Nofo i le “Aai o Sulufaiga” ma Ola Ai!

‘E tatau ona nofo pea o ia i le aai o sulufaiga, seia oti le ositaulaga sili.’—NUMERA 35:28.

1. O ai Lē e Taui ma Sui i le toto, ma o le ā le gaoioiga o le a toeitiiti nei ona ia faia lea?

UA TOEITIITI ona osofai mai lea o Lē Taui ma Sui o le toto a Ieova o Iesu Keriso. Faatasi ai ma ana autau o agelu, o Lē Taui ma Sui o le a toeitiiti ona gaoioi mai lea faasaga ia i latou o ē nofosala i le toto e lē o salamō. Ioe, o le a galue Iesu o se Faaoosala a le Atua i le “puapuaga tele” lea ua matuā lalata tele mai. (Mataio 24:21, 22; Isaia 26:21) Ona lē mafai ai lea e le tagata ona sao mai i iuga o lo latou nofosala i le toto.

2. Ua na o le ā le nofoaga moni o sulufaiga, ma o ā fesili e manaomia ona taliina?

² O le auala e saogalemu ai o le iai lea i le ala e agai atu lea i le ata faaonaponei o le aai o sulufaiga, ma tamoe atu i ai se tasi mo le faasaoina o lona ola. Pe afai e taliaina i le aai, o le a tatau i le tagata sulufai ona nofo ai pea iina, auā e na o lea le nofoaga moni mo le sulufaiga. Ae atonu e te tau mafaufau, ‘Talu ai o le toatele o i tatou e lei fasiotia lava se tasi, pe o tatou nofosala moni ea i le toto? Aisea ua avea ai Iesu ma Lē Taui ma Sui o le toto? O le ā le ata faaonaponei o le aai o sulufaiga? Pe e mafai e se tagata ona alu ese mai lea aai ma saogalemu ai pea?’

Pe o Tatou Nofosala Moni Lava i le Toto?

3. O le ā le vala o le Tulafono Faa-Mose o le a fesoasoani ia i tatou ina ia iloa ai e faitau piliona tagata o le lalolagi e nofosala i le toto?

³ O se vala o le Tulafono Faa-Mose o le a fesoasoani ia i tatou e iloa ai e faapea, e faitau piliona o i le lalolagi o loo faia se sao e nofosala ai i le toto. Na faaee atu e le Atua ia Isaraelu se tiute tauave faalauaitele mo le faamasaaina o le toto. Pe a mauaina se tasi ua fasiotia ma sa lē iloaina po o ai na faia, sa tatau i faamasino ona fuatia le va o aai o vagavagaia ai, ina ia iloa ai po o fea le aai e sili ona latalata atu i le nofoaga na maua i ai lē ua fasiotia. Ina ia mamā mai le agasala, o toeaina o le aai lea e aliali mai na nofosala i le toto, sa tatau ona vavae le ua o se tamai povi e lei faaaogaina lava mo se galuega, i se alia e lei faatoʻaina. Sa faia lenei mea a o iai ma ositaulaga o sa Levī, ‘aua na filifilia i latou e Ieova ina ia latou foiaina finauga e tulai mai ona o ni faiga sauā.’ E fafano e toeaina o le aai o latou lima i luga o le povi ma faapea atu: “E lei faamaligiina lenei toto e o matou lima, e lei vaai i ai foi o matou mata. Ieova e, ia e faamagalo mai i lou nuu o Isaraelu, ua e togiolaina; aua foi e te faaee mai i lou nuu o Isaraelu le toto o le ua le sala.” (Teuteronome 21:1-9) Sa lei finagalo Ieova le Atua e faaleagaina le eleele o Isaraelu i le toto po o le tauaveina foi e ona tagata le nofosala i le toto i se tulaga faalauaitele.

