Po ua Uma ona Tuupoina e le Atua Lo Tatou Iuga?

“E MATUĀ tele lava faafitauli fatufua e mafai ona alofia, pe ana lē faaaogaina lava le faaupuga lea e masani ona lē malamalama i ai tagata, o le iuga tuupoina.” Atonu o loo e tau mānatu po o le ā le uiga o lea faaupuga, pe afai na e faaaogaina le upu “iuga tuupoina” pe na e faalogo foi i ai o faaaogā.

E tusa ai ma le faamatalaga a le lomifefiloi faa-Falani a le Katoliko, le Théo e faapea, e sili ona lelei mo i tatou le aua le faaaogaina le upu “iuga tuupoina.” Ua taʻua e se tasi tusi e faapea: “I aso nei, e foliga mai, ua lē o toe avea le upu, iuga tuupoina, ma autū o felafolafoaiga faalelotu, e oo lava i le toatele o tagata Porotesano.”

Ae peitai, o le fesili e uiga i iuga tuupoina, na faavevesia ai mafaufauga o le toatele o tagata i le faagasologa o le talafaasolopito. Sa avea le aʻoaʻoga i iuga tuupoina ma autū o fefinauaiga lea na māfua ai ona faavaeina le Lotu Toefuataiina, ma e oo lava i le Lotu Katoliko, sa avea lea ma mataupu o fefinauaiga ma le feitagai mo le tele o senituri. E ui lava la ua faaitiitia le fefinauai i le taimi nei, ae o loo avea pea ma faafitauli. O ai se tasi e lē manao e fia iloa pe na muai tuupoina lona iuga?

Iuga Tuupoina—Le Uiga o le Upu

O le ā le uiga o le upu “iuga tuupoina” i lotu? Ua manatu le Dictionnaire de théologie catholique i le upu e faapea, “o le finagalo o le Atua, ia avatu le ola e faavavau i nisi o tagata, o ē ua uma ona tofia muamua i ō latou igoa.” E masani ona manatu e faapea, o ē ua filifilia, “tofia muamua i ō latou igoa,” o i latou na o loo faasino atu i ai le aposetolo o Paulo i lana tusi i Kerisiano i Roma, i upu nei: “E galue le Atua mo le lelei faatasi ma i latou o ē alolofa atu i a te ia, o ē ua valaauina e tusa ai ma lana fuafuaga. Auā o ē na silafia e ia anamua, na ia tuupoina foi i latou anamua ia foliga i lona Alo . . . Ma o i latou na ia tuupoina anamua, na ia valaauina; o ē na ia valaauina, ua ia tauamiotonuina foi; o ē ua ia tauamiotonuina, ua ia faamanuiaina foi i latou.”—Roma 8:28-30, Revised Standard Version.

E oo lava i le taimi a o leʻi fananau mai, e iai nisi tagata e faapea na tofia e le Atua ma le fuafuaga ia tofusia faatasi i le mamalu o Keriso i le lagi. O lenei manatu na lāgā ai se fesili ua loa tausaga o fefinauai ai e faapea: Pe na filifilia e le Atua i Lona lava finagalo i latou o ē e finagalo o ia ina ia faaolaina, pe e iai se filifiliga saoloto ma se vaega a le tagata e faia ina ia maua ai ma tumau ai i le finagalo malie o le Atua?

Aokusotino, le Faavae o le Aʻoaʻoga o le Iuga Tuupoina

E ui lava na tusia talu ai nei e nisi Faatamā o le Lotu e uiga i iuga tuupoina, ae ua manatu pea le lautele i a Aokusotino e faapea o ia lava le faavae o lea aʻoaʻoga a le Lotu Katoliko ma le Lotu Porotesano. E tusa ma le manatu o Aokusotino e faapea, o ē amiotonu, ua leva lava ona tuupoina e le Atua latou te maua faamanuiaga e faavavau. I le isi itu, o ē amioletonu, e ui lava e leʻi tuupoina e le Atua e tusa ai ma le uiga patino o le upu, o i latou na ua tatau i ai le faasalaga mo ā latou agasala, o le faaumatiaga. O le faamalamalamaga a Aokusotino, e itiiti lava se avanoa mo se filifiliga saoloto na maua mai ai, ae ua tatalaina ai le avanoa mo le tele o fefinauaiga.

