Le Auala na Fesoasoani ai le Faatuatua iā te Aʻu e Fesagaʻia ai Tulaga Faigatā

Faamatalaina e Soledad Castillo

E tele taimi o loʻu olaga na foliga mai ai ua lofitūina aʻu i le faavauvau—peitaʻi e leai. Na maliu si aʻu tane faapelepele ua 34 oʻu tausaga. I le ono tausaga mulimuli ane, na maliu ai loʻu tamā. Ae i le valu masina mulimuli ane talu ona mavae le maliu o loʻu tamā, na ou iloa ai ua aafia si aʻu tama tama e toʻatasi, i se maʻi e lē mafai ona togafitia.

O LOʻU igoa o Soledad, o lona uiga o le “Tuua Toʻatasi.” Ae ui i lea, e foliga mai e lē fetaui lea tulaga, ona e lē taitai ona ou lagona le tuua toʻatasi. Ina ua ou fesagaʻia tulaga faigatā, na ou talitonu i le paʻi mai o Ieova le Atua, e na te ‘taofi iā te aʻu i loʻu lima ma fesoasoani iā te aʻu, o lea ou te leʻi fefe ai.’ (Isaia 41:13) Seʻi oʻu faamatala atu pe na faapefea ona ou fesagaʻia tulaga faigatā na oo iā te aʻu, ma pe na faapefea i na tulaga ona ou tosina vavalalata atu ai iā Ieova.

Se Olaga Fiafia e Lē Tele ni Faafitauli

Na ou fanau i Barcelona, i Sepania, iā Me 3, 1961, ma e na o aʻu le tama a oʻu mātua, o José ma Soledad. Na aʻoaʻoina e loʻu tinā le upu moni o le Afioga a le Atua, ina ua iva oʻu tausaga. Sa ia saʻilia ni tali o ana fesili faalelotu, peitaʻi e na te leʻi maua le faamalieina i lana lotu. I se tasi aso, na asiasi atu ai ni Molimau a Ieova e toʻalua i lona fale ma faaaogā le Tusi Paia e tali uma ai ana fesili. Sa ia talia fiafia se suʻesuʻega faale-Tusi Paia.

E leʻi umi ae avea loʻu tinā ma Molimau a Ieova papatiso, ma i ni nai tausaga mulimuli ane ai, na mulimuli atu ai loʻu tamā i lana faaaʻoaʻoga. E leʻi umi ae mātauina e Eliana, o lē sa suʻesuʻe ma loʻu tinā, loʻu naunau i le Afioga a le Atua. E ui lava ua na o aʻu o se teineitiiti laʻitiiti, ae sa fai mai Eliana e fai saʻu lava suʻesuʻega. Ou te faafetai i lana fesoasoani faapea ma faalaeiauga a si oʻu tinā, lea na ou papatiso ai i le 13 o oʻu tausaga.

A o oʻu talavou, sa masani ona ou tatalo atu iā Ieova—aemaise lava pe a ou faia ni filifiliga. O le mea moni, e tau leai ni oʻu faafitauli a o oʻu talavou. Sa tele ni aʻu uō i le faapotopotoga, ma sa māfana la matou mafutaga ma oʻu mātua. I le 1982, na ou faaipoipo ai iā Felipe, o se Molimau sa iai ni ona sini faaleagaga e pei foʻi o aʻu.

Tausia Aʻe la Ma Tama ia Alofa iā Ieova

I le lima tausaga mulimuli ane ai, na fanau ai se ma pepe tama aulelei, lea na ma faaigoaina iā Saúl. Sa ma fiafia tele ma Felipe ina ua maua se ma tama. Na ma faamoemoe o le a tuputupu aʻe Saúl o se tama e soifua mālōlōina lelei, e iloa le mea e ao ona fai, ma alofa i le Atua. E tele taimi na ma faaalu ma Felipe e faifaimea faatasi ai ma Saúl, talanoa atu iā te ia e faatatau iā Ieova, aai faatasi, ave i le paka, ma taaalo faatasi ma ia. Sa fiafia tele Saúl e ō faatasi ma Felipe e taʻu atu upu moni o le Tusi Paia i isi, ma sa fesoasoani Felipe iā te ia e auai i le faiva a o laʻitiiti, i le aʻoaʻoina lea o ia e tuʻituʻi pe oomi logo o faitotoʻa o fale o aiga ma ofo savali i tagata.

