Aisea o le Taimi Lenei e Filifili Ai?

I LONA 16 o senituri T.L.M., na filifilia ai e le Atua mo Ia le nuu o Isaraelu, e avea ma “oloa tāua . . . e sili i nuu uma, . . . ma nuu paia.” (Esoto 19:5, 6) E leʻi pine lava ae leiloa lo latou paia, lo latou mamā āuliuli faalelotu, i le faatagaina o i latou e faaleagaina i ifoga i tupua ma faiga lē faamaoni a nuu na siomia i latou. O lea, na latou faaalia ai i latou “o le nuu e maaa lava ua.” (Teuteronome 9:6, 13; 10:16; 1 Korinito 10:7-11) I se vaitaimi e sili atu i le tolu selau tausaga ina ua mavae le maliu o Iosua, na faatutuina ai e Ieova faamasino, o ni taimua faamaoni o ē sa tatau ona latou toe taʻitaʻiina atu le nuu o Isaraelu i le tapuaiga moni. Ae peitai, o le nuu, “ua latou le tuua a latou amio ma lo latou faalogogatā.”—Faamasino 2:17-19.

Ina ua mavae lena mea, na faatuina ai e le Atua ni tupu faamaoni ma perofeta e taaina le nuu ina ia toe foi i le tapuaiga moni. Sa faalototeleina e le perofeta o Asaraia le tupu o Asa ma ona tagatānuu ina ia saili atu i a Ieova: “Afai tou te sailiili ia te ia, tou te maua o ia; a e afai e tuua o ia e outou, e tuua outou e ia.” Sa faavaeina e Asa le toefuataiina o lotu i le malo o Iuta. (2 Nofoaiga a Tupu 15:1-16) I le iuga, sa toe faafou ai e le Atua le valaau e ala i lana perofeta o Ioelu. (Ioelu 2:12, 13) Mulimuli ane foi, na apoapoai atu ai le perofeta o Sefanaia i tagata o Iuta ina ia “saili ia Ieova.” Sa faia foi faapena e le tupu talavou o Iosia i se tauiviga e toefuataiina e ala i le faaumatia o ifoga i tupua ma faiga lē faamaoni.—Sefanaia 2:3; 2 Nofoaiga a Tupu 34:3-7.

E ui lava i nā faasologa o salamō na faaalia, ae sa oo ina sili atu ona faigata le tulaga faalelotu o tagata. (Ieremia 2:13; 44:4, 5) Sa taʻusalaina e Ieremia faiga faalotu na faaleagaina i ifoga i tupua, i le faamatalaina e faapea, e lē mafai ona toefuataiina: “E mafai ea ona liua e le Aitiope o lona paʻu, pe liua e le nameri ona ila? A mafai lea, ona mafai foi lea ona amio lelei o outou ua masani i amio leaga.” (Ieremia 13:23) O le mafuaaga lenei, na matuā faamamafa ai e le Atua le faasalaga o le malo o Iuta. Na faaumatia Ierusalema ma lona malumalu i le 607 T.L.M., ma na ave ai faatagata o taua i Papelonia ē na sao, ma latou nonofo ai i inā mo le 70 tausaga.

Ina ua mavae lena vaitaimi, na faaalia ai e le Atua lona alofa mutimutivale. Sa ia faagaeetia le tupu o Kuresa e faasaoloto le nuu o Isaraelu, o se vaega totoe o ē na toe foi atu i Ierusalema e toe fausia le malumalu. Na i lo o le aʻoaʻoina o se lesona mai na mea uma, na latou toe liliu ese foi mai le tapuaiga moni, ma faapogaia ai ona toe faafouina e Ieova le Atua lana valaau: “Foi mai ia ia te aʻu, ona ou foi atu lea ia te outou.”—Malaki 3:7.

Le Pogai na Teena ai Isaraelu

O le ā le tulaga faalelotu o tagata Isaraelu i le taimi o Iesu? O taʻitaʻi lotu pepelo, sa o ni “tauaso i latou e taʻitaʻi i ē ua tauaso” na latou aʻoaʻo “e fai ma mataupu silisili poloaiga a tagata.” ‘Na latou solia poloaiga a le Atua i ā latou uputuu.’ O tagata, sa vivii i le Atua “i o latou laugutu,” ae o ō latou loto, sa mamao ese lava mai i a te ia. (Mataio 15:3, 4, 8, 9, 14, NW) Pe sa avea i latou o se nuu e mafai ona maua se isi avanoa e salamō ai? E leai. Na fetalai Iesu: “E aveesea le malo o le Atua ia te outou, a e tuuina atu i se nuu e au mai ai ona fua.” Na ia fetalai atili e faapea: “Ua tuua lo outou fale,” le malumalu i Ierusalema, “e faatafunaina.” (Mataio 21:43; 23:38) Na matuā tele lava lo latou sese. Na latou teena Iesu, o le Mesia ma fasiotia o ia, ae filifilia le Kaisara Roma faasauā e avea ma ō latou tupu.—Mataio 27:25; Ioane 19:15.

