Molimau a Ieova i le Lalolagi Aoao—Initia

INITIA! O lenei vaega tele o se konetineta, ua avea ma aiga mo le toʻa 1 mai tagata uma e toʻa 6 o loo nonofo i lenei paneta. A fuafua atu i ai, e sili atu i le 1,000 gagana ma kalama eseese e tāutala ai le toatele o tagata eseese o loo nonofo i lenei atunuu e tele ona vala eseese. O tagata, e toatele lava e lotu Hinitu, e 83 pasene i latou, a o le 11 pasene o Musalimi, e iai faatasi ma tagata lotu Sikhs, o tagata lotu Puta, o tagata lotu Jains, ma le vaega mulimuli ua faia ae ia i latou ua faapea mai o Kerisiano.

I tausaga na seʻi mavae atu, ua olioli ai Molimau a Ieova i Initia ona o le taulau mataina. Ua latou maua tagata e pei o ni mamoe o ē sa loto naunau e tutū mausalī i le itu o le Malo o Ieova, e ui lava i omiga eseese ma teteega.

E mo se faaaʻoaʻoga, o se teine i se aiga lotu Hinitu sa maua i le faamaʻi pipili a o laitiiti. O mafatiaga na oo ia te ia na māfua ai ona ia mafaufau i le Atua ma le uiga o le olaga. Sa saili o ia i le tele o lotu mo se tali, ae sa leai se mapusaga na maua. O le iuga, na lē toe iai sona faatuatua i le lotu, ae na tumau pea lona faatuatua i le Atua.

I le taimi lena, na feiloai ai ni Molimau se toalua ma lenei teine i la la faiva mai lea fale i lea fale. Ua ia toe manatua e faapea, “Sa ootia aʻu ma maligi oʻu loimata ina ua la faitauina mai le Faaaliga 21:4.” Sa ia talia le tele o lomiga a le Sosaiete o le Olo Matamata ma malie loa e faia se suesuega faale-Tusi Paia i le aiga e ui lava i le tetee o lona tinā. Sa faia e le teine le tele o suiga i lona olaga, faafetaiaia ma le lototele teteega mai ona aiga, ma avea o se Molimau papatisoina. Fai mai a ia: “E tele lava ni suiga ua ou faia, ma e matuā faigata lava. Ae na faatasi mai pea Ieova le Atua ia te au ma tuuina mai ia te au le filemu sili ma le olioli.”

Tu Mausalī mo le Tapuaiga Mamā i le Aʻoga

Na faatonuina se tuafafine laitiiti e lona faiaʻoga ina ia alu i le Lotu Katoliko faatasi ma isi tamaiti o le vasega. Sa teena ma le faaaloalo e le tuafafine i le faapea atu, o ia o se tasi o Molimau a Ieova, ma o le a lē tapuai o ia i so o se tasi po o se isi lava mea e ese ai nai lo o Ieova. Na fai atu le faiaʻoga, afai e ō uma tamaiti i le lotu, e alu ai foi ma ia. Ae na tu mausalī le tuafafine ma faapea atu, talu ai o i latou ia e ō i le lotu o le a lē tatalo ia Ieova, na te lē iloa la se mea o le a alu ai fua o ia i inā.

Ona o le tu mausalī o le teine, sa fia iloa atili ai e lona faiaʻoga ona talitonuga. O lea, i le aso na sosoo ai na avatu ai e le tuafafine ia te ia se mataupu i Le Olomatamata e uiga i le tapuaiga ia Ieova. I le fiafia i mea na ia faitauina, na faataga ai o ia e le faiaʻoga e lē aafia i mataupu uma faalelotu i le aʻoga. Sa mafai e le tuafafine ona tufaina atu le sefulu mekasini i lona faiaʻoga faapea ma isi faiaʻoga.

Tauia le Usiusitai i le Tulafono a le Atua e Faatatau i le Toto

Talu ai nei, na pepesi ai se faamaʻi vevela e māfua i siama ninii i nisi vaega o le setete o Kerala. O lenei faamaʻi e matuā faaleagaina ai lava fatugaʻo ma iu ai ina manaomia ona faamamā le toto. E masani lava ona faia ai ni tuigā toto. I se tasi aai, e 14 tagata na taofia i le falemaʻi ona o lenei faamaʻi. O se tasi o nei tagata mamaʻi, o se Molimau, o se toeaina i le faapotopotoga o lea lava vaipanoa. Na taʻu atu ia te ia e faapea e na o le tuigā toto lava le togafiti lea o loo mafai ona maua. Na faamatala atu e le toeaina ona talitonuga faale-Tusi Paia ma tu mausalī ai e ala i le teena o le toto. (Galuega 15:28, 29) Ina ua mavae le tele o ni finauga, na faapea atu fomaʻi o le a oti o ia ona o lona teena o le tuigā toto.

O isi tagata mamaʻi e toʻa 13 na faia ni tuigā toto. O se mea e faanoanoa ai, ona na maliliu uma i latou ina ua mavae ni nai aso. E na o le uso lava na sao mai ai! Na matuā maofa lava tagata maualuluga o le falemaʻi. Na matuā faagaeetia le aufaigaluega a le falemaʻi ona o le asiasi atu i ai e lē aunoa o tagata o le faapotopotoga. Ina ua teʻa o ia mai le falemaʻi, na alu atu le uso e faafetai i fomaʻi, ae na latou faapea atu: “Aisea e te faafetai mai ai ia i matou? Faafetai i lou Atua o Ieova. O Ia na laveaiina oe. Faamolemole ia e tatalo foi i lou Atua o Ieova mo i matou.”

[Pusa i le itulau 24]

FAAMAUMAUGA O LE GALUEGA I LE ATUNUU

Tausaga Faaleauaunaga 1994

TUMUTUMUGA O Ē O MOLIMAU ATU: 14,271

FAATATAUGA: 1 le Molimau i le 65,266 tagata

Ē NA AUAI I LE FAAMANATUGA: 38,192

FAATATAUGA O PAEONIA: 1,780

FAATATAUGA O SUESUEGA FAALE-TUSI PAIA: 12,453

AOFAI O Ē NA PAPATISO: 1,312

AOFAIGA O FAAPOTOPOTOGA: 410

OFISA O LE LĀLĀ: LONAVLA

[Ata i le itulau 25]

Ofisa o le lālā, Lonavla

[Ata i le itulau 25]

Molimau atu e fesootai ma le tauaofiaga o le “Tala Lelei e Faavavau” sa faia i le 1963

[Ata i le itulau 25]

Talaʻi atu i se tagata o loo faatau atu ni ana oloa, i tua atu o le Red Fort in Delhi