Tuua Toatasi a e Lei Tuulafoaiina

E PEI ONA FAAMATALAINA E ADA LEWIS

Ua ou masani lava i le fiafia e tuua toatasi na o aʻu. Ou te tu maumauai malosi foi—e taʻua e isi i nisi taimi o le lotomalosi—i mea uma ou te faia. Ua ou iloa foi, le faigofie o le soona tautala, ma o lenei uiga na faapogaia ai faafitauli ia te au i le tele o tausaga.

A E PEITAI, ou te faafetai ai ona ua le tuua ai aʻu e Ieova le Atua ona o oʻu vaivaiga. E ala i le suesueina o lana Afioga, ua mafai ai ona ou faaleleia oʻu uiga totino ma faapea ai ona ou auauna mo manaoga o lona Malo mo le 60 tausaga. E talu mai loʻu laitiiti, ou te fiafia tele i solofanua, ma o le fesoasoani a le Atua i le taofiofia o loʻu uiga lotomalosi, ua faamanatu mai ai pea ia te au le auala e mafai ai ona faaaogā le faagutu e pulea ai se solofanua.

Na ou fanau i tafatafa o se vaituloto manaia lanumoana i Mount Gambier i Ausetalia i Saute, i le 1908. Na i ai se lafu povi a oʻu mātua, ma o aʻu le teine ulumatua o le fanau e toavalu. Na maliu lo matou tamā a o matou laiti uma. Na tuu ai ia te au le avega tele o le vaaiga o povi, ona sa manaomia ona faigaluega atu i fafo oʻu tuagane matutua e toalua e maua mai ai se tupe mo le aiga. O le olaga fai lafu manu sa manaomia ai galuega mamafa.

Fesootaiga Muamua ma le Upu Moni o le Tusi Paia

Sa auai lo matou aiga i le Lotu Perepereane, ma o matou o ni sui galulue e le misia se lotu. Na avea aʻu ma faiaʻoga Aso Sa ma sa ou matuā faatauaina loʻu tiute i le aʻoaʻo o tamaiti i mea na ou iloa e faaleagaga ma e saʻo i le tulaga tauamio.

I le 1931, na maliu ai le tamā o loʻu tamā, ma i ana meatotino sa i ai nisi o tusi na tusia e le peresetene o le Sosaiete o le Olo Matamata i lea taimi, o J. F. Rutherford. Na amata ona ou faitauina le tusi The Harp of God ma le Creation, ma o le tele o loʻu faitau atu i ai, o le faateleina foi lea o loʻu ofo, i le iloaina mai ai o le tele o mea ia na ou talitonu i ai ma aʻoaʻoina ai tamaiti, e le o lagolagoina e le Tusi Paia.

Na ou teʻi i loʻu iloaina ai, o le agaga o le tagata e le ola pea pe a oti, e le ō i le lagi le toatele o tagata pe a latou feoti, ma e leai foi se faapuapuagatiaina e faavavau i se afi i seoli mo ē amioleaga. Na faateia foi aʻu i le manatu e faapea o le tausiaina o le sapati faalevaiaso i le Aso Sa e le o se mea e manaomia mo Kerisiano. O lea, na ou feagai ai ma se filifiliga tāua tele: o le pipii atu pea i aʻoaʻoga faauputuu a Kerisinetoma, po o le amata aʻoaʻoina loa o le upu moni o le Tusi Paia. Sa lei umi a e ou filifili loa e taofia aʻu aufaatasiga uma ma le Lotu Perepereane.

Ua Tuua Toatasi Moni loa i le Taimi Lea

Na matuā lē malilie loʻu aiga, aʻu uo, ma aʻu aumea o le lotu muamua, ina ua ou faailoa i ai laʻu faaiuga ou te lē toe lotu ma ou te lē toe faiaʻoga i le aʻoga Aso Sa. Ma ina ua latou iloa ua i ai aʻu fesootaiga ma ē na taʻua o tagata a Judge Rutherford, na atili toe faaopoopo atu ai le lē fiafia i tala faitatala mumū faaafi. Sa lei faatoina aʻu, a e o le toatele o loʻu aiga ma aʻu uo, sa lē fiafia mai ia te au.

