:17; 22:1, 2; faatusatusa i le Salamo 2:12.) Na fetalai Iesu: “Afai tou te alofa mai ia te au, ia outou tausi mai i aʻu poloaiga. O le ua ia te ia aʻu poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e loʻu Tamā; ou te alofa foi ia te ia.” (Ioane 14:15, 21) Pe e te manao ea ina ia alofaina oe e Iesu ma lona Tamā? Ia e gauai atu la i le la pule.
E Usitai ma le Olioli Ovasia
8, 9. (a) O le ā ua sauniunia e Keriso mo le faalaeiauina o le faapotopotoga, ma i le ā le vala e ao ai i nei tane ona avea ma faaaoaoga i le lafu mamoe? (e) Ua faapefea ona faafaatusa mai i le tusi o Faaaliga le gauai atu o ovasia Kerisiano, ma e ao faapefea ona latou sailia se “loto matala” pe a tauaaoina mataupu faafaamasinoga?
8 ‘O loo gauai atu le ekalesia ia Keriso.’ I le avea ma o latou Ovasia, ua ia sauniunia ai “mea alofa i tagata [“tane,” NW]” mo le “atiina ae” o le faapotopotoga. (Efeso 4:8, 11, 12; 5:24) O nei tane matutua faaleagaga ua faatonuina ina ia ‘leoleo i le lafu mamoe a le Atua o loo latou vaavaaia,’ ia lē “faapei o e faamalo i le tofi o le Atua, a ia fai outou ma faaaʻoaʻo i le lafu mamoe.” (1 Peteru 5:1-3) O Ieova e ana le lafu mamoe, ma o Keriso o lona “leoleo mamoe lelei” lea. (Ioane 10:14) Talu ai ua talafeagai le faatalitalia e ovasia le lagolagosua ma le lotomalie mai mamoe na tuuina mai e Ieova ma Keriso latou te vaaia, ua tatau ai foi la ia i latou ona avea ma faaaoaoga lelei o le gauai atu.—Galuega 20:28.
9 I le uluai senituri, sa suitulaga faafaatusa ai ovasia faauuina e pei o loo i “totonu,” po o loo i “luga,” o le aao taumatau o Keriso, e faaāta mai ai lo latou gauai atu ia te ia o le Ulu o le faapotopotoga. (Faaaliga 1:16, 20; 2:1) Ua faapena foi i aso nei, e tatau i ovasia o loo iai i faapotopotoga o Molimau a Ieova ona gauai atu i le taitaiga a Keriso ma ia ‘faamaulaloina e i latou i latou lava i lalo o le aao malosi o le Atua.’ (1 Peteru 5:6) Pe a talosagaina e tauaao ni mataupu faafaamasinoga, e ao ona pei i latou o Solomona i tausaga a o faamaoni o ia, i le tatalo atu lea ia Ieova: “Ia e foai mai ai i lau auauna le loto matala ina ia faamasino e ia i lou nuu, ma ia masino ai i le lelei ma le leaga.” (1 Tupu 3:9) O se loto e usiusitai o le a uunaia ai se toeaina ina ia saili ia maua le vaaiga e pei ona silasila ai Ieova ma Keriso Iesu i mataupu, ina ia avea se filifiliga o loo faia i le lalolagi ma faaāta i se tele e mafai ai, o mea o loo faia i le lagi.—Mataio 18:18-20.
10. E ao faapefea i ovasia uma ona vilivilitai e faataitai ia Iesu i le auala na te tausia ai mamoe?
10 O le a faapena foi i ovasia femalagaai ma toeaina o faapotopotoga ona vilivilitai e faataitai ia Keriso i le auala sa ia tausia ai mamoe. I le lē pei o le au Faresaio, sa leʻi faatutū atu e Iesu ni tulafono se tele sa faafaigata ona usitaia. (Mataio 23:2-11) Na ia fetalai atu i ē pei ni mamoe: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.” (Mataio 11:28-30) E ui o le mea moni e tatau i Kerisiano taitoatasi ona “ave i lana lava avega,” ae ao foi i ovasia ona manatua le faaaoaoga a Iesu ma ia fesoasoani atu i o latou uso ina ia latou lagona, o la latou avega o tiute tauave faa-Kerisiano, e “avegofie,” e “māmā,” ma o se olioli le tauaveina.—Kalatia 6:5.
