O Fea o Iai Ē ua Maliliu?

UA FAAPEA mai se muagagana a le ituaiga o Yoruba o Aferika i Sisifo: “O le lalolagi, o se nofoaga faitele; o le lagi, o lo tatou aiga.” Ua logologoā lenei manatu i le tele o lotu. Ua faailoa mai ai le manatu e faapea, o le lalolagi, ua pei o se nofoaga faitele, e na ona tatou asiasi atu i ai mo sina taimi puupuu ma toe ō ese. Pe a oti, ona tatou ō atu lea i le lagi, o lo tatou nuu moni, e tusa ai ma lenei talitonuga.

Ua aʻoaʻo e le Tusi Paia e faapea, e iai nisi e ō i le lagi. Na faailoa atu e Iesu Keriso i ona aposetolo faamaoni e faapea: “E tele mea e nonofo ai i le maota o loʻu Tamā; . . . ou te alu e sauni se mea e nonofo ai outou? Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma aʻu; ina ia i ai outou i le mea ou te i ai aʻu.”—Ioane 14:2, 3.

E lē o le uiga o upu a Iesu e faapea, o tagata lelei uma lava e ō i le lagi, pe faapea o le lagi, o le aiga o tagata. Ua aveina nisi i le lagi, ina ia pule mai i luga o le lalolagi. Ua silafia e Ieova e faapea, e lē mafai ona taulau manuia pulega a tagata i le faafoeina o mataupu i le lalolagi. O le mea lea, na ia fuafuaina ai se pulega faalelagi, po o le Malo, lea o le a na pulea mulimuli ane le lalolagi ma faaliliuina i le Parataiso lea na ia muai fuafuaina ai. (Mataio 6:9, 10) O Iesu, o le a avea ma Tupu o le Malo o le Atua. (Tanielu 7:13, 14) E iai nisi o le a filifilia mai tagata e pule faatasi ma ia. Na valoia e le Tusi Paia e faapea, o i latou e aveina aʻe i le lagi, o le a avea ma “nuu . . . o ositaulaga foi i lo matou Atua” ma o le a “fai foi i latou ma tupu i le lalolagi.”—Faaaliga 5:10.

O Ai e Ō i le Lagi?

I le manatunatu i le tiute tauave sili o le a faia e nei tupu faalelagi, e lē o se mea e ofo ai e faapea, e tatau ona latou ausia ni manaoga faapitoa. O i latou e ō i le lagi, e tatau ona iai le poto saʻo e uiga i a Ieova, ma e tatau ona usiusitai i a te ia. (Ioane 17:3; Roma 6:17, 18) E manaomia ona latou faaalia le faatuatua i le taulaga togiola a Iesu Keriso. (Ioane 3:16) Ae peitai, e iai mea e sili atu o loo aafia ai. E tatau ona valaaulia ma filifilia i latou e le Atua e ala i lona Alo. (2 Timoteo 1:9, 10; 1 Peteru 2:9) E lē gata i lea, e tatau ona avea i latou o ni Kerisiano papatisoina o ē ua “toe fanau,” ua faauuina e le agaga paia o le Atua. (Ioane 1:12, 13; 3:3-6) E manaomia foi ona latou tausisi i le faamaoni i le Atua seia oo i le oti.—2 Timoteo 2:11-13; Faaaliga 2:10.

E lē mafaitaulia le anoanoai o tagata o ē na soifua ma ua maliliu, latou te leʻi ausia nei manaoga. E toatele sa maua sina avanoa itiiti e aʻoaʻo ai e uiga i le Atua moni. O isi, latou te leʻi faitau lava i le Tusi Paia, ma e itiiti pe leai foi so latou iloa e uiga i a Iesu Keriso. E oo lava i Kerisiano moni i le lalolagi i aso nei, e toaitiiti ua filifilia e le Atua mo le ola faalelagi.

I le iuga, o le faitau aofai o i latou o ē ō i le lagi, e matuā toaitiiti lava. Na faasino atu e Iesu i a i latou na e faapea, o le “lafu mamoe itiiti.” (Luka 12:32) Mulimuli ane, na faailoa atu ai i le aposetolo o Ioane e faapea, o i latou na “ua faatauina nai le lalolagi” e pule faatasi ma Keriso i le lagi, e na o le 144,000 lo latou faitau aofai. (Faaaliga 14:1, 3; 20:6) Pe a faatusatusa atu i le faitau piliona o tagata o ē o loo ola i le lalolagi, o le mea moni, o se fuainumera e matuā laitiiti lava lena.

I Latou e Lē Ō i le Lagi

O le ā e tupu i a i latou o ē e lē ō i le lagi? Po o iai i latou i se nofoaga e faapuapuagatia ai e faavavau, e pei ona aʻoaʻo ai e nisi lotu? O le mea moni e leai, auā o Ieova, o le Atua alofa. E lē mafai ona lafoina e ni mātua alolofa ā latou fanau i le afi, ma e lē mafai ona faapuapuagatia e Ieova tagata i se auala faapena.—1 Ioane 4:8.

