Ieova—Lo Tatou Tamā Alofa Mutimutivale
“E tele le alofa naunau ma le alofa mutimutivale o Ieova.”—IAKOPO 5:11, NW, faaopoopoga i lalo.
1. Aisea ua faalatalata atu ai ē faatauvaa i a Ieova le Atua?
O LE telē anoanoai o le vateatea ua oo ai lava i tagata e suesue i fetu, ua lē mafai ona latou faitauina uma le aofai o ona aniva. O le aniva lea o loo tatou iai, ua taʻua o le Milky Way, e sili ona telē ua matuā lē mafaia lava e se tagata ona faitauina fetu o loo iai. O nisi fetu e pei o Antares, e faitauafe taimi e tetelē ma pupula malolosi atu ai, na i lo o lo tatou la. Maeu la le tele o le malosi o Lē Sili na Foafoaina fetu uma i le vateatea! Ioe, o ia lava o Lē “na te taʻitaʻiina mai a latou ʻau ua faitauina; na te valaau ia te i latou uma i o latou igoa.” (Isaia 40:26) Ae o le Atua mamana lava foi lenei ma le malualii, e “tele le alofa naunau ma le alofa mutimutivale.” Maeu le faafouina ai i lena poto o auauna faatauvaa a Ieova, ae maise i a i latou o loo puapuagatia i sauaga, i maʻi, le loto mafatia, ma isi faigata!
2. O le ā le vaaiga e tele ina manatu i ai le toatele o tagata o le lalolagi e tusa ai ma uiga faapelepele?
2 E toatele e manatu faapea, o uiga agavaivai o Keriso, e pei o le “alofa mutimuti vale ma [le] loto alofa,” o se vaivaiga. (Filipi 2:1) Ona ua aafia mai i filosofia faaevolusione, ua latou faamalosia ai tagata ina ia faamuamua ō latou lava manaoga, e tusa lava pe e faatiga ai i faalogona o isi. E iai ni tagata autū o loo faatinoina mai faaaliga o faafiafiaga i tifaga ma taaloga o ni tagata faafia totoa o ē e lē fetagisi po o le faaalia foi o se alofa faapelepele. Ua faapena foi amioga a isi taʻitaʻi o malo. O le faifilosofia o Seneca mai le aʻoga Setoiko sa na aʻoaʻoina le emeperoa sauā o Nero, na faatāuaina atu e faapea, “o le alofa mutimutivale o se vaivaiga.” Ua faapea mai le Cyclopædia a M’Clintock ma Strong: “O taaiga mai aʻoaʻoga a le au Setoiko . . . ua faaauau ona taaina ai mafaufau o tagata e oo foi lava i taimi nei.”
3. Na faapefea ona faamatala atu e Ieova ia lava i a Mose?
3 I le eseesega pe a faatusatusa, maeu le faamafanafana loto o uiga totino o Lē na Foafoaina le tagata. Na ia faamatala atu o ia lava i a Mose i upu nei: “O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; . . . o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala.” (Esoto 34:6, 7) E moni, ua faaiuina e Ieova lenei faamatalaina o ia lava i le faamatilatila mai lea o lona faamasino tonu. O le a na lē faasaoina ē agasala ma le loto i ai mai le faaooina atu i ai o faasalaga tatau. Peitai, ua ia muai faamatalaina mai o ia o se Atua e alofa fua, i se uiga moni lava, “e tumu i le alofa mutimutivale.”
