Taimi e Sili ona Lelei i le Lumanai

UA FAI mai se fafine: “O matou, e na o le pau la matou mea lea e maua o le tasi-leai-tasi.” A e na tali atu i ai lana uo e faapea: “E sili atu la ona leaga le mea lea ou te maua. O aʻu e na o le leai-leai-tasi.”

I nisi vaega o Aferika i Sisifo, o se talanoaga puupuu faapena e lē manaomia se faamalamalamaga. Nai lo le taumafaina o ni ʻaiga se tolu i le aso (tasi-tasi-tasi), o se tagata o loo i le vaega o le tasi-leai-tasi, o lona uiga e na o le lua ni ʻaiga i le aso e mafai ona ia gafatia—e tasi i le taeao ma le tasi i le po. Ua faamatala mai e le tama talavou lea o loo i le vaega o le leai-leai-tasi lona tulaga e faapea: “E tasi lava laʻu ʻaiga i le aso. E faatumu laʻu pusa ʻaisa i vai. Ou te ʻaiina le gari [manioka po o le tapioka] i le po a e ou te lei moe. O le auala lena o loo oʻu taulimaina ai lea tulaga.”

O le tulaga leaga lena o loo iai i le faatuputupulaia o le faitau aofai o tagata i aso nei. Ua siitai le tau o mea, a ua paʻū le aogā o tupe e faatau ai.

Na Valoia Oge

I se faasologa o vaaiga na faailoa atu i le aposetolo o Ioane, na valoia ai e le Atua tulaga faigata o loo fesagai ma le toatele i aso nei. I na mea, o le a iai oge. Ua faamatala mai e Ioane e faapea: “Ona ou vaai lea, faauta foi, o le solofanua uliuli; ua i le lima o loo tietie ai le fua faatautau.” (Faaaliga 6:5) O lenei solofanua o faatomuaga o mala ma lē o tietie ai, ua faaatagia ai oge—o le a matuā lē lava meaʻai e faasoaina atu i fua faatautau.

Ona sosoo ai lea ma le faapea mai o le aposetolo o Ioane: “Na ou faalogo foi i le leo . . . ua faapea mai, ʻO le tau o le koini o le saito o le tenari lea, o le tau o koini e tolu o le karite o le tenari foi lea.’” I aso o Ioane, o le koini o le saito, o le fua lena o le meaʻai i aso taitasi a se fitafita, ma o se tenari, o le tupe lena sa totogi mo se galuega i le aso e tasi. I lea, ua faapea mai le faaliliuga a Richard Weymouth i lenei fuaiupu: “O le totogi o le aso atoa e tasi, o se pāpā falaoa, o le totogi o le aso atoa e tolu keke karite.”—Faaaliga 6:6.

O le ā le totogi mo le aso atoa i aso nei? I le lipoti o le State of World Population, 1994, ua matauina ai e faapea: “O le 1.1 piliona tagata, pe tusa lea ma le 30 pasene o le faitau aofai o atunuu tauatiaʻe o le lalolagi, o loo ola pe tusa na o le $1.00 [Amerika] i le aso.” I lea, mo tagata matitiva o le lalolagi, o le tulaga moni, o le totogi mo le aso, tele pe itiiti, e na o se pāpāfalaoa e mafai ona faatau ai.

O le mea moni, e lē o se mea lenei e ofo ai i latou o ē e matuā matitiva. Na fai mai ma le ofo se tasi tamaloa: “Falaoa! O ai e mafai ona gafatia se tau o se falaoa? I aso nei ua avea le falaoa o se meaʻai e sili ona taugata seiloga o ni mea faapitoa ona faatoʻā faatau lea!”

E fiafia lava, e lē faapea ona o le lē lava o meaʻai. E tusa ma faamatalaga mai Malo Aufaatasi e faapea, i le sefulu tausaga ua mavae, na faateleina ai i le 24 pasene mea taumafa a le lalolagi, ua sili atu ai nai lo o le faatuputupulaia o le faitau aofai o le lalolagi. A e peitai, o lenei faatelega o meaʻai sa lei faafiafiaina ai tagata uma. Mo se faaaʻoaʻoga, o Aferika, na faaitiitia ai le fua o mea taumafa i le 5 pasene, a o faateleina le faitau aofai o tagata i le 34 pasene. O lea, e ui lava i le matuā faateleina o mea taumafa i le lalolagi aoao, a e o loo faaauau pea ona lē lava mea taumafa i le tele o atunuu.

O le lē lava o taumafa, o lona uiga o le taugata foi lena. O le leai o ni galuega, laitiiti totogi, ma le siitai o le tau o le soifuaga, ua matuā sili atu ai ona faigata ona sailia ni tupe e faatau ai mea o loo maua. Ua taʻua e le lipoti Human Development Report 1994 e faapea: “E pogai ona fia ʻaai tagata, e lē ona o le leai o ni meaʻai—a e ona o le taugata, latou te lē gafatia.”

