Le Folafolaga i se Lalolagi e Aunoa ma Faiga Faapiopio

UA ĀTI atu faiga faapiopio i vala uma o le sosaiete. Pe i totonu o faigā malo, le faasaienisi, taaloga, i lotu, po o pisinisi, e foliga mai ua lē mafai ona pulea faiga faapiopio.

I le lalolagi aoao, ua aliali mai ai pea i auala eseese o faasalalauga o tala fou ni tala faamomoi loto ona o faiga faapiopio. O le toatele o ē ua faia ni tautinoga e auauna mo manaoga o tagata, ua faaalialia i latou o ni tagata e auauna mo lo latou lava lelei e ala i le talia o faiga faatogafalea, ma auala faalilolilo e maua ai mea. O solitulafono ua faia e i latou o mautofiga i galuega, ua matuā taatele i tagata faigaluega faaofisa. Ua faatoateleina tagata i tulaga maualuluga po o tulaga tau tamaoaiga ua nofosala i le faia o amioga matuiā ma ua tuuaia i le solia o tulafono e tusa ai ma o latou tulaga tau i galuega i aso faisoo.

Ua faateleina pea le popole i le mea ua faamatalaina e se tasi mekasini i Europa e faapea “ʻo faiga faapiopio a tagata faaaloalogia’—o faiga ia ua faia e tagata i tulaga maualuluga, o minisita ma, o i latou e masani ona latou faia pea nei mea, o ao ia po o faauluuluga o malo, i lo latou faia o ni faiga faatogafalea ma ni auala faalilolilo e maua ai a latou tupe a o lei faamaonia ni mea e faatau po o atiina aʻe.” I se tasi atunuu, na faaalia ai i se suesuega e faapea, “i le lua o tausaga na faia ai suesuega a leoleo ma e toetoe lava o aso uma e tapuʻeina ma faasala ai tagata, a e e lei mafai ona taofia ai faiga faapiopio a tagata,” ua taʻua ai e le mekasini Peretania o le Economist.

Ona o le salalau atu o na faiga faapiopio, ua lagona ai e le toatele o tagata i aso nei e faapea, e leai se tasi e mafai ona latou faatuatuaina. Ua latou faaleoina ai saafiafiga a le tusitala o le Tusi Paia o Tavita ina ua ia faapea mai: “Ua latou ʻaloʻalo ese uma lava, ua leaga faatasi i latou; e leai se tasi ua amio lelei, e leai lava se tasi.”—Salamo 14:3.

E faapefea ona e fesagai ma le mea moni, o le salalau atu lea o faiga faapiopio? O le toatele o tagata i aso nei, e lē o manatu mamafa lava i ai. A e e tusa lava pe e te faaleamanaia faiga faapiopio ua faia, a e o loo e tiga ai lava. E faapefea?

Ua Aafia Oe i Faiga Faapiopio

O faiga piopio i tulaga maualuluga faapea ma le lē faamaoni i se fua itiiti, ua faateteleina ai le taugata o le soifuaga, ua faapaʻū ai le tulaga maualuga o mea gaosi, ma ua iu ai i le faaitiitia o galuega ma le paʻū maulalo o totogi. E mo se faaaoaoga, ua faatatauina e faapea, o solitulafono e pei o le faaaogaina o tupe i auala faapiopio ma faiga taufaasese, e tusa e faasefuluina tupe e faaalu ai pe a faatusatusa i le tau tuufaatasi o le talepe fale, faomea, ma le gaoi. Ua taʻua i le New Encyclopædia Britannica (1992) e faapea, “o le tau o solitulafono i pisinisi tetele ma kamupanī i le Iunaite Setete, ua fuafuaina e tusa ma le $200,000,000,000 i le tausaga—e faatoluina ona telē nai lo o le tau o solitulafono fuafuaina.” Ua faamatalaina e lenei tusi e faapea, e ui e le faigofie ona iloa atu āuga o ia solitulafono, “a e o na solitulafono, ua matuā tele ona aafiaga i le saogalemu o tagata faigaluega, tagata faatau, ma le siosiomaga.”