Le Gauai Faatiokarate
11. (a) E ono faapefea i se tasi ona faaaloalo i le tulaga ulu ae e lē o faatiokarate moni? Faataitai. (e) O le ā le uiga o le avea ma faatiokarate moni?
11 O le faatiokarate o le pulea lea e le Atua. E aofia ai le mataupu silisili o le tulaga ulu lea ua faamatala mai i le 1 Korinito 11:3. Ae iai foi se isi ona uiga e sili atu. E ono foliga mai se tagata o loo ia faaalia le faaaloalo mo le tulaga ulu, ae atonu e lē faatiokarate e tusa ai ma uiga atoa o le upu. E mafai faapefea ona tupu lenei mea? Ina ia faataitai, o le faatemokalasi, o se pulega lea e pulea lautele e tagata, ma o le temokalasi, ua faamatalaina faapea, o “se tagata o lē e talitonu i aogā o le faatemokalasi.” Atonu e faapea mai se tagata o ia e faatemokalasi, e aafia i faiga palota, ma o se tagata foi e sogasogā i faiga faapolotiki. Ae afai o lana amio i le lautele e taʻu atu ai o loo ia matuā lē faaaloalo i le uiga o le faatemokalasi ma faatulagaga autū uma o loo aofia ai, pe mafai ea la ona faapea atu o ia moni o se faatemokalasi? E faapena foi la i le faatiokarate moni, e ao i se tagata ona gaoioi ia sili atu na i lo o le tau ina gauai i le taitaiga ona o le tulaga o loo iai. E ao ona faataitai o ia i ala ma uiga o Ieova. E ao ona matuā pulea e Ieova ona ala uma lava. Ma talu ai ua tuuina atu e Ieova i lona Alo le pule atoatoa, o le faatiokarate la e uiga foi i le faataitai atu lea ia Iesu.
12, 13. (a) O le ā patino lava e aofia ai i le avea ma sē e faatiokarate? (e) Pe aofia ai ea i le gauai atu faatiokarate le usiusitai i le tele o tulafono? Faataitai.
12 Ia manatua, e finagalo Ieova i le gauai atu ma le lotomalie ua uunaia e le alofa. O lana auala lena o loo puleaina ai le lalolagi aoao. O ia tonu lava o le faaperesonaina o le alofa. (1 Ioane 4:8) O Keriso Iesu “o ia o le pupula o lona mamalu ma ua matuā tusa lava ma ia.” (Eperu 1:3) E finagalo o ia i ona soʻo moni ina ia fealofani. (Ioane 15:17) O le faatiokarate la e aofia ai e lē na o le gauai atu, ae ia alofaina foi. Atonu e taaofai le mataupu e le manatu o loo mulimuli mai e faapea: O le faatiokarate o le pulea lea e le Atua; o le Atua o le alofa; o le faatiokarate la e pulea e le alofa.
13 E mafai ona mafaufau se toeaina e faapea ina ia faatiokarate, e ao i uso ona usitai i tulafono eseese uma. O nisi toeaina ua latou faia ni tulafono e faavae mai i ni manatu e fautuaina e le “auauna faamaoni ma le mafaufau” mai lea taimi i lea taimi. (Mataio 24:45) Mo se faataitaiga, sa fautuaina i se tasi taimi e faapea, ina ia nofo sauni e faamasani atu i uso i le faapotopotoga, e lelei ai ona lē tausisia se nofoa masani i taimi uma i le Maota o le Malo. O lena mea sa na o se manatu aogā na faatū atu, ae lē o se tulafono maumaututu. Ae atonu na mananao nisi toeaina e faaliliu lea manatu ia avea o se tulafono ma manatu ai o i latou e lē o usitaia ua lē o faatiokarate. Ae atonu e tele ni mafuaaga lelei e ono sili ai i se uso po o se tuafafine ona nofo i se vaipanoa patino. Afai la e lē iloiloina ma le alofa e se toeaina na mea, po o faatiokarate moni ea la o ia? Ina ia faatiokarate, “ia faia uma a outou mea i le alofa.”—1 Korinito 16:14.
Auauna ma le Olioli
14, 15. (a) E mafai faapefea e se toeaina ona ia aveesea mai i ni uso po o ni tuafāfine lo latou olioli i le auauna atu ia Ieova, ma aisea o le a lē faatiokarate ai lenei mea? (e) Na faapefea ona faaalia e Iesu e faapea na te talisapaia le alofa ua faaalia e a tatou auaunaga, ae lē o le tele tatou te auauna ai? (i) O le ā e ao ona manatunatu i ai toeaina?