Sa tali lelei mai Saúl i lo ma alofa ma la ma toleniga. E atoa ane le ono o ona tausaga, ua lē aunoa ona ia talaʻi faatasi ma maʻua. E fiafia e faalogologo i tala o le Tusi Paia, ma e na te tulimataʻia le taimi e fai ai la matou suʻesuʻega faale-Tusi Paia o se aiga. E leʻi umi talu ona amata alu i le aʻoga, ua amata ona ia faia ni filifiliga laiti e faavae i lona poto mai le Tusi Paia.

Peitaʻi, i le fitu o tausaga o Saúl, na matuā suia ai le tulaga o lo matou aiga. Ua aafia Felipe i se maʻi e māfua mai i se vairusi ua pipisi i ona māmā. E 11 masina o ia tauivi ma le maʻi, ua lē mafai ona toe faigaluega ma sa tele lava ina faataotolia o ia i le moega. Na maliu laʻu tane i le 36 o ona tausaga.

E faaauau pea ona ou tagi pe a ou manatua lenā tausaga e sili ona faigatā. Sa ou vaavaai atu i laʻu tane ua faasolosolo mālie ona mou atu lona malosi i le tauivi ai ma le vairusi, ma e leai foʻi se mea na mafai ona ou faia. I lenā taimi atoa, sa ou taumafai e avatu pea faalaeiauga iā Felipe, e ui lava na ou iloa ua matuā lē taulau oʻu faamoemoega ma fuafuaga sa i ai. Sa ou faitau atu iā te ia ni mataupu faale-Tusi Paia, ma sa faamalosia i maʻua i nei mataupu pe afai e ma te lē auai i sauniga faa-Kerisiano. Ina ua maliu laʻu tane, na foliga mai ua leai se mea ou te toe mafai ona fai.

Peitaʻi, na tausia aʻu e Ieova. Sa ou tatalo atu e lē aunoa iā te ia e fesoasoani mai lona agaga. Sa ou faafetai atu iā te ia ona o tausaga fiafia sa ma mafuta faatasi ai ma Felipe, faatasi ai ma le faamoemoe o le toe vaai atu iā Felipe i le toetū. Sa ou ōle atu i le Atua e fesoasoani mai iā te aʻu ia ou fiafia pe a ou manatua mea sa ma fiafia faatasi ai ma laʻu tane, ma ia aumai iā te aʻu le atamai e tausia aʻe ai la ma tama ina ia avea ma se Kerisiano moni. E ui lava i le tigā matuitui, ae sa ou lagona le faamāfanafanaina.

Sa tele foʻi le lagolagosua mai i oʻu mātua faapea uso ma tuafāfine i le faapotopotoga. Ae ui i lea, o aʻu lava na tatau ona taʻimua i le suʻesuʻeina o le Tusi Paia faatasi ma Saúl, ma aʻoaʻoina o ia i le auala e auauna ai iā Ieova. Sa ofo mai iā te aʻu e lē na avea muamua ma oʻu pule, se galuega lelei i le ofisa, ae na ou filifili e fai le galuega faamamā ina ia mafai ai ona tele loʻu taimi e faaalu faatasi ma Saúl, ma ia iai faatasi ma ia pe a tuua mai lana aʻoga.