4. O le ā le uiga faamafanafana loto o le upu Eperu, lea ua tele ina faaliliuina i le “alofa mutimutivale”?
4 O nisi taimi e manatu ai i le upu “alofa mutimutivale” i le na o le uiga lea taufaamasinoga o le taofia o se faasalaga. E ui i lea, o se faatusatusaga o faaliliuga o le Tusi Paia, ua maua mai ai le uiga tāua o le upu Eperu e sau mai le veape ra·chamʹ. E tusa ai ma faamatalaga a isi tagata popoto, o lona uiga autū, “ia āga vaivai.” Ua faamatala e le tusi Synonyms of the Old Testament, le upu “racham,” e faapea ua “faamatala mai ai le tele o le alofa naunau ma lagona o le alofa mutimutivale, e pei ona mafua mai ona ua vaai atu i vaivaiga po o puapuaga i a i latou e faapea ona pele i a i tatou po o le manaomia o la tatou fesoasoani.” O isi faauigaga faamafanafana loto o lenei uiga moomia e mafai ona maua i le Insight on the Scriptures, Tusi 2, itulau e 375-379.
5. Na faapefea ona faailoa mai le alofa mutimutivale i le Tulafono a Mose?
5 Ua faailoa mai ma le manino le alofa mutimutivale o le Atua i le Tulafono na ia tuuina atu i le nuu o Isaraelu. O ē ua oo iai ni tulaga faigata e pei o fafine ua oti a latou tane, o ē ua mātua oti, ma ē matitiva, e ao ona tausia ma le alofa mutimutivale. (Esoto 22:22-27; Levitiko 19:9, 10; Teuteronome 15:7-11) O tagata uma lava, e aofia ai pologa ma meaola, e ao ona maua aogā i le malologa o le Sapati faalevaiaso. (Esoto 20:10) E lē gata i lea, na mataulia lelei e le Atua i latou taitoatasi e tausia ma le faapelepele i latou o ē faatauvaa. Ua faapea mai le Faataoto 19:17: “O le ua alofa i le tagata mativa, na te avatua ana mea ia Ieova, e tauia mai foi e ia ana mea na avatu ia te ia.”
Tapulaa o le Alofa Mutimutivale Tauatua
6. Aisea na aauina atu ai e Ieova perofeta ma ave feau i ona tagata?
6 Na tauaveina e tagata Isaraelu le suafa o le Atua ma tapuai i le malumalu i Ierusalema, sa avea foi o se “fale mo le suafa o Ieova.” (2 Nofoaiga a Tupu 2:4; 6:33) E ui i lea, na iai le taimi na latou faataga ai pea amioga lē mamā, ifo i tupua, ma le fasioti tagata, ma faalumaina ai le suafa o Ieova. Ina ia talafeagai ma lona uiga totino o le alofa mutimutivale, na taumafai ai ma le onosai le Atua e faasaʻo lenei tulaga leaga e aunoa ma le faaooina mai o le mala i le atunuu atoa. Na faaauau ona “aauina mai ia te i latou e Ieova le Atua o latou tamā o e ave ana feau, ua ala aauina lava i latou, auā ua na alofa i lona nuu ma lona afioaga; a ua latou faatauemu i e na aauina mai e le Atua, ma ua ʻinoʻino i ana afioga, ma ua ula i ana perofeta, ua oo ina tupu le toasa o Ieova i lona nuu, ua oo ina leai se fofo.”—2 Nofoaiga a Tupu 36:15, 16.
7. Ina ua oo atu le alofa mutimutivale o Ieova i lona mutaaga, o le ā na tupu i le malo o Iuta?
7 E ui lava e alofa mutimutivale Ieova ma telegese lona toasa, ae afai ua tatau ai, na te faaalia lona toasa amiotonu. Na oo atu le faaalia o le alofa mutimutivale tauatua i lona mutaaga i lena vaitaimi. Ua tatou faitau ai i lona taunuuga mulimuli e faapea: “Ona auina mai ai lea e ia [Ieova] ia te i latou o le tupu o Kaletaia o le na fasia o latou taulelea i le pelu i le fale o lo latou malumalu, ma ua le alofa atu i taulelea ma taupou, o le toeaina, ma lē ulusinā, ua ia tuuina atu i latou uma i lona lima.” (2 Nofoaiga a Tupu 36:17) O lea na faaumatia ai Ierusalema ma lona malumalu, ma na ave faatagataotaua le atunuu atoa i Papelonia.