E leʻi mananao le nuu o Isaraelu e malamalama e faapea, o le vaitaimi lea na faia ai e Iesu lana faiva, o le taimi lea o le faamasinoga. Na fetalai atu ai Iesu i tagata lē faamaoni o Ierusalema e faapea: “Ua le iloa e oe ona po ua asia mai ai oe.”—Luka 19:44.

I le Penetekoso 33 T.A., na faavaeina ai e le Atua se nuu fou, po o ni tagata, o soo faauuina e le agaga o lona Alo, o Iesu Keriso, o ē ua filifilia mai atunuu ma ituaiga uma o tagata. (Galuega 10:34, 35; 15:14) Pe sa iai se faamoemoe e faapea o le a iu ina toefuataiina le faiga faalotu Iutaia? Na saunia e autau a Roma le tali i le 70 T.A., i le olopalaina o Ierusalema i le eleele. Na matuā teena atoatoa e le Atua lena faiga faalotu.—Luka 21:5, 6.

Le Aposetasi Sili a Kerisinetoma

Na faia aʻe foi i Kerisiano faauuina e le agaga “le nuu paia, o se nuu faapitoa.” (1 Peteru 2:9, NW; Kalatia 6:16) Ae e oo lava i le uluai faapotopotoga Kerisiano, sa leʻi tumau ona taofia lona tulaga mamā faalelotu mo se taimi umi.

Na valoia e le Tusi Paia se aposetasi sili, po o le paʻū ese mai le faatuatuaga moni. O titania faafaatusa o le faataoto a Iesu, o Kerisiano pepelo, o ē o le a taumafai e titina le saito faafaatusa, po o Kerisiano moni, i latou ia ua faauuina e le agaga o le Atua. Ua faaalia i le faataoto e faapea, na amata ona salalau atu le Faa-Kerisiano pepelo, lea ua faapogaia e le fili sili o le Atua, le Tiapolo, ina “ua momoe tagata.” Na tupu lenei mea ina ua maliliu le au aposetolo faamaoni o Keriso, i se vaitaimi e foliga na momoe ai faaleagaga. (Mataio 13:24-30, 36-43; 2 Tesalonia 2:6-8) E pei lava ona valoia e aposetolo, e toatele Kerisiano pepelo na ō atu faaleiloga i totonu o le lotoā. (Galuega 20:29, 30; 1 Timoteo 4:1-3; 2 Timoteo 2:16-18; 2 Peteru 2:1-3) O Ioane, o le aposetolo mulimuli lea na maliu. Pe tusa o le tausaga e 98 T.A., na ia tusia ai e faapea, “o ona aso nei e gata ai,” na amata ai le vaega faaiu o le vaitaimi o aposetolo.—1 Ioane 2:18, 19.

Ona o le auaufaatasi o lotu ma mālō malolosi faapolotiki lea na faamaonia e le emeperoa Roma o Konesetatino, na matuā faateleina ai le leaga o le tulaga faaleagaga, tulaga tau aʻoaʻoga faalelotu, ma tulaga tau amio a Kerisinetoma. E toatele tusitala o le talafaasolopito e ioe e faapea, “o le manumalo o le Lotu i le vaitaimi o lona fa o senituri, sa o se mala,” e tusa ai ma le manatu o Kerisiano. ‘Ua lē maua e Kerisinetoma lona tulaga maualuga tau amio,’ ma ua talia le tele o faiga ma faafilosofia mai faiga faapaupau, e pei “o le tapuaiga i a Maria” ma le viiviia o “tagata paia,” faapea ma le aʻoaʻoga i le Tolutasi.

Ina ua mavae lona manumalo pepelo, na faasolosolo ai ina faavaivaia le tulaga o Kerisinetoma. O poloaiga ma aʻoaʻoga eseese a pope ma komiti, e faaopoopo i ai ma le Faamasinoga Faalotu, Taua o Eleele Paia, ma taua “paia” sa faia i le va o tagata Katoliko ma Porotesano, na tulai mai ai se faiga faalotu ua lē mafai ona toefuataiina.

