Ua Ou Mauaina se Oa e Silisili Lona Tāua

NA FAAMATALAINA E FLORENCE WIDDOWSON

Ina ua lata mai le po, ona ma filifili loa lea e momoe latalata i le vaitoʻa. E lē lelei lea nofoaga mo le apitaga mo ni fafine se toalua, peitai sa ma manatu, e lē afaina mo na o le po e tasi. O aʻu sa pisi e tutu, ‘i le faleie, a o Marjorie sa saunia la ma meaai.

NA FAATOʻĀ uma lava ona tutuʻi le pine mulimuli o le ma faleie, ae tau loa laʻu vaai i se mea o gaoioi mai i tua o le pogati laau uliuli. “Na e vaai atu i le pogati laau lale o gaoioi?” O laʻu valaau lea ia Marjorie.

“E leai,” o lana tali mai lea, e pei ua fefe.

“Ae, na ou vaai atu lava o gaoioi,” O laʻu eē atu lea. “Aumai ia te aʻu le titata!”

Ua ave le titata, amo ma le toʻi i loʻu tauʻau ma savali atu agaʻi i le vaitoʻa. Ou te latalata atu loa i le pogati laau, ae oso ese loa se tamaloa sa iai i tua!

“E lelei vai o le vaitoʻa i le inu?” o laʻu taumemumemu atu lea.

“Leai, e lē lelei,” o lana tali saʻeā lea, “ae a e manao i ni vaiinu, o le a ou aumaia.”

Na ou vave teena lana ofo, ma na fai si oʻu toʻa ina ua ia liliu faafuasei ma savali ese. Ma le fefe tele, na ou foi faanatinati atu loa ma taʻu ia Marjorie le mea na tupu. Na vave ona tuu i lalo le ma faleie, taai, ma ō ese loa. Mulimuli ane, na faailoa mai ia i maʻua, faatoʻā magalo mai le tamaloa lea mai le falepuipui.

E ui lava o tagata suʻe oa e masani ona momoe ai i laufanua malulu o Ausetalia i tuā i inā i le 1937, ae na avea i maʻua o ni tagata suʻe oa o se isi ituaiga. Sa ma saili mo tagata e tāua i le Atua.

Le Talaaga o Loʻu Aiga

I le selau tausaga ua mavae, sa avea ai loʻu tama ma sē e galue i uamea i le nuu laititi o Porepunkah i le aai o Victoria. Na ou fanau ai i inā i le 1895, ma ou ola aʻe ai faatasi ma oʻu tuagane e toafā e latalata i le Vaitafe o Ovens, i le auvae mauga o le Mauga o Buffalo. O oʻu mātua o ni tagata e toaaga i le Lotu Tuufaatasi, ma sa ou alu ai i le aʻoga Aso Sa sa pule ai loʻu tamā.

I le 1909, na maua ai loʻu tinā i le fatu pē a o agi se afā matautia, ma oti ai lava i lima o loʻu tamā. I le amataga lava o le 1914, na tuua ai lo matou aiga e se tasi o oʻu tuagane, ma i ni nai itula mulimuli ane, na toe avatu ai ia i matou—ua oti. Na pule lava ia i lona ola. Na matuā faateleina lo matou faanoanoa i aʻoaʻoga a le lotu e faapea, o loo faatali mai seoli mo ia talu ai o le pule i le ola, o se agasala lea e lē mafai ona faamagaloina.

Mulimuli ane i lena lava tausaga, na pa ai le Taua Muamua a le Lalolagi, ma e toalua oʻu tuagane na tusia e ō atu e tau i atunuu i fafo. O tala faanoanoa o le toto masaa ma sauaga, na uunaia ai i matou o teine talavou e toaono faatasi ai ma loʻu tamā e amata ona suesueina le tusi o Ioane i le Tusi Paia.