Alofa Mutimutivale Ona o Lona Suafa
8, 9. (a) Aisea na folafola atu ai e Ieova e faapea o le a ia faaalia le alofa mutimutivale mo lona suafa? (e) Na faapefea ona faatoafilemuina fili o Ieova?
8 Na fiafia atunuu na lalata ane ona o lena mala. Na latou fai atu faapea i se auala taufaifai: “O le nuu lea o Ieova, ua latou o mai nai lona laueleele.” Ona e faaautu i a te ia lenei faifaiga, na folafola atu ai e Ieova e faapea: “A e peitai na ou alofa ona o loʻu igoa paia . . . Ou te faapaiaina loʻu igoa mamalu, . . . e iloa ai foi e nuu ese o aʻu lava o Ieova.”—Esekielu 36:20-23.
9 Ina ua mavae ona faaaunuua lona nuu mo le 70 o tausaga, ona faasaolotoina ai lea o i latou e le Atua alofa mutimutivale o Ieova, ma na tuu atu i latou e toe foi i Ierusalema ma toe ati aʻe le malumalu na iai i inā. Na faatoafilemuina ai e lenei mea faifaiga a nuu taulalata ane, o ē na vaavaai atu ma le ofo tele. (Esekielu 36:35, 36) E ui i lea, o se mea e faanoanoa ai ona sa toe liliu atu foi le nuu o Isaraelu i faiga amioleaga. O se tagata Iutaia faamaoni e igoa i a Neemia, na fesoasoani e toe faaleleia le tulaga. I lana tatalo i luma o le lautele, na ia toe autaluina ai feutagaiga na faaaogā ai e le Atua lona alofa mutimutivale i le nuu i lona faapea mai:
10. Na faapefea ona faamatilatila mai e Neemia le alofa mutimutivale o Ieova?
10 “O ona po o lo latou tiga, ua latou alalaga atu ai ia te oe, ona e faafofoga mai lea ai le lagi; ma e foaiina ia te i latou o faifaatoʻaga e tusa ma lou alofa mutimuti vale ua tele, na latou faaolaina foi i latou ai lima o e ita mai ia te i latou. Ua maua e i latou le filemu, ona latou toe faia lea o amio leaga i ou luma; ona e tuua lea o i latou i lima o e ita mai ia te i latou, na latou faatoilaloina ai i latou a ua latou toe foi, ma alalaga atu ia te oe, ona e faafofoga mai lea ai le lagi, ma laveai soo ia te i latou e tusa ma lou alofa mutimuti vale. . . e tele tausaga na e onosai ai ia te i latou.”—Neemia 9:26-30; tagaʻi foi i le Isaia 63:9, 10.
11. O le ā le eseesega o loo iai i le va o Ieova ma atua o tagata?
11 Mulimuli lava ina ua mavae ona latou teena le Alo faapelepeleina o le Atua, ona mavae atu ai loa lea e faavavau le tulaga faaeaina o le nuu o Iutaia. O le mafuta atu ma le faamaoni o le Atua i a i latou na faatumauina mo tausaga e 1,500. Ua avea ma molimau e faavavau i le mea moni e faapea, o Ieova e mautinoa lava o se Atua e alofa mutimutivale. Pagā se eseesega tele i atua sauā ma tupua e leai ni lagona e pei ona faia e tagata agasala!—Tagaʻi i le pusa i le itulau e 8.