O iuga leaga o faiga faapiopio ua faamanatu mai ai ia i tatou upu a le tupu o Solomona: “Ona ou toe manatunatu lea i sauaga uma ua faia i lalo o le la; faauta foi i loimata o e ua sauaina, ua leai foi se na te faamafanafanaina i latou; ua lima malosi foi e na saua ia te i latou; a ua leai se na te faamafanafanaina i latou.”—Failauga 4:1.

Po o le a tatou lolo atu ea la i faiga faapiopio ona e faapea ua taatele? Po ua le mafai ea ona taofia? Po ua na o se miti ea le i ai o se lalolagi e aunoa ma ni faiga faapiopio? O le tali fiafia i ai, e leai! Ua aʻoaʻo i tatou e le Tusi Paia e faapea, o le faamasino le tonu ma le solitulafono ua lē pine ona soloiesea lea.

Le Mea o Fai mai ai le Tusi Paia ia i Tatou

Ua taʻu mai e le Tusi Paia ia i tatou e faapea, o faiga faapiopio na amata ina ua fouvale se agelu malosi faasaga i le Atua ma māfua ai ona au faatasi atu le uluai ulugalii faaletagata ia te ia. (Kenese 3:1-6) E leai se mea lelei na maua mai i lo la ala agasala. Nai lo o lea, na amata mai lava i le aso na agasala ai Atamu ma Eva ia Ieova le Atua, ona la pagatia ai i iuga leaga o faiga faapiopio. O o la tino na faasolosolo ina vaivai, ma oo ai i se oti lē maalofia. (Kenese 3:16-19) E talu mai na taimi, ua faatumuina ai le talafaasolopito i faaaʻoaʻoga leaga o faiga faatogafalea, faaʻoleʻole, ma le taufaasese. A e peitai, o le toatele o tagata solitulafono e foliga mai o loo mafai ona sao mai le oo i ai o ni faasalaga faafaamasinoga.

E lē pei o tagata solitulafono masani, o pule ma tagata faipolotiki, e seāseā ona tuuina i falepuipui pe toe totogi atu mea na latou gaoia. Ona o le faalilolilo o faiga faatogafalea, ma auala e totogi atu ai tupe i nei tagata, e masani lava ona faigata ona faaalia le tulaga matuā maualuga o faiga faapiopio. A e e lē faapea o le a lē mafai ai ona maua se lalolagi e aunoa ma ni faiga faapiopio.

O le laveaiina mai faiga faapiopio o le a aumaia e Lē na Foafoaina le tagata, o Ieova le Atua. O le faalaa tauatua, ua na o lea le vaifofo. Aisea? Ona o le fili lē vaaia o tagata, o Satani le Tiapolo, o loo faaauau pea ona taʻitaʻiseseina le fanau a tagata. E pei ona tatou faitau ai i le 1 Ioane 5:19, “a o le lalolagi uma o loo nofo toilalo i loo leaga.” O le ā se isi mea e faamatala ai le faateleina o faiga faapiopio—ona o le tele lava o na faiga o loo faia pea e aunoa ma le faasalaina?

Po o le ā lava le tele o taumafaiga a le tagata, a e e le mafai ai lava ona faatoilaloina Satani ma ana temoni. E na o le faalaa tauatua lava e mafaia ona faamaonia i tagata usiusitai “le saolotoga o le fanau a le Atua e manuia ai.” (Roma 8:21) Ua folafola mai e Ieova e faapea, ua lē pine ona saisaitia lea o Satani ia lē toe mafai ai ona faasese i le fanau a tagata. (Faaaliga 20:3) I le taimi nei, afai tatou te faanaunau ia ola i le lalolagi fou a le Atua e aunoa ma faiga faapiopio, e tatau ona tatou teena amioga lē faamaoni a lenei lalolagi.