4. O le ā le talaaga o Papelonia le Aai Tele i lona nofosala i le toto?

⁴ Ioe, e iai le mea e taʻua o le nofosala faalauaitele i le toto, po o le nofosala i le toto o se nuu atoa. Seʻi manatunatu i le anoanoai o le nofosala i le toto o Papelonia le Aai Tele, le emepaea o lotu sese a le lalolagi. Ioe, ua onā o ia i le toto o auauna a Ieova! (Faaaliga 17:5, 6; 18:24) Ua faapea mai lotu a Kerisinetoma o loo mulimuli atu i le Perenise o le Filemu, ae o taua, o inikuisisi faalotu po o faamasinoga sauā faalotu, ma taua paia a lotu na fasiotia ai le toatele, ua avea ai o ia ma nofosala i le toto i luma o le Atua. (Isaia 9:6; Ieremia 2:34) O le mea moni, e tatau ona matuā tuuaʻia o ia i le maliliu o le faitau miliona i taua e lua a le lalolagi i lenei senituri. O lea la, o ē mulimuli atu i lotu sese e faapena foi ma ē lagolagoina ma ē auai i taua faaletagata, ua nofosala i le toto i luma o le Atua.

5. Ua faapefea ona pei nisi tagata o le fasioti tagata paivalea i Isaraelu?

⁵ O nisi tagata ua māfua ai le oti o se tagata ona na faia ma le loto i ai pe ona o le faatamala foi. O isi ua latou auai i fasiotiga tagata e faia e se vaega toatele, atonu sa faatauanauina e taʻitaʻi lotu e faapea o le finagalo lena o le Atua. Ae o isi ua latou sauāina ma fasiotia auauna a le Atua. E ui i lea, e tusa foi lava pe tatou te lei faia na mea, ae ua tuuaʻia i tatou i se tulaga faalauaitele i le toesea o le ola o le tagata ona sa tatou lē iloaina le tulafono ma le finagalo o le Atua. Ua pei i tatou o le fasioti tagata paivalea, o ‘lē na fasiotia lona uso a tagata e aunoa ma lona iloaina ma sa lei muai ʻinoʻino foi o ia i lona uso.’ (Teuteronome 19:4) O tagata faapena e ao ona ole atu i le Atua mo le alofa mutimutivale ma sola atu i le ata faaonaponei o le aai o sulufaiga. A lē faia faapea, o le a fetaiai ai ma le matautia ma Lē Taui ma Sui o le toto.

Tofiga Tāua a Iesu

6. Aisea e faapea atu ai o Iesu o le tau aiga pito latalata lea o tagata uma?

⁶ I Isaraelu, o lē taui ma sui i le toto, sa avea o se tane e sili ona latalata atu lona faiā tau aiga i lē ua fasiotia. Ina ia taui ma sui mo i latou uma ua fasiotia i le lalolagi ae maise lava le fasiotia o auauna a Ieova, o Lē Taui ma Sui i le toto faaonaponei, e tatau ona avea o se tane e pito latalata atu lona faiā tau aiga i tagata uma. Ua faataunuuina ia Iesu Keriso lea tofiga. Na fanau mai o ia o se tagata lelei atoatoa. Na tuuina atu e Iesu lona ola e aunoa ma le agasala ia maliu e avea o se taulaga togiola, ma ina ua uma lona toe faatūina aʻe i le lagi, ona ia faaooina atu ai lea o le aogā o lana taulaga i le Atua mo le lelei o ē o loo iai i se tulaga oti na tupuga mai ia Atamu. O lea la, na avea ai Keriso ma Lē na Togiolaina tagata, o ia o lo tatou tau aiga pito latalata—o Lē ua iai le tonu o e Taui ma Sui i le toto. (Roma 5:12; 6:23; Eperu 10:12) Ua iloa Iesu o se uso i ona soo faauuina o ē o mulimuli i ona tulagaaao. (Mataio 25:40, 45; Eperu 2:11-17) I le avea o se Tupu faalelagi, ua avea ai o ia ma “Tamā o le faavavau” ia i latou o le a mauaina aogā mai i lana taulaga, o ona tagatanuu faalelalolagi. O i latou nei o le a ola e faavavau. (Isaia 9:6, 7) O lea ua fetaui lelei le tofiaina e Ieova o lenei Tane e pito latalata lona tau aiga i tagata e fai ma Lē Taui ma Sui i le toto.