Auala Silisili o le Faaalia o le Alofa Mutimutivale
12. O le ā le auala silisili ua faaalia mai ai e le Atua lona alofa mutimutivale?
12 O le auala silisili na faaalia ai e le Atua lona alofa mutimutivale o lona auina mai lea o lona Alo pele i le lalolagi. E moni na matuā fiafia Ieova ona o le olaga faamaoni o Iesu, na mafai ai ona ia avatu se tali i tuuaiga sese a le Tiapolo. (Faataoto 27:11) E ui i lea, i lea taimi i le silasila mai o ia a o puapuagatia lona Alo pele i se maliu i faiga sauā ma le faalumaina, e mautinoa na matuā lagona ai e Ieova le matuitui o le tiga e leʻi oo muamua lava i se mātua faaletagata. O se taulaga na faia i le alofa, ua faaavanoa ai le ala mo le faaolataga o tagata. (Ioane 3:16) E pei ona valoiaina e Sakaria le tamā o Ioane le Papatiso i se auala faamamaluina, “ona ua mutimutivale le alofa o lo tatou Atua.”—Luka 1:77, 78.
13. O le ā le auala tāua ua faaatagia mai ai e Iesu uiga totino o lona Tamā?
13 O le auina mai o le Alo o le Atua i le lalolagi ua faapena foi ona faaooina mai ai i tagata se malamalamaga manino o uiga totino o Ieova. E faapefea? E ala lea i le faaatagia atu ma le lelei atoatoa e Iesu o uiga o lona Tamā, ae maise lava i lona tausia ma le faapelepele ma le alofa mutimutivale o ē faatauvaa! (Ioane 1:14; 14:9) I lenei vala, ua faaaogā ai e le au tusitala e toatolu o le Tala Lelei, o Mataio, Mareko, ma Luka le veape Eleni o le splag·khniʹzo·mai, e mafua mai lea i le upu “fifi” (intestines) i le gagana Eleni. Ua faamatala e le tagata aʻoga o le Tusi Paia o William Barclay e faapea: “Mai i lona uluai tupuaga, e mafai ona iloa ai e lē o faamatalaina ai se lagona ootia po o se alofa mutimutivale e pei ona masani ai, ae o se faalogona e mafai ona faagaee ai se tasi i lona tagata loloto i totonu. O se upu e sili sili ona uigā i le gagana Eleni e faamatala ai le lagona o le mutimutivale o le alofa.” E faaliliuina i nisi taimi, “ona mutimuti vale ai lea o lona alofa,” po o le “alofa atu.”—Mareko 6:34; 8:2.
Le Taimi na Mutimutivale ai le Alofa o Iesu
14, 15. I le aai o Kalilaia, ua faapefea ona uunaia Iesu e le mutimutivale o le alofa, ma o le ā ua faataitaia mai e lenei mea?
14 O le nuu na tupu ai lea vaaiga o Kalilaia. Na faalatalata atu se tamaloa ua “liloia i le lepela” i a Iesu e aunoa ma le avatuina o se lapataiga e pei ona masani ai. (Luka 5:12) Pe na aoaia ea ma le malosi o ia e Iesu ona o le lē tuualaga atu, “Ua leaga, ua leaga,” e pei ona faatonuina ai e le Tulafono a le Atua? (Levitiko 13:45) E leai. Na i lo lea, ua faafofoga atu Iesu i le olega ma le naunautai a le tamaloa e faapea: “Afai ua e finagalo i ai, e te mafaia ona faamamā ia te au.” “Ona mutimuti vale lea o le alofa” o Iesu, ua aapa atu lona aao ma paʻi atu i le lepela ma fetalai atu faapea: “Ou te loto i ai, ina mamā ia oe.” Ona faamālōlōina ai loa lea o le tamaloa i lea lava taimi. E lē gata ina faataitaia e Iesu lona mana e faia ai vavega e mai le Atua, ae faapea foi ma le lagona alofa mutimutivale na mafua ai ona uunaia o ia e faaaogā lea mana.—Mareko 1:40-42.
