‘E Tuu Saʻoloto Outou e le Upu Moni’
“E iloa foi e outou le mea moni, e tuu saʻoloto foi outou e le upu moni.” O le taʻutinoga lena na fetalai atu ai Iesu a o ia aʻoaʻo atu i le motu o tagata i le malumalu i Ierusalema. (Ioane 8:32) Na mafai ona vave faamaonia e aposetolo o Iesu aʻoaʻoga a Iesu o le upu moni. Na latou vaai i le tele o faamaoniga o le tupuga mai le Atua o lo latou faiaʻoga.
PEITAI i aso nei, ua faafaigata i nisi ona iloaina faamaoniga o le upu moni na fetalai i ai Iesu. E pei ona sa iai i aso o le perofeta o Isaia, ua iai foi i aso nei “i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama; o e fai ma mea suamalie le mea oona, a e fai ma mea oona le mea suamalie.” (Isaia 5:20) Faatasi ma le tele o manatu, o filosofia, ma auala eseese o le olaga ua faaauilumaina i aso nei, o le toatele o tagata ua lagona faapea o mea uma e ʻauga i le mea e tasi, e leai se mea e moni atoatoa.
Ina ua fetalai atu Iesu i lana aufaalogologo o le a tuu saoloto i latou e le upu moni, na latou tali mai e faapea: “O i matou nei o le fanau a Aperaamo, e lei fai lava i matou ma pologa o se tasi; pe faapefea ona e fai mai, E tuu saʻoloto outou?” (Ioane 8:33) Latou te lei lagonaina se manaoga mo se tasi po o so o se mea e faasaolotoina i latou. Ae na faamanino atu loa e Iesu: “E moni, e moni, ou te fai atu ia te outou, o sē faia le agasala, o le pologa lea i le agasala.” (Ioane 8:34) O le upu moni na fetalai i ai Iesu e mafai ona tatala ai le ala i le saoloto mai le agasala. Na fetalai Iesu: “Pe a tuu saʻoloto outou e le Atalii, ona saʻoloto faamaoni ai lea o outou.” (Ioane 8:36) O le upu moni la e faasaolotoina tagata o le upu moni e uiga ia Iesu Keriso, le Alo o le Atua. E na o le faatuatua lava i le taulaga o le ola lelei atoatoa faaletagata o Iesu e mafai ai e se tasi ona faasaolotoina mai le agasala ma le oti.
I se tasi o taimi na fetalai ai Iesu: “Ia e faapaiaina i latou i le upu moni; o lau afioga o le upu moni lea.” (Ioane 17:17) O le afioga a le Atua o loo faamatalaina mai i le Tusi Paia o le upu moni lea e mafai ona aumaia ai le saolotoga mai talitonuga faanuupo ma tapuaiga sese. O loo iai i le Tusi Paia le upu moni e faatatau ia Iesu Keriso, lea e taitaiina atu tagata e tuu lo latou faatuatua ia te ia ma tatala ai le ala i le faamoemoe pupula mo le lumanai. O se mea matagofie tele le oo ina iloa le upu moni o le Afioga a le Atua!
O le ā le tāua o le iloa o le upu moni? E tele lotu i aso nei, a o faapea mai o loo mulimuli i le Tusi Paia, ae o loo matuā aafia foi i filosofia ma aganuu faaletagata. E masani lava, e foliga mai e lē popole lava taʻitaʻi lotu po o saʻo la latou feau, o le mea tāua ia taliaina e le toatele. O nisi e lagona faapea o loo faamalieina lava le Atua i so o se ituaiga o tapuaiga, o le mea sili ia faamaoni. Ae na faamanino mai e Iesu Keriso: “E oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni [“upu moni,” NW]; auā o loo saili le Tamā i e tapuai faapena ia te ia.”—Ioane 4:23.
Afai tatou te mananao ia talileleia mai e le Atua la tatou tapuaiga, e tatau ona tatou iloa le upu moni. O se mataupu tāua tele lenei. E faalagolago i ai lo tatou fiafiaga e faavavau. O lea, e tatau ai i tagata uma ona fesili ifo ia te ia lava: ‘Po o taliaina e le Atua le auala o oʻu tapuai ai? Po o oʻu fiafia moni ea e aʻoaʻo le upu moni o le Afioga a le Atua? Po o oʻu fefe i mea e ono faailoa mai e se suesuega e fai ma le faaeteete?’