7. I le avea o le Ositaulaga Sili, o le ā e faia e Iesu mo tagata?

⁷ Ua avea foi Iesu o sē e leai se agasala, ua uma ona tofotofoina, o se Ositaulaga Sili e alofa. (Eperu 4:15) I lena tofiga, na te faaooina atu ai aogā o lana taulaga togiola mo tagata. Na faatūina aai o sulufaiga e “mo le fanauga a Isaraelu, ma le tagata ese, atoa ma le ua āumau ia te i latou.” (Numera 35:15) O lea, e muamua ona faatatauina e le Ositaulaga Sili le aogā o lana taulaga i ona soo faauuina, “le fanauga a Isaraelu.” I le taimi nei, o loo faaaogaina i ‘tagata ese,’ ma ‘ē ua āumau’ o iai i totonu o le ata faaonaponei o le aai o sulufaiga. O “isi mamoe” nei a le Alii o Iesu Keriso ua faamoemoe e ola e faavavau i le lalolagi.—Ioane 10:16; Salamo 37:29, 34.

Aai o Sulufaiga i Aso Nei

8. O le ā le ata faaonaponei o le aai o sulufaiga?

⁸ O le ā le ata faaonaponei o le aai o sulufaiga? E lē o se nofoaga o tu i se laufanua moni e pei o Heperona, o se tasi o aai o sulufaiga mai aai e ono a sa Levī ma sa nofo ai le ositaulaga sili a Isaraelu. I aso nei, o le aai o sulufaiga, o le sauniuniga a le Atua mo le puipuia o i tatou mai le oti ona o le solia o lana poloaiga e faatatau i le paia o le toto. (Kenese 9:6) E tusa lava pe faia ma le loto i ai pe ma le lē loto i ai, o so o se tagata e solia lena tulafono, e tatau ona sailia le faamagaloga a le Atua ma le sōloieseina o lana agasala e ala i le faatuatua i le toto o le Ositaulaga Sili, o Iesu Keriso. O Kerisiano faauuina e iai le faamoemoe faalelagi ma le “motu o tagata e toatele” o faamoemoe e ola i le lalolagi, ua faaavanoa atu i latou i aogā e mauaina e ala mai i le taulaga a Iesu e togiolaina ai agasala, ma o loo iai i totonu o le ata faaonaponei o le aai o sulufaiga.—Faaaliga 7:9, 14; 1 Ioane 1:7; 2:1, 2.

9. Na solia faapefea e Saulo o Taso le tulafono a le Atua e faatatau i le toto, ae na faapefea ona ia faaalia se suiga o ona uiga?

⁹ A o lei avea o ia ma Kerisiano, na solia ai e le aposetolo o Paulo le poloaiga e faatatau i le toto. A o avea ma Saulo o Taso, sa ia sauāina ai soo o Iesu ma na oo foi ina ia loto atu i le fasiotia o i latou. Na faapea mai Paulo: “A ua alofagia aʻu, auā na ou faia faapea i loʻu le iloa ma le le faatuatua.” (1 Timoteo 1:13; Galuega 9:1-19) Sa ia Saulo se agaga salamō, ma na faamaonia mulimuli ane i le tele o ana galuega o le faatuatua. Ae e iai nisi mea se tele e sili atu i le na o le faatuatua i le togiola, e manaomia ina ia ulu atu i le ata faaonaponei o le aai o sulufaiga.

