Mativa e Ui Ina Mauoa—E Mafai Faapefea?

I senituri ua mavae, na tatalo ai se tagata poto ina ia ʻaua neʻi mativa o ia. Aisea ua faia ai sea talosaga? Ona o lona mataʻu ina neʻi avea le mativa ma pogai o ni uiga ma ni gaoioiga e ono faaleagaina ai la la faiā ma le Atua. Ua iloatino lenei mea i ana upu: “Ia e fafaga mai ia te au i ni mea e ʻai e tatau ma aʻu; . . . ina neʻi ou mativa foi, ma ou gaoi, ma ou taʻufuaina le suafa o loʻu Atua.”—FAATAOTO 30:8, 9.

PO O le uiga o lenei mea e lē mafai e se tagata mativa ona auauna faamaoni i le Atua? O le mea moni e leai! I le gasologa o le talafaasolopito, e lē mafaitaulia auauna a Ieova le Atua na tutumau pea i le faamaoni ia te ia e ui lava i tulaga faigata na oo ia i latou ona o le mativa. I lea, ua alofa ai Ieova ia i latou o ē faatuatua atu ia te ia ma tausia i latou.

Tagata Faatuatua Anamua

Na oo foi le aposetolo o Paulo i le tulaga mativa. (2 Korinito 6:3, 4) Sa ia faamatalaina mai foi se ‘faapotopotoga’ o uluai Kerisiano o molimau faamaoni, o nisi o i latou “na feoai solo ma oofu i paʻu mamoe ma paʻu ʻoti; o mativa i latou, . . . na feoai solo i latou i vao, ma mauga, ma ana, ma lua i le eleele.”—Eperu 11:37, 38; 12:1.

O se tasi o nei tagata faatuatua, o le perofeta lea o Elia. I le taimi o le la mala e tolu ma le ʻafa tausaga, na saunia ai e lē aunoa e Ieova meaʻai mo ia. Muamua, na aauina atu e le Atua oreva e avatu areto ma aano o manu mo le perofeta. (1 Tupu 17:2-6) Mulimuli ane na saunia ai faavavega e Ieova meaai i le faatumuina pea o le falaoamata ma le suauu lea na saunia ai e se fafine ua oti lana tane meaai mo Elia. (1 Tupu 17:8-16) Sa lē o se meaai e faigata ona saunia, ae sa mafai ona ola ai le perofeta, le fafine, ma lana tama.

Na faapena foi ona tausia e Ieova le ola o le perofeta o Ieremia i taimi faigata tau tamaoaiga. Na faasaoina Ieremia ina ua siomia e Papelonia Ierusalema, a o “aai ma le atuatuvale [e tagata] a latou mea e ʻai ua fuatia.” (Esekielu 4:16) Mulimuli ane, na oo ina matuā faateteleina le matautia o le oge, o lea na ʻai ai e nisi fafine tino o a latou lava fanau. (Auega 2:20) E ui lava ina tuuina Ieremia i le falepuipui ona o lona talaʻi atu ma le lē fefe, ae sa faamautinoa lava e Ieova ua avatu ia te ia i lea aso ma lea aso “se potoi areto . . . seia uma le areto uma lava o i le aai.”—Ieremia 37:21.

O lea, o Ieremia sa pei o Elia, sa itiiti ana meaai. E lē o taʻu maia e le Tusi Paia ia i tatou po o ā mea na ʻai e Ieremia ae pe faafia foi ona ʻai ina ua oge Ierusalema. Ae peitai, ua tatou iloa na fafagaina o ia e Ieova ma na faasaoina o ia mai lena taimi sili ona leaga o le oge.

I aso nei, o loo iai le oge i tuluʻiga uma o le lalolagi. E tusa ai ma se faamatalaga mai Malo Aufaatasi, o le tulaga sili ona leaga o le mativa, o loo iai lea i Aferika. Na taʻua i se faamatalaga na tuuina atu e Malo Aufaatasi mo faasalalauga o tala fou i le 1996 e faapea: “O le ʻafa o tagata Aferika uma o loo matitiva.” E ui lava i le faateleina o tulaga faigata tau tamaoaiga, ae o loo faatuputupulaia pea le faitau aofai o tagata Aferika o loo faatatauina mataupu silisili o le Tusi Paia i o latou olaga ma o loo auauna ma le faamaoni i le Atua, i le mautinoa o le a ia fafagaina i latou. Seʻi manatu i ni faaaoaoga mai se isi vaega o lo tatou lalolagi tumu i faalavelave.

