Pe e Mafai ona Maua le Upu Moni Faalelotu?

I SUETENA, na filifili ai se tamaloa suesue i mea faaleagaga i le aai o le iunivesite o Uppsala, na te suesueina talitonuga o lotu eseese i lona nuu, ma oo lava ina asiasi atu i nofoaga e fai ai a latou tapuaiga. Sa ia faalogologo a o lauga mai o latou taʻitaʻi lotu, ma na ia faatalanoaina foi nisi o sui. Na ia matauina ai e faapea, e na o Molimau a Ieova lava e foliga mai e mautinoa, ua latou “maua le upu moni.” I le mafaufau atu i le tele o manatu eseese faalotu sa i ai, sa ia tau mānatu ai pe e mafai faapefea e Molimau ona faia o lea faamatalaga.

Po o lou manatu e mafai ona maua le upu moni e faatatau i le lotu? Po o le a mafai foi ona filifilia po o le ā ua taʻua o le upu moni aʻiaʻi?

Filosofia ma le Upu Moni

O i latou ua suesueina le faafilosofia ua oo i ai le manatu e faapea, e lē mafai e le tagata ona maua le upu moni aʻiaʻi. Atonu ua e iloa e faapea, o le filosofia, ua faamatalaina e faapea, “o le faasaienisi o loo taumafai e faamatala le amataga o le i ai o le tagata faapea ma le ola.” A e, o le mea moni, e seāseā ona ausia e le faafilosofia lena tulaga. I le Filosofins Historia (Le Talafaasolopito o le Filosofia), na tusia ai e le tusitala Suetena o Alf Ahlberg e faapea: “O le tele o fesili faafilosofia faapena, e lē mafai ona tuuina atu i ai se tali maʻoti i na fesili. . . . E toatele tagata ua manatu e faapea, o faafitauli faigata uma [e faatatau i le tulafono faavae o mea i le amataga] e aofia ai i lenei . . . vaega.”

O le iuga, o i latou ua taumafai e saili se tali i nei fesili tāua e ala i le faafilosofia, e masani lava ona iu i le lē faamalieina po o le faaatuatuvaleina ai. I lana tusi Tankelinjer och trosformer (Ala o Mafaufauga ma le Faatuatuaga Faalelotu), na faapea mai ai le tusitala Suetena o Gunnar Aspelin: “E tasi le mea ua tatou iloa e faapea, o le natura e lē faaletagata ma e tutusa lelei lona manatu mai i le tagata e pei foi o lona naunau i le pepe [iniseti] ma le namu . . . Ua leai so tatou malosi, ua matuā leai lava se malosi i le feagai ai ma na malosiaga faalenatura o loo feasioaʻi solo i le vateatea ma totonu o lo tatou lalolagi. O lena vaaiga e uiga i le ola, e masani ona aliai mai i tusi i se taimi e leʻi mamao atu i le taufaaiuiuga o le senituri, lea ua tuu ai e tagata lo latou faatuatuaga i gaoioiga agaʻigaʻi i luma ma moomoo ai mo se lumanai e sili ona lelei.”

Pe e Manaomia se Faaaliga o le Upu Moni?

Ua manino mai e faapea, o taumafaiga a le tagata na o ia lava, ua lē taulau ona maua ai le upu moni e uiga i le ola, ma e foliga mai, o le a lē mafai lava ona latou maua. O lea la, ua i ai se mafuaaga lelei e faapea ai, e tatau ona i ai se ituaiga o faaaliga mai le Atua. Ua saunia i le tusi ua taʻua e le toatele o le tusi o le natura ni faaaliga. E tusa lava pe e lē o aumaia ai ni faamatalaga auiliili faaiu e uiga i le amataga o le ola, a e o loo faailoa mai ai e faapea, e i ai se mea e sili mamao atu ona faamalieina ai na i lo o se faamatalaga auliuli mai mea faitino e uiga i le ola. O se lauvao e tupu agaʻi i luga, o le mea moni, o loo mulimuli i tulafono e ese ai mai tulafono na e pulea ai se faaputuga maa i totonu o se lua ua solofa. O mea faiola o le natura, e fausia ma faamaopoopoina i latou lava i se auala e lē mafai e mea e leai ni ola ona faia. O le mafuaaga lea ua faia ai e se tagata poto iloga tau i le tulafono ma lotu se faaiuga e faapea: “O ana mea [mea a le Atua] e le vaaia talu ona faia o le lalolagi, e vaaia lava ia i le mafaufau i mea na faia.”—Roma 1:20.