O se tasi o mau e faamamafa mai ai pea iā te aʻu le tāua o le toleniga faaleagaga o Saúl, e faapea: “Aʻoaʻo ia i le tama e tusa ma lona ala; a oo ina toeaina lava o ia, e lē teʻa ese ai.” (Faataoto 22:6) O lenei mau na aumai ai iā te aʻu le faamoemoe e faapea, pe afai ou te faia le mea sili ou te mafaia e talanoa atu ai iā Saúl i le tāua o mea faaleagaga, o le a faamanuia mai Ieova i aʻu taumafaiga. E moni e iai nisi mea sa manaʻomia ona ou saʻilia ni tupe ina ia maua ai, peitaʻi sa manaʻomia ona ou faaalu le taimi faatasi ma laʻu tama, ma sa sili ona tāua iā te aʻu lenei mea nai lo so o se manuia faaletino.

O le 14 o tausaga o Saúl na maliu ai loʻu tamā. Sa sili ona mafatia Saúl, ona na toe faamanatu mai e le maliu o loʻu tamā ia tigā uma sa ia lagonaina ina ua maliu lona tamā. Sa faataatia foʻi e loʻu tamā se faaaʻoaʻoga lelei o le alofa mo Ieova. Ina ua mavae le maliu o loʻu tamā, sa filifili loa Saúl e faapea, ua na o ia le “tane” i le aiga, ma o le a ia taulimaina nei le tiute tauave o le tausiaina o lona tinā ma le tinā o lona tinā.

Tauivi ma le Maʻi e Taʻu o le Lukimi

I le valu masina mulimuli ane talu ona mavae le maliu o loʻu tamā, na fai mai ai lo matou fomaʻi iā te aʻu e ave Saúl i le falemaʻi i lo matou vaipanoa, ona sa mafatia o ia i le matuā lē lavā. Ina ua māeʻa se saʻiliʻiliga faafomaʻi na faia, na taʻu mai ai e le fomaʻi iā te aʻu, ua maua Saúl i le maʻi e taʻua o le lukimi (leukemia).a

A o faagasolo le lua ma le ʻafa tausaga mulimuli ane, sa ave i le falemaʻi ma toe aumai i tua Saúl a o ia tauivi e fesagaʻia le kanesa ma le togafitiga e taʻu o le chemotherapy, lea na faaaogā e fomaʻi e taumafai e tetee atu ai i le kanesa. O le togafitiga lea sa fai i uluaʻi masina e ono na tau feoloolo mai ai lona maʻi, mo le umi pe ā ma le 18 masina. Peitaʻi na toe aafia lava Saúl i le kanesa, ma na toe fai le isi ona togafitiga o le chemotherapy lea e puupuu se taimi na fai ai, ma na matuā vaivai ai o ia. E na o sina taimi puupuu lava na tau feoloolo mai ai le kanesa, ma sa lē mafai ona ia fesagaʻia le togafitiga lona tolu o le chemotherapy. O le taimi lea ua uma ona tuuina atu e Saúl lona ola i le Atua ma sa faaalia lona faanaunauga e fia papatiso o se tasi o Molimau a Ieova, peitaʻi na uma lona ola i le 17 o ona tausaga.

E masani lava ona fautua mai fomaʻi e manaʻomia ona tui le toto, ina ia tetee atu ai i āuga leaga o le togafitiga o le chemotherapy. O le mea moni, e lē mafai e le tuiina o le toto ona togafitia ai le maʻi. Ina ua muaʻi faailoa mai e fomaʻi ua maua Saúl i le lukimi, sa ma faamautinoa ma Saúl e ma te lē taliaina lenei togafitiga, ona sa ma mananaʻo e usiusitai i le tulafono a Ieova ia “taumamao . . . mai le toto.” (Galuega 15:19, 20) I nisi taimi, sa tatau ai iā Saúl ona ia faatalitonu fomaʻi pe a ou lē iai e faapea, e fai e ia lana lava faaiʻuga i lenei mataupu. (Tagaʻi i le pusa i le itulau e 31.)

Na mulimuli ane faia e fomaʻi se faaiʻuga e faapea, o Saúl o se tamaitiiti ua matua faalemafaufau ma ua ia malamalama lelei i le tulaga o lona maʻi. Na latou malilie e faaaloalogia lo ma tulaga ma ofo mai iā i maʻua ni togafitiga e lē faaaogāina ai le toto, e ui lava sa faaauau pea ona uunaʻia i maʻua ina ia sui la ma faaiʻuga. Na ou matuā lagona le fiafia ina ua ou faalogo atu o faamatala e Saúl lona tulaga i fomaʻi. E mautinoa sa ia atiaʻe se faiā vavalalata ma Ieova.

