Le Teena o le Atua ma Lana Pule i Lona 20 o Senituri

“Ua talia e tagata le manatu e leai se Atua ma ua faia o latou lava olaga e tutoatasi e aunoa ma le toe manatu atu i le Atua, e tusa lava pe lelei pe leaga.”—One Hundred Years of Debate Over God—The Sources of Modern Atheism.

E UI lava e maofa ai i le taimi muamua i se laau e tupu maualuga, ae mulimuli ane, ua manatu i ai o se mea ua taatele. O lona iai ua masani lelei i ai tagata; o lona maualuga, ua lē o toe maofa ai.

E faapena le lē talitonu i le Atua. E ui sa faapogaia ai le tele o fefinauaiga i le faagasologa o lona 19 o senituri, ae i aso nei, ua lē toe avea le faafitia o le soifua o le Atua o se mea e maofa pe faateʻia ai. O se vaitaimi o le fefaapalepaleai, ua mafai ai ona taotogamālie le lē talitonu i le Atua, ma le talitonu i le Atua.

E lē faapea, ona o le toatele o tagata e teena tuusaʻo le Atua; i le tuufaafeagai ai, o iuga o se suesuega na faia i atunuu e 11 i Amerika atoa, Europa, ma Asia, ua faaalia ai i lona faatatauga, e sili laitiiti atu lava i le 2 pasene na faapea mai o ē lē talitonu i le Atua. Ae peitai, o loo taatele pea le agaga o le lē talitonu i le Atua—e oo lava i le toatele o i latou o ē talitonu o loo soifua le Atua. E mafai faapefea ona tupu o lenei mea?

Teena o le Pule a le Atua

Ua matauina mai e le Encyclopedia Americana e faapea: “I nisi taimi, o le aʻoaʻoga o le lē talitonu i le Atua, ua na ona faasino atu i le teena po o le lē amanaia o le Atua.” O le mafuaaga lenei ua aumaia ai e le New Shorter Oxford English Dictionary le faaeseesega lona lua, lea o loo mulimuli mai o le “lē talitonu i le Atua”: “O se tagata na te faafitia le Atua e tusa ai ma ana mataupu silisili; o se tagata lena e lē faaleatua.”—O upu faasisipa o ā matou.

Ioe, o le lē talitonu i le Atua, e mafai ona iu ai a lē o le faafitia o le soifua o le Atua po o lana pule, ia po o mea uma e lua. Ua faasino atu le Tusi Paia i lenei agaga lē talitonu i le Atua i le Tito 1:16: “Ua latou taʻu ane ua latou iloa le Atua, a e faafiti ia te ia i a latou galuega.”—Faatusatusa i le Salamo 14:1.

O lena tetee i le pule a le Atua, e mafai ona toe suʻe i tuā lava i le uluai ulugalii. Sa iloa lelei e Eva o loo soifua le Atua; peitai, sa manao o ia ina “ia pei o le Atua, o loo iloa le lelei ma le leaga.” O lona uiga o lena mea e faapea, sa manao o ia ina ‘ia pulea e ia o ia lava’ ma faia e ia ana lava tulafono i le mea e lelei ma le mea e leaga i a te ia lava. Na aufaatasi atu i ai mulimuli ane Atamu i a Eva i lenei teena o le pule a le Atua.—Kenese 3:5, 6, NW.

Po o taatele ea lea uiga i aso nei? Ioe. O loo faaalia foi le faafitia o le Atua i se auala faatogafiti i le matuā mananao e fia tutoatasi. Ua matauina e le tusi, One Hundred Years of Debate Over God—The Sources of Modern Atheism e faapea: “O tagata i aso nei, ua fiu e ola i lalo o le vaavaaiga a le Atua. Ua . . . latou filifili e ola saoloto.” Ua lafoaia tulafono tauamio a le Tusi Paia e faapea e lē aogā, e lē moni. O mafaufauga o le toatele o tagata, ua pei lava o mafaufauga o le Farao o Aikupito o lē na faalauiloa mai ma lona matuā teena, e faapea: “O ai ea Ieova ou te faalogo ai i lana upu, . . . ? Ou te lei iloa Ieova.” Na ia teena le pule a Ieova.—Esoto 5:2.

Teena e Kerisinetoma le Atua

O le tetee e aupito sili ona faateʻia ai i le pule a le Atua, e sau lea mai taʻitaʻi lotu o Kerisinetoma, o ē ua latou suia upu moni āuliuli o le Tusi Paia i uputuu a tagata. (Faatusatusa i le Mataio 15:9.) E faaopoopo i ai, ua latou lagolagoina taua aupito sili ona faamasaatoto o lenei 20 senituri, i lea, ua faaalia ai le teena o le poloaiga faale-Tusi Paia, ina ia faaalia le alofa moni.—Ioane 13:35.