10. E mafai faapefea ona mauaina se loto fuatia ifo lelei, ma o le ā e ao ona faia ina ia faatumauina ai pea i le lelei?

¹⁰ Sa faatoʻā mafai e le fasioti tagata paivalea ona nofo i se tasi o aai o sulufaiga o Isaraelu pe afai e mafai ona ia faamaonia sa ia te ia se loto fuatia ifo lelei i le Atua e tusa ai ma le toto na faamasaaina. Ina ia mauaina se loto fuatia ifo lelei, e tatau ona tatou faaalia le faatuatua i le taulaga a Iesu, ia salamō i a tatou agasala, ma suia o tatou ala. E manaomia ona tatou talosagaina se loto fuatia ifo lelei i se tuuina atu i le Atua i le tatalo e ala ia Keriso, ia faailoa atu lenei tuuina atu i le papatisoina i le vai. (1 Peteru 3:20, 21) O lenei loto fuatia ifo lelei e faatagaina ai i tatou ina ia mauaina se faiā lelei ma Ieova. E na o le pau lava le auala e taofia ai se loto fuatia ifo lelei o le usiusitai atu lea i tapulaa a le Atua ma faia le galuega ua tofiaina mai ia i tatou i totonu o le ata faaonaponei o le aai o sulufaiga, e pei foi ona sa tatau i ē sulufai i aai o sulufaiga anamua ona usiusitai i le Tulafono ma faataunuuina galuega na tofia i ai i latou. O le galuega autū o tagata o Ieova i aso nei o le folafolaina atu lea o le feau o le Malo. (Mataio 24:14; 28:19, 20) O le faia o lena galuega o le a fesoasoani lea ia i tatou e avea ai ma tagatanuu e aogā i le aai o sulufaiga i aso nei.

11. O le ā e ao ona alofia ina ia nonofo ai pea ma le saogalemu i totonu o le aai o sulufaiga i aso nei?

¹¹ O le alu ese mai le aai o sulufaiga i aso nei, o le faaavanoa atu lea o i tatou i le faaumatiaga, aua o lē e Taui ma Sui i le toto o le a toeitiiti ona gaoioi lea faasaga ia i latou uma o ē e nofosala i le toto. E lē o le taimi la lenei e mauaina mai ai i tatou o i fafo o lenei aai ua fai ma puipuiga, po o se vaega foi e lamatia ai i tafatafa o le aupa o ona laufanua lafulemu. O le a iu ina maua ifo i tatou ua tatou iai i tua o le ata faaonaponei o le aai o sulufaiga pe afai e mou atu lo tatou faatuatua i le taulaga e togiolaina ai agasala a le Ositaulaga Sili. (Eperu 2:1; 6:4-6) O le a lē malupuipuia foi i tatou pe afai tatou te talia ala faalelalolagi, lē matuā aafia atoatoa i le faalapotopotoga a Ieova, po o le ō ese mai tapulaa amiotonu a lo tatou Tamā faalelagi.—1 Korinito 4:4.

Faasaʻoloto Mai le Aai o Sulufaiga

12. O le ā le umi e tatau ona nonofo ai ē ua nofosala i le toto i le ata faaonaponei o le aai o sulufaiga?

¹² Sa tatau i le fasioti tagata paivalea i Isaraelu ona nofo pea i se aai o sulufaiga “seia oti le ositaulaga sili.” (Numera 35:28) O le ā la le umi e tatau ai ia i latou ua nofosala i le toto ona nofo ai i le ata faaonaponei o le aai o sulufaiga? Seia oo ina latou lē toe manaomia le auaunaga a le Ositaulaga Sili, o Iesu Keriso. Na faapea mai Paulo: “E mafai ai ia te ia ona faaola pea lava i e faalatalata atu i le Atua ona o ia.” (Eperu 7:25) A o faaauau ona iai so o se pisia mai le agasala ma le nofosala i le toto sa aafia ai muamua, e manaomia ai pea le auaunaga a le Ositaulaga Sili ina ia mafai ai e tagata lē lelei atoatoa ona mauaina se tulaga lelei ma le Atua.

