Le Nofoaga Tutotonu Tau Aʻoaʻoga a le Olomatamata ua Latou Aauina atu Misionare

E ESEESE nofoaga sa faia ai vasega a le Aʻoga o le Olomatamata ma le Tusi Paia o Kiliata. Mai le tausaga e 1943 e oo i le 1960, sa faia ai i South Lansing, i Niu Ioka i le Iunaite Setete o Amerika, aʻoaʻoga faapitoa mo vasega e 35, na faia aʻe i tagata aʻoga mai atunuu e 95. Ona siitia atu lea o le aʻoga i le nofoagaulu i Brooklyn, i Niu Ioka, o iina na faagaoioia mai ai mo le toetoe 28 tausaga. Mai le 1988 e oo mai i le amatamataga o le 1995, sa faia ai vasega a le Aʻoga o Kiliata i Wallkill, i Niu Ioka.

I nei tausaga uma, sa faalautele atu ai pea e le aʻoga lona faagaoioiga. I lalo o lana taʻitaʻiga na saunia ai se aʻoaʻoga e sefulu vaiaso le umi, mo vaega e tolu sa faia i Mekisikō; e lima foi vasega faapena sa amataina i Siamani; ma le lua i Initia. Talu mai le 1987, na amata ai foi se isi aʻoga faaopoopo ua taʻua o le Aʻoga mo le Toleniina o Auauna o le Faiva, lea na faia ai vasega i atunuu e 34, e saunia ai se aʻoaʻoga faapitoa e valu vaiaso le umi, mo le toleniina o tane talavou ua agavaa. Ae peitai, sa tuuina atu le faatonuga i le vasega lona 99 o le aʻoga o Kiliata, lea na faia i le Nofoaga Tutotonu Tau Aʻoaʻoga a le Olomatamata na faatoʻā uma ona fausia i Patterson, i Niu Ioka, e faapea, o le a 20 vaiaso le umi o le aʻoaʻoga, e aofia ai se suesuega auiliili o le Tusi Paia atoa, le talanoaina o talafaasolopito faaonaponei o le faalapotopotoga o Molimau a Ieova, faapea ma ni fautuaga se tele mo le galuega faamisionare i atunuu ese.

Ia Setema 2, na faauuina ai lena vasega lona 99. O le polokalame o le faauuga e tolu itula le umi, sa faia i le falefono fou a le Nofoaga Tutotonu Tau Aʻoaʻoga a le Olomatamata. Sa matuā faatumulia. O isi aofia faaopoopo sa iai i isi fale o le Peteli i Patterson, i Wallkill, ma i Brooklyn, sa fesootai mai i latou e ala i laina o telefoni. Sa avea lenei o se aso fiafia e lē gata mo le vasega faauu ma o latou aiga ma uō mafana, ae faapea foi i le faitau selau o ē na tauofo e auai i le fausiaina o nei faleaʻoga fou matagofie.

I ana faamatalaga amata, sa tataʻi atu ai e Carey Barber o le Vaega Pule, manatu i le uiga o le faatasiga. Na ia taʻua: “O le vaega tutotonu lenei o gaoioiga silisili tau aʻoaʻoga mai le Atua, lea e sili atu nai lo se isi lava aʻoaʻoga na faia i lenei lalolagi.” Na ia faamatala e faapea, ua tatou lalata atu nei i le taualuga o le taua i le va o le fanau a le fafine ma le fanau a le gata. (Kenese 3:15) Na ia faaalia e faapea, e na o le pau ē o le a faasaoina atu i le fetaiaiga tele i le taimi o le puapuaga tele, e na o ē ua iai le poto saʻo e uiga i le Afioga a le Atua ma o loo usiusitai i ai.

Na ia faailoa mai: “O la tatou polokalame tau aʻoaʻoga i lenei taimi, ua fuafua ina ia aumaia tagata uma o Ieova mai so o se nofoaga ina ia latou iai i se tulaga lelei o le taʻumatuaina lea ua faamatalaina i le Faataoto 1:1-4—le iloaina lea o le atamai ma le aʻoaʻiga, le mafai ona iloa le malamalama, mauaina le aʻoaʻiga e maua mai ai le poto, le amiotonu, e faamasino ai, le amiosaʻo, ma le tomai tau le mafaufau.” Maeu se puipuigamalu o le iai o na sauniuniga faaleagaga!

