“Ua Ou Taofimau i le Faatuatua”

E PEI ONA FAAMATALAINA E UO A BRUNELLA INCONDITI

“O LE Aso Toonai, sa o se aso umi ma sa iai se lagona tuua toatasi. Sa na o aʻu lava le potu, ma na ia te aʻu se lagona ua matuā leai se faamoemoe. Sa ou lagona, e pei o loo ou savali atu i se auala vaiti. Sa lelei mea uma lava, ae na faafuasei lava ona pei ua liai mai e se tasi le faitotoa i oʻu mata, ma ua leai se auala e sao ai i fafo, e ui lava i ni taumafaiga malolosi na ou faia.”

O se faanoanoaga sili sa mafatia ai le loto o Brunella Inconditi, e na o le 15 tausaga le matua. Sa mou mālie ese atu le aso sa sili ona tāua i lona olaga talavou. I le amataga o lena lava tausaga, o le tuputupu aʻe o lona alofa mo Ieova ma le Tusi Paia, na uunaia ai o ia e tuuina atu lona ola ia te ia. Ia Iulai 1990, sa tatau ona papatisoina ai o ia i le Tauaofiaga Itumalo a Molimau a Ieova, le “Gagana Mamā” lea na faia i Montreal, i Kanata. Ae na i lo o lena, sa lē pine ae fesagai loa Brunella ma se tofotofoga o lona faatuatua seia oo i le iuga o lona ola.

I le lua o aso a o faatalitali e faatinoina lona tuuina atu i le papatisoga i le vai, na iloa ai e Brunella ua maua o ia i le maʻi o le kanesa o le toto (leukemia). Sa mananao fomai i le falemai o tamaiti e amata loa ona togafitiga, o lea na taofia ai Brunella i le falemai.

O Ana Lava Upu na Faagaeetia ai Fomai

Sa iloa e Brunella, o le toto, e paia ia Ieova le Atua. (Levitiko 17:11) Sa faamautinoa e ona mātua o Edmondo ma Nicoletta, ua leai se toto e faaaogāina i le togafitiga o la la tama. Ua manatua e lona tamā e faapea: “Sa manao foi Brunella ia, ina ia faalogo atu fomai o tautala mai ai o ia, e ui lava sa iai pea o ia i lalo o le vaaiga a ona mātua. Sa ia taʻu atu ma le loto mau ia i latou e faapea, e lē manao o ia i se togafitiga e solia ai le poloaiga a le Tusi Paia ina ia ‘faamamao ma le toto.’”—Galuega 15:20.

Ia Iulai 10, 1990, na feiloai ai fomai e toatolu ma se tamaitai faigaluega mo le manuia lautele, ma mātua o Brunella, ma faifeau e toalua mai la latou faapotopotoga o Molimau a Ieova. Na faailoa mai i suesuega e faapea, o Brunella ua maua i le kanesa o le toto. Na faamatala mai e fomai la latou fuafuaga e togafitia ai le maʻi. Sa latou faamatala mai ma le faautauta e faapea, e matuā faigata ona togafitia le maʻi. Ua manatua e se tasi toeaina o le faapotopotoga e faapea: “Sa faagaeetia loto o fomai ma le tamaitai faigaluega mo le manuia lautele i le amio ma le maumauai o Brunella e usiusitai i le Atua. Sa ootia foi i latou i le alofa o ona mātua faapea ma le lagolagosua o uso mai le faapotopotoga Kerisiano. Sa latou talisapaia foi le auala o lo matou malamalamaga ma le faaaloalo i lo latou tulaga.”

Sa fuafua fomai e alofia ni tuiga toto. O le a tuuina atu ia Brunella se togafitiga i le faateleina i ai o vailaau, ae o le a lē malolosi tele e pei ona masani ai. O le a faaitiitia ai i lenei mea le faaleagaina ai o sela o lona toto na e faapogaia i togafitiga. Ua faamatala mai e Nicoletta e faapea: “Sa manatu mamafa fomai i manaoga faaletino, faalogona, ma le faaleagaga o Brunella. Ina ua matou talosaga atu ia i latou ina ia faafesootai se fomai faapitoa e poto masani i togafitiga o kanesa o le toto o tamaiti e lē faaaogāina ai le toto, sa ioe i ai i latou.” Sa atiina aʻe e Brunella ma le aufaigaluega a le falemai se noataga mafana o le tiga alofa.

Sini Faaleagaga

E ui lava na aumaia i uluai togafitiga ni nai iuga lelei, ae o le uluai amataga ia o mafatiaga o Brunella. Ia Novema 1990, na feololo ai lona maʻi, o lea, na papatisoina ai o ia e aunoa ma le toe faatali. I le manatunatu i nai masina ua mavae, na faapea mai ai Brunella: “Sa matuā lē faigofie lava. E te manaomia le tele o le malosi, ma e manaomia ona saʻo lou mafaufau. . . . Sa tofotofoina ai loʻu faatuatua, ae sa ou tumau, ma sa tumau pea laʻu fuafuaga e faia o saʻu galuega le paeonia sauatoa [faifeau faataimi atoa].”

