Talanoaina e se Matai Lona Lumanai

O SE matai i Aferika i Sisifo na avea ma taʻitaʻi e alofagia ma faaaloalogia i lona nuu. I le faailogaina o lona 78 o ona tausaga, na faapotopoto faatasi atu ai ana uo, aiga, ma isi tagata alolofa e faamanuia atu ia te ia. I se lauga, na filifilia ai e le matai se matua uiga ese mo se faatasiga faapenei. Na ia taʻua ona manatu e uiga i le ola pe a mavae le oti.

Na ia faapea mai, pe a mavae le oti “e i ai se lalolagi fou, e leai se faaʻoleʻole, mataua ma le matapeʻapeʻa.” Na ia faamatalaina lea lalolagi o se nofoaga e “ufitia i mealilo,” o se lalolagi e faatumuina i na o tagata amiotonu, o ē o le a faatasi ma le Atua.

O talitonuga faapena, e taatele lava i tagata i Aferika atoa. E tusa ai ma le talitonuga o lotu faauputuu a Aferika e faapea, o le oti, e lē o le iuga lea o le ola a e ua na o se suiga, e oo atu ai i le nofoaga o agaga. I le oti, ua faapea mai, e sopoia ai e se tagata le lalolagi faitino i le lalolagi e lē vaaia. Ona o se agaga, ua ulu atu ai loa le tagata i se nofoaga o loo nonofo ai ona tuaa.

E toatele tagata o Aferika i Sisifo e talitonu, o tuaa po o agaga o tuaa, latou te faamautinoaina ua lelei o latou aiga i le lalolagi. Ua taʻua i le tusi West African Traditional Religion: “E leai se eseesega tele o aafiaga i le va o tagata o le nuu o loo iai pea i inei i le lalolagi, ma i latou o loo i le lalolagi i tala atu o le oti. A o i ai i inei i le lalolagi, sa avea ai [tuaa] ma toeaina i o latou aiga. O lenei la ua lilo atu ma i tatou, o loo tumau pea ona avea i latou ma toeaina i le lalolagi o agaga. E latou te lē taofia ai lo latou faanaunau atu mo le lelei lautele o o latou aiga.”

O lona uiga, o le matai matua na taʻua i le amataga, na faatalitalia e aufaatasi atu ma ona tuaa ma galulue faatasi ma i latou i le nofoaga o agaga. Na faapea mai o ia: “Ua ia te aʻu se talitonuga malosi i le ola i tala atu o le oti, ma le tiute tauave o le faaauau pea ona ou auauna ai e avea o se matai—e oo lava i le taimi pe a mavae le oti.”

A e peitai, ona o le tala na sosoo ai a le matai, na manatu ai le nusipepa o le Sunday Times e faapea, “e foliga mai e lei matuā talitonu aʻiaʻi o ia” e uiga i le ola i tala atu o le oti. Na ia taʻu atu i le motu o tagata na faapotopoto ane e faapea, na ia faalogo e uiga i se tusi o loo talanoaina ai le ola pe a mavae le oti. Ua lima tausaga o sailia e lea matai le tusi. Ona o lona naunau tele e fia faitau i ai, o lea na ia ofoina atu ai se tupe e tusa ma le $1,500 (Amerika) i so o se tasi o le a na aumaia se kopi o lea tusi ia te ia.

Sa ono mafai e lea alii ona aloese mai le tele o sailiga o lea tusi pe ana ia suʻe atu mo se tusi e lē faigata ona maua. O se tusi e maua gofie, e leʻi saunia e se tagata, a e o Lē na Foafoaina tagata uma. (1 Tesalonia 2:13) O lena tusi, o le Tusi Paia. O le ā o fai mai ai lea tusi e uiga i le ola i tala atu o le oti?