Le Aso e ‘Mu ai e Pei se Umu’
“Faauta, o le a oo mai le aso e mu ai pei se umu.”—MALAKI 4:1.
1. O ā fesili ua tulai mai i le fesootai atu i le Malaki 4:1?
I LENEI vaitaimi o aso e gata ai, amuia i latou ua filifilia e Ieova e tusia i lana tusi faamanatu. A e faapefea i latou o ē e le taulau ona agavaa mo lena faaeaga? E tusa lava pe o ni faipule po o ni tagata lautele, o le a faapefea ona feagai ai ma i latou pe a latou inoino i ē o faalauiloa le Malo o le Atua ma la latou feau? Ua taʻua e Malaki le aso latou te tali atu ai. Ua tatou faitau ai i le mataupu e 4, fuaiupu 1 e faapea: “Auā faauta, o le a oo mai le aso e mu ai pei se umu; ona fai ai lea ma tagutugutu o saito o e faamaualuluga uma, atoa ma ē fai amio leaga uma; e susunuina foi i latou i le aso o le a oo mai, ua fetalai mai ai Ieova o ʻau; e le faatoeina ai mo i latou se aa po o se la laau.”
2. O le ā le tala faatusa e sili ona malosi o le aso o le faamasinoga a Ieova ua aumaia e Esekielu?
2 Ua faatusaina foi e isi perofeta le faamasinoga a Ieova o isi atunuu e pei o le aasa o le afi i se ogaumu. Maeu le fetaui o le faatatau atu o le Esekielu 22:19-22 i le faamasinoga a le Atua i lotu mavae o Kerisinetoma aposetate! Ua faitauina e faapea: “O le mea lea ua faapea ona fetalai mai ai o le Alii o Ieova, ua avea outou uma ma otaota o uamea, o le mea lea, faauta, ou te faapotopotoina ai lava outou . . . E pei ona faapotopotoina o ario, ma ʻapa memea, ma uamea, ma pulu, ma ʻapa sinasina i totonu o le umu, e tapili ai le afi ia liu suāvai; e faapea ona ou faapotopotoina o outou i loʻu ita ma loʻu tiga, ma ou tuu ai outou ia liu suāvai. Ou te faapotopotoina lava outou, ma ou tapili i le afi o loʻu ita ia te outou, e liu suāvai outou i totonu ia te ia. E pei ona liu suāvai o ario i totonu o le ogaumu, e faapea foi ona liu suāvai o outou i totonu ia te ia; e iloa ai e outou, o aʻu o Ieova, ua ou sasaa atu loʻu ita tele i luga ia te outou.”
3, 4. (a) O ā ni tautinoga faatagafai ua faia e le au taʻitaʻi lotu? (e) O le ā le talaaga e sili ona matagā o lotu?
3 E mautinoa o se tala faatusa e sili ona malosi! O le au taʻitaʻi lotu ua faamavae mai le faaaogaina o le suafa o Ieova, e oo foi ina latou upuleaga i lena suafa paia, e tatau ona tali atu i lena aso o le faamasinoga. I se uiga fiasili, ua latou fai mai ai o le a latou faavaeina ma a latou aumea faaupufai le Malo o le Atua i le lalolagi, po o le faia o le lalolagi o se nofoaga talafeagai mo le Malo.
4 Ua aufaatasi atu Kerisinetoma aposetate i taʻitaʻi faalemalo i le tauina o taua e sili ona matautia. Ua faamauina i le talafaasolopito Taua Paia i le taulotoaiga o le talaaga o le tagata, le faaliliu faamalosi i Pulega Faalotu i Sepania, le Taua e Tolusefulu Tausaga i le va o le lotu Katoliko Roma ma le Porotesano na faaumatia ai se vaega tele o Europa i le senituri lona 17, ma le taua i totonu o Sepania lava ia i tausaga mai le 1930 e agaʻi i le 1939, na tauina ina ia faamausali ai le tulaga o le Lotu Katoliko i Sepania. O le faamasaa toto e sili ona leaga na tupu lea i taua e lua a le lalolagi o lo tatou senituri, ina ua auai ma le saoloto Katoliko ma Porotesano, i le faatamaia o o latou lava tagata lotu, e faapena foi ma le fasiotia o isi e ese lo latou faatuatuaga. E lata mai nei lava, o loo i ai pea fetauaiga i le va o Katoliko ma Porotesano i Aialani, i le va o ituaiga faalotu i Initia, ma i le va o vaega faalotu i le atunuu na avea muamua o Yugoslavia. Ua pisipisia foi le talaaga o lotu i le toto i lo latou fasioti faamaturoina o le faitau afe o molimau faamaoni a Ieova.—Faaaliga 6:9, 10.