A e ina ia iloa po o ai na māfua ai nei mea uma na faia ma faamaopoopoina, ua tatou manaomia ai se faaaliga atili. Pe e lē tatau ea ona tatou faatalitalia le i ai o sea faaaliga? Pe e lē tatau ea ona faatalitalia e faapea, o Lē na pogai ai le ola i le lalolagi, o le a na faaalia mai o ia lava i ana foafoaga ola?

Ua taʻua le Tusi Paia o se faaaliga faapea. I lenei mekasini, e masani ona matou tuuina atu ai mafuaaga lelei e talia ai lenei faamatalaga, ma o le toatele o tagata faimafaufau, latou te ioe i lenei faamatalaga. O le mea moni, o tane na tusia le Tusi Paia, sa manatu mamafa e faamaninoina mai e faapea, o mea na latou tusia e lē o ni o latou manatu, ma o se mea lea e matuā ofoofogia lava. Ua tatou iloa, e sili atu i le faatolu selau ona faaaogā e perofeta o le Tusi Paia faaupuga faapenei, “O le mea lava lea o loo faapea ona fetalai mai ai o Ieova.” (Isaia 37:33; Ieremia 2:2; Nauma 1:12) Ua e iloa foi o tane ma fafine e tusia ni tusi po o ni mataupu, e masani lava ona matuā naunau e saini ai o latou igoa i a latou tusi. Peitai, o i latou na tusia le Tusi Paia, e leʻi faailoaina mai i latou; i nisi tulaga, e faigata ona iloa po o ai na tusia isi vaega o le Tusi Paia.

O le isi vala o le Tusi Paia e mafai ona tāua ia te oe, o le ogatasi o tusi uma o i ai. E matuā mataʻina lava lenei mea, pe a manatu i tusi e 66 o le Tusi Paia e faapea, na tusia i se vaitaimi e sili atu i le 1,600 tausaga. Seʻi faapea sa e alu i se faletusi ma filifili mai ai ni tusi faalelotu se 66 na tusia i se vaitaimi e sili atu i le 16 senituri. Ona e tuufaatasia lea o na tusi e 66 i se tusi atoa se tasi. Po o le a e faatalitalia ea lena tusi e i ai sona matua autū e tasi ma se feau e ogatasi na tusia e ni tagata se toatele? O le mea moni e leai. O lena mea e manaomia ai se vavega. Seʻi manatu i le mea lenei: O tusi o le Tusi Paia, e tasi lava le matua, ma e felagolagomai. Ua faaalia ai i lenei mea, e tatau ona i ai se mataisau e sili ona atamai ma se tusitala e toatasi, o lē na faatonutonuina mea na tusia e tusitala o le Tusi Paia.

A e peitai, o le a e maua ai se vala e faamaonia ai le amataga tauatua o le Tusi Paia e sili atu na i lo o se isi lava mea. O valoaga—o faamatalaga na muai tusia i se taimi mamao lava e uiga i mea moni o le a tutupu i le lumanai. O faaupuga e pei o, “O lea aso” ma le, “O aso e gata ai e oo ina,” e na o le Tusi Paia e maua ai. (Isaia 2:2; 11:10, 11; 23:15; Esekielu 38:18; Hosea 2:21-23; Sakaria 13:2-4) I le faitau selau o tausaga a o leʻi afio mai Iesu i le lalolagi, o valoaga i Tusitusiga Eperu na aumaia ai ni faamatalaga auiliili e uiga i lona soifuaga—i lona fanau mai e oo i lona maliu. E leai lava se isi faaiuga poto e mafai ona faia na i lo o le faapea, o le Tusi Paia o le puna o le upu moni e uiga i le ola. Ua faamautinoa mai e Iesu lava ia lena mea i upu nei: “O lau afioga o le upu moni lea.”—Ioane 17:17.

Lotu ma le Upu Moni

E oo lava i le toatele o ē ua faapea mai e faatuatua i le Tusi Paia, ua talitonu e faapea o le upu moni aʻiaʻi, e lē o mafai ona maua. Na taʻua e se taʻitaʻi lotu Amerika o John S. Spong e faapea: “E tatau . . . ona suia o tatou mafaufau mai le manatu e faapea, ua tatou maua le upu moni ma e tatau i isi ona talia o tatou manatu i le iloa e faapea, e lē mafai e i tatou uma ona maua le upu moni aʻiaʻi.” Ua tuuina mai e se tusitala Katoliko Roma o Christopher Derrick se tasi o mafuaaga mo na manatu sese e faatatau i le mauaina o le upu moni: “So o se taimi e taʻua ai le ‘upu moni’ faalelotu ua faaalia ai se ituaiga o faaupuga e faapea ua iloa . . . Atonu o le a e faapea mai, e i ai se isi o loo sese; ma e matuā lē talia lena manatu.”

