Molimau a Ieova i le Lalolagi Aoao—Pasili
O PASILI, o se atunuu e matuā sili ona telē i le tele o itu. I le tino mai faapea ma le faitau aofai, ua avea ai ma atunuu lona lima e aupito telē i le lalolagi. E aofia ai e toetoe lava o le ʻafa o le laueleele o Amerika i Saute ma e matuā toatele tagata e nonofo ai nai lo o isi atunuu uma o lena konetineta pe a tuu faatasi. O le vaomatua foi o Pasili, e aupito telē i le lalolagi. I totonu o lena vaomatua e tafe ai le vaitafe aupito malosi—le Amasone.
E aupito sili foi ona telē Pasili i se isi uiga. O le aofaiga o ona tagata talaʻi o le tala lelei o le Malo o le Atua, ua latalata atu i le 400,000, ma i le tausaga ua mavae, e sili atu i le 1,000,000 na auai i le Faamanatuga o le maliu o Keriso. O lea la, o lenei atunuu e tutasi a e maise lava i le galuega talaʻi o le Malo. E fai ma faataʻitaʻiga o lenei manatu, o ni mea na tutupu talu ai nei.
Auauna i le Mea o loo Tele ai le Manaomia
O Antonio ma lana avā, na la faia se filifiliga faigata e tuua o la aiga ma se galuega mautū e lelei le totogi i São Paulo, ma ō atu e auauna i le mea o tele ai le manaomia mo ni ē folafola o le Malo i le setete o Minas Gerais. Sa aofia ai i la laʻua oganuu se vaega o tagata e faigaluega i le fale e faamamā ai le suka. O le aso muamua na la molimau ai i inā, na la amataina ai ni suesuega faale-Tusi Paia se iva. E oo ane i le 18 masina, ua sili atu i le 40 suesuega na la faia!
Muamua, sa faia ai sauniga i le fale faigaluega. A e peitai, na mananao le au talaʻi fou e fia vāai i se Maota moni o le Malo. I lea, na totogi ai se pasi ina ia aveina ai tagata e toʻa 75 i le faapotopotoga e latalata ane. Na sosoo mai ai ma se tauaofiaga; e toʻa 45 o tagata aʻoga fou o le Tusi Paia na auai, ma na faatalanoaina i latou. E toʻa sefululima o i latou nei na papatisoina i lena aso. O le mea moni, na maligi ifo loimata o le fiafia!
O le kamupani pasi lava lena na faaaogaina mo malaga faapena, ma na saunia e ofisa o faagaoioia pasi ni tau faapaʻū. I le talisapaia, na ofoina atu ai e Antonio se fesoasoani mo se suesuega faale-Tusi Paia i lē e ona le kamupani pasi. Sa malie o ia e amataina se suesuega faale-Tusi Paia i lena lava afiafi po, ma na papatisoina ina ua mavae ni masina o suesuega filigā. I le uluai taimi, na tetee ai lana avā i le suesuega, a e i se taimi, na suia ai ona uiga. I le taimi nei, ua avea ai o se Molimau papatisoina a Ieova.
Ia Fepuari 1992, na faavaeina ai se faapotopotoga e toʻa 22 le autalaʻi maelega. E oo ane i le 1994, ua faateleina lenei fuainumera i le 42, faatasi ma paeonia sauatoa po o tagata talaʻi faataimi atoa o le tala lelei e toʻa 4. O le iuga, na faaiu mai Antonio e faapea: “Na iloa e i maʻua ma laʻu avā e faapea, afai ma te ‘tofotofoina Ieova,’ e pei ona taʻua i le Malaki 3:10, o le a na ‘sasaa mai ia i maʻua se faamanuiaga seia silisili ona tele.’”
Ofoina o Lomiga Faale-Tusi Paia
Atonu o se isi mafuaaga ua matuā sili ai ona telē laasaga o le galuega talaʻi i Pasili, ona e ofoina atu e Molimau lomiga faale-Tusi Paia i avanoa uma lava. Mo se faaaʻoaʻoga, na tusi atu se tasi faapotopotoga i le ofisa o le lālā o le Sosaiete o le Olo Matamata ma talosagaina ni kopi se 250 o le tusi, Questions Young People Ask—Answers That Work. Aisea ua matuā telē ai lea ota?
Na faamatalaina i le tusi e faapea: ‘O se tasi o aʻoga i le taulaga ua filifili e faaaogā lenei tusi e avea o se tusi aʻoga i se tasi o vasega. Ua faia lea faaiuga e pule o le aʻoga ona o molimau lē fuafuaina na faia e mātua o tamaiti aʻoga Molimau a Ieova ma se tasi o pule o le aʻoga. Tau ina ia faaauau pea ona faamanuia e Ieova i ana auauna a o latou saunia se faatonuga lelei i lenei tusi.’ Ioe, ma tau ina ia faaauau pea ona faamanuia e Ieova le agaigai lelei i luma o le talaʻiga o le Malo i lenei atunuu tele o Pasili.
[Pusa i le itulau 8]
FAAMAUMAUGA O LE GALUEGA I LE ATUNUU
Tausaga Faaleauaunaga 1994
TUMUTUMUGA O Ē O MOLIMAU ATU: 385,099
FAATATAUGA: 1 le Molimau i le 404 tagata
Ē NA AUAI I LE FAAMANATUGA: 1,018,210
FAATATAUGA O PAEONIA: 38,348
FAATATAUGA O SUESUEGA FAALE-TUSI PAIA: 461,343
AOFAI O Ē NA PAPATISO: 24,634
AOFAIGA O FAAPOTOPOTOGA: 5,928
OFISA O LE LĀLĀ: CESÁRIO LANGE
[Ata i le itulau 9]
O se taavale faaleotele leo na faaaogaina i São Paulo pe tusa i le 1940
[Ata i le itulau 9]
Molimau atu i le Faatoaga o Laau Totō i Rio de Janeiro
[Ata i le itulau 9]
Le ofisa o le Lālā i Cesário Lange