Le Auala E Tali atu ai Kerisiano i le Faalumaina i le Lautele

O Ā OU faalogona pe a faalumaina oe e se tagata po o le faasalalauina o ni tala pepelo e faatatau ia te oe? O le uiga masani, e matuā tiga lou loto. E oo foi i Molimau a Ieova se mea e tali tutusa faapena i so o se taimi e avea ai i latou ma autū o faamatalaga lē saʻo po o le lē manino e ala i nusipepa po o faasalalauga. A e e pei ona fetalai Iesu i le Mataio 5:11, 12, e i ai pea i Molimau mafuaaga e olioli ai.

Mo se faataʻitaʻiga, i se lomiga faa-Katoliko i Siamani, ua tuuaia ai e faapea, “ua faamalosia Molimau taitoatasi ina ia foai atu i le va o le 17 ma le 28 pasene o lona totogi i le ofisa ulu o lea lotu mavae.” E ui i lea, o Molimau a Ieova e lē o se lotu mavae, ma ua faatupeina la latou galuega e faavae atoatoa i meaalofa tauofo. E toatele tagata faitau na faaseseina i lenei faamatalaga pepelo, ma e fai si faanoanoa tele ai o Molimau a Ieova. A e e ao faapefea ona tali atu Kerisiano moni i le faalumaina e ala mai i nusipepa ma ālaleo o faasalalauga?

Se Faaaʻoaʻoga e Mulimuli ai Kerisiano

Ua manino le faamatalaina e le Mataio mataupu e 23 le taʻusalaina e Iesu o ona fili faalelotu ona o a latou faiga pepelo ma le faaʻoleʻole. Pe ua saunia ai e lenei mea se ata mo Kerisiano i aso nei i le auala e feagai ai ma faitioga? E leai. Na taʻusalaina e le Alo o le Atua ona fili faaletapuaiga e faavae i le pule e tutasi ma le malamalama sa ia te ia, na faia ona e mo le lelei o le motu o tagata na faalogologo ane.

Ua faamatala mai i le Mataio 15:1-11 e faapea sa faitioina Iesu ona sa solia e ona soo tu faa-Iutaia. Na tali atu faapefea i ai Iesu? Sa lē lolo atu i ai Iesu. I nisi mea na tutupu, na finau ai Iesu ma lana aufaitio i luma o le lautele, e faasaʻo ai o latou manatu sese. I se tulaga lautele, e lē sese mo Kerisiano i aso nei le taumafai e faasaʻo ni tuuaiga sese i la latou galuega po o aʻoaʻoga, ia taumafai lea e faamanino le tulaga i se auala moni ma talafeagai. Latou te faia lenei mea ina ia fesoasoani ai i tagata loto faamaoni ina ia iloa o faitioga i Molimau a Ieova e lē faavaea ma e taufaaleaga.

A e mātau le auala na tali atu ai Iesu i se taimi mulimuli ane ina ua taʻu atu e ona soo e faapea: “Ua e silafia ea ua tiga le au faresaio i lo latou faalogo i lea upu?” Sa lē na ona “tiga” o na faresaio ae na avea ma fili ua faasalaina na teena e Iesu. Ona tali atu ai lea o ia e faapea: “Tuu pea ia i latou, o tauaso i latou e taʻitaʻi i e ua tauaso.” O ni talanoaga atili ma na fili faatupu misa sa maumau ai le taimi, sa lē aogā mo se tasi, ma e na ona taʻitaʻiina atu ai i finauga lē aogā. (Mataio 7:6; 15:12-14; faatusatusa i le 27:11-14.) O tali na avatu e Iesu na faaalia ai e i ai “ona po e faalologo ai, ma ona po e tautala ai.”—Failauga 3:7.

E lē o faatalitalia e Molimau a Ieova o le a taʻuleleia i latou e tagata uma. Latou te manatua fetalaiga a Iesu: “Oi talofa ia te outou pe a tautala lelei tagata uma ia te outou! auā sa faapea lava ona fai e o latou tamā i perofeta pepelo.” (Luka 6:26) Na faatasi ona fesiligia C. T. Russell, le uluai peresitene o le Sosaiete o le Olo Matamata pe aisea na ia lē tetee faasaga atu ai i le taufaaleaga mai. Na tali atu o ia e faapea: “Afai e te tu ina ia tuli i maile uma taitasi e ōu atu ia te oe, e lē mamao la sau savaliga.”

O lea, e lē tatau ona tuu atu i tala a fili e maumauai e tetee mai e tosina ese ai i tatou mai i la tatou auaunaga i le Atua. (Salamo 119:69) Seʻi o tatou uai atu i le galuega a Kerisiano moni, o le galuega lea faaevagelia. O iuga e masani ai, o le a tatou mauaina avanoa e taliina ai fesili ma faamatala le autū o la tatou galuega, o le faaleleia lea o le amio a le tagata ma aʻoaʻo o ia i le Afioga a le Atua.—Mataio 24:14; 28:19, 20.