Suli o Aokusotino

O le felafolafoaiga e faatatau i iuga tuupoina ma le filifiliga saoloto, sa masani ona aliaʻe pea i le vaitaimi o Tausaga Ogatotonu, ma na oo ina manaomia ai ona faia se gaoioiga i le taimi o le Toefuataiina. Sa talitonu Luteru i le iuga tuupoina o tagata taitoatasi e faapea, o le filifiliga saoloto lea a le Atua, e aunoa ma lona muai silafia o aogā i le lumanai po o galuega lelei a ē ua filifilia. Sa faia e Calvin se faaiuga sa sili ona ese e faavae i ōna lava manatu e uiga i ni iuga tuupoina se lua: O nisi ua tuupoina mo le ola e faavavau, a o isi, ua tuupoina mo le faaumatiaga e faavavau. Ae peitai, sa manatu foi Calvin i le filifiliga a le Atua e faapea e faavae i ōna lava manatu, ma e faigata ona malamalama i ai.

O le mataupu e uiga i iuga tuupoina ma le fesili ua fesiligia ai le “alofa tunoa”—o se upu ua faaaogā e lotu e faailoa ai le gaoioiga lea na faia e le Atua e faaolaina ma tauamiotonuina ai tagata—sa oo ina matuā faateteleina, o lea i le 1611, na faasaina ai i le pule a le Pope, ona faasalalauina so o se mea e uiga i le mataupu i iuga tuupoina e aunoa ma lana ioega. I totonu o le Lotu Katoliko, sa lagolagoina malosi ai aʻoaʻoga a Aokusotino e se vaega Falani na taʻua o Jansenists o lona 17 ma lona 18 senituri. Sa latou lagolagoina se ituaiga o Faa-Kerisiano e matuā faasāsā ma e filifilia na o tagata faapitoa, ma na oo ina faia ai ni ō latou soo mai nisi o vaega o tagata maualuluga. Peitai, sa leʻi faaitiitia ai le finauga i le mataupu. Na poloaiina ai e le tupu o Leo XIV le faaumatiaina o le falesa o Port-Royal, le nofoaga faavae o mafaufauga o Jansen.

I lotu Toefuataiina faa-Porotesano, na matuā leai lava se faaiuga o lenei felafolafoaiga na maua mai ai. Faatasi ma isi vaega faalelotu, o Tagata tetee, o ē na mulimuli i a Jacobus Arminius, na talitonu e faapea, e iai se vaega a le tagata e fai mo lona lava faaolataga. O le Pulega a le Porotesano o le Dordrecht (1618-1619) na faaleleia ai mo sina taimi puupuu le felafolafoaiga i lona talia o se ituaiga o aʻoaʻoga maumauai a Calvin. E tusa ma le faamatalaga a le tusi L’Aventure de la Réforme—Le monde de Jean Calvin i Siamani, o lenei finauga e uiga i iuga tuupoina ma le filifiliga saoloto, na amata ai se vaitaimi umi o “taumafaiga lē manuia ia faaleleia, faapea ma upu fāifāi, faafalepuipuiina, ma le faaaunuuaina o aʻoaʻo faalelotu.”

Iuga Tuupoina po o le Filifiliga Saoloto?

Mai lava i le amataga, o nei manatu feteenai e lua, i iuga tuupoina ma le filifiliga saoloto, na lāgā ai le tele o ni feteenaiga aasa. E tusa ai ma le itu a Aokusotino, sa lē mafai ona ia faamatalaina lenei aʻoaʻoga feteenai. Sa talitonu foi Calvin e faapea, o le faaalia lea o le pule silisiliese a le Atua ma e lē mafai ona faamatalaina.

Ae po o ua lē avea ea le faaalia mai e le Tusi Paia o uiga o le Atua ma lona peresona ma fesoasoani i a i tatou ina ia malamalama lelei ai i nei fesili? O le a iloiloina auiliili nei manatu i le mataupu lea e sosoo mai.

[Ata i le itulau 4]

Calvin

Luteru

Jansen

[Ē Ana le Ata]

Pictures: Bibliothèque Nationale, Paris