Le Faamataʻu o Mea Faaniukelea—Aveesea e Faavavau!

O LE ola i se mataʻu e lē faavaea, e lē o le mea lena e finagalo ai le Atua mo tagata. Ona o ia “o le Atua fiafia,” e finagalo o ia ina ia latou olioli i le filemu ma ola saogalemu—pe a faapuupuu, ia fiafia. (1 Timoteo 1:11, NW) I se lalolagi ua tumu i le mataʻu i mea faaniukelea, ua manino mai ai, e lē mafai ona faia o lenei mea.

“Filemu ma le Saogalemu” —O se Mea Pepelo

E ao ona iloa lelei e faapea, o le mea moni e leʻi aveesea le faamataʻu o mea faaniukelea. Ae e ui lava i le lē toafilemu o faiga faapolotiki, le tamaoaiga, ma le va fealoai, ae foliga mai o le autū lava, o loo āloālo atu pea tagata mo se faamoemoe lelei. Talu mai le Tausaga Faavaomalo mo le Filemu a Malo Aufaatasi, i le 1986, na vaaia manino ai se taumafaiga maumauai e faaitiitia le tulaga lamatia.

I le sefulu tausaga ua mavae, na toe ki ai i tua e le Bulletin of the Atomic Scientists lana uati o le taimi atofa—po o lana auala e faailoa ai le ono tupu o se taua faaniukelea—mai le toe 3 minute i le tulua o po ma ao, i le 17 minute i le tulua o po ma ao. I le 1989, na matauina ai e le Faalapotopotoga o Suesuega Faavaomalo mo le Filemu i Stockholm e faapea, “o le faamoemoe mo se filemu o maliega feteenai, ua sili atu nei ona mauaʻa lona faavae na i lo o le vaitaimi talu ona faaiuina le Taua Muamua a le Lalolagi.”

I tausaga na seʻi mavae atu, na faamalosia ai le Malo Aufaatasi e feutagai ma vaega o atunuu faavaomalo ia o loo faia ai pea fetauaiga. E ui ina e leʻi taulau atoatoa lana taumafaiga, ae sa lava le malosi e uunaia ai le agaga lautele mo se faamoemoega lelei. O le a faapena foi ona aumaia e le lumanai nisi taualumaga manuia. E lē taumatea, o le a oo ina sili atu ona leo tele ma sili atu ona malosi le Alaga mo le “filemu ma le saogalemu.” E oo lava ina matuā talitonuina.

Ae ia faaeteete! Ua lapatai mai le Tusi Paia: “Pe a latou fai ane, O loo filemu, ua le afaina [“saogalemu,” NW] ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.” I lea, o le alaga o le “filemu ma le saogalemu” o le a fai ma faailoilo o le taimi a le Atua “e fano ai foi i latou o e na fano ai le lalolagi [e ala i le faapolusioneina i mea faaniukelea ma isi mea].”—1 Tesalonia 5:3, 4; Faaaliga 11:18.

Ia mātau e lē o fai mai le Tusi Paia, o le a ausia e malo le “filemu ma le saogalemu.” E foliga mai o le a latou talanoaina le filemu i se auala mataʻina, i le faaalia o faamoemoega mautinoa ma talitonuga mo se lalolagi e sili ona lelei sa leʻi faapea ona iai muamua. O avanoa i le mauaina o le filemu ma le saogalemu o le a aliali mai ua sili atu nei ona latalata mai na i lo muamua. E ui lava o loo faaauau pea le faamataʻu o mea faaniukelea, ae o le a faatoafilemuina ai atunuu i se uiga taufaasese o le saogalemu.

Ae peitai, o le a lē faaseseina ai Kerisiano moni. O le a latou vaavaai atu ma le naunautai i tala atu o le filemu ma le saogalemu faaletagata i se mea e sili atu ona lelei!

Filemu ma le Saogalemu —O le Mea Moni

E tusa ma le tala a le Salamo 4:8, o le filemu moni ma le saogalemu, e mafai ona maua i na o le faatulagaga lava a Ieova le Atua: “Ou te taoto, ma ou moe filemu; auā o oe Ieova e, na o oe lava, ua ou nofo ai ma le [“saogalemu,” NW] filemu.” Ma so o se alaga mo le “filemu ma le saogalemu” e faia e lē auala mai i le faatulagaga a le Malo o Ieova, ua na o se mea taufaasese. E lē mafai ona ia faia se mea e tumau sona aogā.

E lē lava ni vaifofō faaʻafaʻafa mo le Malo o le Atua i lalo o le pulega a Keriso. O le pulega tauatua, o le a na faia nisi mea e sili atu na i lo o le faaitiitia o le aofaiga o auupega faaniukelea; o le a na matuā soloia aʻiaʻi na mea, ma isi auupega uma o le taua. Ua folafola mai e le Salamo 46:9 e faapea: “Ua faaiua e ia o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foi e ia kariota i le afi.”

O le a faapena foi ona mavae atu le faamataʻu o mea faaniukelea ua mafua ona o le lē lelei o masini e gaosi ai mea faaniukelea, po o otaota o mea faaniukelea. Auā afai o le a lē faia faapea, o le a lē faataunuuina ai la upu nei: “A e taitasi ma nofo i lalo o lona vine, ma lalo o lona mati; e leai foi se na te faamatau mai; auā ua faapea ona tūlei mai ai le siufofoga o Ieova o ʻau.” E lē mafai ona pepelo le Atua. E leai se mafuaaga tatou te masalomia ai fua ana afioga.—Mika 4:4; Tito 1:2.

Po o le a e olioli i le faamoemoe o le ola i se lalolagi ua aveesea atoatoa ai le faamataʻu mai o mea faaniukelea? E mafai, auā ua uma ona faataatia manino mai i le Afioga a le Atua mea e manaomia. O le aʻoaʻoina la ma ola ai e tusa ma na mea, o le a mafai ai i se aso ona e olioli e faapea atu ma se mapuea ona o le toafilemu: “Ua iu moni—le faamataʻu mai o mea faaniukelea!”

[Ata i le itulau 7]

O le a pule le filemu i le lalolagi fou a le Atua e aunoa ma le faamataʻu mai o ni mea faaniukelea

[Ē Ana le Ata]

M. Thonig/H. Armstrong Roberts

[Ē Ana le Ata i le itulau 7]

U.S. National Archives photo