Fesoasoani Manaʻomia Ina ia Malamalama ai i le Tusi Paia
O LE Tusi Paia o se tusi e tutasi. O ē na tusia na faapea mai na faagaeeina e le Atua, ma o mea o loo tusia ai, ua aumaia ai le anoanoaʻi o faamaoniga e faapea, e moni na faamatalaga. (2 Timoteo 3:16) O loo aofia ai i le Tusi Paia le mea na tupuga mai ai le tagata, le fuafuaga o le olaga, ma le lumanaʻi o le tagata. O le mea moni la, o le Tusi Paia e tāua ona tatou manatunatu i ai!
Atonu na e taumafai e faitau le Tusi Paia ae ua e iloa e faigatā lava ona malamalama i ai. Pe atonu e te lē o iloa le mea e te saʻili i ai e maua ai tali i au fesili. Afai o le tulaga lena, e lē na o oe o faapena. O loo pei lou tulaga o le tamāloa lea sa soifua i le uluaʻi senituri. Sa malaga atu o ia i se kariota e sau mai i Ierusalema e agaʻi atu i lona atunuu moni, o Aitiope. O lenei tamāloa aloaʻia mai Aitiope, na ia faitauina ma le leotele mai le tusi faavaloaga o le Tusi Paia le tusi o Isaia, lea na tusia i le silia ma le fitu selau tausaga muamua atu.
Na faafuaseʻi lava ona faafeiloaʻia o ia e se tamāloa na tamoʻe ane i tafatafa o le kariota. O lena tamāloa o Filipo, o le soo o Iesu, ma na ia fesili atu i le tagata Aitiope e faapea: “Po ua e lagona ea i mea ua e faitauina?” Na tali atu le tamāloa Aitiope: “Ou te mafaia faapefea, pe a le faasino mai se tasi ia te au?” Ona ia valaaulia lea o Filipo i le kariota. Na faamalamalamaina e Filipo le uiga o le vaega o le Tusi Paia lea na faitauina e le tamāloa ma talaʻi atu i a te ia “le tala lelei ia Iesu.”—Galuega 8:30-35.
E pei lava ona fesoasoani Filipo i lena tagata Aitiope ia malamalama i le Afioga a le Atua i le taimi ua leva ona mavae atu, ua fesoasoani foʻi Molimau a Ieova i tagata ina ia malamalama i le Tusi Paia i aso nei. E latou te fiafia foʻi e fesoasoani i a te oe. O le tulaga masani lava, e sili pe a suʻesuʻeina le Tusi Paia i se tulaga faasolosolo, e amata i aʻoaʻoga faavae faale-Tusi Paia. (Eperu 6:1) A o e agaʻigaʻi i luma, o le a mafai ona e aveina i fale le mea o loo taʻua e le aposetolo o Paulo o “mea aano”—o lona uiga, o upu moni loloto. (Eperu 5:14) E ui o le Tusi Paia lea e te suʻesuʻeina, ae o isi foʻi lomiga—o fesoasoani i le suʻesuʻeina o le Tusi Paia—e mafai ona fesoasoani i a te oe e suʻeina ma malamalama ai i vaega o le Tusi Paia i mataupu eseese.
E masani lava ona faatulaga se suʻesuʻega i le taimi ma le nofoaga e fetaui lelei mo oe. O nisi e faia foʻi suʻesuʻega e ala i le telefoni. O le suʻesuʻega e lē faia e pei o se faatulagaga o se faleaʻoga; ae o se faatulagaga totino e faafetaui i lou tulaga o iai, e aofia ai lou siʻomaga ma lou tulaga tau aʻoaʻoga. E te lē tau totogia lea suʻesuʻega faale-Tusi Paia. (Mataio 10:8) E leai ni suʻega e faia, ma e lē faia i se tulaga e te lagona ai le masiasi. O le a taliina au fesili, ma o le a e aʻoaʻoina le auala e faalatalata atu ai i le Atua. O lea la, aiseā e tatau ai ona e suʻesuʻeina le Tusi Paia? Ia iloiloina nisi o māfuaaga e ao ai ona suʻesuʻeina le Tusi Paia ma faaopoopo atu i le olioli i lou olaga.