Tausisia o le Faamaoni

O Mikaele,a o sē e nofo i Nigeria, o ia o se fai faatoaga e toaono lana fanau e tausi. Fai mai a ia: “E faigata tele ona e tausia le faamaoni pe afai e leai ni au tupe e tausi ai lou aiga. Ae peitai, pe a tofotofoina aʻu ina ia ou lē faamaoni, ou te faamanatu ifo ia te au lava upu o i le Efeso 4:28, lea o loo faapea mai: “O lē gaoi aua neʻi toe gaoi, a e lelei ina faamalosi o ia i galuega a ona lima i mea aoga.” O lea, pe a oo mai faaosoosoga ia te au, ou te fesili ifo faapenei ia te au lava, ‘Pe na ou galue mo lenei tupe?’ ”

Ua faaopoopo mai Mikaele e faapea: “Seʻi fai ma faaaoaoga, a o oʻu savali atu i le auala i se tasi aso, sa ou vaaia ai se ato taʻitaʻi o paʻū mai i tua o se pasika. Sa lē mafai ona ou taofia le tagata sa tietie i le pasika, o lea na ou tago ai i le ato ma iloa ai sa tumu i tupe! I le faaaogaina o le pepa e faailoa ai le igoa o le tagata lea sa iai i totonu o le ato, na ou iloa ai lē e ona le ato ma toe faafoi atu ai ia te ia.”

Tauivi ma Mafatiaga

Na faapea mai se tagata i Aferika i Mātū: “O le oo i se tulaga mativa, ua pei lava o se tagata ua paʻū i se lua loloto, ua na ona mafai ona vaavaai aʻe i luga i le malamalama i tagata o loo feoai solo, ae ua leai se leo e mafai ai ona alaga atu mo se fesoasoani, po o se apefai e aʻe ai i luga.” E lē o se mea e ofo ai e faapea, o le mativa e masani ona aumaia ai faalogona mafatia ma le lē mautonu! E oo lava i auauna a le Atua, ua mafai ona vaai atu i oa a isi tagata ma amata ai ona mafaufau e faapea, e leai se aogā e ola ai i se olaga faamaoni. (Faatusatusa i le Salamo 73:2-13.) E mafai faapefea ona faafetaiaia na lagona?

O Peteru, o se tagata i Aferika i Saute, na mālōlō o ia ina ua mavae le 19 tausaga na tautua ai i le malo. I le taimi nei, o loo ola o ia i sina penisione laitiiti. Ua taʻua e Peteru e faapea: “Pe a oo mai taimi o le loto vaivai, ou te manatuaina lava mea na ou faitau ai i le Tusi Paia ma lomiga a le Sosaiete o le Olo Matamata. Ua toeitiiti lava ona mavae atu lea o lenei faiga tuai, ma o loo tatou faatalitali atu i se faiga o mea e sili atu ona lelei.

“Ou te mafaufau foi e uiga i le 1 Peteru 5:9 lea o loo faapea mai: ‘Ia outou tetee atu ia te ia [Satani], o mausali outou i le faatuatua, ina ua outou iloa o loo oono lo outou au uso o i le lalolagi i ia lava mea tiga.’ O lea e lē na o aʻu o mafatia i mea faigata. O nei faamanatuga ua fesoasoani ia te au e faatea ese ai manatu e faalotovaivaia ma mafatia ai.”

Ua faaopoopo mai Peteru, “E lē gata i lea, e ui lava ina faia e Iesu le tele o vavega a o iai i le lalolagi, ae na te lei faamauoloaina lava se tasi i le itu faaletino. Aisea la o le a ou faatalitalia ai o ia e na te faamauoloaina aʻu?”

Le Mana o le Tatalo

O le faalatalata atu ia Ieova le Atua i le tatalo, o le tasi lea o auala e faafetaiaia ai mafaufauga sese. Ina ua avea Maria o se tasi o Molimau a Ieova i le 1960, na tuulafoaiina ai o ia e lona aiga. E lei faaipoipo ma ua 50 nei ona tausaga, ua fai si ona vaivai ma e lē tele ni ana mea faitino. E ui i lea, o loo maelega pea o ia i le faiva faa-Kerisiano.

