Molimau a Ieova i le Lalolagi Aoao—Polani

I LE tau e afu ai mea i le 1989, na amata ai ona lepetia faiga malo faa-Komunisi mai le Baltic e oo i le Black Sea. A o soloia i lalo nei faiga na avea ma pa pupuni mai le fesootai atu i isi malo, na amata loa ona sailia e atunuu i Europa i Sasaʻe ō latou lava taiala. Na aofia ai i na atunuu, Polani, o se atunuu e tele ai nofoaga maupuepue, o fanua laugatasi, ma mauga lauleaga.a

O tagata Polani o ni tagata galulue mamafa, ma o i inā foi i Polani na tupuga mai ai tagata na taʻutaʻua i le lalolagi i le tusiata, ma tagata saienitisi. Ae sili atu i lena, o loo faatuputupulaia ai nei i inā se ʻautau tele o ē faalauiloaina le tala lelei o le Malo o le Atua.

Faaalialia Aʻoaʻoga Sese ma le Loto Tetele

I Polani e toatele i latou o ē mananao e aʻoaʻoina le upu moni mai le Tusi Paia. Ae ua faavaivaia nisi ona o ō latou auaiga po o tuaoi. Mo se faaaoaoga, i se vaipanoa i Wrocław, na taofia ai e se tasi o tamaitai fiafia lona suesueina o le Tusi Paia ma Molimau a Ieova ona o omiga mai ona aiga ma ana uo. Ae peitai, na faitauina e lana tama teine e i le va o le 13 ma le 19 tausaga le faasologa o mataupu o Le Olomatamata o loo faaalialia ai lotu sese. O i inā na faagaeeina ai lona fiafia mo le upu moni.

Ina ua mavae le ono masina talu ona ia suesueina le Tusi Paia, na iu ai le filifiliga a lenei talavou o le a aveesea uma ona sootaga mai lotu sese. Na ia alu atu loa i le faifeau o lana lotu e faailoa i ai lana faaiuga. Na fai atu le faifeau i a te ia ina ia tusi i lalo upu nei: “O aʻu o K—— P——, ua ou lafoaia le faatuatuaga Katoliko.”

I le Aso Sa na sosoo ai, na faitauina ai lenei faamatalaga i le lotu. Na matapogia le tamā o le tinā o lenei teine, ae na tagi le tinā o lona tinā. Peitai na faateia isi tagata o le aurotu ma faapea mai: “O lea, ua iu lava ina faailoa mai ma le lototele e se tasi le tele o aʻoaʻoga sese a la tatou tapuaiga.” O lenei talavou lototele ua avea nei o ia ma tuafafine papatisoina faaleagaga ma e fitu suesuega faale-Tusi Paia ua ia amataina i lona nuu.

‘E Ala i Ō Latou Fua’

Na lomia e le nusipepa faalevaiaso o le Kujawy i Pomorze le lipoti e faapea: “Tou te Iloa i Latou i Ō Latou Fua.” Na faapea mai le isi vaega o le mataupu, o tagata tapuai o Kerisinetoma “i se tulaga moni lava, latou te lē faatāuaina ma manatu mamafa i tulafono a le lotu ia na latou malilie i ai. Ua telē se eseesega o i latou ma Molimau a Ieova o ē faia mea latou te tautatala ai ma ua latou tautatala i mea ua faatonuina mai e le Tusi Paia.”

Ina ua uma ona faatusatusa le eseesega o Molimau ma ē ua na ona taʻu o Kerisiano, na faaauau mai faapea le lipoti: “Atonu e lē iloa e ē o loo faapea mai o i latou o Kerisiano i aso nei, ma e masani lava ona latou lē faatatauina upu moni aogā ma mataupu silisili a lo latou lava talitonuga. . . . Ae ua faaalia e Molimau a Ieova e ala i a latou amio le ogatusa o upu o loo latou tautatala ai ma ā latou gaoioiga, ma o se faamaoniga lea e iloa ai e lē o i latou o ni ‘perofeta pepelo,’ ae ua mafai ona mataulia i latou i ō latou fua. ‘Pe tau mai ea e tagata se fuifui vine mai le laau tuitui, po o mati mai le laau talatala?’ (Mataio 7:15-20).”

Na tusi atu se tasi o fafine i le nusipepa faalevaiaso o le Przyjaciółka, ma faamatala le tuua e lana tama tama o le Lotu Katoliko ae ua avea ma se tasi o Molimau a Ieova. O le ā na fautuaina e le tusitala o lenei nusipepa? “Afai ua auaufaatasi atu lau tama ma Molimau a Ieova, ua ia aʻoaʻoina ma talia ā latou talitonuga, e tatau ona e faaaloalogia ma aloaia lana faaiuga ua iai. . . . O lenei faapotopotoga faalelotu ua iloga i ō latou uiga matagofie ma ā latou galuega ua tosina i ai nisi, e pei o lo latou autasi o se vaega e tasi e faavae aʻe i mataupu silisili, o le tulaga sili o lo latou faamaoni ma ua savavali i tulafono faatulagaina mo le olaga o le tagata, ma le agavaa e ola e talafeagai ma le upu moni, ua faataunuuina lea mea e ala i lo latou gaoioi e tusa ai ma tulaga manaomia. O ni uiga tāua na.”

[Faaopoopoga i lalo]

[Pusa i le itulau 9]

FAAMAUMAUGA O LE GALUEGA I LE ATUNUU

Tausaga Faaleauaunaga i le 1993

TUMUTUMUGA O Ē O MOLIMAU ATU: 113,551

FAATATAUGA: 1 Molimau i le 339

Ē NA AUAI I LE FAAMANATUGA: 235,642

FAATATAUGA O PAEONIA: 7,961

FAATATAUGA O SUESUEGA FAALE-TUSI PAIA: 79,131

AOFAI O Ē NA PAPATISO: 8,164

AOFAIGA O FAAPOTOPOTOGA: 1,397

OFISA O LE LĀLĀ: Nadarzyn

[Ata i le itulau 9]

O le ofisa o le lālā i Lodz i Polani i le 1948

[Ata i le itulau 9]

O le faaaogaina o “placard” i a Iuni 1948, i le nuu sa taʻua muamua o East Prussia

[Ata i le itulau 9]

O sui e fitusefulu lua o le aiga Peteli i Polani, Ianuari 1993

[Ata i le itulau 9]

O le lālā fou i Nadarzyn