A o faagasolo le tau māfanafana, ina ua ma faatoʻā iloaina le maʻi o Saúl, na tatala ai le tusi e taʻua o le Faalatalata Atu iā Ieova, i la matou tauaofiaga itumalo na faia i Barcelona. O lenā tusi e tāua tele na faamaonia le avea e pei o se taula ina ia ma tumau ai pea, a o ma fesagaʻi ma lo ma tulaga e lē mautinoa ma faigatā. I taimi a o ma iai i le falemaʻi, sa ma faitauina faatasi vaega o le tusi. A o faagasolo le tele o taimi faigatā ia na ma onosaia mulimuli ane, sa masani ona ma mafaufau i mea o loo taʻua i le tusi. O lea ina ua taʻua i upu tomua o le tusi le Isaia 41:13, sa iai sona uiga tāua iā i maʻua. O loo faapea mai: “O aʻu o Ieova lou Atua, o lē ua taofia lou lima taumatau; o lē ua fai atu iā te oe, ‘Aua e te fefe, o aʻu ou te fesoasoani iā te oe.’”

O le Faatuatua o Saúl ua Pāʻia ai Loto o Isi

O le tulaga taʻumatuaina ma le vaaiga mautinoa o Saúl, na matuā ofo ai fomaʻi ma tausimaʻi i le falemaʻi i Vall d’Hebrón. Sa alofagia o ia e i latou na tausia o ia. Talu mai lenā taimi, ua togafitia ai e le fomaʻi faapitoa mo le toto lea na te vaavaaia maʻi o kanesa, ia isi tamaiti Molimau ua aafia i le lukimi, ma ua ia avatu iā i latou le faaaloalo ma le mamalu. E na te manatua le filifiliga maumaututū a Saúl ina ia tausisi i ona talitonuga, o lona lototele i le taimi ua lata ona uma ai lona ola, ma lana vaaiga fiafia i le olaga. Na faapea atu le ʻau tausimaʻi iā Saúl, o ia le maʻi pito sili ona lelei ua latou tausia i lenā potu. Ua latou taʻua e faapea, e lē taitai ona ia faitio pe mou atu ona uiga agamālie—e oo lava foʻi i le taimi o le a uma ai lona ola.

Na faapea mai se fomaʻi o le mafaufau iā te aʻu, o le toʻatele lava o tamaiti e fesagaʻi ma lea ituaiga gasegase tugā i le matua lea, e tele lava ina tetee i fomaʻi ma mātua ona o le mafatia ma le fiu. Na ia mātauina e leʻi faapena Saúl. Iā te ia, e mataʻina le vaai atu i le toʻafilemu o Saúl ma lona mautinoa. O lenei tulaga na aumai ai iā i maʻua ma Saúl, se avanoa e molimau atu ai iā te ia e faatatau i lo ma faatuatuaga.

Ou te manatua foʻi le auala na fesoasoani ai Saúl i se Molimau i la matou faapotopotoga, i se auala lē tuusaʻo. Na maua o ia i mafatiaga o le mafaufau i le pe tusa ma le ono tausaga, ma e leʻi aogā ni fualaau e faaleleia ai lona tulaga. I se tasi taimi, sa ia faaalu le pō e nofo ai i le falemaʻi e tausi Saúl. Na ia faapea mai iā te aʻu na ia matuā maofa i le uiga faaalia o Saúl a o fesagaʻi ma le lukimi. Na ia mātauina, e ui lava i lona mafatia, ae sa taumafai lava Saúl e faalaeiau tagata uma na asiasi atu iā te ia. Ua faapea mai lenei Molimau, “O le faaaʻoaʻoga a Saúl ua aumaia ai iā te aʻu le lototele e tauivi ai ma loʻu mafatiaga o le mafaufau.”