Ua faateleina foi le leai o se faamoemoe, le atuatuvale, ma le lē mautonu. Na taʻua e Glory o se fafine e nofo i Aferika i Sisifo e faapea: “Ua lagona e tagata ua leaga aso nei, a e i le lumanai, o le a sili atu ona leaga.” Na faapea mai foi se isi fafine: “Ua lagona e tagata ua latou tulata atu i se mala. Ua latou lagona e faapea, o le a oo mai le aso e lē toe maua ai se meaʻai i le maketi.”

Na Tausia e Ieova Ana Auauna i Aso ua Mavae

Ua iloa e auauna a le Atua e faapea, e tauia e Ieova ana auauna faamaoni e ala i le tausia o o latou manaoga ma tuuina atu ia i latou le malosi e faafetaiaia ai ma le manuia tulaga faigata. O lena mautinoa i le tomai o le Atua e saunia ai mea, o le mea moni, o se vaega e matuā tāua lea o lo latou faatuatua. Na tusi mai le aposetolo o Paulo e faapea: “Auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.”—Eperu 11:6.

E tausia pea lava e Ieova ana auauna faamaoni. I le vaitaimi o se lā mala e tolu ma le ʻafa tausaga, na saunia ai e Ieova mea e ʻai mo lana perofeta o Elia. Muamua, na poloaiina ai e le Atua oreva e avatu ni areto ma aano o manu mo Elia. (1 Tupu 17:2-6) Mulimuli ane, na saunia ai faavavega e Ieova le mauaina pea o le falaoamata ma le suāuu a se fafine ua oti lana tane o lē na saunia se meaʻai ma Elia. (1 Tupu 17:8-16) I le vaitaimi lava lena o le oge, e ui i sauaga ogoogo faalotu na tuuina atu ia i latou e le Masiofo leaga o Iesepela, a e sa faamautinoa lava e Ieova ua maua e ana perofeta areto ma vai e inu.—1 Tupu 18:13.

Mulimuli ane, ina ua siomia e le tupu o Papelonia Ierusalema aposetate, o tagata sa “aai ma le atuatuvale a latou mea e ʻai ua fuatia.” (Esekielu 4:16) Sa oo ina matuā leaga le tulaga, o lea, na ʻai ai e nisi fafine tino o a latou lava fanau. (Auega 2:20) A e peitai, e ui lava sa i le falepuipui le perofeta o Ieremia ona o lana talaʻiga, a e sa silasila lava i ai Ieova ua “avatu . . . ia te ia [Ieremia] i lea aso ma lea aso se potoi areto mai le ala o e fai areto, seia uma le areto uma lava o i le aai.”—Ieremia 37:21.

Pe sa faagaloina e Ieova Ieremia ina ua uma le areto? Ma le manino lava e leai, auā, ina ua paʻū le aai ia Papelonia, na foaiina atu ia Ieremia ʻo mea e ʻai, ma se mea alofa ma tuuina atu o ia e alu’—Ieremia 40:5, 6; tagai foi i le Salamo 37:25.

E Lagolago e Ieova Ana Auauna i Aso Nei

E pei lava ona tausia e Ieova ana auauna i tupulaga ua mavae, ua faapena foi ona ia faia i aso nei, i le tausia uma o i latou i le faaletino ma le faaleagaga. Mo se faaaʻoaʻoga, seʻi manatu i le mea na tupu ia Lamitunde, o lē e nofo i Aferika i Sisifo. Ua ia faamatala mai e faapea: “Sa iai saʻu lafumoa telē lava. I se tasi aso, na ō mai ai ni tagata gaoi faaauupegaina ma gaoia le tele o moa, le afi molī faaleoleo, ma le matou tupe na iai. E lei pine lava mulimuli ane, a e mamate loa nai moa na totoe i se faamaʻi. O lena mea na faaleagaina ai laʻu pisinisi moa. E lua tausaga o oʻu taumafai e suʻe saʻu galuega, a e sa lei manuia. Sa matuā faigata lava le tulaga o mea, a e na tausia i matou e Ieova.

“O le mea na fesoasoani ia te au e faafetaiaia ai taimi faigata, o loʻu iloaina lea e faapea, e faataga e Ieova mea e tutupu e faaleleia atili ai i tatou. Sa ma tausisia pea ma laʻu avā la ma masani o le faia o le suesuega faale-Tusi Paia a le aiga, ma sa fesoasoani moni lava lenei mea ia i maʻua. O le tatalo, sa avea o se puna sili o le malosi. I nisi taimi sa oo ai ia te au le lagona ua ou lē fia tatalo, a e ina ua ou tatalo, sa oo ia te au se faalogona lelei.

“I lena vaitaimi faigata, sa ou iloa ai le tāua o le mafaufau loloto i le Tusi Paia. Sa tele ina ou mafaufau i le Salamo 23 lea e tautala e uiga ia Ieova e faapea o lo tatou Leoleo Mamoe. O le isi mau na faamalosiau ia te au, o le Filipi 4:6, 7, lea o loo faasino i le ʻfilemu mai le Atua e silisili lava i mea uma e mafaufau i ai.’ O le isi fuaitau na faamalosia aʻu o le 1 Peteru 5:6, 7, lea e faapea mai: ʻO le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou.’ O nei mau uma na fesoasoani ia te au i na taimi faigata. Pe a e mafaufau loloto i ai, ona mafai ai lea ona suia ou mafaufauga na e pogai ai le loto mafatia.