5. O le ā le faamasinoga o taatia mai mo lotu sese?
5 Ua tatou sauni ai la e talisapaia le tonu o le faaoosala a Ieova ua lalata mai ia Papelonia le Aai Tele, le emepaea o lotu sese, faatasi ai ma i latou o lagolagoina. O lenei faasalaga ua faamatala mai e le Faaaliga 18:21, 24 e faapea: “Ua siitia foi e le tasi agelu malosi o le maa e pei o se maaolo tele, ma lafo i le sami, ua faapea atu, ‘E faapea ona lafotuina o Papelonia le aai tele, e le toe iloa lava. Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.’”
6. (a) O ai o le a avea ma tagutugutu o saito, ma aisea? (e) O le ā le faamautinoaga ua i ai mo i latou o ē matatau ia Ieova?
6 I lona taimi tonu, o fili uma e tetee i le amiotonu, ma i latou e gauai atu i ai, o le a “fai ma tagutugutu o saito.” O le a mumū le aso o Ieova ia i latou e pei o se umu. “E le faatoeina ai mo i latou se aa po o se la laau.” I lena aso, o le a tonu le auala e feagai ai ma tamaiti, po o la laau, e tusa ai ma le faatulagaga a Ieova i o latou mātua, o latou aa, o ē tausia nei fanau. O mātua amioleaga o le a leai se fanau e tuu atu i ai e faaauau ai o latou ala amioleaga. A e o i latou o e faaalia le faatuatua i folafolaga o le Malo o le Atua, o le a faamausaliina. O lea ua faamafanafana mai le Eperu 12:28, 29 (NW), e faapea: “Seʻia tatou maua pea le agalelei faifua, e ala i lea, e mafai ai ona tatou avatu i le Atua le auaunaga paia faatasi ma le mataʻu ma le migao i le Atua. Auā foi o lo tatou Atua o le afi maamaai ia.”
Po o Ieova o se Atua Sauā?
7. E faapefea ona aafia ai le alofa o Ieova i lana faamasinoga?
7 Po o le uiga ea o lenei mea o Ieova o se Atua e sauā, ma le fia taui ma sui? E le taitai ona faapea! I le 1 Ioane 4:8, ua taʻua ai e le aposetolo se upu moni faavae e faapea: “O le Atua, o le alofa lava ia.” Ua ia faaopoopo mai le faamamafaga i le fuaiupu e 16, i le faapea mai: “O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foi o i totonu ia te ia.” Ona o lona alofa i tagata, ua fuafua ai e Ieova e faamamāina lenei lalolagi mai i amioleaga uma lava. Ua folafola mai e lo tatou Atua alofa ma mutimuti vale e faapea: “Ou te ola aʻu, ou te le fiafia lava i le oti o lē amio leaga, a ia liliu mai lē amio leaga ai lona ala, ma ola ai; liliu ia outou, ina outou liliu ese ia i o outou ala leaga; auā pe se a ea le mea tou te fia oti ai?”—Esekielu 33:11.
8. Na faapefea e Ioane ona faatauaina mai le alofa, a e ua ia faaalia foi o ia e pei o se Atalii o le Faititili?
8 Ua tele ina taʻua e Ioane le a·gaʹpe, le alofa e faavae i mataupu silisili, e sili atu pe a tuufaatasi isi tusitala e toatolu o le Tala Lelei, a e i le Mareko 3:7, ua faamatalaina mai ai Ioane e pei o se ‘Atalii o le Faititili.’ I le faagaeeina e Ieova, na tusia ai e lenei Atalii o le Faititili le feau faafaaaliga o le tusi mulimuli o le Tusi Paia, o le Faaaliga, ua faaatagia mai ai o Ieova o le Atua na te faaooina atu le faamasinoga tonu. Ua tumu lenei tusi i faamatalaga faafaamasinoga, e pei “o le soligāvine tele o le toasa o le Atua,” ‘o ipu e fitu o le toasa o le Atua,’ ma “le toasa mamafa o le Atua e ona le malosi uma lava.” —Faaaliga 14:19; 16:1; 19:15.
