Na Latou Faia le Finagalo o Ieova

Ua Papatiso e Filipo se Tagata na Maualuga Lona Tofiga i le Malo o Aitiope

NA FAAAOGAINA ma le atamai e le tagata Aitiope lona taimi, a o tietie i lana kariota. Na ia faitau leotele—o se tulaga e masani ai tagata femalagaai i le uluai senituri. O lenei tamaloa na maualuga lona tofiga i le malo i le avea ma “auauna sili a Kanake le tupu tamaitai o Aitiope.”a O ia sa na “tausi ana oloa uma lava”—o lona uiga sa avea o ia ma minisita o tupe a le atunuu. O lenei tagata maualuga a le malo sa ia faitauina le Afioga a le Atua ina ia maua ai le poto.—Galuega 8:27, 28.

Sa latalata ane i ai le faievagelia o Filipo. Na taitaiina atu o ia e se agelu i lenei nofoaga, ma o lea na faatonuina ai o ia ina ia: “Faalatalata atu ia, ma e faatasi i lena taavale.” (Galuega 8:26, 29) Atonu tatou te tau mānatu i le fesili ifo o Filipo ia te ia lava, ‘O ai lenei tamaloa? O le ā o loo ia faitauina? Aisea ua taitaiina atu ai aʻu ia te ia?’

A o tamoe Filipo i tafatafa o le kariota, na ia faalogoina ai le tagata Aitiope o faitauina upu nei: “Pei o le mamoe ua taʻitaʻiina ia fasia; pei o le tamai mamoe foi i luma o lē sele fulufulu e le tagi, e faapea foi o ia ua le tautala mai. O ona po o lona faamaulaloina na aveesea ai lona faamasinoga; o ai foi se na te talaina lana tupulaga? Auā ua aveesea lona ola i le lalolagi.”—Galuega 8:32, 33.

Na vave lava ona iloa e Filipo le fuaitau lea. Sa maua mai i tusitusiga a Isaia. (Isaia 53:7, 8) Na lē malamalama le tagata Aitiope i mea na ia faitauina. Na amata ai loa e Filipo se talanoaga i lona fesili atu: “Po ua e lagona ea i mea ua e faitauina?” Na tali atu le tagata Aitiope: “Ou te mafaia faapefea, pe a le faasino mai se tasi ia te au?” O lea na talosaga atu ai loa ia Filipo ina ia la ō faatasi i lana kariota.—Galuega 8:30, 31.

‘O le ā ua Taofia Aʻu Mai le Papatisoina?’

Na fai atu le tagata Aitiope ia Filipo e faapea: “Soʻu fesili atu ia te oe, ua fai mai lenei mea e le perofeta ia te ai? Ia te ia ea, po o se tasi tagata?” (Galuega 8:34) Sa lē o se mea e ofo ai i le fenuminumiai o le tagata Aitiope ona o le malamalamaga i le “mamoe,” po o le “auauna,” i le valoaga a Isaia ua leva ona avea ma mealilo. (Isaia 53:11) Maeu le manino o lenei tulaga ina ua faamalamalama atu e Filipo i le tagata Aitiope “le tala lelei ia Iesu”! E lei umi ae fai atu loa le tagata Aitiope e faapea: “Faauta, o le vai; se a ea se mea e vaoia ai aʻu e aua le papatisoina o aʻu?” Na papatisoina ai loa o ia e Filipo iina i le taimi lava lea.—Galuega 8:35-38.

Pe o se gaoioiga vave naʻuā ea lenei? E leai! O le tagata Aitiope o se tagata liulotu Iutaia.b O lea sa avea o ia ma tagata tapuai a Ieova ma sa iai sona poto i le Tusi Paia, e aofia ai valoaga e uiga i le Mesia. Ae peitai, o lona poto sa lei atoatoa. Ona o lea ua ia mauaina nei faamatalaga matuā tāua e uiga i le tulaga o Iesu Keriso, na malamalama ai loa le tagata Aitiope i le mea o loo manaomia e le Atua mai ia te ia ma sa ia sauni e faia ni suiga. Sa talafeagai le papatisoga.—Mataio 28:18-20; 1 Peteru 3:21.

Mulimuli ane, “ona segia lea o Filipo e le agaga o le Atua.” Na alu atu o ia i se isi tofiga. O le tagata Aitiope “ua alu foi ia i lana malaga ma le olioli.”—Galuega 8:39, 40.

O se Lesona mo i Tatou

I le avea ma auauna a Ieova i aso nei, ua ia i tatou le matafaioi e fesoasoani atu ai i tagata loto faamaoni taitoatasi e aʻoaʻoina le upu moni o le Afioga a le Atua. E toatele ua taulau i le avatua o le tala lelei i isi a o faimalaga po o isi tulaga e lē fuafuaina. O le iuga o le galuega talaʻi o le Malo, i tausaga taitasi e faitau selau afe ua faamaonia lo latou tuutoina atu ia Ieova le Atua e ala i le papatisoina.

O le mea moni, e lē tatau i ē fou ona nanati i le papatisoga. E tatau ona latou mauaina muamua le poto ia Ieova le Atua ma lona Alo, o Iesu Keriso. (Ioane 17:3) Ona tatau ai lea ona latou salamō, lafoaia amioga sese ma liliu ese mai ai ina ia ogatusa ma tapulaa a le Atua. (Galuega 3:19) E faaaluina ai se taimi i lenei tulaga, ae maise lava pe afai ua mauaa i le loto mafaufauga ma amioga sese. A o manatunatu loloto ē fou i mea e aofia ai i le avea ma soo Kerisiano, e mafai ona latou faatalitalia faamanuiaga sili e maua mai pe a amataina se faiā tuutoina ma Ieova le Atua. (Faatusatusa i le Luka 9:23; 14:25-33.) O i latou o Molimau a Ieova ua latou taitaiina atu ma le aasa ē fou i le faalapotopotoga o loo faaaogā e le Atua e faataunuu ai lona finagalo. (Mataio 24:45-47) E pei o le tagata Aitiope, o le a olioli i latou nei i le aʻoaʻoina ma amioaʻi i mea e finagalo i ai le Atua mai ia i latou.

[Faaopoopoga i lalo]

[Pusa i le itulau 8]

Aisea ua Taʻua ai o se Eunuka?

I le tala atoa i le Galuega mataupu e 8, ua faasino atu i le tagata Aitiope o se “eunuka.” Ae peitai, talu ai o le Tulafono faa-Mose sa lei faatagaina ai se tane na momomoina ona fuāmanava pe vavaeeseina lona aualuma e galue i le faapotopotoga, e faamaonia ai o lenei tamaloa e lē o se eunuka i le tulaga faaletino. (Teuteronome 23:1) O le upu Eleni mo le “eunuka” e mafai ona faasino atu i se tagata e iai sona tofiga maualuga i se mea. O lea, o le tagata Aitiope o se tagata sa maualuga sona tulaga i le malo o le tupu tamaitai o Aitiope.