Fautuaga i le Vasega Faauu

Ina ua uma na upu faatomua, ona sosoo mai ai lea ma se faasologa o ni lauga pupuu e lima, sa tuusaʻo atu i le vasega faauu. O Harold Jackson, o sē na muai avea ma faiaʻoga o Kiliata, ua avea nei o se sui o le ofisaulu i Brooklyn, sa ia faalaeiau atu i le vasega e faapea, “Ia Taofimau i Mea Faale-Atua ua Faamalieina ai Outou.” O Lloyd Barry, o sē ua autausagā o avea ma misionare ma ua avea nei o se sui o le Vaega Pule, na ia talanoa i le matua, “Ia Auauna ia Ieova ma le Loto Maulalo.” Na ia faamatala e faapea, o lenei uiga o le a aogā i le aufaauu i a latou fetuutuunaiga i tulaga fou o le a iai, faapea foi i a latou faiā ma o latou uso misionare, ma faapotopotoga o le a latou auauna ai, ma i tagata o oganuu o le a latou iai.

O Karl Adams, o lē o loo auauna nei i le ofisa pule o Kiliata, sa ia talanoaina ma le vasega le fesili “O le ā o le a Taʻitaʻia Oe e Lou Faatuatua E te Faia?” Sa ia faalaeiauina i latou ina ia aua neʻi pei o le fanauga a Isaraelu o ē na faitio i tulaga sa iai i le vaomatua ma moomoo e toe fia foi i Aikupito, nai lo lea, ia pei i latou o Aperaamo, o lē sa nofo tatali atu i le Malo o le Atua nai lo le toe foi i Uro i le nuu o Kaletaia e foia ai ona faafitauli. (Esoto 16:2, 3; Eperu 11:10, 15, 16) O Ulysses Glass, o le lesitala lea a le aʻoga, sa ia taulai atu i le mea na tupu ia Asafo e pei ona faamauina i le Salamo 73 ma timai atu ai i le vasega faauu e faapea, “Toe Manatunatu i O Outou Faamanuiaga.” O Albert Schroeder, o se sui o le Komiti Tau Aʻoaʻoga a le Vaega Pule, na ia talanoa i le matua “O Ieova na te Saunia Mea.” O se faamaoniga o lena sauniuniga, na ia faasino atu ai i le Aʻoga o Kiliata ma lana matafaioi i le faataunuuina o le galuega tele o le talaʻi ma le faia o soʻo.

Mulimuli ane, ona faalogologo atu ai lea ma le naunautai le aofia a o lauga mai Milton Henschel, o le peresitene o le Sosaiete o le Olo Matamata, i le matua e faapea, “O Itutino i Tatou o le Tasi i le Isi.” Sa ia faitauina le Roma mataupu e 12, ma talanoa auiliili i ai. Na ia faapea mai, e faatasi ai ma isi mea: “E ao ona tatou manatunatu e faapea, ua iai sa tatou faiā vavalalata ma o tatou uso o loo tatou auauna faatasi i le faapotopotoga.” Na ia taʻua atili: “O se mea lelei mo i tatou ona mafaufau pea le tasi i le isi o i tatou o ni meatotino a Ieova, ma nai lo le faitio, nai lo le sailiili masei, seʻi o tatou loto fesoasoani i taimi uma. O loo tatou fesoasoani ia i tatou lava pe afai tatou te tausisia le autasi faaleagaga o le faapotopotoga Kerisiano.” Na ia faaalia le auala e mafai ai ona faaalia mai lena loto fesoasoani i le sauniunia o taumafataga i aiga o misionare, le manatuaina o le mea moni e faapea, atonu e lē mafai e tagata uma ona tutusa mea latou te taumafaina. Na ia faalaeiauina foi le iai o le loto fesoasoani nai lo le faitio pe a auai i le auaunaga i le fanua ma uso Kerisiano o ē e lē lelei o latou tamaoaiga faaletino. Pe afai tatou te loto fesoasoani moni, tatou te fefaamalosiau, ma fefaalaeiauai, na taʻua e le uso o Henschel, “o le a alofa mai Ieova ia i tatou ona o lo tatou faia faapea.” Maeu ni timaiga sili ona lelei mo misionare o ē o le a auauna i atunuu e tele vala e matuā eseese ai mai atunuu ia ua latou tuua!

