Le Au Aʻoʻoga ua Faauu o le Afioga a le Atua

I LE faataitai atu i Kerisiano o le uluai senituri, ua lauiloa ai Molimau a Ieova i le lalolagi aoao mo la latou talaʻiga mai lea fale i lea fale. Sa faamamafaina le tāua o lenei galuega i upu na amata ai le polokalame o le faauuga o le vasega lona 102 a le Aʻoga Faale-Tusi Paia o le Olomatamata o Kiliata.

Ia Mati 1, 1997, na tataʻi atu ai e Albert Schroeder, o se sui o le Vaega Pule a Molimau a Ieova, manatu i se mataupu talu ai nei na tusia i le nusipepa a Falani o le Le Point. Sa taʻua ai fuafuaga a le Katoliko Roma ina ia amata se galuega talaʻi mai lea fale i lea fale i Italia. Na taʻua faapea i le mataupu: “Ina ia lē ō atu [misionare o le Vatikana] e augapiu ma se mea i o latou lima a o latou faatautavā i oganuu o loo galulue ai Molimau a Ieova, ua oo ai ina naunautai le Vatikana e lolomia ni kopi e miliona o le Evagelia a Sagato Mareko, a o fetaiai a latou misionare ma le ʻau atamamai [o Molimau] i le ‘tufatufaina’ atu mai lea fale i lea fale o le tala lelei.”

Ua iai faatasi le toʻa 48 o le ʻau faauu ma i latou o ē na faataitai atu i auala atamai o le talaʻiga a Iesu, i le faasalalauina atu o le Afioga a le Atua. E valu atunuu na latou ō mai ai ina ia ulu atu i le Nofoaga Tutotonu o Aʻoaʻoga a le Olomatamata (Watchtower Educational Center) i Patterson, i Niu Ioka. A o faagasolo le lima masina o a latou aʻoaʻoga, sa latou suesueina ai le Tusi Paia atoa mai lona amataga e oo atu i le faaiuga. Sa aofia foi i a latou aʻoaʻoga le talafaasolopito o le faalapotopotoga a le Atua, o vala aogā o le olaga faamisionare, ma fua o le agaga o le Atua. O nei mea uma sa faia ma le sini e tasi i le mafaufau—ina ia sauniunia ai i latou mo le auaunaga faamisionare i atunuu ese i atunuu e 17 ua aauina atu i ai i latou. A o faauuina i latou, sa auai faatasi ai i le olioli se aofia e 5,015 mai atunuu eseese. O ā ni fautuaga aogā faaiu na tuuina atu i na tagata aʻoga o Kiliata?

Faalaeiauga Fetaui Lelei mo Misionare Fou

Ina ua maeʻa le saunoaga amata a le taʻitaʻifono, ona tauaaoina atu lea e Ralph Walls, o sē e fesoasoani i le komiti o le aufaigaluega (Personnel Committee) a le Vaega Pule, se lauga puupuu na iai ni fautuaga aogā mo misionare fou. O lana matua “Ia Manatua e Alofa Atu.” Sa ia faasino mai e faapea na valoia mai ai e le Tusi Paia, i le 2 Timoteo mataupu 3, o le a faatuputeleina le leai o se alofa i le lalolagi. Na ia ofoina mai lenei faamanatuga fetaui lelei i misionare fou, e tusa ai ma le faamatalaina o le alofa lea o loo maua i le 1 Korinito 13:1-7: “O outou, o ni misionare, atonu tou te faateleina itula tou te galulue ai. Atonu ua ia te outou le tamaoaiga o le poto mai a outou aʻoaʻoga i Kiliata. Pe atonu foi matou te faaopoopoina ma le maelega nisi taimi e galulue ai i o matou tofiga i le lālā. Peitai e lē aogā a tatou taumafaiga uma ma a tatou faataulaga o loo fai pe a galo ona tatou alolofa atu.”

Na sosoo ai i le polokalame le lauga a Carey Barber, o se sui o le Vaega Pule, o lē na ia talanoaina le mataupu “O Loo Taʻitaʻia i Tatou e Ieova i le Manumalo.” Mai sina amataga itiiti na latou amata mai ai ina ua mavae le Taua Muamua a le Lalolagi, ua taʻitaʻi atu ai e Ieova le Atua ana auauna faamaoni ina ia manumalo i le folafolaina atu o le tala lelei o lona Malo, e ui lava i sauāga. I le 1931, na talia ai e Tagata Suesue o le Tusi Paia, e pei ona lauiloa ai i latou i na taimi, le igoa o Molimau a Ieova, e ui lava i le feita o taʻitaʻi lotu o Kerisinetoma. Na faapea mai le uso o Barber: “Ua iai nei i le vasega lona 102 o misionare ua aʻoaʻoina i Kiliata, se faaeaga tele o le iai o so latou sao tele i le galuega mamalu o le tuuina atu i le toatele o ni tagata e mafai ai, le avanoa e aʻoaʻoina ai lena suafa paia.” Ua latou aufaatasi atu i le lisi umi o misionare e 7,131 o ē ua aʻoaʻoina i le Aʻoga o Kiliata ma o ē ua fesoasoani i le faalauteleina atu o le Afioga a le Atua mai atunuu e 54 i le 1943, i le 233 atunuu i le taimi nei.