Mauaina o Oa Moni

Sa ia Ellen Hudson se kopi o le tusi sa tusia e Charles Taze Russell o le Time Is at Hand. O lona sogasoga mo lea tusi na taaina uma atu ai isi o le vaega. Ina ua ia iloaina o lenei tusi o se tasi o tusi e ono o le seti ua faaigoaina o le Studies in the Scriptures, ona ia auina atu lea o se tusi i le Sosaiete o Tagata Aʻoga o le Tusi Paia i Melbourne, ma talosagaina ai isi tusi o le seti. Na malilie la matou vaega matou te suesueina le tusi muamua lea o le Divine Plan of the Ages, i a matou suesuega faalevaiaso.

Seʻi manatu i lo ma olioli ma loʻu Tamā ina ua ma iloaina e leai se afi i seoli. O le fefe sa ia i maʻua ona e faapea o loo faapuapuagaina loʻu tuagane i le afi i seoli, ua aveesea. Sa ma aʻoaʻoina le upu moni e faapea o ē ua feoti, latou te lē o toe iloa se mea e pei o momoe, ma e lē o nonofo i se nofoaga e faapuapuagatiaina ai. (Failauga 9:5, 10; Ioane 11:11-14) Na filifili nisi o la matou vaega e ō e talaʻi le upu moni lea ua matou aʻoaʻoina i o matou tuaoi. Sa matou savavali i fale e latalata i ai, ae matou te faaaogāina uila vilivae ma le taavale solofanua e faaoo atu ai le feau i isi nuu i tua o le taulaga.

Ia Novema 11, 1918 i le Aso o le Sainiga o le Filemu (Armistice Day), faatoʻā ou tofo ai lava i le molimau atu i lea fale ma lea fale. E toatolu mai la matou suesuega a vaega na malaga mo le 50 maila po o le [80 kilomitaa] i le taulaga o Wangaratta e tufatufaina le sāvali o le Peoples Pulpit. I tausaga mulimuli ane, a o iai i se tofiga o le talaʻi i se tasi o oganuu maotua, na tupu ai ia te aʻu le tala o loo taʻua atu i le amataga.

I le 1919, sa ou auai ai i se tauaofiaga a Tagata Aʻoga o le Tusi Paia sa faia i Melbourne. I i inā ia Aperila 22, 1919, sa faailogaina ai loʻu tuuina atu ia Ieova e ala i loʻu papatisoga. O le faulai o meaai faaleagaga, na ou talisapaia loloto ai le oa faaleagaga o le Malo o le lagi, ma mo le faalapotopotoga faalelalolagi a Ieova.—Mataio 13:44.

Ou te leʻi foi saʻo i le fale ina ua uma le tauaofiaga, ae sa ou talia se valaaulia ina ia ma galulue faatasi ma Jane Nicholson, o se faifeau faasauatoa, mo se masina i le talaʻiga. O le ma tofiga, o le talaʻi i le au faifaatoaga ma le au failafumanu i le vaitafe o le King River. Mo ni nai tausaga e leʻi leva atu, sa avea ai lena laufanua maugā ma nofoaga na pueina ai le ata tifaga lea e faaigoaina o le Man From Snowy River.

I le 1921, na matou mauaina ai se tasi fesoasoani mo suesuega faale-Tusi Paia o le Harp of God. Ina ua amata ona faaaogāina e Tamā lenei tusi e fai ma tusi faavae o lana Aʻoga Aso Sa, na tetee le tele o mātua ma latou fai atu ia faamavae. Sa ia faia loa faapea. Mulimuli ane, na matou mauaina le tamai tusi o Hell, ma fesili faaoso naunau i lona faavaa e faapea, “O le ā Hele? O Ai o Iai i Lea Nofoaga? Pe e Mafai ona Latou Toe Ō Ese Mai Ai?” Na matuā faagaeeina Tamā i faamaoniga manino o loo aumaia i le Tusi Paia e tusa ai ma lea mataupu, ma na amata ai lava i lena taimi, ona ia tufatufaina atu ni kopi o lea tusi i lea fale ma lea fale. Na ia tufatufaina atu tusi e faitau selau, i lo matou nuu ma isi nuu latalata ane.