Pe e Tatau ona Tali atu i Faitioga?

Na fetalai Iesu e faatatau i ona soo: “E lē ni o le lalolagi outou . . . o le mea lea e ʻinoʻino ai le lalolagi ia te outou.” (Ioane 15:19) O le tele o tala faasalalau ua faafaupue atu ai le faalumaina o Molimau a Ieova, o ni faaupuga e fai ona o lea ʻinoʻino, ma o tala faapena e tatau ona lē amanaiaina. A e peitai, e i ai taimi e faaalia mai ai i tala faasalalau faamatalaga e faailoa ai e lē o lava lo latou silafia e faatatau i Molimau, po o le faaleaogaina ai ma sui seseina ai nisi o mea moni. O nisi tusitala atonu latou te mauaina mai a latou faamatalaga mai ni puna e faaʻauʻau o latou manatu. A e pe tatou te faaleamanaiaina faamatalaga sese i tala faasalalau po o le tali atu ina ia puipuia le upu moni e ala i tulaga tatau, e faalagolago lea i tulaga o le mataupu, lē na amataina le faitioga, ma lona faanaunauga.

O nisi taimi, e mafai ona faasaʻoina mea moni e ala i se tusi ua tusia lelei ma avatu i le faatonu o le nusipepa lea na faia le faamatalaga ina ia lomia atoa mai ai. A e e mafai foi e lea tusi ona oo i ni taunuuga e matuā ese ma le mea na faamoemoe i ai. E faapefea? O le tala sese lea na fai muamua atonu o le a atili ai ona faasalalau atu, pe atonu foi o le a avatu ai i fili nisi avanoa ina ia toe faaoo atu ai foi ni pepelo po o ni faifaiga i le nusipepa. I le tele o tulaga, e lelei ona tuu atu i toeaina latou te filifili pe e tatau ona tusi atu se tusi i le faatonu o le nusipepa. Pe afai o le a faapogaia e se faasalalauga lē lelei a se nusipepa faalogona ita mai o tagata faasaga ia i tatou, e mafai la e le ofisa o le lālā o le Sosaiete o le Olo Matamata ona faailoa atu i faapotopotoga uma o i lena atunuu mea moni e tusa ma le tulaga o i ai le mataupu, i le faia faapea o le a mafai ai e tagata talaʻi uma ona faamalamalama lelei i ē e fesili ane.

Pe e manaomia ona e aafia totino i tuuaiga uma faapea e lē o saʻosaʻo? O le fautuaga a Iesu ia “tuu pea ia i latou,” aua le amanaiaina i latou, e mautinoa lava e faatatau i lenei vaega a le fili. E i ai i Kerisiano faamaoni mafuaaga mai le Tusi Paia e teena ai aposetate ma o latou manatu. (1 Korinito 5:11-13; Tito 3:10, 11; 1 Ioane 2:19; 2 Ioane 10, 11) Pe afai e naunau faamaoni se tasi pe faamata o faitioga e uiga i Molimau e faavae aʻe i ni mea e moni po o le sese, o lou lava malamalamaga ua faavaea lelei, e masani ona lava lea e tali atu ai.—Tagai i Le Olomatamata o Tesema 1, 1986 itulau e 13 ma le 14.

Pe afai e te fesagai ma ni faamatalaga lē saʻo mai nusipepa, ia ave i fale le fautuaga o i le Faataoto 14:15: “O le ua faigofie, e talia e ia upu uma; a o le ua mafaufau, ua faautauta o ia i lona ala.” I Suisilani, e toatele tagata na feita ma ofo ina ua faia e se nusipepa se faamatalaga e faagaee ai lagona e faapea, na maliu se teine talavou Molimau ona na mumusu lona auaiga e faataga fomai e tui le toto. E ui i lea, pe na faamaonia ea na mea? E leai. Na teena e le maʻi le tuigā toto ona o talitonuga faalelotu, a e na ioe o ia na te talia togafitiga e sui aʻi le toto. O lenei mea sa ono mafai ona faia loa lava e aunoa ma le maumau o le taimi ma na ono mafai ona faasaoina ai lona ola. Peitai ane, na faatuai le falemai i le faia faapea e aunoa ma ni mafuaaga tatau seia oo atu lava ina fai si tuai tele mo le maʻi ma maliu ai. Sa leʻi taʻua e le tala i le nusipepa nei mea moni e uiga i togafitiga e sui aʻi le toto.

