Po o le a Faaiʻuina Faiga Piʻopiʻo a Faigāmalo?

O faiga piʻopiʻo a tagata maualuluga o le malo o se faafitauli i le lalolagi aoao, ma e iai ni ona aafiaga mataʻutia.a O se faataʻitaʻiga, a o faagasolo le KOVITI-19, na tuuaʻia tagata maualuluga o malo i le tele o atunuu, i lo latou faaaogāsesē o fesoasoani tautupe na foaʻi atu mo le puipuiga o le faamaʻi. O na faiga piʻopiʻo, na lē mafai ai ona maua e tagata le fesoasoani tau i le soifua mālōlōina na latou manaʻomia, ma iʻu ai ina mafatia ma maliliu ai.

E mataʻutia aafiaga o faiga piʻopiʻo a faigāmalo. Na faapea mai David Cameron, o sē na avea muamua ma palemia o le Malo Tuufaatasi o Peretania ma Aialani i Mātū: “O faiga piʻopiʻo, o se mailei telē ua lavelavea ai atunuu uma.”

Peitaʻi, e mafai ona tatou mautinoa ua toeitiiti ona faaiʻuina lea o faiga piʻopiʻo uma a faigāmalo. Aiseā? Mātau le gaoioiga o le a faia e le Atua, o loo taʻua i le Tusi Paia.

Le māfuaaga e tatou te iloa ai o le a faaiʻuina e le Atua faiga piʻopiʻo

O loo faamauina i le Tusi Paia fetalaiga nei a le Atua: “O aʻu o Ieova ou te fiafia i le faamasinotonu, ae ou te ʻinoʻino i le gaoi ma le amiolētonu.”b (Isaia 61:8) Pe a mafatia tagata ona o faiga piʻopiʻo a isi, e silafia lelei e le Atua. (Faataoto 14:31) Ua ia folafola mai: “Ona o le faileagaina o ē ua mafatia, . . . o le a ou tulaʻi ai nei.”—Salamo 12:5.

O le ā o le a faia e le Atua? Nai lo le toe faaleleia o faigāmalo o loo iai nei, ae o le a ia suia na faigāmalo i lana faigāmalo i le lagi, lea e taʻua o “le Malo o le Atua.” (Mareko 1:14, 15; Mataio 6:10) Ua faapea mai le Tusi Paia: “O le a faatūina ai e le Atua o le lagi o le malo e . . . tuʻimomomoina ma faaumatia malo uma, ae e tumau lea malo e faavavau.” (Tanielu 2:44) O le a faaiʻuina e le Atua faiga piʻopiʻo o loo tatou vāai ai i aso nei.

O se faigāmalo e leai ni faiga piʻopiʻo

E faapefea ona tatou iloa o le a lē faia e le Malo o le Atua ni faiga piʻopiʻo? Iloilo manatu nei.

1. 1. Pule. E maua e le Malo le pule mai i le Atua Silisili Ese.—Faaaliga 11:5.

   Aiseā e tāua ai?: Ina ia faatinoina pulega a faigāmalo faaletagata, e latou te faalagolago i tupe mai i o latou tagatānuu. Ona o lea, e masani ai lava ona latou faia faiga faatogafalea, gaoi, ma taufaavalea. Peitaʻi, o lenei Malo, e lagolagoina e le Atua Silisili Ese, ma o le a mafai ona ia faamalieina manaʻoga o ona tagatānuu.—Salamo 145:16.

2. 2. Taʻitaʻi. Ua tofia e le Atua Iesu Keriso e avea ma taʻitaʻi o le Malo.—Tanielu 7:13, 14.

   Aiseā e tāua ai?: E oo lava i taʻitaʻi faaletagata lelei, e iai lava taimi e aafia ai i taaʻiga lē lelei. (Failauga 7:20) Ae ua faamaonia mai e Iesu, e lē mafai ona taaʻina o ia i ni faiga faatogafalea. (Mataio 4:8-11) E le gata i lea, e na te faaalia le alofa moni i ona tagatānuu, ma naunau moni mo lo latou lelei.—Salamo 72:12-14.

3. 3. Tulafono. E lelei atoatoa tulafono a le Malo o le Atua, ma maua ai e i latou e usiusitaʻi i ai le fiafia.—Salamo 19: 7, 8.

   Aiseā e tāua ai?: O tulafono a tagata e masani lava ona faigatā, mamafatū, pe lē saʻo foʻi le auala e faamalosia ai, lea e māfua ai ona tele faiga piʻopiʻo. Ae i le tuufaafeagai, o tulafono a le Atua e lelei ma aogā. (Isaia 48:17, 18) E lē gata i lea, o nei tulafono e lē gata e faailoa mai ai le gaoioiga e tatau ona fai, ae o le uunaʻiga foʻi e fai ai. (Mataio 22: 37, 39) E silafia e le Atua o tatou loto, ma e na te faamautinoa ma le alofa o loo tatou usitaʻia ana tulafono, e tusa ai ma o tatou tulaga lē lelei atoatoa.—Ieremia 17:10.

E matou te valaaulia oe e aʻoaʻo atili folafolaga a le Tusi Paia e faatatau i se faigāmalo i le lumanaʻi, e lē aafia i faiga piʻopiʻo.

• Faitau le mataupu “Malo o le Atua—O se Malo e Leai ni Faiga Piʻopiʻo” ma iloa ai isi māfuaaga e tolu e lē faia ai e le Malo o le Atua ni faiga piʻopiʻo.

• Maimoa i le vitiō O le ā le Malo o le Atua? ina ia malamalama atili ai i le faigāmalo a le Atua, ma mea o le a faia e lenā Malo i le lalolagi.

• Ia faataʻitaʻi a matou talanoaga faale-Tusi Paia e aunoa ma se totogi, ina ia iloa ai pe faapefea ona e maua aogā mai i folafolaga a le Tusi Paia.