Malaga i Talaʻiga ma Loʻu Tamā

Mulimuli ane, na faatau e Tamā se taavale ina ia faaoo atu ai le feau o le Malo i isi tagata i isi vaipanoa. I le avea ma tagata galue i uamea, sa sili atu ai ona masani o ia i solofanua, o lea na ou avea ai la ma taavale. I le amataga o la ma galuega, ma te momoe ai mo ni po i fale talimalo. E leʻi umi ae ma iloaina e fai si taugata, ma na amata ai loa ona ma tolauapi solo.

Na faia e Tamā le nofoa i luma o le taavale ina ia mafai ona faataatia i lalo ma ou moe ai. Sa ma fauina foi se tamai faleie mo Tamā e moe ai. Ina ua mavae ni nai vaiaso o ma maumau solo, ona ma toe foi lea i Porepunkah, e toe tatala e Tamā lona fale fai uamea. E lē uma lo ma ofo tele ona o le toatele o tagata e ō mai e totogi a latou pili i loʻu tamā, ma na matuā lava ai foi le tupe mo le isi a ma malaga mo le talaʻiga lea o le a sosoo ai.

O le toatele o tagata e loto lelei, sa latou talia la ma asiasiga, ma mulimuli ane, sa latou taliaina ni suesuega faale-Tusi Paia i aiga. I le taimi nei, ua fitu faapotopotoga fou ua iai nei, ma o latou lava Maota o le Malo i le aai lea sa matou muai galulue ai faatasi ma le vaega toaitiiti lea sa iai i Porepunkah. O le mea moni, o ai e manatu faatauvaa i “le aso o mea iti”?—Sakaria 4:10.

I le 1931, na ma malaga ai ma Tamā i le toetoe lava 200 maila po o le [300 kilomita] a i auala gaoā ina ia auai i se sauniga faapitoa, lea na maua mai ai lo tatou igoa fou, “Molimau a Ieova.” Na faafiafiaina uma i maʻua i lenei igoa tutasi faale-Tusi Paia. (Isaia 43:10-12) Ua sili atu ona iloa manino ai i tatou i le igoa lenei na i lo o le igoa sa iloa muamua ai i tatou, o le “International Bible Students” (“Tagata Aʻoga Faavaomalo o le Tusi Paia”).

I se tasi aso, a o oʻu talaʻi i le taulaga o Bethanga, na ou fetaui ai i le faifeau o le Lotu Egelani. Na matuā ita tele o ia ma amata ai ona ia sailia uma tusi na matou tuuina i tagata, ma faatonuina tagata ina ia tuuina uma atu tusi ia te ia. Ina ua uma lena, ona ia taitaia lea o le susunuina o tusi i le ogatotonu o le taulaga. Peitai na toe afaina ai lava o ia i lenei gaoioiga matagā.

Ina ua uma ona ou logoina le ofisa o le lālā o le Sosaiete i le mea na tupu, na lolomiina ai se tusi e tausalaina ai le mea na faia e le faifeau. Na faia foi ni fuafuaga mo ni taavale e laʻu ai Molimau e tufatufa atu le tusi i le itumalo atoa. Ina ua ma toe asiasi atu ma Tamā i le nuu, sa sili atu ona tele tusi na tufaina atu i le taimi lea na i lo o le taimi muamua. Na matuā fia iloa e tagata o le taulaga mea o loo taʻua i lenei lomiga na “faasāina”.