O lea, ia fua ma le faaeteete po o le ā le tele o mea moni o loo i ai i ia ituaiga o lipoti. E mafai ona tatou taʻu atu i ē fesili mai e faapea, o loo faafoeina e toeaina o i le vaipanoa lava lea ia le mataupu i se auala alofa ma e tusa ai ma taʻiala mai le Tusi Paia. O le tausisi atu i mataupu silisili pe a fai atu se tali, e puipuia ai tatou mai le nanati o se faaiuga.—Faataoto 18:13.

E Tāua Faamatalaga Tuusaʻo Mai ia i Latou

I le uluai senituri, na faasalalau ai e tagata tala pepelo e faatatau ia Iesu Keriso ina ia taʻuvalea ai lona talaaga, na faapea atu foi nisi, o ia o lē fouvale. (Luka 7:34; 23:2; faatusatusa i le Mataio 22:21.) Mulimuli ane, na feagai ai le faapotopotoga fou Kerisiano ma teteega na matuā salalau atu mai lotu ma malo. Ona ua “filifilia e le Atua mea vālea a le lalolagi,” e toatele ai tagata ua vaai faatauvaa i ana auauna. (1 Korinito 1:22-29) E moni e ao i Kerisiano i aso nei ona manatu i le faalumaina o se ituaiga o sauaga.—Ioane 15:20.

E ui i lea, e talisapaia e Molimau a Ieova, pe afai o le tagata lea latou te talanoa i ai e tonu lona mafaufau ma e i ai uiga e pei o ia sa i tagata na asiasi atu i ai Paulo i Roma, o ē na latou folafola atu: “A o lo matou manao nei, seʻi faalogo atu ia te oe i lou taofi; auā ua iloa e i matou ua talaeseina lena lotu i nuu uma lava.”—Galuega 28:22.

Ia fai atu i tagata ua talaeseina se faamalamalamaga, ma ia faia ma le agamalu. (Roma 12:14; faatusatusa i le 2 Timoteo 2:25.) Ia valaaulia i latou ina ia maua faamatalaga tuusaʻo e faatatau i Molimau a Ieova, e fesoasoani ai ia i latou ina ia lē faaʻoleʻoleina i tuuaiga sese. E mafai ona e faaaogaina faamatalaga ua lomia e le Sosaiete o le Olo Matamata o auiliili mai ai le faalapotopotoga, lona talafaasolopito, ma ana aʻoaʻoga.a Na faapea atu Filipo ia Natanielu: “Ina sau ia, ina matamata.” (Ioane 1:46) E mafai foi ona tatou faia faapea. O so o se tasi lava e manao i ai, ua valaaulia ma le mafana ina ia asiasi atu i le Maota o le Malo o i lona vaipanoa ina ia mafai ona tagai ia lava i ai po o ā ituaiga tagata e i ai Molimau a Ieova, ma mea e talitonu latou i ai.

ʻAua le Faamatauina e Fili

Maeu le faafiafia loto i le iloa e faapea e lē o taofia e nei faalumaina tagata mai le avea o ni Molimau! I le faagasologa o se faatalanoaga i se TV i Siamani, na fafau aʻe ai e aposetate le anoanoai o pepelo e faatatau i Molimau. Na iloa e se tagata matamata o le taufaaleaga a aposetate ua na o ni mafaufauga fatu ma o lea na uunaia ai o ia e toe amata lana suesuega o le Tusi Paia ma Molimau. Ioe, o faifaiga mai i le lautele e taʻitaʻiina atu ai i ni iuga lelei!—Faatusatusa i le Filipi 1:12, 13.

Na iloa e le aposetolo o Paulo e faapea, o le a liliu atu nisi i ‘tala pepelo’ na i lo le upu moni. O lea na ia tusi ai e faapea: “Ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva.” (2 Timoteo 4:3-5) O lea, aua le taaina oe e nei faiga, ma ‘ia aua lava neʻi faamatauina’ oe e ou fili. (Filipi 1:28) Ia mau pea le nofo ma toafimalie, ma talaʻi pea ma le olioli le tala lelei, ona mafai ai lea ona e onosaia ma le tutumau faifaiga mai le lautele. Ioe, manatua le folafolaga a Iesu: “Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele; auā na faapea ona latou faasaua i perofeta e na muamua ia te outou.”—Mataio 5:11, 12.

[Faaopoopoga i lalo]

[Faamatalaga faaopoopo i le itulau 27]

Pe a feagai ai ma ē tetee, na fetalai atu Iesu i ona soo: “Tuu pea ia i latou.” O le ā na uiga i ai lana fetalaiga?

[Faamatalaga faaopoopo i le itulau 29]

“Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o aʻu.”—Mataio 5:11