O le failauga na sosoo ai, o Lloyd Barry, o se sui foi o le Vaega Pule, na faauu mai le vasega lona 11 a Kiliata, ma na auauna o se misionare i Iapani mo le silia i le 25 tausaga. Na ia saunia ni faalaeiauga i lana matua, “Ia Tumau i Nei Mea.” Na ia taʻu atu i le ʻau aʻoʻoga: “O le tele o lo outou olioli o le a maua pe a tutumau.” O ā taui e maua mai le tutumau i le galuega faamisionare pe i so o se isi lava tofiga faatiokarate? “E sili atu i mea uma lava, o lo tatou tutumau e faafiafiaina ai le finagalo o Ieova . . . E telē le faamalieina o le a maua i le tausisia o le faamaoni i lalo o tofotofoga . . . Ia avea le auaunaga faamisionare ma a outou galuega faifai pea i le olaga . . . O lo outou taui o le a avea o se faamafanafanaloto pe a faapea atu ‘ua lelei ia.’” (Mataio 25:21; Faataoto 27:11) I le faaiuina o lana lauga, na matuā fautuaina ai e le uso o Barry le ‘tumau i nei mea’ o misionare fou e ala i lo latou maumauai e avea le auaunaga faamisionare ma o latou olaga atoa.—1 Timoteo 4:16.

“O ā Mea o le a Outou Vaaia?” o le fesili lena na lāgā e Karl Adams, o lē ua iai sona sao i le aʻoaʻoina o le tele o vasega o Kiliata. Na ia taʻua e faapea o mea o le a vaaia e misionare fou i o latou tofiga e faalagolago atu lea e lē gata i o latou mata faaletino ae i mata foi o o latou loto. (Efeso 1:18) Sa faataitaia mai lenei manatu i mea na vaaia e tagata vāai Isaraelu a o latou suesueina le Nuu o le Folafolaga. Na tutusa uma mea na vāai i ai tagata vāai e toʻa 12 i o latou mata faaletino, ae na o le toalua sa tutusa le la vaai i le Nuu o le Folafolaga, ma le silafaga a le Atua. E mafai foi e misionare ona eseese auala latou te manatu ai i mea. I nisi atunuu o le a latou auauna ai, atonu latou te vaaia ai le olaga mativa, o mafatiaga, ma le leai o se faamoemoe. Ae lē tatau ona lē fiafia ai ma lafoaia ai o latou tofiga. Sa taʻua e le uso o Adams se tasi misionare mai se vasega talu ai nei o lē na faapea mai: “O nei mea na tutupu na ou iloa tino ai e tatau ona ou nofo iinei. O loo manaomia e nei tagata se faamoemoe mo le lumanai. Ou te fia faaleleia o latou olaga.” Na faaiu mai upu a le uso o Adams i lona faalaeiauina o misionare fou ina ia latou manatu i atunuu ua tofia i ai i latou o ni nofoaga ua filifilia e Ieova e fai ai se isi vaega o Lana parataiso i le lalolagi aoao ma ia manatu i tagata i na nofoaga o nisi ia tagata o le a iai i le sosaiete a le lalolagi fou.

O le lauga mulimuli i lenei vaega o le polokalame sa faia lea e Wallace Liverance, o lē na auauna mo le tele o tausaga i le auaunaga faamisionare a o lei avea ma faiaʻoga a Kiliata. O lana matua, “Ia Gaoioi ma le Poto i Galuega Ofoofogia a le Atua.” O le gaoioi ma le poto e aofia ai le gaoioi ma le atamai, le faautauta, ma ia faaaogā lelei le mafaufau. O le mea lena sa lei faia e le tupu o Isaraelu o Saulo.—1 Samuelu 13:9-13; 15:1-22.