O Milton Gibb, o le tagata muamua lava lea mai mātū i sasaʻe o Victoria na talia le upu moni o le Tusi Paia i la ma talaʻiga. I le va o lea asiasiga ma lea asiasiga, sa ia suesueina ai ma le maeaea lomiga uma a le Sosaiete ma te tuuina i ai. I se tasi o a ma toe asiga, na ia faateia ai i maʻua i lona faapea mai: “Ua avea nei aʻu ma se tasi o lua soʻo.”

E ui lava ua faafiafiaina i lana faaiuga, ae na ou faamatalaina i ai e faapea: “E leai, Milton. E lē mafai ona avea oe o se tasi o oʻu soʻo.”

“Ia, o aʻu la o se tasi o soʻo o Rutherford [le peresitene o le Sosaiete o le Olomatamata i le taimi lena].”

Ona ou toe faapea atu foi lea: “E leai, e lē o oe foi o se soʻo o Rutherford, ae ou te faamoemoe o se soʻo o Keriso.”

Na faamaonia le avea o Milton Gibb ma se tasi o oa e silisili lona tāua mai le toatele o i latou na faaaluina ai loʻu taimi i le sueina. O ia, ma ona atalii e toalua, o ni toeaina Kerisiano, ae o isi sui o lona aiga o ni ē e malolosi i le faapotopotoga.

Faafetaiaia o Tofotofoga Eseese

E ui lava ina sa faasāina le galuega a Molimau a Ieova i Ausetalia ia Ianuari i le 1941, ae sa faaauau pea ona matou talaʻi i le faaaogāina na o le Tusi Paia. Ae peitai ane, na faalavelaveina laʻu paeonia, po o laʻu faiva faasauatoa, ina ua valaauina aʻu ou te toe foi i le aiga e tausi loʻu tamā ua maʻi tigaina. Mulimuli ane, na ou maʻi foi ma na manaomia ai ona faia soʻu taotoga. Sa fai si tuai ona ou toe malosi, peitai sa ou iloaina le moni o le folafolaga a le Atua e faapea: “Ou te le tuua lava oe, ou te le tuulafoai lava ia te oe.” (Eperu 13:5) Na faamautinoa atili mai foi e se tasi tuafafine Kerisiano ia te aʻu e faapea: “Ia manatua Flo, e lē tuulafoaiina lava oe. Ma o oe ma Ieova e avea pea ma se vaega toatele.”

Ina ua mavae le 13 vaiaso talu ona maʻi loʻu tamā, ona maliu loa lea o ia ia Iulai 26, 1946. Sa olioli o ia i lona olaga atoa, ma ua ia te ia foi le faamoemoe faalelagi. (Filipi 3:14) O lea, i le 51 o oʻu tausaga, ua tuua ai na o aʻu, auā o le tele lava o tausaga amata o loʻu olaga, sa ma faatasi ai ma Tamā. Ia, ona ou fetaui loa lea ma lē o le a avea ma aʻu tane. Na ma faaipoipo i le 1947 ma amata ai loa ona ma paeonia. Peitai, e leʻi umi se taimi o lenei fiafiaga ona i le 1953, na maua ai loʻu toalua i se maʻi ma ua pē uma ai le isi itu o lona tino (stroke) ma oo ai ina lē toe aogā i ni feau.

Na matuā aafia lava le tautala a loʻu toalua, ma toetoe lava a lē mafai ona talanoa ma ia. O le itu lea sa sili ona faigata i lona tausiga. O le tigaina o le mafaufau e faavasega po o le ā le mea lea o loo taumafai e taʻu mai, o se faafitauli tele lenei mea. E ui lava ina ma nonofo i se nofoaga e tuufua e leai se faapotopotoga e latalata atu i ai, ae sa leʻi tuulafoaiina ai i maʻua e Ieova i na tausaga faigata. Na ou maua pea faamatalaga fou i le faalapotopotoga mai lea taimi i lea taimi, e oo foi i le faaauauina mai pea o meaai faaleagaga e ala mai i mekasini o Le Olomatamata ma le Awake! sa lē misi. Ia Tesema 29, i le 1957, na maliu ai loʻu toalua pele.