9. O ā faamatalaga na faia e Iesu i le faamasinoga a Ieova, ma na faataunuuina faapefea ana valoaga?
9 Na folafola atu ma le loto tele e lo tatou Alii o Iesu Keriso, o le “faatusa o le Atua e le vaaia,” faamasinoga a Ieova a o i ai i inei i le lalolagi. (Kolose 1:15) Mo se faaaʻoaʻoga, e faafitu ona taʻua le faaupuga, oi talofa e, i le Mataio mataupu e 23, na ia folafola tuusao faasaga i tagata lotu faapiopio i ona aso. Na ia faaiu mai faapea lana tausalaina i upu nei: “Ierusalema e, Ierusalema e, o lē fasiotia perofeta, ma fetogi i maa i e ua aauina atu ia te oe; ua tele lava oʻu manao e faapotopoto i lau fanau, e pei o le moa ona ofaofatai i lana toloai i lalo i ona apaau a e lei mafafai outou. Faauta, ua tuua lo outou fale, e faatafunaina.” I le tolusefulufitu o tausaga mulimuli ane, na faaoo atu ai le sala e le ʻau tau a Roma i le taʻitaʻiga a le Taʻitaʻiau o Tito. Sa avea o se aso e mataʻu ai, o se ata faavaloaga o le aso o le a silisili ona mataʻu ai i lo mea uma ua oo mai i tagata—le aso o Ieova, e le o toe mamao a e oo mai loa.
Ua Susulu atu “le La”
10. Ua aumaia faapefea e le “la o le amiotonu” le olioli i tagata o le Atua?
10 Ua faailoa mai e Ieova e faapea o le a i ai ē faasaoina mai i lona aso. Ua ia faatatau atu ia i latou ia i le Malaki 4:2, i le faapea mai: “A o outou o e matatau i loʻu igoa, e alu ae ia te outou le La o le amiotonu; e i ai foi le mea e malolo ai i ona apaau.” O le la o le amiotonu, e na o Iesu Keriso lava e faatatau i ai. I se tulaga faaleagaga, o ia o le “malamalama o le lalolagi.” (Ioane 8:12) E faapefea ona ia susulu atu? E oso aʻe o ia i ona apaau e malolo ai—e muamua le faamaloloina faaleagaga o tatou mauaina i aso nei, ma pe a oo mai le lalolagi fou, ona faamaloloina ai lea faaletino o tagata mai i atunuu uma lava. (Mataio 4:23; Faaaliga 22:1, 2) E pei ona taʻua e Malaki, i se uiga faafaatusa, o e ua malolo o le a “o atu . . . ma osooso, pei o tamai povi mai le fale povi,” faatoʻā tatala mai le fale na tuu ai. Maeu se olioli o le a oo foi ia i latou ua toe faatutuina mai, o e ua toe tutū mai ma le faamoemoe i le mauaina o le lelei atoatoa faaletagata!
11, 12. (a) O le ā le taunuuga mulimuli o taatia mai mo e amio leaga? (e) E faapefea i tagata o le Atua ona latou “solia . . . o e amio leaga”?
11 Peitai ane, e faapefea e amioleaga? Ua tatou faitau faapea i le Malaki 4:3: “Ona outou solia lea o e amio leaga; auā e fai i latou ma efuefu i lalo o outou alofivae i le aso ua ou tofia, ua fetalai mai ai Ieova o ʻau.” O le a tafi mamaina e lo tatou Atua-Manumalo le lalolagi mai fili pule sauā ma faaumatia i latou, a o ia leoleoina i latou o e alolofa ia te ia. O le taimi lea ua saisaitia ai Satani ma ana temoni.—Salamo 145:20; Faaaliga 20:1-3.
12 E leai se vaega a tagata o le Atua i le faaumatiaina o ē amio leaga. E faapefea la ona latou “solia . . . o e amio leaga”? Latou te faia lenei mea i se uiga faafaatusa e ala i le faia o se vaega i le samiga o le manumalo tele. Ua faamatala mai e le Esoto 15:1-21 sea ituaiga o fiafiaga. Na sosoo ai ina ua faaumatia Farao ma ana ʻau i le Sami Ulaula. O le faataunuuina o le Isaia 25:3-9, le aveesea o “tagata matautia” (“pule sauā,” NW), o le a sosoo atu ai ma se faigaai tele o le manumalo e fesootai atu i le folafolaga lenei a le Atua: “E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova. O lea aso e faapea ai, Faauta, o lo tatou Atua lenei; . . . o Ieova lava lenei, sa tatou faatalitali ia te ia; tatou te fiafia ma olioli i lana faaolataga.” O lenei olioli e le o se mimitavale po o se faaamuamu i le faatoilaloina o le fili, a e o se faagaeetia i le vaai atu ua faapaiaina le suafa o Ieova ma ua faamamaina le lalolagi mo le aināina e tagata ua autasia.