Fai mai Maria: “Pe a ou lagona le loto vaivai, ou te tatalo atu ia Ieova. Ua ou iloa e leai se tasi e sili atu ona fesoasoani mai ia te au nai lo o ia. Ua ou iloa afai e te faatuatua ia Ieova, e fesoasoani mai o ia ia te oe. Ou te manatua pea lava nei upu a le tupu o Tavita ia o loo maua i le Salamo 37:25: ‘Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.’

“Ou te maua foi faalaeiauga mai mea na tutupu i olaga o uso ma tuafāfine matutua faaleagaga na o loo faamatalaina mai i Le Olomatamata. Na fesoasoani Ieova le Atua ia i latou, o lea ua ou iloa ai o le a faaauau foi ona ia fesoasoani mai ia te au. Ua ia faamanuia si aʻu galuega faatauvaa o le faatauina atu lea o taumafataga e faia i le manioka, ma ua mafai ai ona maua mea ou te manaomia i aso taitasi. I nisi taimi pe a matuā leai lava saʻu tupe ma ua ou tau mānatu po o le ā se mea o le a fai, e auina mai ai e Ieova se tasi o se na te tuuina mai ia te au se meaalofa ma faapea mai, ‘Tuafafine, avatu le mea lea.’ E lei faaletaulauina lava e Ieova loʻu faamoemoe.”

Le Tāua o le Suesueina o le Tusi Paia

E faatāua e Molimau a Ieova le suesueina o le Afioga a le Atua, le Tusi Paia, e oo lava i tagata matitiva o loo auaufaatasi ma i latou. O Ioane e 60 ona tausaga, o loo auauna o se paeonia (o se tagata talaʻi faataimi atoa o le Malo) ma o se auauna o le faiva i le faapotopotoga. E nofo o ia i se fale fogafale lua ua toeitiiti lava masofa, e toʻa 13 aiga e nonofo faatasi ai. O lona potu, o se vaega o le auala e ulu atu ai i totonu i le fogafale muamua, ua puipuia i laupapa. I lea potu, e iai ni nofoa tuai se lua ma se laulau o loo faaputu ai tusi o suesuega faale-Tusi Paia. E moe o ia i se papa laufala.

Sa masani ona maua e Ioane le tālā e tasi i le aso mai le faatauina atu o falaoa, ae ina ua faasaina le aauina mai o falaoamata i le atunuu, ona taofia ai foi lea o lenei alā tupe e ola ai. Fai mai a ia: “Ou te iloa le matuā faigata tele o mea mo aʻu i nisi taimi, ae e faaauau pea ona ou paeonia. O Ieova lea na te tausia aʻu. Ou te faia so o se galuega e mafai ona ou maua, ma ou te lē faalagolago atu i se tagata e aumaia ni mea mo aʻu pe fafaga aʻu, e ui lava e matuā agalelei ma fesoasoani uso i le faapotopotoga. E latou te fesoasoani mai ia te au e suʻe saʻu galuega ma i nisi taimi e latou te aumai ni meaalofa tautupe ia te au.

“Ou te faaavanoa taimi e faitau ai le Tusi Paia ma lomiga a le Sosaiete o le Olo Matamata. E fai aʻu suesuega i le taeao po lava a o toafilemu le fale, ma faitau le Tusi Paia i se taimi mulimuli ane o le po pe a ola mai le eletise. Ou te iloa e tatau ona ou tausisi pea i aʻu suesuega totino.”

Toleniina o le Fanau mo le Ola

O Tanielu, ua maliu lana avā, ma e toaono lana fanau. I le 1985, na vāea ai o ia mai le galuega na ia faigaluega ai mo le 25 tausaga, ae na maua sana galuega e avea o se faatauoloa. Fai mai a ia: “E matuā faigata le olaga tautamaoaiga mo le aiga. I le taimi nei e na o le tasi se ʻaiga i le aso e mafai ona matou maua. I se tasi taimi, e tolu aso matou te lei ʻaai ai. E na o vai sa mafai ona matou inuina e matou te ola ai.”