O le tele o loʻu suesue ma iloilo mau na aumaia ai i tusi sa ou faitauina, o le tele foi lea o loʻu iloa o le manaoga e ao ona talaʻi i le lautele. Na ou iloa ai sa ō atu Molimau a Ieova mai lea fale i lea fale o se vaega o la latou faiva i le lautele. A e o le taimi lena sa leai ni Molimau i lo matou itumalo. O lea sa leai ai se isi e faalaeiauina aʻu pe faasino mai le auala e talaʻia ai le tala lelei o le Malo o le Atua. (Mataio 24:14) Sa ou matuā lagona le tuua toatasi.

E ui i lea, o le faatonuga a le Tusi Paia ia talaʻi i isi na uunai mai pea ia te au, ma sa ou filifili ai e tatau ona ou amata talaʻi i so o se auala lava e mafai ai. I le uma o aʻu tatalo e tele sa fai, na ou manatu ai ou te amata asiasi i aiga o matou tuaoi, e na ona taʻu atu ia i latou o mea ia na ou aʻoaʻoina mai i aʻu suesuega ma taumafai e faasino i ai ia manatu mai i a latou lava Tusi Paia. O laʻu fale muamua, o le fale o lē na vaaia la matou aʻoga Aso Sa lea na ou i ai muamua. O lona tali ita mai ma ona manatu le saʻo e uiga i loʻu tuua o le lotu, sa mautinoa le le faamalosiauina ai o le amataga o laʻu talaʻiga. A e peitai, na ou lagona se faalogona mafanafana ma se malosi uigaese, a o oʻu alu ese mai i lona aiga ma faaauau ai ona ou asiasi atu i isi aiga.

O le mea moni sa leai ni teteega tuusaʻo na oo mai, a e na ou ofo i le taufai lē fiafia ma le matuā le ano mai o aʻu aumea faalelotu na i ai muamua, ina ua ou asiasi atu ia i latou. Sa ou tatalia ma loʻu ofo tele ma le lē fiafia, teteega pito i matuia mai loʻu tuagane matua, ua faamanatuina mai ai ia te au upu a Iesu e faapea: “E tuuina atu foi outou e mātua, ma uso, ma aiga, ma uo; . . . E inosia foi outou e tagata uma ona o loʻu igoa.”—Luka 21:16, 17.

O aʻu o se tagata e masani i le tietie solofanua a o oʻu laitiiti, na ou manatu ai o le auala vave lea e oo atu ai i aiga o tagata, o le alu i le solofanua. Sa mafai ai ona ou oo atu i isi oganuu i tua e tuaoi ma lo matou nuu. A e i se tasi aoauli, na lē mafai ai e le solofanua ona tatali le maseesee o le auala, ma paū ai, ma na ou matuā tigaina i le telē o loʻu foa. Mo se vaitaimi, na faapea ou te faaletonu ai. Ina ua uma le paʻūga lena, na ou lē toe alu ai i se solofanua pe a susū pe maseesee auala, a e ou alu i le sulky e toso e le solofanua.a

Fesootai ma le Faalapotopotoga

I se taimi ina ua uma le faalavelave na tupu ia te au, na asiasia ai le itumalo o Mount Gambier e se vaega o tagata talaʻi faataimi atoa ua taʻua nei o paeonia. O le uluai taimi lea, na mafai ona ou talanoa faafesagai lelei ai ma oʻu uso talitonu. A o lei o ese, na latou faalaeiauina aʻu ou te tusi atu i le lālā a le Sosaiete o le Olo Matamata, ma faafesili i ai i se auala e mafai ai ona ou auai i le galuega talaʻi i se auala e sili atu ona maopoopo.

O laʻu tusi i le Sosaiete, na ou maua mai ai tusi, tamai tusi, ma se pepa tusitusia o faamatalaga na faaaogā ou te faafeiloai atu ai i aiga. Na ou lagona se mafana atu i oʻu uso ma tuafāfine faaleagaga i tusi na maua mai i le lālā. A e ina ua foi paeonia ma ō atu i le isi aai, sa sili ona ou lagonaina loʻu tuua toatasi.

O le iuga o aʻu molimau faataamilo i aiga e masani ai i aso taitasi—lea e tele ina ou alu i le sulky e toso e le solofanua—na iloa lelei ai aʻu i le itumalo. I le taimi e tasi, sa mafai lava ona ou galue i le vaaiga o le lafu povi. Na mulimuli ane, lē toe tetee mai loʻu aiga ma lē toe faalavelave mai ia te au. E fa tausaga o oʻu auauna ai faapea na o aʻu, o sē faalauiloa le tala lelei e lei papatisoina.