Se Polokalama Tele Tau Aʻoaʻoga
13. O le ā le aʻoaʻoga o le a faia i le “lalolagi fou”?
13 I le Malaki 4:4, na faatonuina ai tagata Iutaia ina ia “manatunatu i le tulafono a Mose.” O lea i aso nei, e manaomia ona tatou mulimuli i le “tulafono a Keriso,” e pei ona taʻua i le Kalatia 6:2. O ē faasaoina ia Amaketo o le a le masalomia le tuuina atu i ai o nisi faatonuga atili e faavae aʻe i lea tulafono, ma atonu o le a tusia “i tusi” o le Faaaliga 20:12 lea o le a tatala i le vaitaimi o le toe tutū. Maeu se aso tele o le a i ai a o aʻoaʻoina ē ua toe faatutuina mai e mulimuli i le ituaiga olaga o le a i ai i le “lalolagi fou”!—Faaaliga 21:1.
14, 15. (a) Ua iloa faapefea le Elia o ona po nei? (e) O le ā le tiute tauave ua faataunuuina e le vasega o Elia?
14 O le a avea lea o se faateleina o le galuega tau aʻoaʻoga, na faasino i ai fetalaiga a Ieova e pei ona faamauina i le Malaki 4:5 e faapea: “Faauta, ou te auina atu ia te outou o Elia le perofeta, a o lei oo mai le aso o Ieova e sili, ma le matautia.” O ai lena Elia faaonaponei? E pei ona faaalia i le Mataio 16:27, 28, i le faasino atu i lona “sau i lona malo,” na fetalai ai Iesu e faapea: “Auā e sau le Atalii o le tagata faatasi ma ana agelu i le mamalu o lona Tamā; ona tauia lea e ia e taitasi e tusa ma lana galuega.” I le ono o aso mulimuli ane, a o i ai i le mauga ma Peteru, Iakopo, ma Ioane, “Ona liua ai lea o ia i o latou luma, ua pupula mai ona fofoga e pei o le la, ua sisina mai foi ona ofu e pei o le malamalama.” Pe sa na o ia ea na i ai i lea vaaiga? E leai, auā “faauta foi, ua faaali mai Mose ma Elia ia i latou, ua latou fetautalatalaʻi ma ia.”—Mataio 17:2, 3.
15 O le ā e uiga i ai lenei mea? Na faasino atu ia Iesu o le Mose Sili, lea na valoia, i le taimi e afio mai ai o ia i le faamasinoga. (Teuteronome 18:18, 19; Galuega 3:19-23) O le a aufaatasi atu o ia i le vasega o Elia o ona po nei ina ia faataulauina se galuega e sili ona tāua, o le talaʻia lea o le tala lelei o le Malo i le lalolagi uma lava a o leʻi pa mai le aso sili ma le matautia o Ieova. I le faamatalaina o le galuega a lenei “Elia,” ua faapea mai le Malaki 4:6: “Na te faaliliuina loto o mātua i fanau, ma loto o fanau i o latou mātua; neʻi ou alu atu, ma ou taia le nuu i le faafanoga.” O lea ua faapea ona iloa “Elia,” o le vasega o Kerisiano faautauta ma le mafaufau ua faauuina o i le lalolagi, o le ua tofia atu i ai e le Matai o Iesu Ana mea uma lava. E aofia ai i lenei le tausia o le auaiga o le faatuatua i “mea e ʻai [faaleagaga] i ona itu aso” e tatau ai.—Mataio 24:45, 46.
16. O ā iuga fiafia ua maua mai i le galuega a le vasega o Elia?
16 I le lalolagi aoao i aso nei, ua mafai ai ona tatou vaaia iuga lelei o lena polokalama o le fafagaina. O le mekasini o Le Olomatamata ua lomia le aofaiga e 16,100,000 i lomiga taitasi i gagana e 120, o le 97 o nei gagana ua lomia i le taimi e tasi faamatalaga o i ai, ma ua lilofia ai le lalolagi i le “tala lelei o le malo.” (Mataio 24:14) O isi lomiga i le tele o gagana ua faaaogā i vala eseese o le galuega talaʻi ma le aʻoaʻo atu a Molimau a Ieova. Ua mataalia le vasega o Elia, le auauna faautauta ma le mafaufau i le saunia o le anoanoai o mea mo i latou uma o “mataala i o latou manaoga faaleagaga.” (Mataio 5:3, NW) E faaopoopo atu i ai, o i latou e talia lenei faamoemoe i le Malo ma amioai, ua fusia i se aufaatasiga autasi matagofie. Ua fusia faatasi ai le motu o tagata e toatele “mai atu nuu uma, ma aiga, ma nuu, ma gagana eseese.” (Faaaliga 7:9) Pe a faamaeaina lenei galuega i le tele ua finagalo i ai Ieova, ona oo mai ai lea o le iuga i lona aso sili ma le matautia.