13. O ai ua avea ma le “fanauga a Isaraelu” i aso nei, ma o le ā le umi e ao ona latou nonofo ai i totonu o le “aai o sulufaiga”?

¹³ Ia manatua na faavaeina aai anamua o sulufaiga ona sa mo le “fanauga a Isaraelu,” o tagata ese, atoa ma ē āumau. “O le fanauga a Isaraelu,” o Isaraelu ia faaleagaga. (Kalatia 6:16) E tatau ona latou nonofo i le ata faaonaponei o le aai o sulufaiga a o ola pea i le lalolagi. Aisea? Ona o loo iai pea i latou i le tino agasala, ma o lea e manaomia ai le aogā faatogiola a lo latou Ositaulaga Sili faalelagi. Ae a maliliu loa nei Kerisiano faauuina ma ua toe faatutūina aʻe i le ola faaleagaga i le lagi, ona latou lē toe manaomia ai lea o le auaunaga faatogiola a le Ositaulaga Sili; auā o le a tuua e faavavau o latou tino aano, ma ua lē toe avea i latou o ni tagata e nofosala i le toto. Ia i latou la na o ē faauuina ua toe faatutūina, o le a maliu ai le Ositaulaga Sili i lona tulaga togiolaina, ma mo lo latou puipuiga.

14. O le ā le isi mea ua manaomia ia i latou o iai le faamoemoe faalelagi ona nonofo i le aai o sulufaiga o aso nei?

¹⁴ O le iai o uiga faaletagata ua faapea ona manaomia ai e i latou o le a avea “o suli faatasi ma Keriso” i le lagi ona tumau i totonu o le ata faaonaponei o le aai o sulufaiga seia oo ina latou faaiuina ma le faamaoni lo latou olaga i le lalolagi i le oti. Pe a maliliu i latou, ona latou faataulagaina ai lea e faavavau ia tulaga uma e fesootai atu i le avea ai ma tagata. (Roma 8:17; Faaaliga 2:10) O le taulaga a Iesu e mo na o i latou e faaletagata lo latou tupuaga mai. O lea la, e maliu ai le Ositaulaga Sili mo i latou o i le Isaraelu faaleagaga pe a toe faatutūina aʻe i latou o ni peresona agaga o ē o le a mau e faavavau i le lagi, “ina ia tofusia faatasi ai . . . i le uiga o le Atua.”—2 Peteru 1:4.

15. O ai ‘tagata ese’ ma ‘ē e aumau’ o aso nei, ma o le ā o le a faia e le Ositaulaga Sili mo i latou?

¹⁵ O afea la e “oti” ai le Ositaulaga Sili e faatatau atu i ‘tagata ese’ ma ‘ē e āumau’ o ona po nei, e faatagaina ai i latou e tuua le ata faaonaponei o le aai o sulufaiga? O nei sui o le motu o tagata e toatele e lē mafai ona latou tuua loa lenei ata faaonaponei o le aai o sulufaiga pe a mavae le puapuaga tele. Aisea e lē faapea ai? Ona o le a iai pea i latou i o latou tino agasala lē lelei atoatoa, ma o le a manaomia ona tumau ai i lalo o le puipuiga a le Ositaulaga Sili. I le faaavanoaina atu o i latou i lenei auaunaga faatogiola i le faagasologa o le afe tausaga o lona tulaga tautupu ma faaositaulaga, o le a oo atu ai i latou i le lelei atoatoa faaletagata. I lea taimi, ona tuuina atu ai lea e Iesu i latou i le Atua mo se tofotofoga mulimuli e iloa ai lo latou faamaoni e ala i le tatalaina o Satani ma ana temoni mo sina taimi puupuu. Talu ai latou te manumalo i lenei tofotofoga ma ua taliaina e le Atua, o le a taʻuamiotonuina ai i latou e Ieova. O lea, o le a oo atu ai i latou i le atoaga o le lelei atoatoa faaletagata.—1 Korinito 15:28; Faaaliga 20:7-10.a