Faiva i Adelaide

Ua toe tuua nei foi na o aʻu. O le ā nei laʻu mea o le a fai? Faamata e toe talia aʻu e avea ma faifeau sauatoa ina ua uma se malologa mo le toetoe lava lima tausaga? Na talia aʻu, o lea na ou faatau atu ai loʻu fale ma amata ai se amataga fou o laʻu galuega paeonia i Adelaide, le laumua o Ausetalia i Saute. Na matuā manaomia tele paeonia i inā i lea taimi, ma sa tofia ai aʻu i le faapotopotoga i Prospect.

Ona o loʻu fefe e avetaavale i le taulaga, o lea na ou faatauina atu ai laʻu taavale ae amata ona ou toe faaaogāina se uila vilivae. Na ou faaaogāina pea le uila vilivae seia oo ina ua 86 oʻu tausaga, ma ua lauiloa ai aʻu i le aai o le “tamaitai tino iti ma lana uila vilivae lanumoana.” A o faagasolo pea le taimi, na matuā faateteleina lava loʻu fefe i taavale, o le paʻu foi i luma o laʻu uila vilivae na amata ona tete e lē aunoa. O le mea mulimuli lava na tupu, na matuā sisii ai oʻu lima i le uila vilivae, ina ua ou paʻū i se pa laau i le isi aoauli. Na ou faapea lemu ifo ia te aʻu lava, ‘Ua lava lea,’ ma toe tui loa le laa ia.

I ni nai tausaga e leʻi mamao atu, a o oʻu auai i se tauaofiaga itumalo, sa amata foi ona vaivai oʻu vae, ma mulimuli ane na faia ni oʻu taotoga se lua i sooga o oʻu suilapalapa. Na manuia loʻu taotoga, ae na toe leaga ina ua taia aʻu ma paʻū ai i lalo e se maile lapoa. Na toe manaomia ai nisi togafitiga, ma i lena taimi seia oo mai i le taimi nei, ua ou faaaogāina ai se walker e fesoasoani ia te aʻu ou te fealuai solo ai. O loo lelei pea loʻu mafaufau. E pei lava ona faapea mai se uo: “E foliga mai e lē mafai e lou tino ua matua ona ō faatasi ma lou mafaufau o loo talavou pea.”

Ina ua mavae ni tausaga, sa ou vaaia ai le ola, le faateleina, ma le vaevaeina foi o faapotopotoga i Adelaide. Ma i le 1983, ina ua 88 oʻu tausaga, na ou tuua ai Adelaide ae faatasi atu i se aiga i Kyabram i le setete o Victoria, lea ua faaalu ai nei tausaga fiafia e sefulu. O loo mafai lava ona ou auai i le faiva i le fanua; e matou te ō lava ma aʻu uo i le faapotopotoga e asiasi ia i latou o ē o loo maua pea a latou mekasini mai ia te aʻu. E matuā ō mai lava nei tagata ma le agalelei i le taavale ou te iai, ina ia mafai ai ona matou talanoa.

I le toe manatu atu i tuā i le 98 o oʻu tausaga, ou te manatuaina ai lava ma le fiafia le toatele o ē faamaoni na matou viia Ieova, ae maise lava si oʻu tamā alofa. E foliga mai o aʻu lava le tagata o loo ola pea, mai le toatele o ē faamaoni na avea ma aʻu paga i le faiva faapaeonia. Peitai, maeu se olioli o le a iai pe afai e toe faatasia ma i latou o loo iai le faamoemoe o le taui o le ola i le Malo faalelagi o le Atua, o le mea moni o se matuā oa lava e silisili lona tāua!

[Ata i le itulau 28]

Na ou papatiso ia Aperila 22, 1919

[Ata i le itulau 31]

Tumau pea loʻu fiafia e auauna ia Ieova a o latalata atu i le 100 oʻu tausaga