Se Tauaofiaga ma, Mafai loa ona Papatisoina

Ia Aperila i le 1938, na asia ai e le uso o Rutherford ia Ausetalia. O le tetee malosi o taʻitaʻi lotu na iu ai i le soloia o le konekalate mo le Maota Fono a le malo i Sini. E ui i lea, o le taimi mulimuli lava na faatagaina mai ai le faaaogaina o le Malae Taalo (Sports Grounds). Na fetaui lelei le suiga faatopetope lea na i ai, talu ai e silia ma le afe ma afe e mafai ona ofi ai i le Malae Taalo pito i telē lea. Pe tusa e 12,000 na auai mai, o le fiafia o le toatele na foliga mai na māfua, ona o teteega na faaosoina e taʻitaʻi lotu i a matou sauniga.

O le fesootaiga ma le asiasiga a le uso o Rutherford, na faia ai foi se tauaofiaga mo ni aso i se aai e lata ane i Sini. O i inā na mafai ai loa ona faailogaina loʻu tuuina atu ia Ieova le Atua e ala i le papatisoina i le vai. Seʻi e mafaufau i loʻu fiafia tele i le faatasitasi ai i lea taimi ma le faitau selau o uso ma tuafāfine mai i itu uma o le konetineta tele o Ausetalia?

Toe Foi i Mount Gambier

O loʻu toe foi atu i le aiga, na matuā lagonaina ai loʻu tuua toatasi, a e na sili atu ona ou maumauai i le taimi lea e faia mea ou te mafaia i le galuega o le Malo. E lei leva, a e matou masani loa ma le aiga e faaiu ia Agnew—o Hugh, o lana avā, ma le la fanau e toafā. E nonofo i le taulaga o Millicent, e na o le 30 maila po o le 50 kilomita mai Mount Gambier, ma e 30 maila la ou te alu ai ma ou toe foi mai ai i le sulky e toso e le solofanua, e fai le latou suesuega faifaipea faale-Tusi Paia. Ina ua latou faatauaina le upu moni, na mou malie ese atu loa loʻu lagona tuua toatasi.

E lei leva lava, a e matou faatasi loa o se vaega mo le faamaopoopoina o le galuega o le molimau atu. A e ma le fiafia lava mulimuli ane, na amata ona fiafia mai loʻu tinā ma amata ai ona ma ō i le 60 maila po o le 100 kilomita le alu ma le sau, i le suesuega fou a vaega lea ua faia. Na amata mai i lena taimi, ona avea Tinā ma faamalosiau ma fesoasoani sili, e ui ina faatoʻā papatiso o ia i ni tausaga mulimuli ane. Ua matuā leai nei se faalogona tuua toatasi!

E toafā paeonia na maua i la matou vaega toaitiiti, o teine e toatolu o le au Agnew—o Crystal, Estelle, ma Betty—ma aʻu. Mulimuli ane i le amataga o vaitausaga o le 1950, na auai uma ai le auso teine e toatolu i le Aʻoga o le Olomatamata ma le Tusi Paia o Kiliata. Na tofia i latou e avea ma misionare i Initia ma Sri Lanka, lea o loo auauna faamaoni ai pea.

Ia Ianuari 1941, na faasaina ai le galuega a Molimau a Ieova i Ausetalia, ma na matou gaoioi loa faatatau i ai. Na matou tuuina mea uma na matou faaaogaina i le faiva—o tusi, o laau faasalalau, o kopi ua pueina o lauga faale-Tusi Paia, ma mea faapena—i totonu o se pusa telē e fai i le apa. Ona matou tuuina loa lea o le pusa i se tamai fale ma laʻu mai i ai uta o lauvao mamago e tanu ai.

E ui lava i faasasaāga, na faaauau pea la matou talaʻiga mai lea fale i lea fale, a e na faia ma le poto, i le faaaogaina na o le Tusi Paia lava pe a talanoa atu i tagata o aiga. Sa ou nanaina mekasini ma tamai tusi i lalo o le nofoa o laʻu solofanua ma seiloga e faaalia le fiafia moni i le feau na tuuina atu o le Malo ona aumai lea i fafo. Na aveesea mulimuli ane ia Iuni 1943 le faasaāga, ma toe mafai ai ona matou ofoina atu i le lautele ia tusi.

