Fesili Mai le Au Faitau

I le Filipi 2:9, na faapea mai ai Paulo e uiga ia Iesu: “Ua matuā faaeaina ai o ia e le Atua, ma foaiina atu ai ia te ia o le suafa e silisili i [“isi,” NW] suafa uma lava.” O le ā lea suafa fou? Ma afai e maulalo ifo Iesu ia Ieova, e faapefea la ona silisili lona suafa i isi suafa uma lava?

Ua faitauina faapenei le Filipi 2:8, 9: “A o iloa o ia [Iesu] i ona foliga e faapei o se tagata, ua faamaulalo o ia e ia lava, ua na anaana ua oo ina maliu, o le maliu lava lea i le satauro. O le mea lava lea ua matuā faaeaina ai o ia e le Atua, ma foaiina atu ai ia te ia o le suafa e silisili i [“isi,” NW] suafa uma lava.”

E lē o le uiga o lea faaupuga e faapea talu ai e na o Ieova e iai le suafa e silisili ona maualuga i isi suafa uma, ona faapea ai lea o Iesu lava o Ieova lea. E tusa ai ma le aotelega ua faaalia i le Filipi mataupu e lua, na maua e Iesu lona suafa faaeaina ina ua mavae lona toe faatuina. A o lei oo i lena taimi, sa lei ia te ia lea suafa. Ae i le isi itu, o loo tumau pea ona silisili ese Ieova, ma o lona tulaga e lē taitai ona suia. O le mea moni i le faatoʻā maua e Iesu o le suafa silisili nai lo le suafa na ia te ia ina ua mavae lana faiva i le lalolagi ua faamaonia ai e lē tutusa o ia ma Ieova. A o tautala Paulo i le tuuina atu ia Iesu o le suafa e silisili i isi suafa uma, sa uiga o ia i le mauaina nei e Iesu o le suafa e silisili i suafa o foafoaga ola uma a le Atua.

O ai le suafa silisili o Iesu? Ua fesoasoani mai le Isaia 9:6 ia i tatou mo le tali. Ua valoia mai e lena fuaiupu e uiga i le oo mai o le Mesia, o Iesu e faapea: “E i lona ua le malo, e igoa foi o ia . . . o le Faipule, o le Atua malosi, o le Tamā o le faavavau, o le Alii o le filemu.” O iinei, e fesootai atu ai le “suafa” o Iesu ma lona tulaga maualuga ma lana pule, lea foi ua māfua ai ona tatou malamalama i le “suafa e silisili i [“isi,” NW] suafa uma” e pei ona taʻua i le Filipi 2:9. Ua poloaiina tulivae uma ia tootuli ia Iesu e faailoa ai le maualuga o le pule na tuuina atu e Ieova ia te ia—o se tulaga e sili ona maualuga nai lo isi tulaga na tuuina atu i so o se isi lava foafoaga ola. O le upu “isi” i lenei faaliliuga e lē o faaatagia tuusaʻo mai i le mau faa-Eleni, ae o loo faasino atu i le uiga o le fuaiupu. O le “suafa” o Iesu e lē sili aʻe i lona lava igoa ae e silisili i isi suafa uma o foafoaga ola.

Maeu lo tatou fiafia e aufaatasi ma agelu faamaoni ma tagata i le ifo ma tootuli atu ina ia faailoa atu le suafa o Iesu! Ua tatou faia lenei mea e ala i le gauai atu o i tatou lava ia Iesu ona o le faaeaga ma le tulaga maualuga ua tuuina atu e Ieova ia te ia—“ia iu ai i le viiga o le Atua le Tamā.”—Filipi 2:11; Mataio 28:18.