O se tasi o auala e gaoioi ai ma le poto e ala lea i le taliaina o luʻi o le fetuutuunaiina i se auala fou o le olaga, o loo aofia ai le aʻoaʻoina o se gagana fou ma ia faamasani atu i tagata. O mea ua tutupu i misionare i le faafetaiaia o luʻi ma le foiaina o toʻatugā e mafai ona faamalosia ai i latou faaleagaga i le auala lea sa faamalosia ai foi Iosua ma Kalepo a o la tau manumalo i le laueleele na tofia i ai i laʻua e le Atua.

O Faatalanoaga

O le vaega na sosoo o le polokalame sa aofia ai se faasologa o faatalanoaga. Na faatalatalanoa e Harold Jackson ia Ulysses Glass, o le lesitala lea ma o se faiaʻoga ua leva a le Aʻoga o Kiliata, o lē ua 85 nei tausaga o lona soifuaga. E toatele misionare o loo iai pea i o latou tofiga o loo latou manatua lelei ona tausaga o lana auaunaga faamaoni o se faiaʻoga. Ona sosoo lea ma Mark Noumair, o se faiaʻoga o Kiliata o lē na faaaluina le tele o tausaga i le auaunaga faamisionare i Aferika a o lei avea o se faiaʻoga o le Aʻoga o Kiliata. Sa ia faatalanoaina le ʻau aʻoʻoga e faatatau i la latou faiva a o faagasolo le lima masina o a latou aʻoaʻoga. O mea na tutupu ia i latou sa faataitaia manino mai ai e faapea, o loo iai tagata o ē naunau fiafia i le Afioga a le Atua i lea lava oganuu.

Ona talanoa atu lea o Robert Ciranko ma Charles Molohan i ni tane ua iai le tomai o ē na auai atu i se isi aʻoga iina lava, o le aʻoga mo sui o komiti o lālā. O a latou fautuaga i le vasega faauu sa aofia ai le manaoga ina ia lotomaulalo ma saosaolaumea i le autasi o le faapotopotoga. Sa latou faatutū mai ni manatu faapea e lē tatau i le ʻau faauu ona ia i latou ni manatu e muai fuafua ai tulaga o mea o le a tutupu i le galuega faamisionare, ae nai lo lea, tau lava ina loto malilie e talia so o se mea e tulai mai. O le faatatauina o lenei fautuaga o le a mautinoa le fesoasoani ai i misionare fou ina ia faataunuu o latou tofiga o ni faiaʻoga o le Afioga a le Atua.

I le faaiuga, na lauga mai ai i le aofia Theodore Jaracz, o se sui o le Vaega Pule, i le mataupu “Pe ua Aafia i le Lalolagi pe o Avea Outou o ni Aafiaga Lelei i Isi?” Sa ia faamatala mai e faapea pe afai e faaalia e i tatou o Kerisiano fua o le agaga, e mafai ai ona avea i tatou o ni aafiaga lelei i isi tagata. Na ia taʻua: “O misionare o loo aauina atu e le faalapotopotoga a Ieova ua aumaia ai se talaaga lelei i lo latou faaaafiaina o tagata i se tulaga e aogā, ma faaleagaga.” Ona ia taʻua lea o ni faamatalaga sa faia e ni tagata o ē ua latou maua se fesoasoani ina ia auauna i le Atua ona o iuga o faaaoaoga lelei a misionare. Ona ia faaiu mai lea: “Tau ina ia outou tausisia pea le talaaga ua maua e tagata o Ieova ma faaauau ona tuʻituʻi atu i na faitotoa i o outou tofiga faamisionare i le saili atu mo ē ua tatau i ai . . . E lē gata i lea, i a outou amio saʻo, ma mamā, ia tetee atu ai i le agaga o lenei lalolagi, ma ia avea outou o ni aafiaga lelei e viia ma faamamaluina ai Ieova.”

I le aotelega o le polokalame, sa faalau mai ai e le taʻitaʻifono faamanuiaga mai vaega eseese o le lalolagi ona tauaaoina atu lea o tusipasi ma faasilasila atu tofiga o misionare. Ina ua maeʻa lena, ona faitau mai ai lea e se tasi o le ʻau faauu se taʻutinoga a le vasega e faaleo mai ai lo latou faafetai mo aʻoaʻoga na saunia. E manino lava, o le polokalame o le faauuga a le vasega lona 102 ua atili ai ona maumaututū i latou sa auai ina ia agaʻi pea i luma i le folafolaina atu o le Afioga a le Atua.

[Ata i le itulau 31]

Vasega Faauu Lona 102 o le Aʻoga Faale-Tusi Paia o le Olomatamata o Kiliata

I le lisi i lalo, o laina e amata mai i luma agaʻi i tua, ma o igoa e lisi mai le itu agavale i le itu taumatau i laina taitasi.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.