I lana tusi, A World Lit Only by Fire, na tusia ai e William Manchester e faapea: “O pope o lona 15 ma lona 16 o senituri, sa ola i olaga e pei o emeperoa o Roma. Sa avea i latou o ni tagata e aupito sili ona mauoa i le lalolagi, ma sa atili faatamaoaigaina i latou ma ā latou katinale e ala i lo latou faatauina atu o tofiga paia.” I le taimi o le aposetasi sili, sa taumafai ai ni nai vaega toaitiiti po o tagata taitoatasi e saili ina ia toe maua le Faa-Kerisiano moni, i le faaalia o uiga o le saito faafaatusa. Sa masani lava ona matuā sauāina ai i latou. Ua faapea mai lea lava tusi: “I nisi taimi, sa foliga mai ai, o tagata paia moni o le Faa-Kerisiano, Porotesano faapena ma Katoliko, na avea o ni maturo e pei ua valiina i se vali uliuli e ala i le susunuina o i latou i le afi.” O isi tagata o le lotu Toefuataiina e pei o Martin Luther ma John Calvin, sa mafai ona latou faia ni faiga tumau faalelotu na vavae ese mai i le Lotu Katoliko, ae sa tumau pea ona talitonu i latou i ana aʻoaʻoga faavae. Sa matuā aafia foi i latou i mataupu faapolotiki.

I le tulaga o le lotu Porotesano, na faia ai ni taumafaiga ina ia faaolaolaina le lotu. Mo se faaaʻoaʻoga, i le vaitaimi o lona 18 ma lona 19 o senituri, o nei taumafaiga na iu ai i se gaoioiga filigā o le aauina atu o misionare i atunuu ese. Ae peitai, e tusa ai ma faamatalaga a leoleo mamoe lava i latou e faapea, i aso nei, ua matuā leai lava se faamalosiau o maua mai i le tulaga faaleagaga o le lafu mamoe a Porotesano. Na ioeina e le aʻoaʻo Porotesano o Oscar Cullmann talu ai nei e faapea, “i totonu o lotu lava ia, ua iai se tulaga malaia tau i le faatuatuaga.”

O le Toefuataiina ma isi gaoioiga tetee i le toefuataiina, na faia foi i totonu o le Lotu Katoliko. Mai lona 11 e oo i lona 13 o senituri, a o feagai ma le salalau atu o faiga lē faamaoni ma le matuā faateleina o le tamaoaiga o taʻitaʻi lotu, na faavaeina ai pulega faamonaseri na sa mulimulitui i le tautoga o se olaga mativa. Ae peitai, sa mataituina ma le faaeteete i latou, ma e tusa ma le faamatalaga a tagata popoto e faapea, sa faaleaogaina e le vaega pule o taʻitaʻi lotu. Ona sosoo mai lea ma le Gaoioiga Tetee i le Toefuataiina o lona 16 o senituri, na faavaeina e le Council of Trent ma sa tele lava ina faatonutonuina e tetee atu i le Toefuataiina a le lotu Porotesano.

I le ʻafa muamua o lona 19 o senituri, i le vaitaimi o le toe faafoisia o tofiga faalelotu, na faia ai e le Lotu Katoliko se pulega ma faatumauina ai tulaga masani. E lē mafai la ona faapea atu, sa faia ni toefuataiina moni e toe faafoisia ai le Faa-Kerisiano moni. Na i lo o lea, o nei mea uma, ua na o ni taumafaiga ina ia faamautuina ai le pule a taʻitaʻi lotu i le feagai ai ma suiga faalotu, faapolotiki, ma le vafealoai i le lalolagi.

Talu ai nei, i vaitausaga o le 1960, na foliga mai sa manao le Lotu Katoliko e faia se suiga mataʻina i le komiti aoao o lotu i le Vatikana II. Ae peitai, na vave ona taofia le toe faafouina o le leleiga lea na faatulai mai e le pope sa iai i lena vaitaimi, ina ia taofia sui o le lotu na iai le agaga fia agaigai i luma. O lenei vala, lea ua taʻua e nisi, o le toe faafoisia na faia e Wojtyła, na faamatalaina e se tasi vaega Katoliko e faapea, “o se faiga fou faa-Konesetatino.” E pei ona taʻua patino mai i se mekasini a Jesuit, La Civiltà Cattolica e faapea, ua fesagai le Lotu Katoliko ma se “mala autū ma faalekelope: ua faapea atu o se mala autū, ona ua aafia ai le autū po o le faavae o le faatuatuaga ma le olaga faa-Kerisiano; o le faalekelope, ona ua aafia ai vala uma o le Faa-Kerisiano.”