15 Pe e tatau ea ona faalatalata atu i a Iesu ona faatoʻā ia faaalia mai lea o le lagona alofa mutimutivale? E leai. I se taimi mulimuli ane na ia feiloai ai ma se solo o se maliu o ō ese atu nai le aai o Naina. E mautinoa, e tele nisi maliu na silasila muamua foi i ai Iesu, ae o le maliu lenei, e tulaga ese lava lona faanoanoa. O lē ua maliu, o le tama e toatasi a le fafine ua oti lana tane. Ona ua uunaia e le “mutimuti alofa,” na faalatalata atu Iesu i le fafine ma fetalai atu: “Aua e te tagi.” Ona ia faia ai lea o se vavega ofoofogia o le toe faatuina o lana tama i le ola.—Luka 7:11-15.
16. Aisea ua mutimutivale ai le alofa o Iesu i le motu o tagata e toatele na mulimuli atu i a te ia?
16 O le lesona mataina e aʻoaʻoina mai i lena mea na tupu o taʻua i luga e faapea, pe a uunaia Iesu i le “mutimuti alofa,” ona ia faia lea o se gaoioiga mautinoa e fesoasoani atu ai. I le isi mea na tupu mulimuli ane, na silasila totoʻa Iesu i le motu o tagata e toatele na mulimuli atu pea i a te ia. Ua tala mai faapea e Mataio: “Ona mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” (Mataio 9:36) E itiiti mea na faia e le ʻau Faresaio e faamalieina ai le galala faaleagaga o tagata lautele. O mea na latou faia, o le faamamafa atu lea o avega i ē loto maulalo i le tuuina atu i ai o le tele o tulafono e lē manaomia. (Mataio 12:1, 2; 15:1-9; 23:4, 23) Na aliai mai i lumāmea la latou vaaiga i tagata lautele ina ua latou faapea ane i a i latou na faalogologo i a Iesu: “O lenei vao tagata ua le iloa le tulafono, ua fetuuina lava i latou.”—Ioane 7:49.
17. Ua faapefea ona uunaia Iesu i le mutimutivale o lona alofa i le motu o tagata e toatele, ma o le ā le taiala e oo mai i aso nei le aogā ua ia saunia?
17 I le eseesega, na uunaia Iesu ona o le ootia o lona alofa i le lailoa faaleagaga na iai le motu o tagata. Peitai na fai si toatele naua o tagata loto naunau, ma ua faigata ai ona ia vaaia taitoatasi i latou. O lea na ia fetalai atu ai i ona soo ina ia tatalo atu e auina mai se aufaigaluega e toatele. (Mataio 9:35-38) Ina ia talafeagai ai ma lena tatalo, na aauina atu ai e Iesu ona aposetolo ma le sāvali e faapea: “Ua latalata mai le malo o le lagi.” O faatonuga na faaooina atu i tuā i lena taimi ua aumaia ai se taiala aogā mo Kerisiano e oo mai lava i aso nei. E aunoa ma le masalosalo, ona o le lagona alofa mutimutivale o Iesu, ua uunaia ai o ia e faamalieina le galala faaleagaga o tagata.—Mataio 10:5-7.
18. Na faapefea ona tali atu Iesu ina ua faalavelave atu le motu o tagata i lona fia tuua na o ia, ma o le ā le lesona tatou te aʻoaʻoina mai lenei mea?
18 I se isi mea na tupu, na toe lagona ai foi e Iesu le naunau i manaoga faaleagaga o le motu o tagata e toatele. O le taimi lea ua vaivai ai o ia ma ona aposetolo ina ua maeʻa se savaliga tele mo le talaʻiga, ma na latou sailia ai se nofoaga e mapu i ai. Peitai ane, e leʻi umi ae maua mai i latou e le motu o tagata. Na i lo le toatamai o Iesu ona o le faalavelave atu i lo latou fia tuua na o i latou lava, na faamauina e Mareko e faapea, ona “mutimuti vale” ai lea o lona alofa. Ma na mafua aisea lagona ootia o Iesu? “Auā ua faapei o mamoe i latou e leai so latou leoleo.” Ona toe gaoioi foi lea o Iesu e tusa ai ma ona lagona, ua ia aʻoaʻo atu ai i le motu o tagata e faatatau i le “malo o le Atua.” Ioe, na uunaia loloto o ia ona o lo latou galala faaleagaga ma na ia faataulagaina ai le malologa na manaomia ina ia aʻoaʻoina i latou.—Mareko 6:34; Luka 9:11.