O le faamoemoe mo le anoanoai o i latou ua maliliu, o le toe faatutuina lea i le parataiso faalelalolagi. Ua faapea mai le Tusi Paia, na faia e Ieova le lalolagi “ina ia āina.” (Isaia 45:18) Na faalauiloa mai e le faisalamo e faapea: “O le lagi, o le lagi lava, e ia Ieova lea; a ua tuuina mai e ia le lalolagi mo le fanau a tagata.” (Salamo 115:16) O le lalolagi, ae lē o le lagi, o le a avea ma aiga tumau o tagata.

Na valoia e Iesu e faapea: “E oo mai le aso e faalogo ai i lona leo [o Iesu, le “Atalii o le tagata”] o i latou uma ua i tuugamau, ma latou o mai ai.” (Ioane 5:27-29) Na faamautinoa mai e le aposetolo Kerisiano o Pauro e faapea: “O loo ia te au le faamoemoe i le Atua, . . . o le a toe tutū mai e ua amiotonu atoa ma e ua amioletonu.” (Galuega 24:15) I luga o lena laau faaoosala, na folafola atu ai e Iesu i le pagota ua salamō le ola e ala i se toetu i le parataiso faalelalolagi.—Luka 23:43.

O le ā la le tulaga i le taimi nei o ē ua oti o le a toe faatutuina mai i le ola i le lalolagi? O se mea na tupu i le faiva a Iesu, ua fesoasoani e taliina lenei fesili. Na maliu lana uo o Lasalo. A o leʻi maliu atu Iesu e toe faatuina o ia, na Ia taʻu atu i Ona soo: “O loo moe la tatou uo o Lasalo; a e ou te alu e fafagu ia te ia.” (Ioane 11:11) I lea, ua faatusaina ai e Iesu le oti i le moe, o se moe gase e aunoa ma le faia o ni miti.

Moe i le Oti

E iai isi mau e ogatusa ma lenei manatu faapea ua moe i le oti. E lē o aʻoaʻo mai ai e faapea, e iai se solu e lē mafai ona oti o tagata, e alu atu i le nofoaga o agaga pe a oti. Na i lo o lea, ua faapea mai le Tusi Paia: “A o e ua oti, latou te le iloa se mea; . . . O lo latou alofa foi, ma lo latou ita, ma lo latou mataua, ua mavae lava ia; . . . e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 6, 10) E lē gata i lea, na faalauiloa mai e le faisalamo e faapea, o le tagata “e foi atu i le eleele na i ai o ia; e faaumatia i lea lava aso ona manatunatu.”—Salamo 146:4.

Ua faamanino mai e nei mau e faapea, o i latou ua momoe i le oti, e lē o toe iloa pe faalogo mai i a i tatou. E lē mafai foi ona latou aumaia ni faamanuiaga po o ni mala. E lē o i le lagi i latou, po o nonofo i se nuu o tuaā ua mavae. Ua leai se ola o i a i latou, ua leai i latou.

I le taimi atofaina a le Atua, o le a toe fafagu mai ai i latou o momoe nei i le oti, ma i latou o loo i lona finagalo, i le ola i le lalolagi parataiso. O le a avea o se lalolagi ua faamamāina mai le polusione, faalavelave, ma faafitauli o loo tofo i ai tagata i le taimi nei. Maeu le olioli o lea taimi o le a iai! I lena Parataiso, o le a latou maua ai le faamoemoe o le ola e faavavau, auā ua faamautinoa mai i tatou e le Salamo 37:29 e faapea: “E fai lava le nuu [“lalolagi,” NW] mo tagata amiotonu, e nonofo ai pea i latou.”

[Pusa i le itulau 6, 7]

UA OU LAFOAIA LE TAPUAI ATU I Ē UA MALILIU

“Ina o oʻu tamaitiiti, sa ou fesoasoani i loʻu tamā i taimi e fai ai ana taulaga masani i lona tamā ua oti. I se tasi taimi, ina ua toe malosi loʻu tamā mai se maʻi faigata, na taʻu atu e se tamaloa fai vai faataulaitu e faapea, ona o le talisapaia o lona toe malosi mai i lona maʻi, e ao ai ona ia ofoina atu se taulaga i lona tamā ua maliu, e faia i se ʻoti, ufi, kola nuts, ma le ʻava malosi. Sa fautuaina foi loʻu tamā ina ia talosaga atu i ona tuaā ua maliliu ina ia tafiesea nisi maʻi ma ni mala.

“Na faatau mai e loʻu tinā mea na manaomia mo le taulaga, lea o le a faia i le tuugamau o loʻu augatamā. O le tuugamau, e i tafatafa tonu lava o lo matou fale, e tusa ai ma aganuu masani.