17. O afea o le a pa faafuasei mai ai le aso sili ma le matautia o Ieova?
17 O afea o le a pa faafuasei mai ai lena aso sili ma le matautia ia i tatou? Ua tali mai le aposetolo o Paulo e faapea: “Auā ua outou iloa lelei lava, o le aso o le Alii e pei o le gaoi i le po, e faapea ona oo mai ai; auā pe a latou fai ane [atonu i se auala iloga], ‘O loo filemu, ua le afaina,’ ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.”—1 Tesalonia 5:2, 3.
18, 19. (a) E faapefea ona alagaina le “filemu, ua le afaina?” (e) O afea o le a maua ai e tagata o Ieova le mapusaga?
18 O ai “i latou” i lenei valoaga? O i latou o taʻitaʻi faalemalo o e ua faapea mai e mafai ona latou fausia se faiga fou mai vaega eseese o lenei lalolagi sauā. O fua o galuega ua latou faia o faaviivii i ai, le Malo Sosoo ma le Malo Aufaatasi, ua le taulau i le fafauina aʻe o se faiga fou e autasi. E pei lava ona valoia mai e le perofeta a Ieova, ua oo foi ina latou “fai mai i le taimi nei, ‘Ua filemu! Ua filemu! A e e le o i ai se filemu.’”—Ieremia 6:14; 8:11; 14:13-16.
19 I le taimi nei, ua onosaia pea e tagata o Ieova omiga ma sauaga o lenei lalolagi le amioatua. A e ua toeitiiti ona latou maua lea o le mapusaga e pei ona taʻua i le 2 Tesalonia 1:7,8, “pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu.”
20. (a) O le ā na vavalo i ai Sefanaia ma Sapakuka e faatatau i le aso e “mu ai e pei se umu”? (e) O le ā le fautuaga ma le faalaeiauga ua aumaia e nei valoaga?
20 O le ā le umi o le toeitiiti o i ai nei? O le toatele o i tatou ua umi se taimi o faatalitali. I le taimi nei, o le toatele o e agamalu o le a faasaoina o loo talia le valaau o loo i le Sefanaia 2:2,3 e faapea: “Ia outou saili ia Ieova . . . ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.” Ona maua ai lea i le Sefanaia 3:8 se faalaeiauga e faapea: “O lenei, ia outou faatalitali ia te au, o loo fetalai mai ai Ieova, ia oo i le aso ou te tulai atu ai i le vete; auā ua tonu ia te au e faapotopotoina nuu ese, e aofia lava malo; ina ia sasaa atu i luga ia i latou loʻu ita, o loʻu ita tele uma lava; auā e faaumatia le lalolagi uma i le afi o loʻu fuā.” Ua lata tele mai le iuga! Ua silafia e Ieova lona aso ma le itula, ma o le a lē suia lava lana taimi faatulagaina. Seʻi a o tatou tutumau ma le onosai. “Auā o le faaaliga ua tuuina mo ona aso ua tuupoina, a e tautala mai pe a oo i le iuga, e le pepelo lava; e ui lava ina tuai mai, a ia faatalitali pea i ai; auā e oo mai lava, e le faatuai mai.” (Sapakuka 2:3) Ua faanatinati le vave oo mai o le aso sili ma le matautia o Ieova. Ia manatua, o lea aso o le a lē faatuai mai!
E Ala i se Autaluga:
◻ O le a faapefea ona feagai ai taʻitaʻi faalemalo ma tagata lautele i le aso sili ma le matautia o Ieova?
◻ O le ā le ituaiga Atua e i ai Ieova?
◻ O le ā le ituaiga o aʻoaʻoga ua faamatalaina mai mo tagata o Ieova?
◻ Ua faalototeleina faapefea i tatou e perofeta a le Atua e tusa ai ma le lalata tele mai o le iuga?
[Ata i le itulau 21]
I le vaitaimi o le Puleaga Faalotu i Sepania, e toatele na faamalosia ina ia faaliliuina e avea ma Katoliko
[Ē Ana le Ata]
The Complete Encyclopedia of Illustration/J. G. Heck