19. Na faapefea i le naunau o Iesu i le motu o tagata ona faalautele e sili atu i ō latou manaoga faaleagaga?
19 A o faamuamua e Iesu manaoga faaleagaga o tagata, ae na te leʻi faagaloina ai foi ō latou manaoga faaletino. I lena lava mea na tupu, na ia toe “faamalolo i e na fia maloloina.” (Luka 9:11) I se isi mea na tupu, na faatasi ai ma ia le motu o tagata mo se taimi umi, ma sa mamao ese mai i ō latou aiga. I lona silafia o ō latou manaoga faaletino, na fetalai atu ai Iesu i ona soo: “Ou te alofa atu i le motu o tagata, auā o le aso tolu lenei o tatou nonofo ma i latou, e leai foi ni a latou mea e ʻai. Ou te le mafai ona tuuina atu ia te i latou e ō matelāina, neʻi latou lailoa i le ala.” (Mataio 15:32) Ona faia loa lea e Iesu se mea e taofia ai puapuaga e ono tulai mai. Na ia fafagaina faavavega le faitau afe o tamaloloa, o fafine, ma tamaiti i se faigaʻai na saunia mai i pāpāfalaoa e fitu ma ni nai iʻa laiti.
20. O le ā ua tatou aʻoaʻoina mai i le mea mulimuli na tupu ua faamaumauina ina ua uunaia Iesu i le mutimutivale o lona alofa?
20 O le mea mulimuli na tupu o faamaumauina ai le uunaia o Iesu i le mutimutivale o lona alofa, o lana malaga mulimuli lea i Ierusalema. Na malaga atu o ia ma tagata e toatele i le tausamiga o le Paseka. I le ala i tafatafa ane o Ieriko, na alalaga e lē aunoa ane ai ni tagata tauaso e āisi se toalua e faapea: “Le Alii e, . . . ia e alofa mai ia te i maua.” Na taumafai le motu o tagata e vavao i a te i laua, ae na valaau atu Iesu i a te i laua ma fesili atu i ai po o le ā le mea la te mananao na te faia mo i laua. Na la augani mai, “Le Alii e, ia pupula o maua mata.” Na uunaia o ia i le “mutimuti vale . . . o le alofa,” ona paʻi atu lea o ia i ō laua mata, ona fepulafi ai lea o i laua. (Mataio 20:29-34) Maeu se lesona tāua ua tatou aʻoaʻoina mai i lenei mea! O le taimi lea toeitiiti oo atu o Iesu i le vaiaso mulimuli o lana faiva i le lalolagi. E tele galuega e ao ona faataunuuina a o leʻi oo ina mafatia i se maliu tiga i lima o sui a Satani. Peitai na te leʻi faatagaina omiga o na taimi fita e taofia ai lona faaalia o lagona loloto o le alofa mutimutivale mo manaoga faatauvaa o tagata.
Tala Faatusa ua Faamatilatila ai le Alofa Mutimutivale
21. O le ā ua faataitaia i le faamagaloina e le matai o le aitalafu telē a lana auauna?
21 O le veape Eleni splag·khniʹzo·mai, ua faaaogā i inei i mea na tutupu i le soifuaga o Iesu, ua faaaogā foi i tala faatusa e tolu a Iesu. I se tasi o tala, ua aioi atu ai le auauna i lona matai e tuu atu se taimi seʻi totogi ai lana aitalafu telē. “Ona mutimuti vale ai lea o le alofa” o lona matai ma faamagalo atu lana aitalafu. Ua faataitaia mai e lenei mea faapea, e faaalia e Ieova le tele o lona alofa mutimutivale i le faamagaloina o se aitalafu telē, o agasala a Kerisiano taitoatasi, o ē faaalia le faatuatua i le taulaga togiola a Iesu.—Mataio 18:27; 20:28.