“Na valaaulia uo, aiga, ma tuaoi e maimoaina le taulaga. Sa ofu lelei loʻu tamā ina ia talafeagai ma le mea o le a faia, sa nofo i se nofoa e faafesagai ma le tuugamau o loo laina mai ai ulupoo o ʻoti ia sa faaaogā mo isi taulaga muamua. O laʻu galuega, o le liligi lea o le uaina mai se fagu i totonu o se tamai ipu, lea sa ou tuuina atu i loʻu tamā. Ona ia sasaa lea o le uaina i le eleele e fai ma taulaga. Na valaau faatolu loʻu tamā i le igoa o lona tamā ma tatalo atu i a te ia mo le laveaiina mai ni mala i le lumanai.

“Sa ofoina atu kola nuts, ma na fasia se ʻoti poʻa, faavela, ma aai ai i latou uma na iai. Sa ou ʻai ai foi ma siva i pese ma le tatā o tagipalau. Sa manaia ma tiotio le siva a loʻu tamā, e ui lava i ona foliga matua. Pe a faia malologa, sa ia tatalo atu i ona tuaā ina ia faamanuia i latou uma na auai, ae tali uma atu tagata Ise, e aofia ai ma aʻu, o lona uiga ‘Ia faapea lava ona faia.’ Sa ou vaavaai ma le naunau ma viiviia loʻu tamā ma moomoo mo le aso ou te matua ai ma mafai ai ona ou faia taulaga i tuaā ua maliliu.

“E ui lava i taulaga e tele na ofoina atu, ae sa tumau pea ona leai se filemu i le aiga. E ui e toatolu le fanau tama a loʻu tinā o loo ola, ae leai lava se tasi o lana fanau teine e toatolu na fananau mai i a te ia na umi se taimi na ola ai; na feoti uma lava a o laiti. Ina ua toe maʻitaga loʻu tinā, na faia ai e loʻu tamā ni taulaga taugata ina ia fanau mai le pepe ma le saogalemu.

“Na toe fanau mai e tinā se isi teine. I le lua tausaga mulimuli ane, na maʻi le pepe ma oti ai. Na faafesootai e loʻu tamā le fomaʻi faataulaitu, o lē na faapea mai, e iai se fili ua mafua ai le oti o le pepe. Na faapea mai le fomaʻi faataulaitu, ina ia mafai e le ‘solu’ o le teineitiiti ona tetee atu, sa manaomia ai se fasi fafie ua mū, se fagu ʻava malosi, ma se tamaʻi lavilavi mo le taulaga. O le fafie o loo mū, e tuu i luga o le tuugamau, o le ʻava malosi e sausau ai luga o le tuugamau, ma o le lavilavi, e tanuola i tafatafa o le tuugamau. Na faia lenei mea e fafagu ai le solu o le teine ua oti ina ia taui atu i lona oti.

“Sa ou ave le fagu o le ʻava malosi ma le fasi fafie o loo mū i le tuugamau, ae na ave e loʻu tamā le tamaʻi lavilavi lea na ia tanumia e tusa ma faatonuga a le faataulaitu. Na matou talitonu uma lava e faapea, i totonu o le fitu aso, ona faaumatia loa lea e le solu o le teine ua oti le tagata na pogai ai lona oti faafuasei. Na uma lava le lua masina, ae leai se oti na taʻua mai i nisi o tuaoi. Sa oo ina ou lē mautonu.

“I le taimi lena, sa na o le 18 oʻu tausaga. E leʻi leva lava mulimuli ane, ae ou feiloai loa i Molimau a Ieova, o ē na faailoa mai i a te aʻu mai le Tusi Paia e faapea, e lē mafai e ē ua oti ona faia se lelei po o se leaga i tagata ola. Ina ua mauaa le poto mai le Afioga a le Atua i loʻu loto, na ou taʻu atu loa i loʻu tamā, e lē toe mafai ona ou fesoasoani atu i a te ia i le faia o taulaga i ē ua oti. I le taimi muamua, sa ita o ia i a te aʻu, ma faapea mai ua ou tuulafoaiina o ia. Ae ina ua ia matauina loʻu lē manao e lafoai loʻu faatuatuaga fou, sa leʻi tetee o ia i laʻu tapuaiga i a Ieova.

“I a Aperila 18, 1948, na faatinoina ai loʻu tuuina atu e ala i loʻu papatisoga i le vai. Talu mai lena taimi, o loo faaauau pea ona ou auauna i a Ieova ma le matuā olioli ma le loto malie, i le fesoasoani atu i isi ina ia faasaolotoina mai le tapuai atu i tuaā ua maliliu, e lē toe mafai ona fesoasoani mai pe faaleagaina foi i tatou.”—Na tauofo mai e J. B. Omiegbe, i Benin City, i Nigeria.

[Ata i le itulau 7]

O le a tele le olioli pe a toe faatutuina mai ē ua maliliu i le lalolagi parataiso