Tofiga Fou

I le 1943, na ou paeonia ai, ma o le tausaga na sosoo ai na ou tuua ai Mount Gambier mo le isi tofiga. Na muamua valaaulia aʻu ou te auauna mo sina taimi i le ofisa o le lālā a le Sosaiete i Strathfield. Na mulimuli mai i lena auaunaga, oʻu mauaina ai ni tofiga i taulaga laiti i le itu i saute o New South Wales ma mulimuli ane ai i Victoria i sisifo. E ui i lea, o se tasi o tofiga na sili ona avea ma taui faaoaina ia te au, o le i ai faatasi ma se faapotopotoga toatele i le aai o Melbourne. Ona ou te sau mai se tamai taulaga, na ou aʻoaʻoina ai ni mea se tele i le auauna ai i inā.

I loʻu tofiga i le vaega maualalo o le itumalo o Victoria o Gippsland, na ma faia ai ma laʻu paga paeonia o Helen Grawford ni suesuega se tele faale-Tusi Paia, ma e lei umi lava, a e faatuina loa se faapotopotoga. E telē tele le oganuu o nuu maotua o lena itumalo, ma sa na o se taavale maʻi tuai na i ai mo a ma femalagaaiga. O nisi taimi ma te tietie ai, a e o le tele lava o taimi e ma te tuleia ai. Pagā loʻu faananau mo se solofanua i lena taimi! Sa i ai taimi na ou fai atu moni ai lava e faapea: “O le a ou avatua mea uma (vaganā ai le Malo), mo se solofanua!” I le tele o taulaga o lena itumalo i aso nei, o loo i ai faapotopotoga malolosi ma Maota mananaia o le Malo.

I le 1969, na ou mauaina ai se tofiga i Canberra, le laumua o Ausetalia. Sa o se nofoaga na avea ma luʻitau toe tele ituaiga eseese o tagata e molimau atu i ai, talu ai sa masani ona ma faafesootaia tagata i ofisa e tele o sui o isi atunuu. O loo oʻu auauna ai pea i inā i le taimi nei, a e i tausaga e lei mavae tele atu sa taulai ai laʻu molimau atu i vaipanoa e i ai falegaosimea o le aai.

I le 1973, na maua ai loʻu faaeaga e auai atu i tauaofiaga tetele i le Iunaite Setete. O se tasi faaeaga tāua o loʻu olaga o le avea ma sui usufono i se tauaofiaga i le 1979 ma ou asiasi ai i Isaraelu ma Ioritana. O le asiasi i nofoaga tonu ua taʻua i le Tusi Paia ma toe manatunatu ai i mea na tutupu i inā, sa avea moni ma uunaiga malosi. Sa mafai ona ou faataʻitaʻia pe faapeī le faaopeopea i le Sami Mate, ma ona vai e masimā, ma a o matou asiasi i Petra i Ioritana, na toe maua ai loʻu avanoa ou te tietie i se solofanua. Na ou toe manatua ai aso la sa mafai ona ou oo ai i laufanua tūtū solo ma maotua ma le feau o le Malo, ona o solofanua.

Faaauau le Auaunaga Faataimi Atoa

O loʻu faanaunauga e faaauau i le auaunaga faataimi atoa e ui ua ou matua, ua faaolaolaina pea e fesoasoani faapitoa e pei o le Aʻoga o le Auaunaga Paeonia ma fono a paeonia ia e faia faatasi ma fonotaga matagaluega, faapea foi ma faalaeiauga e maua mai pea i ovasia femalagaai. Ua mafai moni lava ona ou fai atu, ua silasila ma le agalelei Ieova, i aso na ou tuua toatasi ai ua matuā mou atu lava.

Ua 87 nei oʻu tausaga, ma o le i ai i le auaunaga ia Ieova mo le 60 tausaga, ou te faalaeiauina ai isi foi atonu e soona tautatala ma matuā tutoatasi e faapea: Ia gauai pea i le taʻitaʻiga a Ieova. Tau ina ia fesoasoani mai Ieova ia tatou pulea lo tatou soona tautatala, ma talosia ia lē aunoa ona ia faamanatu mai ia i tatou, e ui tatou te ono faalogoina faalogona tuua toatasi, o le a na lē tuulafoaia lava i tatou.

[Faaopoopoga i lalo]