O loo auauna Tanielu o se toeaina o le faapotopotoga. Fai mai o ia: “E lē tāitai ona ou misia sauniga faa-Kerisiano, ma ou te toaga pea i oʻu tofiga faatiokarate. E so o se galuega lava e fia faia i le Maota o le Malo, e mautinoa lava ou te iai. Ma pe afai e oo ina faigata tulaga o mea, ou te faamanatu mai upu a Peteru ia Iesu, o loo faamauina i le Ioane 6:68: ‘Le Alii e, a matou o ea ia te ai?’ Afai ou te lē auauna ia Ieova, o fea ou te alu i ai? Ua faatumauina foi loʻu maumauai i upu a Paulo i le Roma 8:35-39 auā o loo faaalia ai i na upu e faapea, e leai se mea e mafai ona vavaeeseina mai i tatou mai le alofa o le Atua ma Keriso. O le uiga lenei ou te totoina i laʻu fanau. Ou te taʻu atu pea ia te i latou e lē tatau lava ona matou tuua Ieova.” O le maelega o Tanielu faatasi ma le suesuega faale-Tusi Paia faifai pea a le aiga, ua avea o se taaʻiga mautinoa i lana fanau.

Le Agaga o le Foai Atu

Atonu e manatu se tasi e faapea, o i latou o ē o ola i ni olaga matuā matitiva, o le a faigata ona latou faia ni foai tauofo tautupe e lagolagoina ai manaoga o le Malo. Ae e leai, e lē o le tulaga lena. (Faatusatusa i le Luka 21:1-4.) O nisi o Molimau i Ghana o la latou galuega autū o le faia o togalaau ʻaina e maua ai tupe e ola ai, e latou te vavaeeseina se vaega o lo latou fanua e faaaogaina mo le faaauilumaina o manaoga o le Malo o le Atua. Pe a faatauina atu fua o lena vaega o lo latou laueleele, ona faaaogaina lea o le tupe mo na o lena lava fuafuaga, e aofia ai foi le faia o meaalofa tauofo i lo latou Maota o le Malo o Molimau a Ieova.

O Ioana o lē e nofo i Aferika Tutotonu, o se paeonia. I le tausia o lana tane e pē le tino ma le isi toafā o ē na te tausia, e na te faatauina atu ai falaoa. Ina ua manaomia e le faapotopotoga lea e auai atu i ai ni nofoa mo le Maota o le Malo, na filifili ai loa le aiga o Ioana e foai faameaalofa atu a latou tupe uma na iai. O lea, na leai ai se tupe na totoe ia i latou. Ae peitai, i le aso na sosoo ai, o se mea e latou te lei faatalitalia, na totogi ai e se tasi se aitalafu ua leva ona iai, ma avatu ia i latou se tupe e lei faamoemoe e toe maua mai!

Ua fiafia Ioana ma e lei popole naua o ia e uiga i tupe. “Ou te faamatala atu loʻu tulaga ia Ieova i le tatalo, ona ou alu loa lea i le faiva i le fanua. Ua matou iloa e itiiti lava se faamoemoe mo ni taimi e sili atu ona lelei i lenei faiga o mea. Peitai ua matou iloa o le a aumaia e Ieova mea o tatou manaomia.”

Faaalia le Filigā

Ua iloga Molimau a Ieova i lo latou fealofani. (Ioane 13:35) O i latou e iai tupe e fesoasoani i o latou uso Kerisiano o ē o loo matitiva. E masani lava ona oo mai lenei mea i se auala faameaalofa, ma i nisi taimi e auala mai o se fesoasoani e ala i se galuega.

O Mareko, e nofo i Congo, e mafatia i le maʻi o le lepela. Ua faaleagaina uma ai ona tamatamai vae ma tamatamai lima. E savali o ia i ni tootoo. Ina ua filifili Mareko e auauna ia Ieova, sa ia faia ni suiga tetele i lona olaga. Nai lo o le aisi mo meaai e pei ona sa ia faia ai muamua, sa amata ona ia totō ni mea mo ana lava meaai. Sa ia faia foi ni piliki faufale, ma faatau atu.

E ui lava i le lē atoatoa o lona tino, ae sa galue pea ma le filigā Mareko. Mulimuli ane, sa mafai ai ona ia faatauina mai se fasi fanua ma fau ai se fale faatauvaa. I aso nei, ua auauna ai Mareko o se toeaina o le faapotopotoga ma e matuā faaaloalogia o ia i le aai o loo ia nofo ai. Ua fesoasoani atu nei foi o ia i isi tagata matitiva.

O le mea moni, i le tele o nofoaga e matuā faigata ona maua ai ni galuega. Na tusi mai se toeaina Kerisiano o lē o loo galue i ofisa o le lālā o le Sosaiete o le Olo Matamata i Aferika Tutotonu e faapea: “O le toatele o uso iinei, e leai ni galuega. E tauivi nisi e faia ni a latou lava galuega, ae faigata foi lena mea. Ua manatu le toatele e faapea, ona o le a pagatia lava i latou e tusa lava po o ā mea latou te faia, o le a latou faataulagaina mea faitino i le avea o ni faifeau paeonia. I le faia o lena mea, ua iloa ai e le toatele ua matuā anoanoai faamanuiaga ua latou maua, nai lo o le faia o se galuega e laitiiti po o le leai foi o se totogi.”