22. O le ā ua faataitaia mai e le faataoto i le uii faamaumau mea?
22 O loo iai foi le tala i le uii faamaumau mea. Manatua le mea na tupu ina ua toe taliu atu le atalii ua taase i le aiga. “Ua iloa mamao atu foi o ia e lona tamā, ona mutimuti vale lea o lona alofa, ua momoʻe atu o ia, ua fusi ia te ia, ma sogi atu ia te ia.” (Luka 15:20) Ua faaalia i lenei mea e faapea, pe afai e faaalia e se Kerisiano ua taase le salamō faamaoni, o le a lagona e Ieova le alofa mutimutivale ma toe talia ma le agalelei lea tagata. O lea, e ala i nei tala faatusa e lua, ua faaalia mai ai e Iesu, o lo tatou Tamā o Ieova, e tele lona “alofa naunau ma alofa mutimutivale.”—Iakopo 5:11, NW, faaopoopoga i lalo.
23. O le ā le lesona tatou te aʻoaʻoina mai i le faataitaiga a Iesu i le Samaria agalelei i lē la te tuaoi?
23 O le faataitaiga lona tolu o le faaaogaina o le upu splag·khniʹzo·mai, e faatatau lea i le Samaria alofa mutimutivale, o lē na uunaia “ona o le mutimuti vale . . . o lona alofa,” i le tausia o se tagata Iutaia o lē na gaoia ana mea ma tuua ua tali oti. (Luka 10:33) I le gaoioi e tusa ai ma ia lagona, na faia ai e le tagata Samaria mea uma na te mafaia e fesoasoani atu ai i le tagata ese. Ua faataitaia ai e lenei mea e faapea, e faatalitalia e Ieova ma Iesu, Kerisiano moni ina ia mulimuli atu i le la faaaoaoga o le faaalia o le alofa faapelepele ma le alofa mutimutivale. O nisi o auala e mafai ai ona tatou faia lenei mea o le a talanoaina i le isi mataupu o sosoo mai.
Fesili mo le Autaluga
◻ O le ā le uiga o le, ia mutimutivale le alofa?
◻ Na faaalia faapefea e Ieova le alofa mutimutivale ona o lona suafa?
◻ O le ā le auala silisili ua faaalia ai le alofa mutimutivale?
◻ O le ā le auala mataina ua faaatagia mai ai e Iesu uiga totino o lona Tamā?
◻ O le ā ua tatou aʻoaʻoina i gaoioiga alofa mutimutivale a Iesu, ma faapea foi ma ana tala faatusa?
[Pusa i le itulau 12, 13]
O SE UIGA FAAATA O LE UPU “TAUSIGA ALOFA MUTIMUTIVALE”
NA AUĒ le perofeta o Ieremia e faapea: “Loʻu manava [“fifi,” NW] e, loʻu manava [“fifi”] e!” Pe na uio ea o ia ona o se maʻi i le fifi ona o se mea faaletonu na ia ʻaina? E leai. Na faaaogā e Ieremia se agana faafaatusa faa-Eperu e faamatala ai le loloto o ona popolega ona o puapuaga o le a oo mai i le malo o Iuta.—Ieremia 4:19.