I le amataga o le 1991, na toe mafatia ai Brunella i lona maʻi. Na toetoe lava a maliu ai o ia a o faia lona togafitiga (chemotherapy), ae na maofa tagata uma ma le matuā fiafia, ina ua toe malosi mai o ia. Ia Aokuso, sa toe maua ai sona malosi na mafai ai ona ia faaalu le masina i le faiva i le lautele i le avea ma paeonia lagolago. Sa toe faateteleina le leaga o lona maʻi, ma ia Novema 1991 sa afaina ai ni vaega o lona tino i le kanesa. Ona amata ai lea e se tasi o le au faigaluega o fomai mai se isi falemai ona togafitia o ia e ala i fāʻata malolosi (radiation therapy).

E ui lava i na tulaga faigata, ae sa tumau pea Brunella ma faataatitia ni ona sini faaleagaga. Ina ua ia uluai iloa e uiga i le kanesa o le toto, sa taʻu atu ia te ia e faapea, masalo pe toe ono ni masina e mafai ona ola ai o ia. Nei, ua toetoe lava atoa le tausaga ma le ʻafa ua mavae, o ola pea Brunella, ma sa tumau pea ana fuafuaga mo le lumanai. Na taʻua e se toeaina o le faapotopotoga e faapea: “Na te leʻi faamaimauina se taimi, i le galue mo ona sini. O le faatuatua o Brunella i le Parataiso na folafolaina mai e le Atua, na faamalosia ai o ia i le taimi o ona mafatiaga. Sa tupu aʻe o ia o se Kerisiano taumatuaina e ui lava ina itiiti ona tausaga. O lana amio ma uiga faaalia na faagaeeina ai le faapotopotoga ma pāʻia ai loto o i latou na iloa o ia, e aofia ai ma le au faigaluega a le falemai.” Ua manatua e lona tinā e faapea: “E lē faaseā lava o ia. Pe a fesili atu se tasi po o ā mai o ia, e tali mai lava e faapea, ‘Manuia’ po o le faapea mai foi, ‘Feoloolo, ae o ā mai oe?’”

Se Lumanai Saogalemu

Sa fuafua e Brunella e auai i le Tauaofiaga Itumalo a Molimau a Ieova “O Ē Faasusulu Atu le Malamalama” na faia ia Iulai 1992. Ae peitai, e oo atu i le taimi o le tauaofiaga, ua toe taofia Brunella i le falemai, ma ua oo atu o ia i se tulaga faaletonu. Ae ui lava i lea, sa auai o ia i le tauaofiaga ma na saofai i se nofoa faataavalevale, ona o le naunau e fia matamata i le tala, Faia le Mea e Tonu i Fofoga o Ieova.

Na toe foi atu o ia i lona aiga mo ni nai aso mulimuli o lona ola. Fai mai Nicoletta: “I ona taimi mulimuli, sa sili ona manatu mamafa o ia e uiga i isi na i lo o ia lava. Sa ia faalaeiauina i latou e suesue le Tusi Paia, ma taʻu atu ia i latou, ‘Tatou te toe faatasi i le Parataiso.’”

Na maliu Brunella ia Iulai 27, 1992, o mausali lona faamoemoe i le toetu i le ola i le Parataiso i le lalolagi. O lena faatoʻā amata ona ia tuliloa ona sini, ae ua fuafua o ia e faaauau i le auala o lona tuuina atu pe a mavae lona toe faatuina mai. I na o ni nai aso lava a o leʻi maliu o ia, na tusia ai e Brunella se tusi, lea o loo mulimuli mai, na faitauina i le taimi o le sauniga o lona maliu.

“Uo Peleina:

“Faafetai mo lo outou afifio mai. O lo outou auai mai, e matuā tāua tele i loʻu aiga.

“I tagata sa mafana mai ia te aʻu—e tele ni mea na oo ia i tatou. Sa tele ni o tatou taimi faigata, ae sa iai foi ni taimi na tatou toē ai. Sa o se taua faigata ma le umi, ae e lē o ia te aʻu se lagona e faapea ua ou lē taulau. E pei ona faapea mai le Tusi Paia, ‘Ua ou tau le taua lelei, ua iu ia te au le tausinioga, ua ou taofi i le upu o le faatuatua.’—2 Timoteo 4:7.

“E tele mea na ou aʻoaʻoina, ma sa tele loʻu tuputupu aʻe, o aʻu uo ma i latou sa faatasi ma aʻu, sa latou vaaia le suiga. Ou te fia faafetai atu ia i latou uma o ē na lagolago mai ia te aʻu.

“O outou o ē o talitonu i le faiga fou a Ieova, ua iloa o le a iai se toetu, e pei lava ona fai mai ai le Ioane 5:28, 29. O lea, ia faamalolosi i le upu moni, ma o le a mafai ai ona tatou toe feiloai.

“Ou te fia faafetai atu foi ia i latou na iloa oʻu mafatiaga. Ou te sogi ma opo atu ia te outou uma taitoatasi. Ou te alofa ia te outou uma lava.”

Sa leʻi faatagaina e Brunella lona laitiiti po o lona maʻi e taofia ai le tuuina atu o ia i le Atua. O lana faaaoaoga i le faatuatua ma lona maumauai ua faalaeiauina ai ē talavou ma ē matutua, e tuuesea so o se mea e ono faalavelaveina ai i latou mai le taufetuli i le tausinioga mo le ola.—Eperu 12:1.