16. O afea o le a lē toe manaomia ai e ē faasaoina mai le puapuaga tele ia auaunaga faatogiola a le Ositaulaga Sili?

¹⁶ O lea, o ē faasaoina mai i le puapuaga tele e tatau ona tausia se loto fuatia ifo lelei e ala i le nonofo pea i le ata faaonaponei o le aai o sulufaiga seia oo i le iuga o le Pulega o le Afe Tausaga a Keriso. I le avea ma tagata ua lelei atoatoa, o le a latou lē toe manaomia ai ia auaunaga faatogiola a le Ositaulaga Sili ma o le a lē toe maua ai e i latou lana puipuiga. Ona maliu ai lea o Iesu ia i latou o se Ositaulaga Sili, auā o le a lē toe manaomia e ia ona toe galue mo i latou i le toto e faamamāina ai o lana taulaga. O le taimi lea o le a latou tuua ai le ata faaonaponei o le aai o sulufaiga.

17. Aisea o le a lē manaomia ai e i latou e toe faatutūina i le vaitaimi o le Pulega o le Afe Tausaga a Keriso ona ulu atu i le ata faaonaponei o le aai o sulufaiga, ma tumau ai iina?

¹⁷ Pe e tatau ia i latou e toe faatutūina i le taimi o le Pulega o le Afe Tausaga a Iesu ona ulufale atu i le ata faaonaponei o le aai o sulufaiga, ma tumau ai iina seia oti le ositaulaga sili? E leai, auā ina ua maliliu, ua latou totogia ai le sala mo lo latou tulaga agasala. (Roma 6:7; Eperu 9:27) Ae peitai, o le a fesoasoani le Ositaulaga Sili ia i latou ina ia ausia le lelei atoatoa. Pe afai latou te sao mai ma le manuia i le tofotofoga faaiu pe a mavae le Meleniuma, o le a taʻuamiotonuina foi i latou e le Atua faatasi ai ma le faamautinoaina o le mauaina o le ola e faavavau i le lalolagi. O le mea moni, o le lē taulau ona usiusitai atu i tapulaa a le Atua, o le a oo mai ai le faasalaga faafaamasinoga ma le faaumatiaga i so o se tagata o ē e paʻūū i le tofotofoga faaiu i le avea o ni ē e tausisi i le faamaoni.

18. E tusa ai ma le tulaga tautupu ma faaositaulaga o Iesu, o le ā o le a tumau e faavavau i tagata?

¹⁸ Na oo ina feoti ositaulaga sili o Isaraelu. Ae o Iesu, “ua fai o ia ma ositaulaga sili e faavavau, e uiga faatasi ma Mekisateko.” (Eperu 6:19, 20; 7:3) O lea, o le faamutaina o le tofiga o Iesu o se Ositaulaga Sili e fai ma puluvaga i tagata, e lei uma ai lona soifua. O āuga lelei o lana auaunaga o se Tupu ma Ositaulaga Sili o le a tumau e faavavau i tagata, ma o le a nofo aitalafu ai e faavavau tagata ia te ia ona o lana auaunaga i nei tofiga. E faaopoopo atu i ai, o le a taʻitaʻia e Iesu e faavavau le tapuaiga mamā ia Ieova.—Filipi 2:5-11.