Ona e iai lagona loloto o Ieova le Atua, o le upu Eperu mo le “fifi” (intestine), po o le “gaau” (bowel, me·ʽimʹ), o loo faaaogaina foi e faamatalaina ai ona lagona faapelepele. Mo se faaaoaoga, i le faitau sefulu o tausaga a o leʻi oo mai i le vaitaimi o Ieremia, na ave faatagataofaatauaina ai ituaiga e sefulu o le malo o Isaraelu e le tupu o Asuria. Na faataga e Ieova lenei mea e fai ma faasalaga ona o lo latou lē faamaoni. Ae pe na faagalo ai i latou e le Atua a o faaaunuua? E leai. Na mafana atu pea i ai lona finagalo ona o i latou o se vaega o tagata o lana feagaiga. Na fesili Ieova e faatatau i a i latou i le faaaogaina ai o le igoa o le ituaiga lauiloa o Efaraima i le faapea mai: “O le atalii pele ea Efaraima ia te au? o le tama ea ia e fiafia i ai? auā talu ina ou tautala ia te ia, ua ou matuā manatunatu pea ia te ia; o le mea lea ua tagi ai loʻu loto [“tiga ai loʻu fifi,” NW] ia te ia; ou te matuā alofa lava ia te ia, o loo fetalai mai ai Ieova.”—Ieremia 31:20.
I le faapea mai ua “tiga ai loʻu fifi” ua faaaogā ai e Ieova se faaupuga faafaatusa e faamatala ai ona lagona loloto o le alofa mo ona tagata o faaaunuua. I le faamatalaga a le tagata aʻoga o le Tusi Paia i le lona 19 o senituri o E. Henderson e uiga i lenei fuaiupu, na tusia faapea e ia: “E leai se mea e sili atu i lo lagona faaalia o le alofa mutimutivale faamātua agaʻi i se atalii faamaumau mea ua toe foi mai, lea o loo faaatagia mai i inei e Ieova. . . . E ui lava ina sa fetalai atu o ia faatatau i [tagata Efaraima ifo i tupua] ma faasala i a i latou . . . , ae na lē faagaloina lava i latou, i le isi itu, na olioli o ia i le faatalitalia o lo latou toe laveaiina sili.”
O le upu Eleni mo le “gaau,” po o le “fifi,” ua faaaogā foi i se uiga tali faapea i Tusi Paia Kerisiano Eleni. Pe a lē faaaogaina i lona faatatauga moni e pei ona faaaogā ai i le Galuega 1:18, ona faasino loa lea i lagona alofa faapelepele po o le alofa mutimutivale. (Filemoni 12) O nisi taimi e tuufaatasia ai lea upu ma le upu Eleni o lona uiga o le “lelei” po o le “malōlōina.” Na faaaogā e aposetolo o Pauro ma Peteru nei upu ua tuufaatasia ina ua faalaeiau atu i Kerisiano ina ia “mutimuti vale i le alofa,” i sona uiga moni, ua “faailoa lelei atu le alofa mutimutivale.” (1 Peteru 3:8; Efeso 4:32) O le upu Eleni mo le “gaau” e mafai foi ona soofaatasi ma le upu Eleni o le pol·yʹ. O le uiga moni o le tuufaatasiga “ia tele ni gaau.” E na o le faatasi lava ona faaaogā i le Tusi Paia lenei faaupuga faa-Eleni e seasea lava faaaogaina, ma o loo faatatau atu i a Ieova le Atua. Ua taʻua e le New World Translation lenei faaupuga e faapea: “E tele le alofa naunau ma le alofa mutimutivale o Ieova.”—Iakopo 5:11.
Maeu so tatou loto faafetai ona o Ieova le Atua, o lē e silisili ona malosi i le vateatea, ua lē pei o atua sauā ua faia e tagata e leai so latou alofa mutimutivale! Ona o le faataitai i lo latou Atua e “tele le alofa mutimutivale,” ua uunaia ai Kerisiano ina ia amioai faapea i ā latou feutagaiga o le tasi i le isi.—Efeso 5:1.
[Ata i le itulau 10]
Ina ua oo atu le alofa mutimutivale tauatua i ona mutaaga, na faatagaina e Ieova Papelonia na te faatoilaloina ōna tagata taase
[Ata i le itulau 11]
Na oo i a Ieova le matuā matuitui o le tiga e leʻi oo muamua lava i se tasi a o silasila atu i le maliu o lona Alo
[Ata i le itulau 15]
Na faaatagia mai ma le lelei atoatoa e Iesu uiga totino o le alofa mutimutivale o lona Tamā