Ia Masani Lelei i le Vasega

O tagata aʻoga e toʻa 48 o le vasega lona 99, sa iai se faatatauga e 32 tausaga o lo latou matutua, ma sa latou tuutoina atu mo le silia i le 11 tausaga i le faiva faataimi atoa.

O faatalanoaga sa fai o se vaega o le polokalame o le faauuga, na maua ai e le aofia se avanoa e masani lelei ai i nisi o i latou. O Nikki Liebl, mai le Iunaite Setete, ma Simon Bolton, mai Egelani, sa la faamatalaina ni mea na tofotofoina ai lo la faatuatua, lea na saunia ai e Ieova mea mo o la manaoga faaletino. Sa la tofo i le tausiga alofa a Ieova a o la faamuamuaina le faiva faataimi atoa.

O Isabelle Kazan, o lana gagana moni o le faa-Falani, na ia faapea mai, sa ia aʻoaʻoina le faa-Arapi ina ia mafai ai ona molimau atu i tagata sa nonofo i lona atunuu [o Falani] o ē tautatala i le gagana Arapi. Ina ua amata lana molimau atu i le 1987, e tasi se tamai vaega i Pale sa na o le toafā uso na iai ma e tautatala i le gagana Arapi, e faaopoopo atu i ai ma ia ma le isi tuafafine o lē sa aʻoaʻoina foi le gagana. (Sa lē faigofie. Sa latou faaaluina le taʻi valu itula i le sauniunia o a latou mataupu o Le Olomatamata i vaiaso taitasi ina ia mafai ai ona faia ni o latou manatu.) Pe na aogā ea taumafaiga? Ioe, i aso nei, ua iai Molimau e tautatala i le faa-Arapi, ua faamaopoopoina i matagaluega e lima i le oganuu a Falani. O le isi tagata aʻoga, o Miko Puro, na ia taʻua le auala na aogā ai ia te ia le gagana Falani lea sa ia aʻoaʻoina i le aʻoga, na mafai ai ona ia talaʻi atu i tagata Aferika o ē sa sulufai mai i lona atunuu o Finilani, ma o le a aogā foi i lona tofiga faamisionare lea o le a iai i Benin. Sa toe taʻua e Bonny Bowes lana tauiviga ina ia mafai ona tautala manino i le gagana Falani, ina ia mafai ai ona ia auauna atu ma le uigā i Quebec, i Kanata. Ae o Bjarki Rasmussen, mai Tenemaka, sa ia faamatalaina ni mea sa tutupu ia te ia ma lana avā i tausaga sa auauna ai i Faeroe Islands. Ioe, o nei misionare fou ua uma ona latou tofo i le avea o ni faifeau faataimi atoa.

Sa tofia atu le aufaauu i atunuu e 19—i Aferika, i Amerika i Saute ma Amerika Tutotonu, i Asia, ma Europa i Sasaʻe. O ē na faauu mai isi vasega ua tuanai atu, o loo latou auauna nei i le silia ma le 200 atunuu. O le toatele o na aufaauu o loo tele pea a latou galuega o loo fai i o latou tofiga. O nei misionare fou o loo aufaatasi atu nei ia i latou na i le faalautele atu atili o le molimau o le Malo i tuluʻiga uma o le lalolagi.—Galuega 1:8.

[Ata i le itulau 25]

O vaaiga i totonu o potu aʻoga i le Nofoaga Tutotonu Tau Aʻoaʻoga a le Olomatamata

[Ata i le itulau 26]

Vasega Faauu Lona 99 o le Aʻoga o le Olomatamata ma le Tusi Paia o Kiliata

I le lisi i lalo, o laina e amata mai i luma agaʻi i tua, ma o igoa e lisi mai le itu agavale i le itu taumatau i laina taitasi.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Ata i le itulau 27]

O loo iai pea i o latou tofiga: (itu agavale) Charles Leathco ma lana avā o Fern, i Pasili, na faauu mai i laua i le vasega muamua ma le vasega lona ono a Kiliata; (le pito i lalo) Martha Hess, i Iapani, o lē na faauu mai i le vasega lona fitu a Kiliata