Ua teena foi e taʻitaʻi lotu le Atua e ala i lo latou fulitua i ana tapulaa tauamio—mo se faaaoaoga, ua faaalia lea e ala i le faasolo mai pea o moliaga faasaga i faifeau o ē o faaleagaina tamaiti i feusuaiga. O le tulaga o Kerisinetoma, ua tutusa lava ma le tulaga o Isaraelu ma Iuta anamua. Na taʻu atu i a Esekielu e faapea: “Ua tumu le nuu i le toto, ua tumu le aai i le amio faapiopio; auā ua faapea i latou, Ua lafoai e Ieova le lalolagi; ua le silafia lava e Ieova.” (Esekielu 9:9; faatusatusa i le Isaia 29:15.) E lē o se mea e ofo ai ona ua lafoaia atoatoa e le toatele lotu a Kerisinetoma! Ae pe tatau ai ea ona latou lafoaia le talitonu i le Atua?

Po o ni Mafuaaga Tatau ia e Lē Talitonu ai i le Atua?

Pe latou te iloa le pepelo o lotu pe leai, ua lē mafai e le toatele o tagata e lē talitonu i le Atua ona toe faafesootaia le talitonu i le Atua ma mafatiaga o le lalolagi. Na faapea mai i se tasi taimi le tamaitai o Simone Beauvoir: “Sa faigofie i a te aʻu ona mafaufau i se lalolagi e aunoa ma sē na foafoaina, na i lo o le mafaufau i sē na foafoaina ua faafaupuʻe atu i ai feteenaiga uma o le lalolagi.”

Po ua faamaonia i tulaga lē faamasinotonu o le lalolagi—e aofia ai ma gaoioiga na uunaia e lotu pepelo—e faapea e leai se Atua? Seʻi manatunatu i lenei mea: Afai e faaaogā se naifi e faamataʻu pe faamanualia ma oo lava ina fasiotia ai se tagata e lē sala, pe faamaonia ai i lea e leai sē tasi na faia le naifi? Pe e lē faaalia ai ea i lea mea, o le naifi na faaaogaseseina? E faapena foi i le tele o mafatiaga o tagata, ona faamaonia ai le faaaogaseseina e tagata o ō latou tomai na tuuina atu e le Atua, faapea foi ma le lalolagi lava ia.

Ae peitai, ua lagona e nisi e faapea, o se mea lē saʻo le talitonu i le Atua, talu ai e lē o mafai ona tatou vaaia o ia. Ae faapefea le ea, alaleo, ma manogi? E lē mafai ona tatou vaaia se tasi o na mea, peitai, tatou te iloa o loo iai. O ō tatou māmā, taliga, ma isu, ua faailoa maia ia mea i a i tatou. E mautinoa lava la, tatou te talitonu i mea tatou te lē o vaaia pe a iai ni faamaoniga.

Ina ua uma ona vaavaai ma mafaufau i faamaoniga faaletino—e aofia ai ave faaeletise, protons, atoma, amino acids, ma le faiʻai lavelave—na faagaeetia ai se saienitisi suesue tau i malosiaga, o Irving William Knobloch e faapea mai: “Ou te talitonu i le Atua, auā o Lona Soifuaga Tauatua, ua na o lea le faamalamalamaga saʻo i a te aʻu o mea e pei ona iai.” (Faatusatusa i le Salamo 104:24.) Ua faapena foi ona taʻua e se tagata suesue tau i le ola o meaola o Marlin Books Kreider e faapea: “I le avea o se tagata maulalo, faapea foi i le avea o se tagata e tuutoina lona ola i suesuega ma sailiiliga faasaienitisi, ua matuā leai lava ma soʻu masalosalo e uiga i le soifua o le Atua.”

E lē na o i latou nei ni tagata e talitonu i le soifua o le Atua. E tusa ai ma le faamatalaga a polofesa Henry Margenau i suesuega tau i le ola ma tulafono masani ma malosiaga e faapea, “A e vaavaai i saienitisi sili ona popoto, e toaitiiti lava i latou e lē talitonu i le Atua.” E lē o le agaigai i luma o le faasaienisi po o le lē taulau o lotu, e tatau ai ona faamalosia i tatou e lafoaia le talitonu i Lē na Foafoaina Mea. Seʻi ō tatou iloiloina le pogai.