E leʻi faia moni e lotu a Kerisinetoma se toefuataiina, ma e lē mafai foi ona latou faia o lenei mea, talu ai, e na o le pau lava le taimi e toe faafoisia ai le Faa-Kerisiano moni, o le taimi lea o le “seleselega,” i le aoaoina mai o le saito faafaatusa i le faapotopotoga mamā e tasi. (Mataio 13:30, 39) O se faasologa umi o solitulafono ma faiga sese ua leva ona faia i le pule a le lotu, pe sa faapea mai o ni Kerisiano pe leai, ua mapuna aʻe ai se fesili e faapea, Po o se mea moni le faatalitalia o se toefuataiina moni mai Kerisinetoma?

Pe e Mafai ona Toefuataiina?

O loo tautala le tusi o Faaaliga e uiga i se fafine talitane sili o loo faaigoaina i se igoa lilo, o “Papelonia le Aai Tele.” (Faaaliga 17:1, 5) Mo le tele o senituri, ua saili ai le aufaitau o le Tusi Paia mo se faamalamalamaga o lenei faatusa lilo. E toatele sa inoino ona o le tamaoaiga ma le lē faamaoni o taʻitaʻi lotu. Na manatu nisi e faapea o Papelonia le Aai Tele ua fai ma sui o le pulega maualuga aoao faalotu. I a i latou na, sa iai Jan Hus, o se patele Katoliko mai Bohemia, na susunu olaina i le tausaga e 1415, ma Aonio Paleario, o se tagata suesue i olaga o tagata i Italia, na sisiina ma susunu i le 1570. Na taumafai i laua uma ina ia toefuataiina le Lotu Katoliko ma le faamoemoe o le a toe foi i “lona mamalu i le amataga.”

Pe a faatusatusa atu i le mataupu e 17 ma le 18 o le Faaaliga ua faaalia ai o Papelonia le Aai Tele ua fai ma sui o le emepaea o lotu sese uma i le lalolagi.a O le “fafine talitane sili” tuufaatasi, ua lē mafai ona toefuataiina “auā ua paʻi atu ana agasala i le lagi.” O le mea moni, i lenei 20 senituri, o lotu uma lava, e lē na o lotu o Kerisinetoma, e iai so latou sao i taua o loo faamasaaina ai le tele o le toto, ma le matuā paʻū maulalo o amioga ua mafatia ai tagata. O le iuga, ua poloaiina e le Atua le faaumatiaga o “Papelonia.”—Faaaliga 18:5, 8.

O le Taimi Lenei e ‘O Ese ai i a te Ia’

O faataunuuga o valoaga o le Tusi Paia, ua faaalia ai, o ō tatou aso ua talafeagai lelei ma “le faaiuga” o lenei “faiga o mea” leaga. (Mataio 24:3, NW) So o se tasi la e manao moni e tapuai i le Atua, e lē mafai ona mulimuli i ona lava manatu ma mea e manao i ai. E tatau ona ia ‘saili mo Ieova a o mafai ona maua o ia,’ ioe, i le taimi lava lenei, auā ua lata tele mai le “puapuaga tele” lea na valoia e Iesu. (Isaia 55:6; Mataio 24:21) E pei lava ona faamaonia i le tulaga o tagata Isaraelu, o le a lē faapalepale lava le Atua i se lotu e lē faamaoni ona o le gugutu i le leva ona iai. Na i lo o le tauivi e toe faafou se vaa o le a goto, e tatau i a i latou uma lava o faanaunau e maua le faamaoniga a le Atua ma le faaolataga, ona usiusitai e aunoa ma le faatuai i le poloaiga faagaeeina i le Faaaliga 18:4 e faapea: “Loʻu nuu e, ia outou o ese ia [Papelonia le Aai Tele], ina neʻi faatasia outou i ana agasala, ina neʻi tofusia foi outou i ona mala.”

Ae, e “o ese” e ō i fea? O fea se isi mea e maua ai le faaolataga? Pe e lē o se mea matautia ea le sailia o se lafitaga i se nofoaga sese? E mafai faapefea ona iloa le tapuaiga e tasi ua faamaonia e le Atua? E na o le Afioga lava a le Atua e mafai ona maua ai tali maufaatuatuaina. (2 Timoteo 3:16, 17) Ua valaaulia oe e Molimau a Ieova ina ia suesueina totoʻa le Tusi Paia. O le a mafai ona e malamalama ai po o ai i latou ua filifilia e le Atua e avea “o se nuu mo lona suafa,” o ē o le a ia puipuia a o faaloloʻi mai le aso o lona maʻemaʻeā.—Galuega 15:14; Sefanaia 2:3; Faaaliga 16:14-16.

[Faaopoopoga i lalo]

[Ata i le itulau 7]

Afai ua magoto lou vaa faalelotu, ia liliu atu i le vaa faaola o le Faa-Kerisiano moni