14 O le faatiokarate e uiga foi i le auauna ia Ieova ma le olioli. O Ieova o “le Atua manuia [“fiafia,” NW].” (1 Timoteo 1:11) E finagalo o ia ina ia auauna atu ma le olioli ia te ia ona tagata tapuai. O i latou o ē maumaututu i le tausia o tulafono e ao ona latou manatua, sa aofia ai i tulafono na tuu atu ia Isaraelu ina ia “tausisi i ai” ma le faaeteete i ai le mea lenei: “E te olioli foi i luma o Ieova lou Atua, i mea uma lava e te faia i ou lima.” (Teuteronome 12:1, 18) So o se mea lava tatou te faia i le auaunaga ia Ieova, e ao ona avea o se olioli, ae lē o se avega mamafa. E tele ni mea e mafai ona faia e ovasia ina ia maua ai e uso le lagona fiafia e faia le mea latou te mafaia i le auaunaga ia Ieova. Ae i le isi itu, pe a lē faaeteete toeaina, e mafai ona latou aveesea le olioli o nisi o uso. Mo se faaaoaoga, pe afai latou te faia ni faatusatusaga, i le faaviiviia o i latou o ē ua ausia po o le sili atu i le tuufaatatauga o itula a le faapotopotoga e faaaluina i le molimau atu, ae faitioina i latou o ē e leʻi ausiaina, o le a faapeī la faalogona o na tagata, o ē atonu sa iai sa latou mafuaaga tāua mo le lipotia mai o se taimi itiiti? Pe o le a lē avea ea lenei mea latou te lagona ai e pei o se latou agasala ma aveesea ai lo latou olioli?
15 O ni nai itula itiiti ua mafai ona tuutoina atu e nisi i le molimau atu i le lautele ua fai lea ma sui o ni taumafaiga tetele, na i lo o le tele o itula ua faaalu e nisi i le talaʻiga, pe a manatu atu i tagata o loo talavou, o loo lelei lo latou soifua maloloina, ma isi lava tulaga. I lenei la itu, e lē tatau ai i toeaina ona faamasinoina na tagata. O le mea moni, o Iesu na tuuina i ai e le Tamā le “pule, ina ia fai ai le faamasinoga.” (Ioane 5:27) Pe na faitioina ea e Iesu le fafine mativa ua oti lana tane ona o lana taulaga sa itiiti ifo na i lo le tulaga sa tatau ona iai? E leai, sa matuā amanaia e Iesu le tāua i le fafine o nei tupe siliva laiti e lua. Sa na o le pau lava na “o ana mea uma e ola ai.” Maeu se alofa loloto mo Ieova sa faaatagia atu i na mea! (Mareko 12:41-44) Pe ao ea la i toeaina ona itiiti le amanaiaina o taumafaiga alofa a i latou o ē e itiiti ifo itula na i lo o le “tulaga masani”? Ona o le alofa mo Ieova, atonu ai ua sili atu na i lo le tulaga masani na taumafaiga!
16. (a) Afai e faaaogā e ovasia fuainumera i a latou lauga, aisea latou te manaomia ai le faautauta ma le paleni lelei? (e) O le ā se auala e sili ona lelei e mafai ona fesoasoani atu ai i uso ina ia faateleina la latou auaunaga?
16 Pe ua tatau ea la i nei faamatalaga ona liliuina e avea o se “tulafono” e faapea o fuainumera—e oo lava i tuufaatatauga—e lē tatau ona faailoa maia? E leai lava! O le manatu autū, e ao i ovasia ona paleni le latou vaai i le faalaeiauina o uso e faalautele atu la latou faiva, ma le fesoasoani ia i latou ina ia faia le mea latou te mafaia ma le olioli. (Kalatia 6:4) I le faataitaiga a Iesu i taleni, na tuuina atu ai e le matai ana mea i ana auauna “ua faatatau i le mea ua mafai ai e le tagata” lava ia. (Mataio 25:14, 15) E ao i toeaina ona latou faia foi faapena, i le manatunatu lea i mea o loo mafaia e tagata talaʻi taitoatasi o le Malo. E manaomia ai i lenei mea le faautauta. Atonu ua lelei lea ona o loo iai nisi o loo latou manaomia moni lava ni faalaeiauga e faia ai nisi mea e sili atu. Atonu latou te talisapaia se fesoasoani ina ia lelei atili le faamaopoopoina o a latou galuega. I so o se tulaga lava la, pe afai e mafai ona fesoasoani atu ia i latou e faia le mea latou te mafaia ma le olioli, o lena la olioli o le a faamalosia moni ai lava i latou ina ia faalautele atu a latou galuega faa-Kerisiano i le mea e mafai ai.—Neemia 8:10; Salamo 59:16; Ieremia 20:9.