Le Eseesega o le Lotu Moni

I le 1803, na tusia ai e le peresitene o le Iunaite Setete o Thomas Jefferson e faapea: “O aʻu, ou te matuā tetee i faiga iuvale a le Faa-Kerisiano; ae ou te lē tetee i aʻoaʻoga moni a Iesu lava ia.” Ioe, e iai se eseesega i le va o Kerisinetoma ma le Faa-Kerisiano. O le tele o aʻoaʻoga a Kerisinetoma e faavae i uputuu a tagata. I se faaeseesega, o le Faa-Kerisiano moni, e faavae ona talitonuga i le na o le Tusi Paia. I lea, na tusi atu ai Pauro i tagata Kolose o le uluai senituri e tatau ona latou maua le “poto saʻo,” “atamai,” ma le “mafaufau faaleagaga.”—Kolose 1:9, 10, NW.

O le mea lenei e ao ona tatou faatalitalia mai Kerisiano moni, auā na poloai Iesu i ona soo: “E fai nuu uma lava ma soo, ma papatiso atu ia te i latou . . . , ia outou aʻoaʻo atu ia te i latou ia tausi i mea uma ua ou fai atu ai ia te outou.”—Mataio 28:19, 20.

I aso nei, ua faataunuuina ai e Molimau a Ieova lenei poloaiga i atunuu e 231 i le lalolagi aoao. Ua latou faaliliuina le Tusi Paia i gagana e 12 ma lomia e sili atu i le 74,000,000 kopi. E lē gata i lea, e ala i se polokalama o le faia o suesuega faale-Tusi Paia i aiga, o loo latou fesoasoani atu ai i le taimi nei i tagata e 4,500,000 ina ia ‘tausi i mea uma na poloaiina e Iesu.’

O lenei polokalama faaleaʻoaʻoga ua matuā sili mamao atu ona maua ai ni iuga aogā. Ua aumaia ai le faamalamalamaina moni, auā o loo faavae i le atamai o le Atua, ae lē o manatu o tagata. (Faataoto 4:18) E lē gata i lea, o loo fesoasoani ai foi i tagata mai atunuu uma ma lanu e faia se mea e lē mafai e le “Faamalamalamaina” faaletagata ona faataunuuina—o le faaofuina lea i se “tagata fou” e mafai ai ona latou atiina aʻe le alofa moni o le tasi i le isi.—Kolose 3:9, 10.

Ua manumalo le lotu moni i lo tatou 20 senituri. Na te lē o faafitia le Atua—i lona soifua pea po o lana pule. Ua matou valaaulia oe ina ia e tagaʻi lava oe i ai, e ala i lou asiasi atu i Molimau a Ieova i se tasi o ō latou Maota o le Malo.

[Pusa i le itulau 6]

FAAMALOSIA MAFUAAGA O LE LĒ TALITONU I LE ATUA

I le taurotoaiga o lona 18 o senituri, na tofia ai se aʻoaʻo o le faafilosofia o Denis Diderot e faaliliuina se vaega e tasi o le lomifefiloi mai le faa-Peretania i le faa-Falani. Ae peitai, e sili atu mea na ia faia na i lo o mea na faatalitalia e lona pule. E tusa ma le tolu sefulu tausaga na faaalu e Diderot e tuufaatasia ai lana Encyclopédie, o se tusi e 28 ona vaega na taaina ai talitonuga i lena vaitaimi.

E ui lava sa iai i le Encyclopédie le tele o faamatalaga aogā, ae sa faamamafaina ai le atamai faaletagata. E tusa ai ma le faamatalaga a se faaputuga tusi na faaulutalaina o le Great Ages of Man, sa “taumafai ai e talaʻi le talitonuga faavae faafilosofia e ese mai ai e faapea, e mafai e le tagata ona faaleleia auala o lona olaga pe afai na te suia le faatuatua i le atamai o le mafaufau e avea ma mataupu silisili e taitaiina ai.” Na matuā lē toe taʻua lava le Atua. Fai mai le tusi The Modern Heritage, “E ala i le filifilia o ā latou mataupu e talanoaina, na faamanino mai ai e faatonu e faapea, o le lotu, o se tasi lea o mea e lē manaomia ona iloa e tagata.” E lelētioa ona taumafai le lotu e faatamaia le Encyclopédie. Na faitioina e le loia sili le tusi e faapea, o se taumafaiga e faaumatia faiga faapolotiki, amioga tatau, ma lotu.

E ui lava i taumafaiga a ona fili, ae e toʻa 4,000 tagata na talosagaina le Encyclopédie a Diderot—o se fuainumera mataina, pe a faatusatusa atu i le matuā taugata o le tusi. O le mea mautinoa e leʻi umi se taimi, ae na matuā olaola ai taumafaiga lilo a lenei tagata lē talitonu i le Atua i le teena o le Atua.