“I le taimi nei, o lea ua ou toe faigaluega, a e o le mea moni, ou te fai atu, o loo tumau pea ona faigata le tulaga o mea. E pei lava ona valoia mai i le Tusi Paia i le 2 Timoteo 3:1-5, o loo ua tatou ola i ʻaso e gata ai,’ ua faailogaina e ʻaso faigata.’ E lē mafai ona tatou suia le mea o fai mai ai le Tusi Paia. O lea, aua le faatalitalia le olaga e faapea o le a faigofie. A e peitai, ou te lagona o loo fesoasoani le agaga o Ieova ia te au ina ia mafai ona ou faafetaiaia.”

E ui o loo tatou ola i aso faigata, a e o i latou e faatuatua ia Ieova ma lona Alo Tupu, o Iesu Keriso, o le a lē faamāina. (Roma 10:11) Ua faamautinoa mai foi i tatou e Iesu e faapea: “O le mea lea ou te fai atu ai ia te outou, aua neʻi outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. E le sili ea le ola i le mea e ʻai, ma le tino i le ofu? Ia outou vaavaai i manu felelei; latou te le lulu saito, pe selesele, pe faaputu i fale saito, a e fagaina i latou e lo outou Tamā o i le lagi. E le sili ea lo outou lelei i lo latou? O ai ea so outou na te mafaia i lona popole ona faateleina le umi o lona olaga i le kupita e tasi? Se a foi le mea tou te popole ai i ofu?”—Mataio 6:25-28.

O le mea moni, o na fesili, e mafai ona suesue ai le loto i nei aso faigata. A e na faaauau mai Iesu i nei upu e faamautinoa ai: “Ia outou mafaufau i lautalotalo o le vao, pe faapefea ona tupu; latou te le galulue, latou te le milo foi; a ou te fai atu ia te outou, o Solomona ma lona matagofie tele na le ofu o ia pei o le tasi o na mea. Afai e faapea ona faaofuina e le Atua le vao o le fanua, o ola mai i le asō, a e lafoina a taeao i le ogaumu; e le sili ea ona faaofuina o outou e faatuatua itiiti? O lenei, aua neʻi outou popole, ma faapea ane. Ni a mea tatou te aai ai, ni a foi mea tatou te inu ai, ni a foi mea tatou te oofu ai? auā o mea uma ia ua sailia e nuu ese. Auā ua silafia e lo outou Tamā o i le lagi e aoga ia mea uma ia te outou. A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.”—Mataio 6:28-33.

Taimi e Sili ona Lelei i le Lumanai

E iai faamaoniga e faapea, i le tele o vaega o le lalolagi, o le a faaauau ai pea ona sili atu ona leaga le tulaga ōia o le tamaoaiga ma le vafealoai. A e peitai, ua iloa e tagata o le Atua o nei tulaga e lē tumau ona iai. O le pulega mamalu a le tupu o Solomona, ua faamatalaina ai le pulega amiotonu a le Tupu e silisili atu nai lo Solomona, o lē o le a pule i le lalolagi aoao. (Mataio 12:42) O lena Tupu, o Keriso Iesu, le “Tupu o tupu ma le Alii o alii.”—Faaaliga 19:16.

O le Salamo 72, lea na muai faataunuuina e faatatau i le tupu o Solomona, ua faaatagia ai le pulega mamalu a Iesu Keriso. Seʻi manatunatu i nisi o mea ofoofogia ua ia valoia e faatatau i le lumanai o le lalolagi i lalo o le pulega a le Tupu o Keriso.

Tulaga Toafilemu i le Lalolagi Aoao: “O lana nofoaiga e tupu olaola mai ai le ua amiotonu; e manuia tele ai, seia leai se masina. E pule foi o ia e pau mai i le tasi sami e oo atu i le tasi sami; e pau mai le vaitafe e oo atu i tuluʻiga o le lalolagi.”—Salamo 72:7, 8.

E Manatu Mamafa i Ē Faatauvaa: “E laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo; e silisili foi o latou toto i lona manatu.”—Salamo 72:12-14.

O le a Anoanoai Mea Taumafa: “O le a tele le saito i le laueleele; o le a fau ma soloi i tumutumu o mauga.”—Salamo 72:16, NW.

O le a Tumu le Lalolagi i le Mamalu o Ieova: “Ia faafetaia Ieova le Atua, o le Atua o Isaraelu, na o ia lava na te faia vavega. Ia viia lona suafa mamalu e faavavau lava; ia tumu foi le lalolagi uma i lona mamalu.”—Salamo 72:18, 19.

O lea, e mautinoa lava e iai taimi e sili ona lelei i le lumanai.