E Tausia e Ieova Ona Tagata

Na fetalai Iesu e uiga ia te ia lava: “E fai lua o alope, e fai foi mea e momoe ai manu felelei; a o le Atalii o le tagata, e leai se mea e moe ai o ia.” (Luka 9:58) Na faapena foi ona tusi mai le aposetolo o Paulo: “Ua oo mai i lenei lava itu aso, ua matou fia aai, ma fia inu, ma ua le lavalavā, ma taufaituʻiina, ma maumau solo.”—1 Korinito 4:11.

Sa filifili uma Iesu ma Paulo e ola i ni olaga e faatapulaa le tamaoaiga ina ia mafai ai ona faia atoatoa la la faiva. E toatele Kerisiano i aso nei e matitiva ona e leai se isi mea ua latou filifilia. Ae peitai, ua latou faatatauina mataupu silisili o le Tusi Paia i o latou olaga ma auauna ai ma le maelega i le Atua. Ua latou iloa e alofa faapelepele Ieova ia i latou a o latou tofo i le faamaoni o le faamautinoaga a Iesu e faapea: “A ia outou muai saili le malo ma lana amiotonu; ona faaopoopoina atu lea o ia mea uma [mea faitino] ia te outou.” (Mataio 6:25-33) E lē gata i lea, o nei auauna matitiva a le Atua, ua latou mautinoa e faapea “o le faamanuia a Ieova, o lea e faatamaoaiga aʻi.”—Faataoto 10:22.

[Faaopoopoga i lalo]

[Pusa i le itulau 6]

O Ai ‘Ē Anaana i le Upu’?

E TUSA o se palota e faaalia ai manatu o tagata lautele i ni mataupu patino (Gallup poll) sa faia i le 1994, e 96 pasene o tagata Amerika na faapea mai “e talitonu i le Atua po o se agaga o loo iai i mea uma.” Ua faapea mai le U.S.News & World Report: “E pito sili atu foi ona tele lotu pe a faatusatusa i le toatele o tagata i le Iunaite Setete nai lo se isi lava atunuu o le Lalolagi.” E ui lava i na faafoliga e peiseai e mamalu, ae ua faapea mai lē na ia amataina le palota, o George Gallup, Jr.: “O le mea moni lava ia e lē mafaafitia, o le toatele o tagata Amerika latou te lē iloa mea o loo latou talitonu i ai, po o le mafuaaga foi ua latou talitonu ai i na mea.”

Ua faaalia foi i faamaumauga faafuainumera e faapea, o loo iai se eseesega tele i talitonuga faalotu a le toatele o tagata ma a latou gaoioiga. Mo se faataitaiga, ua faapea mai le tusitala o Jeffery Sheler: “Ua matauina e i latou o loo suesue i mataupu tau i vafealoai o tagata e faapea, o nisi o vaipanoa e sili ona tele ai solitulafono i le atunuu o loo avea foi ma vaipanoa e malosi ai le faamamaluina o talitonuga ma faiga faalotu.”

E lē o se mea lenei e tatau ona maofa ai. Aisea? Auā i tuā lava i le uluai senituri, na lapataia ai e le aposetolo o Paulo ona uso Kerisiano, ina ia faaeteete ia i latou o ē “taʻu ane ua latou iloa le Atua, a e faafiti ia te ia i a latou galuega.” (Tito 1:16) Na taʻu atu foi e Paulo i le talavou o Timoteo e faapea, o “aso e gata ai” o le a mataulia i tagata o ē “ua peiseai ua amio Atua, a o le mana ua i lea mea ua latou teena.”​—2 Timoteo 3:1, 5, LT.

Peitai ane, e faia e Kerisiano moni le mea sili latou te mafai, ina ia usiusitai atu ai i le poloaiga a Iesu Keriso e “o atu e fai nuu uma lava ma soo.” (Mataio 28:19) I lenei auala ua ‘avea ai i latou ma ē anaana i le upu, ae lē na ona faalogologo i ai.’​—Iakopo 1:22.

[Ata i le itulau 7]

E faatāua e tagata i le lalolagi aoao le suesueina o le Tusi Paia