O Lesona Aogā mo i Tatou

19. O le ā le lesona e faatatau i le feitagai ma le alofa e mafai ona aʻoaʻoina mai le sauniuniga o aai o sulufaiga?

¹⁹ E mafai ona tatou aʻoaʻoina lesona eseese mai i le sauniuniga o aai o sulufaiga. Mo se faaaoaoga, e leai se tagata fasioti tagata na ʻinoʻino ma fia fasioti i lē ua maliu na faatagaina e nofo i se aai o sulufaiga. (Numera 35:20, 21) O lea, e mafai faapefea e se tasi o iai i le ata faaonaponei o le aai o sulufaiga, ona ia faatagaina se ʻinoʻino i se uso e tuputupu aʻe i lona loto? Na tusi mai le aposetolo o Ioane e faapea: “O i latou uma o e ʻinoʻino i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola faavavau.” O lea, seʻi faaauau ia ona “tatou fealofani; auā mai le Atua le alofa.”—1 Ioane 3:15; 4:7.

20. Ina ia puipuia mai Lē e Taui ma Sui i le toto, o le ā e tatau ia i latou o i totonu o le ata faaonaponei o le aai o sulufaiga ona faia?

²⁰ Ina ia puipuia mai lē taui ma sui i le toto, sa tatau i le fasioti tagata paivalea ona nofo i totonu o se aai o sulufaiga ae aua le se ese mai i ona laufanua lafulemu. Ae faapefea i latou o loo iai i le ata faaonaponei o le aai o sulufaiga? Ina ia puipuia mai Lē Taui mai Sui sili i le toto, e ao ia i latou ona tuua le aai. E mautinoa lava le manaomia ia i latou ona puipui faasaga i faaosoosoga ina neʻi ō atu i le faatausiusiuga o laufanua lafulemu, i se uiga faafaatusa. E ao ia i latou ona matuā faaeteete ina ia lē faatagaina le fiafia i le lalolagi a Satani e tuputupu aʻe i o latou loto. Atonu e manaomia ai i lenei mea le tatalo ma taumafaiga, ae e faalagolago atu i ai o latou ola.—1 Ioane 2:15-17; 5:19.

21. O le ā le galuega tauia o faia e i latou o i le aai o sulufaiga o aso nei?

²¹ O ē fasioti tagata paivalea i aai anamua o sulufaiga sa tatau ona avea i latou ma ni ē e faigaluega lelei. E faapena foi la, o le “fanauga a Isaraelu” faauuina, ua latou faataatia mai se faaaoaoga lelei o ni ē galulue mo le seleselega ma ē e faalauiloa le Malo. (Mataio 9:37, 38; Mareko 13:10) I le avea ma ‘tagata ese’ ma ‘ē e āumau’ i le aai o sulufaiga o aso nei, o Kerisiano o iai le faamoemoe faalelalolagi ua faaeaina i latou i le faia o lenei galuega faasaoola, galulue soosoo tauʻau ma ē faauuina o totoe i luga o le lalolagi. Ma maeu le tauia o lenei galuega! O i latou o i le ata faaonaponei o le aai o sulufaiga, o loo galulue faamaoni, o le a sao mai le oti e faavavau i lima o Lē e Taui ma Sui i le toto. Ae o le a latou mauaina aogā e faavavau mai i lana auaunaga o se Ositaulaga Sili a le Atua. Pe o le a e nofo pea i le aai o sulufaiga ma ola ai e faavavau?

[Faaopoopoga i lalo]

E Faapefea ona E Taliina?

◻ Aisea e mafai ai ona faapea atu o le faitau piliona o tagata o le lalolagi ua nofosala i le toto?

◻ O ā tofiga ua faatumuina e Iesu Keriso e faatatau i tagata?

◻ O le ā le ata faaonaponei o le aai o sulufaiga, ma e faapefea ona ulu atu i ai se tasi?

◻ O afea o le a faasaʻoloto ai tagata o i le ata faaonaponei o le aai o sulufaiga?

◻ O ā ni lesona aogā e mafai ona tatou aʻoaʻoina mai i le sauniuniga o aai o sulufaiga?

[Ata i le itulau 16]

Pe e te iloaina tofiga tāua ua faataunuuina ia Iesu Keriso?