A e peitai, afai o oe o se tagata mafaufau, e sili ona lelei mo oe ona manatunatu i nisi o nei fesili tuusaʻo. Afai e lē mafai ona maua le upu moni, aisea ua faapea mai ai Iesu Keriso: “E iloa e outou le upu moni, e tuusaoloto foi outou e le upu moni”? Ma aisea ua fai mai ai se tasi o aposetolo o Iesu, o le finagalo lenei o le Atua “ia faaolaina o tagata uma ma oo ina iloa lelei le upu moni?” Aisea ua maua ai e sili atu i le faaselau le upu “upu moni” i Tusi Paia Kerisiano Eleni e fesootai atu ma le faatuatua? Ioe, aisea pe afai e lē mafai ona maua le upu moni?—Ioane 8:32; 1 Timoteo 2:3, 4.

O le mea moni, sa lē gata ina faasino mai e Iesu ia i tatou e faapea e mafai ona maua le upu moni, a e na faaalia mai e faapea, e manaomia ona saili le upu moni, pe afai e fia faamaonia e le Atua la tatou tapuaiga. Ina o tau mānatu se fafine Samaria po o le ā le ituaiga o tapuaiga e moni—po o le tapuaiga na faia e tagata Iutaia i Ierusalema, po o lea na faia e tagata Samaria i le Mauga o Keresema—sa leʻi tali atu Iesu e faapea, e lē mafai ona maua le upu moni. Na i lo o lea, na ia fetalai atu: “O e tapuai faamaoni latou te tapuai i le Tamā i le agaga ma le faamaoni [“upu moni,” NW]; auā o loo saili le Tamā i e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le [“upu moni”].”—Ioane 4:23, 24.

E toatele tagata ua faapea mai, ‘E eseese lava auala e mafai ona faamatalaina ai le Tusi Paia, o lea la, e leai se tasi e mafai ona mautinoa po o le ā le upu moni.’ A e po o tusia moni ea le Tusi Paia i se auala faalemanino faapena ua lē mafai ai ona e mautinoa le auala e faamalamalamaina ai? Ua ioeina e faapea, o nisi o valoaga ma gagana faafaatusa atonu e faigata ona malamalama i ai. Mo se faaaoaoga, na fetalai atu le Atua i le perofeta o Tanielu e faapea, i lana tusi, o loo i ai le anoanoai o upu faavaloaga, sa lē manaomia ona malamalama atoatoa i ai seia “oo i ona po o le iuga.” (Tanielu 12:9) Ma e manino lava o nisi o faataoto ma tala faatusa e manaomia ona faamatalaina.

E manino lava la, e tusa ai ma aʻoaʻoga faavae faa-Kerisiano ma tulaga o amioga tatau e talafeagai ma le tapuaiga i le Atua i le upu moni, e matuā saʻolele lava le Tusi Paia. E leai se avanoa o i ai mo ni faamatalaga feteenai. I le tusi i Kerisiano Efeso, o le faatuatuaga faa-Kerisiano o loo tautala i ai, e na o le “tasi” lava, e faaalia ai, e lē tatau ona i ai ni faatuatuaga se tele. (Efeso 4:4-6) Atonu o e taumanatu e faapea, ‘Afai e lē mafai ona faamatalaina saʻo le Tusi Paia i ni auala eseese, aisea la ua tele naua ai lotu “Kerisiano” eseese?’ Tatou te maua le tali pe a tatou toe tepa i tua i le taimi ina ua faatoʻa mavae le maliliu o aposetolo o Iesu ma ua tupu aʻe le aposetasi mai le faatuatuaga Kerisiano.

‘Le Saito ma le Titania’

Na valoia e Iesu lenei aposetasi i lana faataoto i le saito ma le titania. Na faamatala e Iesu lava ia e faapea, o “le saito” ua fai ma sui o Kerisiano moni; “o le titania” ua fai ma sui o Kerisiano pepelo po o aposetate. Na fetalai Iesu, “ua momoe tagata,” ona alu ane ai lea o “le ua ita mai” ua na luluina le titania i totonu o le togāsaito. O lenei luluina o le titania, na amata ina ua momoe i le oti aposetolo. Ua faaalia i le faataoto e faapea o lenei fefiloi o Kerisiano moni ma Kerisiano pepelo o le a faaauau pea ona i ai seia oo ‘i le faaiuga o le faiga o mea.’ O lea, i le faagasologa o senituri, na faigata ai ona malamalama i le faailoaina mai o Kerisiano moni ona sa pulea gaoioiga faalotu e i latou sa na ona taʻua o Kerisiano. A e peitai, i ‘le faaiuga o le faiga o mea’ o le a oo mai ai se suiga. “E aauina atu e le Atalii o le tagata ana agelu” e vavaeese Kerisiano moni mai Kerisiano pepelo. O le uiga o lenei mea, o le a faigofie ai ona iloa le faapotopotoga Kerisiano, i le i ai o le tulaga sa i ai i taimi o aposetolo.—Mataio 13:24-30, 36-43.