Ua tolu nei tausaga talu ona uma le ola o Saúl. Ae o loo lagona pea le tigā ma le mafatia. Oʻu te lē malosi, peitaʻi e aumai e le Atua iā te aʻu le “mana lea e sili atu i le malosi o tagata.” (2 Korinito 4:7) Ua ou iloa e oo lava foʻi i mea e tutupu e sili ona faigatā ma tigā, e mafai ona iai sona aafiaga lelei. O le aʻoaʻoina ia fesagaʻi ma le maliu o laʻu tane, o loʻu tamā, ma laʻu tama, ua fesoasoani iā te aʻu e avea ai ma sē e lē manatu faapito ma e malamalama e faatatau i isi o loo mafatia. Ae e sili atu i nei mea uma, ua atili ai ona ou tosina vavalalata atu iā Ieova. E mafai ona ou fesagaʻia ma le lē fefe le lumanaʻi, ona e faaauau pea ona fesoasoani mai iā te aʻu loʻu Tamā i le lagi. E faaauau pea ona ia taofi iā te aʻu i loʻu lima.

[Faaopoopoga i lalo]

[Pusa/Ata i le itulau 31]

PE SA E TAUMĀNATU?

Atonu na e faalogo e lē taliaina e Molimau a Ieova ni tuigātoto. Pe sa e taumānatu pe aiseā?

E masani lava ona faauiga sesē e tagata lenei talitonuga e faavae i le Tusi Paia. O nisi taimi e manatu tagata faapea, e teena e Molimau a Ieova togafitiga faafomaʻi uma lava, ia pe e lē tāua foʻi iā i latou le ola. Ae e matuā sesē lava lenā manatu. E saʻilia e Molimau a Ieova togafitiga faafomaʻi e sili ona lelei mo i latou ma sui o o latou aiga. Peitaʻi, e latou te saʻilia togafitiga e lē faaaogāina ai le toto. Aiseā?

E faavae lo latou talitonuga i se tulafono faavae na tuuina mai e le Atua i tagata. Ina ua faatoʻā uma le Lolo i aso o Noa, na avatu e le Atua iā Noa ma lona aiga le faatagaga e aai ai i aano o manu. A o le mea lenei e tasi na faasā e le Atua: E sā ona latou ʻaina le toto. (Kenese 9:3, 4) Talu ai o tagata uma o ituaiga uma na tupuga mai iā Noa, o lea ua faatatauina ai foʻi lenei tulafono i tagata uma. E leʻi faalēaogāina lava lenei tulafono. I le silia i le valu senituri mulimuli ane, na toe faamautinoa atu ai e le Atua lenā tulafono i le nuu o Isaraelu, e ala i le faamatala atu i ai o le toto e paia, ma ua fai ma sui o le ola o le tagata. (Levitiko 17:14) I le silia i le 1,500 tausaga mulimuli ane, na faatonu ai e aposetolo Kerisiano ia Kerisiano uma ina ia “faaauau ona taumamao mai . . . le toto.”—Galuega 15:29.

I Molimau a Ieova, e manino lava e lē mafai ona taumamao mai le toto pe afai e faaooina atu le toto i totonu o le tino e ala i le tuiina i ai. O le ala lea e latou te maumaututū ai i togafitiga faafomaʻi e lē o aofia ai le toto. O lenā talitonuga faale-Tusi Paia e masani lava ona iʻu ai i le mauaina o togafitiga faafomaʻi e sili ona lelei. E lē taumatea o le māfuaaga lea ua mananaʻo ai foʻi le toʻatele o tagata e lē o ni Molimau a Ieova, i togafitiga faafomaʻi e lē faaaogāina ai le toto.

[Ata i le itulau 29]

Faatasi ma laʻu tane o Felipe, ma la ma tama tama o Saúl

[Ata i le itulau 29]

O oʻu mātua o José ma Soledad

[Ata i le itulau 30]

O Saúl i le tasi le masina a o leʻi uma lona ola