Le Filemu e Maua Mai i le Gauai atu ma le Olioli
17, 18. (a) E mafai faapefea e le gauai atu ma le olioli ona aumaia ai ia i tatou le filemu ma le amiotonu? (e) O le ā e mafai ona tatou maua pe a tatou matuā uai atu i poloaiga a le Atua?
17 O le gauai atu ma le olioli i le pule silisiliesee ma maualuga a Ieova e aumaia ai ia i tatou le tele o le filemu. Na faapea mai le faisalamo i le tatalo ia Ieova: “Ua tele le filemu o e naunau i lau tulafono; e leai foi se mea e tausuai ai i latou.” (Salamo 119:165) O le usiusitai i tulafono a le Atua, tatou te manuia ai. Na fetalai Ieova ia Isaraelu e faapea: “O loo faapea ona fetalai mai o Ieova, o le na faatauina oe, o le Paia o Isaraelu, O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami.”—Isaia 48:17, 18.
18 Ua aumaia e le taulaga togiola a Keriso ia i tatou le filemu ma le Atua. (2 Korinito 5:18, 19) Afai tatou te faatuatua i le toto faatogiola a Keriso ma taumafai ma le mataalia ina ia faatoilalo o tatou vaivaiga ae fai le finagalo o le Atua, ona tatou mapu ai lea mai faalogona nofo sala. (1 Ioane 3:19-23) O lena faatuatua, ua lagolagoina e galuega, e aumaia ai ia i tatou se tulaga amiotonu i luma o Ieova ma le faamoemoe matagofie o le faasaoina atu i “le puapuaga tele” ma ola ai e faavavau i le lalolagi fou a Ieova. (Faaaliga 7:14-17; Ioane 3:36; Iakopo 2:22, 23) E mafai ona fai ma tatou nei mea uma, ‘pe afai o le a tatou uai moni atu i poloaiga a le Atua.’
19. O le ā e faalagolago i ai lo tatou fiafiaga i le taimi nei ma lo tatou faamoemoe o le ola e faavavau, ma na faapefea ona faaleo mai e Tavita lo tatou maumaututu mai le loto?
19 Ioe, o lo tatou fiafiaga i le taimi nei ma lo tatou faamoemoe o le ola e faavavau i se lalolagi parataiso, o loo faamalumalu mai i lo tatou gauai atu ma le olioli i le pule a Ieova, o ia o le Alii Pule Silisili Ese i le lalolagi aoao. Tau ina ia tatou auai faatasi pea ma Tavita i ona lagona, o lē na faapea mai: “Ieova e, e ou le silisili ese ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. O lenei, lo matou Atua e, ua matou faafetai atu ia te oe, ma vivii atu i lou suafa mamalu.”—1 Nofoaiga a Tupu 29:11, 13.
Manatu ia Manatua
◻ O le ā le ituaiga o gauai atu ma le usiusitai lea e finagalo Ieova ina ia faaalia e ana auauna?
◻ Na faapefea ona tauia Iesu ona o lona usiusitai, ma o le ā e ao ona tatou faamaonia atu e ala i a tatou gaoioiga?
◻ E ao faapefea i ovasia uma ona faataitai ia Iesu i le auala na ia tausia ai mamoe?
◻ O le ā ua aofia ai i le avea ma sē e faatiokarate?
◻ O ā faamanuiaga ua aumaia ia i tatou i le gauai atu ma le olioli?
[Ata i le itulau 24]
E faalaeiauina e toeaina le lafu mamoe ina ia faia ma le olioli so o se mea lava latou te mafaia
[Ata i le itulau 26]
E finagalo malie Ieova ia i latou o ē usiusitai ia te ia mai le loto