O loo valoia uma e Isaia ma Mika lena aoaoina o tagata tapuai moni “i aso e gata ai.” Ua faapea mai Isaia: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai. E o mai lava nuu e tele, ma latou faapea ane, ‘O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala.” O se vaaiga manino i mea moni, ua faaalia ai e faapea, o le valoaga a Isaia, ua faataunuuina i o tatou taimi.—Isaia 2:2, 3; Mika 4:1-3.

E ui i lea, o le faatupuina o le faapotopotoga Kerisiano, e lē faia e ala i ni taumafaiga a tagata. Na valoia e Iesu e faapea, o le a na ia “aauina mai ana agelu” e faia le galuega o le aoaoina. Ua ia faaalia foi se fuafuaga e matuā faapitoa mo lenei mea: “Ona pupula ai lea o e amiotonu e pei o le la i le malo o lo latou Tamā.” (Mataio 13:43) Ua faaalia i lenei mea e faapea o le faamalamalamaina, po o le galuega tau i le aʻoaʻoina lea o le a faia i le lalolagi aoao e le faapotopotoga Kerisiano.

Ua vaaia e Molimau a Ieova le faataunuuga o nei valoaga o le galuega faaleaʻoaʻoga lea o loo latou faia i atunuu e 232 i aso nei. E ala i le faatusatusaina o talitonuga o Molimau a Ieova, tapulaa tau amio, ma le faalapotopotoga i le Tusi Paia, ua iloa manino ai e tagata e lē faaituau, le tutusa lelei o i latou nei ma i latou o le faapotopotoga Kerisiano o le uluai senituri. E tautala Molimau i lo latou faatuatuaga e faapea “o le upu moni” a e lē o uunaia i le fiasili. Na i lo o lea, ua latou mafaia lenei mea ona ua latou suesue loloto i le Afioga a le Atua, le Tusi Paia, ma latou mulimuli ai ua na o lea le tulaga saʻo e mafai ona fuaina ai ma le tonu le lotu moni.

Sa faasino atu uluai Kerisiano i lo latou faatuatuaga e faapea “o le upu moni.” (1 Timoteo 3:15; 2 Peteru 2:2; 2 Ioane 1) O le mea sa avea ma upu moni ia i latou, e tatau foi ona avea ma upu moni ia i tatou i aso nei. Ua valaaulia e Molimau a Ieova tagata uma ina ia faamautinoa ua latou faia lena mea e ala i le suesueina o le Tusi Paia. Matou te faamoemoe, o le faia faapea o le a e tofo ai foi i le olioli e maua mai e lē gata i le mauaina o se lotu moni e sili atu i isi lotu, a e i le mauaina o le upu moni!

[Pusa i le itulau 5]

NISI O FAAFILOSOFIA E TETEE I LE UPU MONI

MAUTINOA: O le vaaiga e faapea, o manatu masani faalotu, o ni manatu valea e lē mafai ona faamatalaina, ma o le manatu autū o le faafilosofia, o le tuufaatasia lea o le faasaienisi moni ina ia avea o se mea e tasi.

LONA I AI: O i latou e lagolagoina lea manatu, sa matuā taaʻina i mea matautia na tutupu i le Taua Lona Lua a le Lalolagi ma i lea ua oo ai ina sili atu ona lē mautinoa le vaaiga e uiga i le olaga. Ua faamamafaina ai le suesueina o le atuatuvale o le tagata i le feagai ai ma le oti ma se olaga gaogao. Fai mai le tusitala o le gaoioiga o le existentialism o Jean-Paul Sartre e faapea, talu ai e leai se Atua, ua tuulafoaiina ai le tagata ma ua ola ai i se lalolagi e aunoa ma se amanaiaina o tagata.

LE LĒ TALITONU: E taofi i latou e faapea e ala i le suesue ma fefulisaʻi, e lē mafai ona maua ai se poto autū i le lalolagi aoao—se upu moni—e uiga i le i ai o le ola.

FAAMAONIA LE MEA MONI I NI IUGA AOGĀ: E fuaina le aogā moni o o tatou talitonuga e faavae i mea aogā latou te faia mo le lelei o le tagata, e pei o le toe fesuiai o tulaga faaleaʻoaʻoga, amioga, ma faiga faapolotiki. E lē o manatu e faapea e i ai se aogā o le upu moni lava ia.

[Ē Ana le Ata i le itulau 2]

Itulau 3: Lona lua mai le itu agavale: Courtesy of The British Museum; Itu taumatau: Sung Kyun Kwan University, Seoul, Korea