E Mafai ona Suia Tagata

I aso o Iesu Keriso, sa i ai i latou o ē na faaaogasese la latou pule ma faapologaina o latou uso a tagata. E mo se faataʻitaʻiga, o ao lafoga sa lauiloa i a latou faiga faapiopio. Na faia lenei mea e ui lava sa i ai le tulafono maʻoti a le Atua: “Aua le talia se mea alofa [e faatogafalea]; auā o le mea alofa [e faatogafalea ai] e faatauaso aʻi o e vaavaai, e faaseseina ai foi upu a e amiotonu.” (Esoto 23:8) O Sakaio, o se ao lafoga sili, na ioe sa faamalosia o ia e faia ni faiga faapiopio ona o tuuaiga sese. A e nai lo o le taumafai e suia tulafono lautele, sa talosaga atu Iesu i tagata ina ia salamō ma lafoai o latou ala faapiopio. O le iuga, o le au ao lafoga lauiloa e pei o Mataio ma Sakaio na lafoaia ia ituaiga o olaga sa ola ai muamua.—Mataio 4:17; 9:9-13; Luka 19:1-10.

O i latou ua aafia i faiga piopio i aso nei, ua mafai ona latou teena faiga lē faamaoni e ala i le ofuina “o le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:24) Atonu e lē faigofie ona totogiina lafoga e aunoa ma ni faiga faapiopio po o le taofia o le auai i ni faiga le faamaoni. A e e aogā pea lava so o se taumafaiga.

Ona ua lē toe amio faatasi ma lenei lalolagi amio piopio, o i latou o loo manatu mamafa mo le lelei o isi, o loo olioli i le filemu o o latou loto. E leai se popole ina neʻi maua o faia ni mea sese. Nai lo o lea, o loo latou olioli ai i se loto fuatia ifo lelei. Ua latou faataʻitaʻi i le faaaʻoaʻoga faale-Tusi Paia a le perofeta o Tanielu. Ua faapea mai le faamatalaga a le Tusi Paia, sa saili pea alii sili ina ia maua se mea e faasala ai ia Tanielu. “A ua le maua e i latou se mea e faalani ai po o se mea leaga e tasi; auā sa faamaoni o ia, ua le maua foi sona sese e tasi, po o se mea leaga.”—Tanielu 6:4.

Folafolaga a Ieova

Ua folafola mai e Ieova e faapea: “E ui lava ina faaselau ona fai o mea leaga e le ua agasala, ma ua faafualoaina lona ola; a ua ou iloa lava e manuia e ua matatau i le Atua, o e matatau i ona luma. A e le manuia le ua amio leaga, e le faafualoaina foi ona aso, ua pei o se ata; auā ua le mataʻu o ia i luma o le Atua.”—Failauga 8:12, 13.

Maeu se mapusaga pe a lē toe faapogaia e faiga faapiopio le lē fiafia! Maeu se faamanuiaga o le ola e faavavau i se lalolagi o le a le toe i ai ni faiga faapiopio! E lē faapea e lē mafaia lenei mea. Ua tautala le Tusi Paia e uiga “i le faamoemoe i le ola faavavau, na folafolaina mai talu mai tausaga o le vavau e le Atua e le mafai ona tala pepelo.” (Tito 1:2) Afai e te inoino i faiga piopio ma alofa i le amiotonu, o le avanoa lelei lea mo oe e iloa ai le faataunuuga o le folafolaga a le Atua i se lalolagi fou e aunoa ma ni faiga faapiopio.

[Ata i le itulau 4]

O faiga faapiopio ua taatele i faigā malo ma faiga faapisinisi

[Ata i le itulau 5]

O faiga faapiopio e masani ona aafia ai feutagaiga ma tagata maualuluga lautele